Zwililo 3:1-66
-
Yeremia u amba nḓila ine a ḓipfa ngayo na zwe a zwi fhulufhela
א [Aleph]
3 Ndo vhona vhathu vha tshi tambula nga nṱhani ha ṱhamu ya mbiti dzawe.
2 O mpandela a ita uri ndi tshimbile swiswini, hu si tshedzani.+
3 U lwa na nṋe ḓuvha ḽoṱhe.+
ב [Beth]
4 O ita uri muvhili wanga u nete na lukanda lwanga lu ṱahale;O vunḓa marambo anga.
5 O ntanga nga zwi vhavhaho+ na zwi konḓaho.
6 O nkombetshedza uri ndi dzule swiswini u fana na vhathu vho faho kale-kale.
ג [Gimel]
7 O ntanga nga luvhondo uri ndi si kone u shavha;A mmbofha nga ngeḓane khulu dza koporo.+
8 Musi ndi tshi lila ndi tshi ṱoḓa thuso, ha thetshelesi* thabelo yanga.+
9 O vala nḓila dzanga nga matombo o vhaḓwaho;A ita uri nḓila dzanga dzi kombame.+
ד [Daleth]
10 O nndalela sa tshivhingwi, sa ndau yo dzumbamaho.+
11 O mbvisa nḓilani a nṱhukhukanya;A ita uri ndi vhe shubi.+
12 O akha vhura hawe uri a mpfule nga musevhe.
ה [He]
13 O mpfula tswio nga misevhe i re mukhwamani wawe.
14 Ndo no vha wa u seiwa nga vhathu vhoṱhe, ndi luimbo lune vha lu imba ḓuvha ḽoṱhe.
15 O ita uri ndi ḽe zwi vhavhaho na uri ndi nwe zwi kalakataho.*+
ו [Waw]
16 O nkula maṋo nga tombo;U ntsukumedzela miḽorani.+
17 U ita uri ndi si tsha vha na mulalo; ndo no hangwa uri zwavhuḓi ndi zwifhio.
18 Ndi zwine nda ri: “Vhugala hanga ho fhela, na zwe nda zwi lavhelela kha Yehova.”
ז [Zayin]
19 Humbula vhuṱungu hanga na uri a thi na haya,+ u humbule zwi nkalakataho na zwi mmbavhaho.+
20 U ḓo zwi humbula ngangoho wa kwatamela kha nṋe.+
21 Ndo humbula zwenezwi mbiluni yanga; ndi ngazwo ndi tshi ḓo lindela ndi sa fheli mbilu.+
ח [Heth]
22 Zwo itiswa nga lufuno lwa Yehova lu sa shanduki uri ri si fheliswe,+Ngauri khathutshelo yawe a i fheli.+
23 U khathutshela matsheloni maṅwe na maṅwe;+ u fhulufhedzea hau ndi huhulu.+
24 Ndo ri, “Yehova ndi mukovhe wanga,+ ndi ngazwo ndi tshi ḓo mu lindela ndi sa fheli mbilu.”+
ט [Teth]
25 Yehova ndi wavhuḓi kha ane a mu fhulufhela,+ na kha ane a dzula a tshi mu ṱoḓa.+
26 Ndi zwavhuḓi u lindela+ u tshidzwa nga Yehova wo fhumula.*+
27 Ndi zwavhuḓi uri muthu a hwale dzhogo a tshee muswa.+
י [Yod]
28 Kha dzule e eṱhe o fhumula musi A tshi mu hwesa yone.+
29 Kha gwadame a lavhelese fhasi;+ khamusi hu nga vha na fhulufhelo.+
30 Kha ṋekedzele shama ane a khou mu rwa; kha shoniswe zwihulu.
כ [Kaph]
31 Ngauri Yehova a nga si ri laṱe lwa tshoṱhe.+
32 Naho o ri pfisa vhuṱungu, u ḓo dovha a ri khathutshela u ya nga lufuno lwawe luhulu lu sa shanduki.+
33 Ngauri a zwiho mbiluni yawe u vhaisa kana u pfisa vhuṱungu vhana vha vhathu.+
ל [Lamed]
34 Muthu a tshi kandekanya vhafariwa vhoṱhe vha ḽifhasi,+
35 A sa sumbedzi khaṱhulo yo teaho phanḓa ha Wa-Ṱaḓulu-ṱaḓulu,+
36 A tshi fhura muthu tsengoni yawe,Yehova ha tendeli zwithu zwo raloho.
מ [Mem]
37 Ndi nnyi ane a nga amba zwa itea arali Yehova a songo amba uri zwi itee?
38 Mulomoni wa Wa-Ṱaḓulu-ṱaḓulu,Hu bva zwavhuḓi fhedzi, hu si zwivhi.
39 Ndi ngani muthu a tshi fanela u gungulela masiandoitwa a zwivhi zwawe?+
נ [Nun]
40 Kha ri ṱolisise na u sedzulusa nḓila dzashu,+ ri humele kha Yehova.+
41 Ri imisele mbilu dzashu khathihi na zwanḓa zwashu kha Mudzimu a re ṱaḓulu, ri ri:+
42 “Ro u khakhela na u u shandukela,+ fhedzi a u athu u ri hangwela.+
ס [Samekh]
43 Wo ri thivhela wo sinyuwa uri ri si ambe na iwe;+Wo ri pandamedza wa ri vhulaya u sa ri pfeli vhuṱungu.+
44 Wo ri thivhela nga gole uri ri si ambe na iwe, uri thabelo dzashu dzi si fhire.+
45 Wo ri ita mathukhwi na tshika vhukati ha dzitshaka.”
פ [Pe]
46 Maswina ashu oṱhe a a ri goḓa.+
47 Nyofho na dindi zwo no vha zwashu+ na u fheliswa na u tshinyadzwa.+
48 Maṱoni anga hu elela milambwana nga nṱhani ha u tshinyadzwa ha ṅwananyana wa vhathu vhanga.+
ע [Ayin]
49 Maṱo anga a lila a sa imi, a sa aweli,+
50 U swikela Yehova a tshi lavhelesa fhasi a vhona e ṱaḓulu.+
51 Maṱo anga o ita uri ndi ṱungufhale nga nṱhani ha vhananyana vhoṱhe vha muḓi wanga.+
צ [Tsade]
52 Maswina anga o nzwima hu si na tshiitisi vhunga a tshi zwima tshiṋoni.
53 Vho lingedza u mmbulaya; vho vha vha tshi dzulela u mposa nga matombo.
54 Maḓi o elela nṱha ha ṱhoho yanga, nda ri: “Ndi hone ndo fa!”
ק [Qoph]
55 Iwe Yehova, ndo vhidzelela dzina ḽau, ndi fhasi-fhasi mulindini.+
56 Ipfa ipfi ḽanga; u songo thivha nḓevhe dzau musi ndi tshi lilela thuso.
57 Wo sendela tsini na nṋe nga ḓuvha ḽe nda u vhidzelela. Wa ri: “U songo ofha.”
ר [Resh]
58 Iwe Yehova, wo nnyimelela, wa rengulula vhutshilo hanga.+
59 Iwe Yehova, wo vhona nḓila ye nda khakhelwa ngayo; ndi humbela uri u nkhaṱhulele nga nḓila yo teaho.+
60 Wo vhona vha tshi nndifhedza, vha tshi nnyitela vhukwila hoṱhe.
ש [Sin] kana [Shin]
61 Iwe Yehova, wo pfa vha tshi ngoḓa, vha tshi nnyitela vhukwila hoṱhe,+
62 Vhane vha lwa na nṋe vha a mpikisa na u ntsola ḓuvha ḽoṱhe.
63 Naho vha tshi dzula kana vha tshi ima, u vha lavhelese; vha a ngoḓa nga nyimbo dzavho!
ת [Taw]
64 U ḓo vha lifhedza Iwe Yehova, u ya nga mishumo yavho.
65 U ḓo ita uri mbilu dzavho dzi rindile, musi u tshi ita uri vha vhe na samba.
66 U ḓo vha pandamedza wo sinyuwa Iwe Yehova, wa vha fhelisa fhasi ha ḽiṱaḓulu ḽau.
