1. Momo lie tu sukilila oku amamako oku pamisa ukamba wetu la Yehova?

NDA Umbangi ya Yehova, o kuete ocina cimue ci kuete esilivilo lia velapo. Momo, o kuete ukamba wocili la Yehova. Pole, citava okuti ukamba waco u nyõliwa loluali lulo lua Satana, kuenda pamue u hongua omo liekambo lietu lioku lipua. Eli olio esunga lieci tu sukilila oku amamako loku pamisa ukamba wetu la Yehova.

2. (a) Ukamba u lomboloka nye? (Tala etosi pombuelo yemẽla.) (b) Tu pondola oku pamisa ndati ukamba wetu la Yehova?

² O tava hẽ okuti Yehova omunu muẽle? O tava okuti Ekamba liove? O yongola hẽ oku kuata ukamba wa pama laye? Ukanda wa Tiago 4:8 u tu sapuila ovina o sukila oku linga poku popia ndoco: “Amẽli ku Suku kuenje eye amẽla kokuene.” Vukamba wove la Yehova mua kongela ove kumue laye. * (Tala etosi pombuelo yemẽla.) Nda wa sanda onjila yoku amẽla ku Yehova, eye amẽlavo kokuove. Nda wa  likolisilako oku ci linga, o kũlĩha ciwa Yehova, ukamba wove laye u pamisiwa, kuenda o kuata ovisimĩlo ndevi via Yesu wa popia hati: “U wa numa eye wocili,” kuenda “ame ndo kũlĩha.” (Yoano 7:28, 29) Pole, ovina vipi o sukila oku linga oco o kuate ukamba la Yehova?

3. Tu pondola oku sapela ndati la Yehova?

³ Nda o yongola oku kuata ukamba la Yehova, o sukila oku sapela laye olonjanja viosi. Pole, o ci linga ndati? Sokolola ndomo ove kumue lekamba liove li kasi ocipãla u pondola oku sapela. Citava okuti u li sonehela ovikanda, kuenda u sapela votelefone. O pondolavo oku sapela la Yehova olonjanja viosi poku likutilila kokuaye. (Tanga Osamo 142:2.) Pole, o pondola oku ecelela ndati okuti Yehova o sapela love? O ci linga poku tanga olonjanja viosi ondaka yaye yi sangiwa Vembimbiliya, kuenda poku sokolola ovina wa tanga. (Tanga Isaya 30:20, 21.) Omo liaco, tu konomuisi ndomo oku sapela la Yehova ku pamisa ukamba wove laye oco a linge Ekamba liove.

4, 5. Yehova o pondola oku sapela ndati love poku lilongisa Embimbiliya? Tukula ulandu umue.

⁴ Tua kũlĩha okuti Embimbiliya esapulo lia Suku lia eciwa komanu vosi. Pole, Embimbiliya li pondola hẽ oku ku kuatisa oku kuata ukamba la Yehova? Li pondola! Osimbu o lilongisa ovina wa tanga Vembimbiliya, kũlĩhĩsa lutate ovisimĩlo viove viatiamẽla kovina o kasi oku tanga. Sokololavo ndomo o pondola oku kapako ovina o kasi oku lilongisa. Nda wa ci linga, ci pondola oku ku kuatisa okuti Yehova o sapela love. Eye o linga ekamba liove li ku kuatisa, kuenje ove amẽla kokuaye.—Va Heveru 4:12; Tiago 1:23-25.

⁵ Nye o yeva vutima eci o tanga olondaka via Yesu wa popia hati: “Ko ka lisiliyili ukuasi kilu lieve.” Nda o kasi oku likolisilako loku velisapo upange wa Yehova komuenyo wove, o ka limbuka okuti eye wa ku sanjukila. Pole, pamue o tanga olondaka via Yesu, kuenje o limbuka okuti o sukila oku leluisa omuenyo wove, kuenda oku tiamisila utima wove kupange wa Suku. Nda wa ci linga, Yehova oku kuatisa oku kuata elomboloko lieci o pondola oku linga  oco o kuate ukamba laye.—Mateo 6:19, 20.

6, 7. (a) Eci tu lilongisa Embimbiliya nye ci pita locisola tu kuetele Yehova kuenda ocisola a tu kuetele? (b) Ocimãho cipi tu sukila oku kuata eci tu lilongisa Embimbiliya?

⁶ Eci tu lilongisa Embimbiliya, tu limbuka apongoloko tu sukila oku linga oco tu vumbe ciwa Yehova. Tu pondolavo oku lilongisa catiamẽla kovina viocisola Yehova a siata oku linga, kuenda ekalo liaye liwa okuti li tu vetiya oku vokiya ocisola cetu kokuaye. Osimbu ocisola tu kuetele Yehova ci livokiya, ocisola caye kokuetu ci livokiyavo, kuenje ukamba wetu laye u pamisiwa.—Tanga 1 Va Korindo 8:3.

⁷ Nda tu yongola oku kuata ukamba la Yehova, tu sukila oku lilongisa Embimbiliya lonjila yimue ya sunguluka. Yesu wa popia hati: “Omuenyo ko pui wowu, oku ku kũlĩha ove lika vu Suku yocili, loku kũlĩhavo Yesu Kristu, u wa tuma.” (Yoano 17:3) Tu pondola oku lilongisa ovina vialua viokaliye eci tu tanga Embimbiliya, pole, ocimãho cetu ca velapo, oku kũlĩha ciwa Yehova okuti Omunu wocili.—Tanga Etundilo 33:13; Osamo 25:4.

8. (a) Nye omanu vamue va sima catiamẽla konjila Yehova a kuama eci a yambula soma Asariya? (b) Nda wa kũlĩha Yehova, ovisimĩlo vipi o kuata viatiamẽla kueci a linga?

⁸ Nda tua kũlĩha Yehova Ndekamba lietu liocili, ka tu sakalala nda Embimbiliya pamue ka li lombolola esunga lieci a tetuluila ovina lonjila yimue a yongola. Eci Asariya a kala osoma yo ko Yuda, omanu va enda oku fendela olosuku viesanda. Pole, Asariya ka likongelele kokuavo, momo “wa lingainga eci ca sunguluka kovaso a Yehova.” (2 Olosoma 15:1-5) Pole, Yehova wa yambula Asariya lovilundu. Momo lie? Embimbiliya ka li tu lomboluila ulandu waco. Pole, nye o sima catiamẽla kueci Yehova a linga? Anga hẽ o sakalala loku sima okuti Yehova ka lingile ovina via sunguluka omo lioku yambula Asariya okuti ka kuatele esunga lioku ci linga? Sio, ku ci lingi. Nda wa kũlĩha ciwa Yehova, o pondola oku limbuka okuti, olonjanja viosi eyambulo liaye liesunga. Eye o yambula ‘ndeci omunu a sesamẽla.’ (Yeremiya 30:11) Omo liaco, ndaño okuti pamue kua kũlĩhĩle esunga lieci Yehova a yambuila Asariya, pole o pondola oku limbuka okuti, Yehova wa linga eci ca sunguluka.

9. Ovina vipi vi tu kuatisa oku kuata elomboloko lieci Yehova a yambuila Asariya lovilundu?

⁹ Embimbiliya li tu sapuila ovina vikuavo viatiamẽla komuenyo wa Soma Asariya una wa enda oku tukuiwavo okuti Soma Usiya. (2 Olosoma 15:7, 32) Ulandu u sangiwa kelivulu lia 2 Asapulo 26:3-5, 16-21 u lombolola okuti, Asariya “wa lingainga eci ca sunguluka kovaso a Yehova.” Pole, ulandu waco u lekisavo okuti, noke “utima waye wa lenda wo nyõla.” Soma wa seteka oku linga ocina cimue okuti ovitunda ovio lika via kuatele omoko yoku ci linga. Ci soka akũi ecelãla kovitunda la cimosi vo sapuila vati ovina a kala oku linga ka via sungulukile, kuenje via seteka oku u tutuiya. Nye a linga? Wa lekisa epela, kuenje wa va kuatela onyeño! Ulandu owu u tu kuatisa oku limbuka esunga lieci Yehova a yambuila soma lovilundu.

10. Momo lie ka tu sukilila oku kũlĩha esunga lieci Yehova a siatela oku linga ovina vimue? Tu pondola oku kolela ndati okuti Yehova wa siata oku linga ovina via sunguluka?

 ¹⁰ Ulandu wa tukuiwa ndeti u tu longisa nye? Vulandu wa Soma Asariya tu sangamo ovina vi tu kuatisa oku kuata elomboloko liesunga lieci Yehova o yambuila. Pole, nda Embimbiliya ka li lombolola ovina viosi nye o sukila oku linga? O kuata hẽ atatahãi nda Yehova wa linga ocina cimue ca sunguluka? Ale o sima okuti Vembimbiliya mu sangiwa olonumbi vi ku kuatisa oku kolela okuti Suku olonjanja viosi wa siata oku linga ovina via sunguluka? (Esinumuĩlo 32:4) Eci o kũlĩha ciwa okuti Yehova Omunu wocili, ocisola u kuetele ci livokiya, kuenje o kolela kokuaye. Nda wa ci linga, ku sukila oku konomuisa esunga lieci a siatela oku linga ovina vimue. Osimbu amamako oku lilongisa Embimbiliya o kũlĩha ciwa Yehova, kuenda amẽla kokuaye.—Osamo 77:12, 13.

11-13. Wa kũlĩha ndati okuti Yehova o yevelela olohutililo? (Tala ociluvialuvia kefetikilo liocipama cilo.)

¹¹ Eci tu likutilila tu kuata ukamba la Yehova. Tu eca esivayo kokuaye, loku eca olopandu, kuenda oku pinga ekuatiso kokuaye. (Osamo 32:8) Pole, nda o yongola oku kuata ukamba la Yehova, o sukila oku tava okuti, eye wa siata oku yeva olohutililo.

¹² Omanu vamue va siata oku popia vati, Suku ka yevi olohutililo, kuenda ohutililo ocina cimue ci kuatisa lika omunu oku kala ciwa. Ovo va tavavo okuti, ohutililo yi ku kuatisa oku  sokolola lutate ovina viatiamẽla kovitangi viove, kuenda oku sanga atambululo ove. Ocili okuti ohutililo yi pondola oku ku kuatisa. Pole, eci o sapela la Yehova vohutililo, eye oku yevelela. O pondola oku ci limbuka ndati?

¹³ Sokolola ulandu owu: Eci Yesu keyile handi palo posi, wa limbukile okuti Yehova wa tambulula olohutililo viafendeli Vaye. Eci Yesu a kala palo posi wa likutilila ku Isiaye wo kilu, catiamẽla kovisimĩlo viaye. Onjanja yimue wa likutilila vokuenda kuteke wosi. (Luka 6:12; 22:40-46) Anga hẽ Yesu nda wa ci linga, nda wa simĩle okuti Yehova ko yevelela? Yesu wa longisavo kolondonge viaye ndomo via sukilile oku likutilila ku Yehova. Anga hẽ Yesu nda wa likutilila nda wa simĩle okuti Yehova ka yevelela olohutililo? Yesu wa kũlĩhĩle okuti Yehova o yeva olohutililo. Eye wa popia hati: “A Tate, hu pandula omo wa njeva. Nda kũlĩha okuti olonjanja viosi o njeva njeva.” Tu pondolavo oku kolela okuti, Yehova o yevelela olohutililo vietu.—Yoano 11:41, 42; Osamo 65:2.

14, 15. (a) Tu kuatisiwa ndati nda poku likutilila tu tukula ovina tu pinga? (b) Olohutililo manji Kathy a linga vio kuatisa ndati oku pamisa ukamba waye la Yehova?

¹⁴ Pamue ku pondola oku limbuka atambululo olohutililo viove. Pole, eci o tukula ovina o pinga volohutililo, o limbuka okuti atambululo aco a tunda ku Yehova, kuenje o pondola oku u kũlĩha ciwa. Nda wa ecelela oku sapuila ku Yehova ovina viosi vi ku sakalaisa, eye amẽla kokuove.

¹⁵ Manji umue o tukuiwa hati Kathy olonjanja vimue eci a enda kupange woku kunda ka kuatele esanju lioku ci linga. * (Tala etosi pombuelo yemẽla.)  Eye wa popia hati: “Sia solele upange woku kunda. Ci lomboloka okuti sia sanjukilile oku linga upange waco.” Eci a siapo upange waye woku sanda eteku, ukulu umue wekongelo wo vetiya oco a linge ukundi wotembo yosi. Manji Kathy wa popia hati: “Ukulu wekongelo wa eca kokuange o formulariu yaco. Ndaño nda nõlapo oku kala ukundi wotembo yosi, pole nda fetikavo oku likutilila oloneke viosi oco Yehova a ndi kuatise oku sola upange woku kunda.” Yehova wa tambulula hẽ olohutililo viaye? Noke yoku kala ukundi wotembo yosi vokuenda kuanyamo atatu, wa popia hati: “Omo lioku pesila otembo yalua kupange woku kunda loku kuama ongangu ya vamanji vakuavo, ca ndi kuatisa oku mioñolola uloño wange woku kundila omanu. Koloneke vilo, si kuete lika—ombili kupange woku kunda, pole ndu u kuetelevo ocisola. Cilo, ukamba wange la Yehova wa livokiya calua okuti kosimbu ci sule.” Olohutililo manji Kathy a linga, vio vetiya oku kuata ukamba la Yehova.

16, 17. (a) Nye tu sukila oku linga oco tu amameko oku pamisa ukamba wetu la Yehova? (b) Nye tu ka konomuisa vocipama ci kuãimo?

¹⁶ Tu pondola oku kuata ukamba la Yehova otembo ka yi pui. Omo liaco, tu sukila oku u yevelela olonjanja viosi poku lilongisa Embimbiliya, kuenda oku sapela laye poku likutilila. Nda tua ci linga, ukamba wetu la Yehova u pamisiwa, kuenje lekuatiso liaye, tu pondola oku pandikisa kovitangi.

¹⁷ Olonjanja vimue tua siata oku liyaka lovitangi vietu muẽle ndaño okuti tu kasi oku amamako oku likutilila ku Yehova. Nda tua pita locitangi caco, tu fetika oku tepulula ekolelo lietu ku Yehova. Kuenje tu sima okuti, Yehova ka kasi oku yevelela olohutililo vietu, kuenda tu kuata atatahãi nda tuakamba vaye vocili ale sio. Nda wa fetika oku kuata ovisimĩlo viaco, nye o sukila oku linga? Ocipama ci kuãimo ci ka ku kuatisa.