1. Epulilo lipi vamanji vamue vakuekolelo va siata oku linga?

 MANJI umue ukãi okuti wa liyaka lovitangi vokuenda kuanyamo alua, wa pula lumbombe hati: “Ndi ka mola hẽ esulilo lioluali lulo osimbu sia file handi?” Vamanji vana va kasi oku vumba Yehova vokuenda kuanyamo alua, va siatavo oku linga epulilo eli. Vosi yetu tu yongola oku mola eci Suku a ka malako ovintangi viosi tua siata oku liyaka lavio koloneke vilo. Eye, o ka pongolola ovina viosi okuti, vi linga viokaliye. (Esit. 21:⁠5) Ndaño tu tava okuti esulilo lioluali lulo lua Satana li kasi ocipepi, pole, ka ca lelukile oku kevelela lepandi koloneke vilo.

2. Apulilo api atiamẽla kepandi lia Suku tu konomuisa?

² Embimbiliya li lekisa okuti, tu sukila oku kuata epandi. Oco tu tambule ovina Suku a tu likuminya, tu sukila oku pamisa ekolelo lietu osimbu tu kevelela lepandi otembo a ka tẽlisa olohuminyo viaye, ndeci afendeli vaye va linga kosimbu. (Tanga Va Heveru 6:​11, 12.) Yehova o kuete epandi. Eye nda wa malako ale evĩho liosi kilu lieve, pole, o kasi oku kevelela otembo a sokiya oku ci linga. (Va Rom. 9:​20-​24) Momo lie a siatela oku lekisa epandi? Yesu wa lekisa ndati ongangu yepandi ndeli lia Suku? Asumũlũho api tu ka tambula nda tua lekisa epandi ndeli lia Suku? Atambululo kapulilo a lingiwa ndeti, a tu kuatisa oku amamako lepandi loku pamisa ekolelo, ndaño pamue tua siata oku sima okuti, Yehova ka kasi oku tẽlisa lonjanga olohuminyo viaye.

3, 4. (a) Momo lie Yehova a kasilili oku lekisa epandi oco a tẽlise ocipango caye palo posi? (b) Yehova wa tambulula ndati usuanji wa lingiwa vocumbo Cedene?

³ Yehova o kuete esunga lieci a siatela oku lekisa epandi. Ndaño o kuete unene wa velapo kilu kuenda palo posi, pole, o kasi oku talamẽla toke cilo, oco a tambulule apulilo a votuiwa la Satana vocumbo Cedene. Yehova o kasi oku lekisa epandi momo wa kũlĩha okuti, oco a tambulule apulilo osi a votuiwa, ci sukila otembo yalua. Omo okuti Yehova wa kũlĩha ovilinga lovituwa vioviluvo viaye viokilu levi via palo posi, o kasi oku tu lingila ovina vi tu kuatisa.​—⁠Va Hev. 4:⁠13.

 ⁴ Yehova wa yonguile okuti, Adama la Heva va yukisa ilu lieve locitumbulukila cavo. Eci Satana a yonja Heva la Adama oco va lekise esino, Yehova Suku ka liwekelepo oku linga upange oco ocipango caye ci tẽlisiwe. Eye ka yokokele loku nõla lonjanga onjila ka ya sungulukile, kuenda ka yandulukile epata liomanu. Pole, wa linga eliangiliyo lioku tẽlisa ocipango caye coku yukisa Oluali luosi lomanu. (Isa. 55:​11) Yehova o kasi oku kevelela lepandi vokuenda kuanyamo alua, oco a tẽlise ocipango caye loku teyuila uviali waye okuti, o linga ciwa ovina viosi viatiamẽla kupange waye.

5. Epandi lia Yehova liecelela oku kuata asumũlũho api?

⁵ Esunga likuavo lieci Yehova a kasilili oku kevelela lepandi, momo o yongola okuti, omanu vosi va kuata omuenyo ko pui. Toke cilo, Yehova o kasi oku linga eliangiliyo lioku popela “owiñi wakahandangala.” (Esit. 7:​9, 14; 14:⁠6) Yehova o kasi oku kongela omanu lekuatiso liupange wetu woku kunda, poku va laleka oku lilongisa ovina viatiamẽla Kusoma waye kuenda kolonumbi viaye viesunga. Omo okuti esapulo Liusoma li kuete esilivilo lia velapo komanu, li tukuiwa hati, ‘olondaka viwa.’ (Mat. 24:​14) Eci omunu a kokiwa la Yehova, otiamẽla kekongelo liaye voluali luosi, kuenje, o linga ekamba lia vana va sole esunga. (Yoa. 6:​44-​47) Suku yetu ukuacisola wa siata oku kuatisa omanu vaco oco va taviwe laye. Pokati komanu vaco, wa nõlapo vana va ka kala vuviali waye kilu. Noke yoku enda kilu, va ka kuatisa ambombe oku li pua oco va kuate omuenyo ko pui. Osimbu Yehova a kasi oku kevelela lepandi, o tẽlisa olohuminyo viaye vioku tu lingila ovina vi tu kuatisa.

6. (a) Yehova wa lekisa ndati epandi koloneke via Noha? (b) Yehova o kasi oku lekisa ndati epandi koloneke vilo?

⁶ Yehova o kuete epandi, ndaño lovina vialua vĩvi omanu va linga kosimbu okuti, vio sumuisa. Tu limbuka uvangi waco, ndomo a pandikisa levĩho lia kala voluali osimbu handi Etande ka lieyile. Kotembo yaco, voluali mua kala ovituwa vĩvi, kuenda ungangala, omo liesino liomanu, kuenje, Yehova “co vala vutima.” (Efet. 6:​2-8) Eye ka ecelele okuti, evĩho liaco li amamako, kuenje, wa nena etande lia nyõla olondingaĩvi viosi. Osimbu Yehova Suku a kala oku ‘talamẽla lepandi koloneke via Noha,’ wa linga esokiyo lioku u popela kumue lepata liaye. (1 Pet. 3:​20) Eci otembo Yehova a sokiyile ya pitĩla, wa sapuila Noha ocisimĩlo caye coku nyõla olondingaĩvi viosi, kuenje wo tuma oku tunga ocimbaluku. (Efet. 6:​14-​22) Omo liaco, Noha ‘wa kunda esunga’ poku sapuila omanu enyõleho lia laikele oku iya. (2 Pet. 2:⁠5) Yesu wa popia hati, ovituwa viomanu vo koloneke vilo, vi sokisiwa levi viomanu va kala koloneke via Noha. Yehova wa sokiya ale eteke a ka nyõla oluali lulo lua vĩha. Lomue wa kũlĩha ‘eteke lowola’ esulilo liya. (Mat. 24:​36) Pole, osimbu eteke liaco ka lieyile, tu sukila oku tẽlisa ocikundi tua tambula ku Suku coku lungula omanu oco va kũlĩhe ndomo va pondola oku popeliwa.

7. Anga hẽ Yehova ka kasi oku tẽlisa lonjanga olohuminyo viaye? Ci lombolola.

⁷ Epandi lia Yehova ka li lomboloka okuti, o kasi lika oku talamẽla oco otembo yi pite. Ka tu ka simi okuti, Yehova wa siata oku lekisa epandi omo liowesi woku tẽlisa ocipango caye! Pole, ka ca ­lelukile oku kuata elomboloko liaco, momo tua siata oku liyaka loku kuka, kuenda oku tala ohali omo liovitangi vikuavo vi kasi voluali lulo lua vĩha. Oku kuata ovisimĩlo viaco ci tepulula ekolelo lietu, ale ci tu vetiya oku sima okuti, Suku ka kasi oku tẽlisa lonjanga olohuminyo viaye. (Va Hev. 10:​36) Omo liaco, tu sukila oku ivaluka okuti, Yehova o kuete esunga lieci a siatela oku lekisa epandi, momo wa sokiya ale otembo a ka teyuila afendeli vaye vo kolela. (2 Pet. 2:3; 3:⁠9) Tu konomuisivo ndomo Yesu a lekisa epandi ndeli lia Suku.

8. Yesu wa lekisa ndati epandi?

⁸ Yesu o kasi oku linga ocipango ca Suku kuenda o yongola oku ci tẽlisa toke kesulilo liohulukãi yanyamo. Eci Satana a linga usuanji, Yehova wa linga esokiyo liokuti, Omõlaye wongunga iya palo posi, oco a linge Mesiya. Sokolola ndomo Yesu a kevelela lepandi vokuenda kuanyamo alua toke eci otembo ya pitĩla. (Tanga Va Galatia 4:⁠4.) Eye ka kevelile lika okuti ka lingi cimue. Pole, wa linga upange Isiaye o tuma. Eci Yesu eya palo posi, wa kũlĩhĩle okuti, wa laikele oku pondiwa la Satana ndomo ca tukuiwile vocitumasuku. (Efet. 3:15; Mat. 16:​21) Eye, wa lekisa epandi poku linga ocipango ca Suku, ndaño wa talisiwa ohali yalua. Yesu wa lekisa epandi lia velapo. Omo okuti ka velisilepo olonjongole viaye, lekalo liaye, tu pondola oku kuatisiwa longangu yaye yiwa.​—⁠Va Hev. 5:​8, 9.

9, 10. (a) Yesu wa lekisa ndati epandi osimbu a kala oku talamẽla ovina Yehova a laikele oku linga? (b) Tu lekisa ndati epandi poku talamẽla otembo Yehova a sokiya?

⁹ Yesu noke yepinduko liaye, wa tambula unene woku viala kilu kuenda palo posi. (Mat. 28:​18) Unene waco, u kasi oku u kuatisa oku tẽlisa ocipango ca Yehova Suku, toke kotembo ya sokiyiwa. Yesu wa kevelela lepandi kondio ya Suku toke kunyamo wo 1914, eci a tundisa kilu ovanyãli vaye oco va linge ociliatelo colomãhi viaye. (Osa. 110:​1, 2; Va Hev. 10:​12, 13) Ndopo o ka nyõla oluali lulo lua vialiwa la Satana. Omo liaco, Yesu o kasi oku kuatisa omanu oco a va songuile ‘kovava omuenyo.’​—⁠Esit. 7:⁠17.

¹⁰ O pondola hẽ oku setukula ongangu ya Yesu yoku talamẽla otembo Yehova a sokiya? Yesu wa linga ovina viosi Isiaye o tumĩle, kuenda wa talamẽla otembo Yehova a sokiya yoku tẽlisa ocipango caye. Osimbu tu lavoka enyõleho lioluali lulo lua vialiwa la Satana, tu sukila oku kuata epandi ndeli lia Suku, kuenda tu yuvuli oku tomba Suku oco ekolelo lietu ka li ka tepuluke. Nye tu sukila oku linga oco tu kuate epandi ndeli lia Suku?

11. (a) Elitokeko lipi li kasi pokati kekolelo lepandi? (b) Momo lie tu kuetele esunga lioku lekisa ekolelo lia pama?

¹¹ Osimbu Yesu keyile palo posi, ovaprofeto kumue lafendeli vakuavo vakuekolelo va lekisa ongangu yiwa yeca uvangi wokuti, omanu ka va lipuile, va pondola oku kuata epandi. Ekolelo liavo li kuete elitokeko lepandi. (Tanga Tiago 5:​10, 11.) Nda ka va tavele kovina Yehova a va sapuila, nda va kevelela hẽ lepandi oku tẽlisiwa kuolohuminyo viaye? Ndaño va liyaka lovitangi vialua vina via seteka ekolelo liavo, pole, va kolelele okuti, Suku o tẽlisa olohuminyo viaye. (Va Hev. 11:​13, 35-​40) Tu kuete esunga lioku kuata ekolelo lia pama, momo cilo Yesu o pondola oku ‘Kangula ekolelo lietu.’ (Va Hev. 12:⁠2) Eye wa tẽlisa ovitumasuku, kuenda wa situlula ocipango ca Suku lonjila yimue yi tu kuatisa oku kuata ekolelo lia pama.

12. Nye tu sukila oku linga oco tu pamise ekolelo lietu?

 ¹² Ovina vipi tu sukila oku linga vi ­pamisa ekolelo lietu kuenda epandi? Tu ci linga poku pokola kalungulo a Suku. Sokolola esunga lieci wa pitisila kovaso Usoma wa Suku. O pondola hẽ oku vokiya alikolisilo ove oku kapako elungulo li sangiwa kelivulu lia Mateo 6:33? O ci linga lika poku pesila otembo yalua kupange woku kunda, ale oku linga apongoloko komuenyo wove. Omo liaco, ku ka tombe asumũlũho Yehova a siata oku eca kokuove toke cilo. Eye o pondola oku ku kuatisa oco o fetike oku longisa omunu umue Embimbiliya, kuenda o ku ĩha ‘ombembua yina ya velapo olondunge viosi.’ (Tanga Va Filipoi 4:⁠7.) Osimbu o tiamisila utima wove kasumũlũho wa siata oku tambula omo lioku pokola kolonumbi via Yehova, o vokiya onjongole yove yoku kuata epandi.​—⁠Osa. 34:⁠8.

13. Oku pamisa ekolelo lepandi ku sokisiwa lupange upi?

¹³ Oku pamisa ekolelo lepandi ku sokisiwa lupange woku imba ombuto, oku tata ovikũla, kuenda oku ungula. Eci ongunja yungula okulia kualua, yi kolela kombuto a ka lima kotembo yikuavo. Oyo yi talamẽla lepandi toke kotembo yoku ungula. Pole, onjanja yikuavo, yi kũla ombuto vovapia alua okuti yina a kũlile kotembo ya pita yi sule. Ongunja yaco ya kolela okuti yi kongula okulia kualua. Cimuamue haico ci pita letu okuti, tu sukila oku amamako oku lilongisa alungulo a Yehova, kuenda oku a kapako. Nda tua ci linga, tu kuata asumũlũho alua kuenda ekolelo lietu ku Yehova li pamisiwa. Osimbu ekolelo lietu li li vokiya, ci leluka vali oku talamẽla asumũlũho tu ka tambula kovaso yoloneke.​—⁠Tanga Tiago 5:​7, 8.

14, 15. Tu tenda ndati ohali tua siata oku liyaka layo?

¹⁴ Ocina cikuavo ci tu kuatisa oku kuata epandi, oku limbuka ndomo tu tenda ovina vi kasi voluali lulo kuenda ekalo lietu. Tenda ovina viaco ndomo Yehova a vi tenda. Sokolola ndomo eye a tenda ohali omanu va siata oku pita layo. Nda omanu va talisiwa ohali, eye o yeva evalo vutima. Pole, ka ecelela okuti, esumuo liaco liu tateka oku va lingila ovina viwa. Yehova wa tuma Omõlaye wongunga oco a ‘nyõle ovilinga Vieliapu’ kuenje, o ka malako ovina viosi vĩvi Satana a siata oku kokela omanu. (1 Yoa. 3:⁠8)  Ohali tua siata oku liyaka layo ka yi ka amamako, momo Suku wa sokiya otembo yoku yi malako. Omo liaco, tu yuvuli oku yuliwa lovitangi violuali lulo lua vĩha lua vialiwa la Satana, kuenda oku konyõha omo lioku sima okuti esulilo ka liya lonjanga. Pole, tu koleli kovina ka vi letiwe lovaso etu, okuti vi ka kala otembo ka yi pui. Yehova o kamalako evĩho liosi, kuenda o ka ci linga votembo a sokiya.​—⁠Isa. 46:13; Nah. 1:⁠9.

¹⁵ Koloneke vilo via sulako violuali lulo lua vĩha, pamue tu liyaka lovitangi vialua vi seteka ekolelo lietu. Nda tu lambalaliwa, ale vangandietu va talisiwa ohali, tu yuvuli oku fetuluinya, kuenda tu koleli Yehova lutima wosi. Omo okuti ka tua lipuile, ka ca lelukile oku liyaka lovitangi viaco. Pole, tu sukila oku ivaluka ovina Yesu a linga vi sangiwa kelivulu lia Mateo 26:39.​—⁠Tanga.

16. Ovina vipi tu sukila oku yuvula koloneke vilo via sulako?

¹⁶ Onjongole yoku mola lonjanga oku tẽlisiwa kuovina omunu a lavoka, yi pondola oku u vetiya oku pua ekolelo lepandi. Omunu o pua ndati ekolelo lepandi? Omunu una wa pua ekolelo omo lioku sima okuti esulilo ka liya lonjanga, o fetika oku linga upange waye muẽle kuenje, ka tava okuti, Yehova o ka tẽlisa olohuminyo viaye. Omunu waco o sima ndoco: ‘Ndi tala handi nda Yehova o tẽlisa muẽle ondaka yaye.’ Citava okuti eye o sandiliya oku kuata ekemãlo voluali lulo, kuenda o kolela kolombongo ale kelilongiso lia velapo, kuenje, ka pitisa vali kovaso Usoma wa Suku, omo liomuenyo uwa a kuete. Oku linga ovina viaco, ka ci lekisa hẽ ekambo liekolelo? Omo liaco, Paulu o tu vetiya oku setukula afendeli vo kosimbu okuti, va tambula olohuminyo via Yehova kuenje, ‘va lekisa ekolelo lepandi.’ (Va Hev. 6:​12) Yehova ka ka ecelela okuti oluali lulo lua vĩha lu kala otembo ka yi pui, momo o yongola oku tẽlisa ocipango caye. (Hav. 2:⁠3) Tu yuvuli ocituwa coku vumba Yehova locikukũi. Omo liaco, tu amamiko oku lavulula kuenda tu lekisi ombili kupange woku kunda olondaka viwa, vina vi nenela omanu esanju lia piãla.​—⁠Luka 21:⁠36.

17, 18. (a) Epuluvi lipi tu kuete koloneke vilo, li tu kuatisa oku lekisa epandi? (b) Asumũlũho api tu ka tambula omo lioku lekisa epandi?

¹⁷ Ci kale okuti ndopo tua fetika oku vumba Suku, ale tu kasi oku u vumba anyamo alua, tu yongola oku ci linga otembo ka yi pui. Ci kale okuti, kua kamba otembo yalua oco oluali lulo lu nyõliwe ale sio, epandi li tu kuatisa oku amamako lekolelo toke eci tu popeliwa. Yehova wa tu ĩha epuluvi lioku lekisa okuti, tua kolela kolonumbi viaye, kuenda tu yongola oku pandikisa kovitangi omo lionduko yaye. (1 Pet. 4:​13, 14) Yehova wa siata oku tu ĩha epindiso li tu kuatisa oku kuata epandi oco tu popeliwe.​—⁠1 Pet. 5:⁠10.

¹⁸ Yesu o kuete unene wosi kilu la palo posi, kuenje, nda ove wa kolela kokuaye, lacimue cu tateka oku ku teyuila. (Yoa. 10:​28, 29) Ka tu ka kuati usumba lovitangi viya kovaso yoloneke ndaño olofa. Omanu vana va pandikisa toke kesulilo lioluali lulo, va ka popeliwa. Ka tu ka eceleli okuti ovina vi sangiwa voluali lulo vi tu vetiya oku liwekapo oku kolela ku Yehova. Omo liaco, tu amamiko oku pamisa ekolelo lietu, kuenda tu sokololi lolondunge epandi lia Suku.​—⁠Mat. 24:13; tanga 2 Petulu 3:​17, 18.