Ассирияның хоорайы Ниневияның чурттакчылары дыка каржы турган. Иегова Иона деп медээчизинге Ниневияже баргаш, ол улусту эттинип алыр кылдыр чугаалаарын чагаан. Ынчалза-даа Иона корабльга олурупкаш, ооң көңгүс өске талазында Фарсис хоорайже эжиндирип чорупкан.

Далайга улуг шуурган эгелей бээрге, далайжылар корга бергеннер. Олар бурганнарынга мөргүп: «Чүге бистер-биле мындыг хилинчек болуп турары ол?» — деп турганнар. Оон Иона: «Ол дээрге мээң буруум-дур. Иегова даалга бээрге, ону күүсетпес дээш, дезипкен мен. Мени далайже октаптыңар, ынчан шуурган оожургай бээр» — дээн. Далайжылар Ионаны октаарын күзевээн, ынчалза-даа ол дилеп-ле турган. Оон Ионаны сугже октаптары билек, шуурган соксай берген.

Иона өлүрүм ол-дур деп бодаан. Ол далайның дүвүнче бадып бар чыткаш, Иеговага мөргүп турган. Ынчан Иегова улуг балыкты чоргузупкан. Балык Ионаны сыырыптарга, ол өлбээн. Оон: «Мен сеңээ кезээде дыңнангыр боор мен» — деп, Иона балык иштинге чыткаш, Иеговага аазаан. Иегова ону балык иштинге үш хонук кадагалаан. Оон балык ону кургаг черже үндүр бүлгүрүпкен.

Иегова Ионаны камгалап алгаш, ону Ниневияже катап чоргуспас бе? Чок. Иегова аңаа катап ынаар баарын айыткан. Бо удаа Иона  дыңнангыр болган. Ниневияга келгеш, ол каржы улуска: «40 хонгаш, Ниневия хоорай узуткаттырар» — деп чарлаан. Ынчан кайгамчык чүве болган: ол чурттакчы чон Ионаны дыңнааш, өскерлип эгелээн. Оларның хааны мынча дээн: «Буруузунуп, Бургандан өршээлди дилеңер. Ынчан ол бисти узуткавайн баар чадавас». Иегова оларның буруузунуп турарын көргеш, Ниневияны узуткавас деп бодап алган.

Иегова ол хоорайны узуткаваска, Иона хорадап эгелээн. Бодап көр даан, Иегова Ионага шыдамык бооп, ээ көрнүп турган. А Иона Ниневияның чурттакчыларын кээргээр хөңнү чок болган. Ол хоорайдан үнгеш, хомудаанындан хөлүе бергеш, үнүштүң хөлегезинге олурган. А кажан ол үнүш кургап каарга, Иона хорадай берген. Ынчан Иегова аңаа мынча дээн: «Сеңээ кижилер эвес, а ол үнүш кээргенчиг болган. Мен кижилерни кээргээш, ол хоорайны узуткавадым». Иегова Ионаны Ниневияның чурттакчылары анаа үнүштен артык үнелиг деп өөредиксээн.