Саул чок апаарга, Давид 30 харлыында хааннай берген. Кезек үе эрткенде, ол ордузунуң кырынга тургаш, дыка чараш херээжен кижини көрүп каан. Ол дээрге Урия дээр дайынчының Вирсавия дээр кадайы деп, Давид билип алган. Давид ону ордузунче эккээрин дужааган. Олар эр-херээжен харылзаа кылган соонда Вирсавия иштели берген. Давид ол кылган чүүлүн чажырып турган. Ол дайынчыларның баштыңчызынга тулчуушкун үезинде Урияны мурнунга салып кааш, аткаарлай бээр силер деп дужааган. Ооң соонда Урия чок апарган. А Давид Вирсавияга өгленип алган.

Ынчалза-даа Иегова шупту чүвени көрүп турган. Ынчангаш ол Давидче Нафан деп медээчизин чоргузупкан. Нафан мынча дээн: «Бир бай кижи дыка хөй хойлуг турган, а ядыы кижи чаңгыс борбак ынак хойлуг чораан. Бай кижи ядыы кижиниң чаңгыс хоюн хунаап алгаш барган». Давид аажок хорадап, алгырган: «Ол бай кижини өлүрер херек!» Ынчан Нафан аңаа: «Ол бай кижи — сен-дир сен!» — дээн. Давид аажок муңгарап: «Мен Иегованың мурнунга бачыт кылдым» — деп ажыы-биле чугаалаан. Ол бачыт дээш Давидтиң өг-бүлези дыка хөй хай-халаптарга таварышкан. Иегова Давидти шииткен-даа болза, дириг арттырып каан, чүге дээрге Давид биче сеткилдиг, буруузун миннип билир турган.

Давид Иеговага өргээ тудуп бериксеп турган. Ынчалза-даа Иегова ол өргээни Давид эвес, а ооң оглу Соломон тудар дээн. Давид шупту херек материалдарны чыып эгелээш, мынча дээн: «Иегованың  өргээзи эң чараш боор ужурлуг. Соломон ам-даа аныяк-тыр, мен аңаа дузалажып, херек чүүлдерни чыып бээйн». Давид тудугже дыка хөй акшаны өргээн. Ол мергежилдиг дузалакчыларны тыпкаш, алдын-мөңгүннү чыып каан. А Тир биле Сидондан эңдере хөй пөш ыяштарны эккеп берген. Давид өлүрүнүң мурнунда тудугнуң кандыг боорун чураан чурукту оглунга бергеш, чугаалаан: «Иегова сеңээ айтыышкыннарны меңээ бижидип кагды. Кортпа, эрес-дидим бол! Иегова сеңээ дузалаар. Шупту чүвең болдуна бээр!»