Дээди бараалгакчы Илий Офни биле Финеес дээр ийи оолдуг турган. Олар ыдыктыг өргээ-майгынга бараалгап турган. Олар Иегованың хоойлуларын үреп, улусту багай аажылап чораан. Израильчилер Иеговага өргүлдер эккээрге, Офни биле Финеес эъттиң эң экизин алыр турган. Илий ооң дугайында билир-даа болза, оларны кезетпээн. Чүү деп бодаар сен, Иегова аңаа таарзынган бе?

Офни биле Финеестен Самуил оранчок бичии-даа болза, оларны өттүнмээн. Ынчангаш Иегова аңаа дыка ынак турган. Бир катап дүне Самуил удуп чыдырда, ону бир үн кыйгырган. Ол Илийге чеде бергеш: «Дыңнап тур мен!» — дээн. Илий: «Сени кыйгырбадым, барып удуп чыдып ал» — дээн. Самуил чыдып алырга, ол үн база катап кыйгырган. Самуил ол үннү үш дугаар дыңнааш, Илийге чеде бээрге, оозу Иегова кыйгырып турар деп билип каан. Ынчан Илий Самуилге мынча дээн: «Ам ол үннү дыңнап кагзыңза: „Иегова, чалчаң дыңнап тур“ дээр сен».

Самуил катап удуп чыдып алган. Оон үн дыңналган: «Самуил! Самуил!» «Иегова, чалчаң дыңнап тур» — деп, Самуил чугаалаан. Иегова аңаа мынча дээн: «Илийни база ооң шупту өг-бүлезин  кеземче манап турар деп дамчыт. Мээң ыдыктыг өргээ-майгынымда оолдарының чүнү кылып турарын билир хирезинде, чүнү-даа кылбас-тыр». Дараазында хүн Самуил база-ла бодунуң ажылын кылып, эжиктерни ажыдып турган. Ол Илийге Иегованың сөстерин дамчыдарындан сестип турган. Ынчалза-даа Илий оолду кыйгыргаш, мынча дээн: «Оглум, Иегова сеңээ чүү диди? Менден чүнү-даа чажырба». Самуил аңаа шуптузун чугаалап берген.

Самуил өзүп-доругуп-ла орган, а Иегова аңаа кезээде дузалажып турган. Самуилди медээчи болгаш баштыңчы кылдыр Иегова шилип алган деп, шупту израильчилер билир апарган.