АНЫЯКТАРГА
11. Ажылгыр-кежээ боору
ОЛ ЧҮҮ ДЭЭНИ ОЛ?
Ажылгыр-кежээ улус ажылдан деспес. Олар амыдыраар дээш база өскелерге дузалаар дээш, бөдүүн кара ажыл кылырындан безин чалданмас.
ОЛ ЧҮГЕ ЧУГУЛА?
Күзээр, күзевес-даа болзувусса, чуртталгада харыысалганы дөмей-ле чүктээр апаар бис. Бо делегейде хөй кезии улус ажылдаарынга хөңнү чок. Оларга көөрде, ажылгыр-кежээ кижилерни улус бедик үнелээр боор (Экклесиаст 3:13).
«Бир эвес эки ажылдаан болзуңза, бодуңга чоргаарланып, иштики сагыш-сеткилиң көдүрлүп келир. Ол минниишкин меңээ ажылга ынак апаарынга дузалаан. Ажылгыр-кежээ кижиниң ат-алдары база эки болур» (Рейон).
БИБЛЕЙЖИ ДҮРҮМ: «Карак кызыл ажылдан кезээде орулга кээр» (Чугаалар 14:23).
ЧҮНҮ КЫЛЫП БОЛУРУЛ?
Ажылыңга ынак болурунга сеңээ дараазында сүмелер дузалаар.
Эки кылган ажылыңдан өөрүшкүнү ап өөрен. Онаалгаң, бажың ажылын азы оон-даа өске ажыл кылып тургаш, ону сеткилиңден кыл. Бир чүүлдү эки кылып алган болзуңза, ону канчаар оон-даа эки шынарлыг, дүрген кылып болурун бодан. Ажылың түңнели эки болган тудум, оон-даа өөрүшкүлүг болур сен.
БИБЛЕЙЖИ ДҮРҮМ: «Бодунуң ажыл-херээнге мергежээн кижини көрген сен бе? Ол карачал улуска эвес, а хааннарга бараан болур» (Чугаалар 22:29).
Байдалды долузу-биле көөрүн кызыт. Бодуңнуң хүлээлгелериңни сеткилиңден кылыр болзуңза, ол өскелерге ажык-дуза эккээр. Чижээ, бажың ажылын кызымак кылып тургаш, ада-иеңниң ажылын чиигедип бээр сен.
БИБЛЕЙЖИ ДҮРҮМ: «„Алырынга көөрде, бээри — амыр-чыргалдыг“ — дээн болгай» (Ажыл-чорудулга 20:35).
Хөйнү кыл. Кылыр ужурлуг чүүлүңден хөйнү кылырын шенеп көр. Ынчаар кылып тургаш, чуртталгаңны бодуң башкарып турар боор сен. Чүге дизе сен өскелерге албадаткаш эвес, а бодуң күзелиң-биле хөйнү кылган болгай сен (Матфей 5:41).
БИБЛЕЙЖИ ДҮРҮМ: «Сээң чөпшээрелиң чокка чүнү-даа кылыр хөңнүм чок болду. Сээң кылып турар бүгү буяның хүлээлге ёзугаар эвес, а сээң тура-сорууң аайы-биле илерээн болуру күзенчиг-дир» (Филимонга 14).
Угаан-сарыылдыг бол. Ажылгыр-кежээ улус өйүн билир. Олар ажылдап-даа, дыштанып-даа билир.
БИБЛЕЙЖИ ДҮРҮМ: «Ындыг-даа болза, ажыл-иш болгаш улуг күжениишкин-биле чедип алган ийи адыш хиреден амыр-дыштыг оргаш алган чаңгыс адыш хирези дээре» (Экклесиаст 4:6).
