Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  Tenuare 2015

 TUMU PARAU MATAMUA | MEA MAU ANEI SATANI?

Satani, e parau noa anei no te faataa i te ino?

Satani, e parau noa anei no te faataa i te ino?

E ere i te mea tano ia mana‘o mai tera. Eaha mau na ta te Parau a te Atua e haapii ra? Mai te peu e parau noa Satani no te faataa i te ino, no te aha te Bibilia e faaite ai ia ’na mai tei paraparau ia Iesu Mesia e te Atua Mana hope iho? E hi‘opoa ana‘e e piti hi‘oraa o tera mau aparauraa.

UA PARAPARAU SATANI IA IESU

A haamata ’i Iesu i ta ’na taviniraa, ua faahema te Diabolo ia ’na e toru taime. Na mua, ua tamata Satani i te faahepo ia Iesu ia faaohipa i to ’na mana no ǒ mai i te Atua no to ’na iho maitai ma te haamâha i to ’na poia. I muri iho, aita te Diabolo i taiâ i te turai ia Iesu ia haafaufaa ore i to ’na ora ma te rave i te tahi ohipa maamaa ia haapaohia o ’na. I muri a‘e, ua pûpû Satani ia Iesu ia riro ei faatere i nia i te mau basileia atoa o te ao nei ia haamori râ oia ia ’na. Ua patoi Iesu i na toru faahemaraa haavarevare ma te faahiti noa i te mau Papai.—Mataio 4:1-11; Luka 4:1-13.

O vai ta Iesu i paraparau? Te tahi anei huru ino i roto ia ’na? Teie ta te mau Papai e parau ra no Iesu: “I ati atoa hoi oia i te mau mea atoa mai ia tatou atoa nei, aita roa râ e hara.” (Hebera 4:15) Te faataa atoa ra ia ’na mai “tei ore roa i rave i te hara, e aore roa e haavare i itea i to ’na vaha.” (Petero 1, 2:22) Aita Iesu i hara noa ’‘e e ua faaite noa o ’na i te haerea hapa ore. Aita roa oia i vaiiho hoê noa ’‘e huru ino ia tupu i roto i to ’na aau. Aita ïa Iesu i paraparau i te tahi huru ino i roto ia ’na, i te tahi melahi mau râ.

Te vai ra te tahi atu haapapuraa e melahi mau Satani i roto i tera noa â aparauraa.

  • A haamana‘o na ua pûpû te Diabolo i te mau faatereraa o te ao nei ia Iesu, ia haamori atu râ o ’na ia ’na. (Mataio 4:8, 9) Eaha ïa te faufaaraa o teie pûpûraa ahiri e ere Satani i te mea mau! Hau atu â, aita Iesu i patoi e mana rahi to Satani i nia i tera mau faatereraa.

  • Ua patoi Iesu i te mau faahemaraa e i muri a‘e, teie te parauhia no te Diabolo: “Haere iti ê atura oia, faarue maira ia ’na.” (Luka 4:13) I tera taime, ua riro anei Satani ei huru ino i roto ia Iesu? Aore ra ei enemi i onoono mau.

  • A tapao na i te faaitehia ra i roto i te Mataio 4:11, “e mau melahi tei haere mai e ua tauturu maira” ia Iesu. E ere anei e melahi mau ratou o tei faaitoito e tei tauturu ia Iesu? Oia mau. No te aha ïa e mana‘o ai e ere Satani i te melahi mau?

 UA PARAPARAU SATANI I TE ATUA

No nia ia Ioba te piti o te faatiaraa, e taata oia tei mǎta‘u i te Atua. I roto i to ’na aamu, te faaitehia ra e piti taime i paraparau ai te Diabolo i te Atua. I tera na taime, ua haapopou te Atua ia Ioba no to ’na hapa ore. Ua pari Satani no te mau tumu miimii noa Ioba e tavini ai i te Atua. Ua parau hoi e ohipa ta te Atua i rave i tavini ai Ioba ia ’Na ma te taiva ore. E au ra e ua mana‘o Satani o ’na tei matau a‘e ia Ioba i te Atua. Ua vaiiho Iehova ia faaere Satani ia Ioba i ta ’na mau faufaa, tamarii e to ’na ea maitai. * Ua ite-mau-hia râ ua tano ta Iehova i parau no Ioba e ua hape Satani. Ua haamaitai te Atua ia Ioba no to ’na hapa ore.—Ioba 1:6-12; 2:1-7.

I na taime e piti, ua paraparau anei Iehova i te tahi huru ino i roto ia ’Na? Te na ô ra te Bibilia: “O te Atua ra, e parau-tia ta ’na.” (Samuela 2, 22:31) Teie atoa ta te Parau a te Atua e faahiti ra: “E mo‘a, e mo‘a, e mo‘a, to te Fatu ra to te Atua Mana hope.” (Apokalupo 4:8) Mea viivii ore, mo‘a e mea faataa-ê-hia i te hara te auraa o tera parau. Mea tia roa o Iehova e aita hoê a‘e mea ino i roto ia ’Na. Aita hoê noa ’‘e huru ino to ’na.

Ua taui mau te oraraa o Ioba i muri a‘e i to Satani paraparauraa i te Atua

E parau vetahi e ere Ioba i te taata mau e mea mana‘o-noa-hia ïa tera faatiaraa. Mea tano anei râ tera mana‘o? Te faaite ra te tahi atu mau irava Bibilia e taata mau iho â Ioba. I roto i te Iakobo 5:7-11, ua riro Ioba ei hi‘oraa no te faaitoito i te mau Kerisetiano ia faaoromai i te ati e no te haamana‘o mai e haamaitai Iehova tei na reira. Ahiri e ere Ioba i te taata mau e mea mana‘o-noa-hia ta Satani mau pariraa, eaha ïa te faufaaraa ia faaitoito ia pee i to ’na hi‘oraa? Hau atu â, i roto i te Ezekiela 14:14, 20, e taata parau-tia atoa Ioba mai ia Noa e Daniela. Mai na tavini e piti o te Atua, e taata mau ïa Ioba e te faaroo puai. E ere anei tei hamani ino ia ’na i te mea mau atoa?

Ia au i te Bibilia, mea papu maitai e melahi mau Satani. Te feruri ra paha oe, ‘E nehenehe anei oia e haafifi ia ’u e to ’u utuafare i teie nei mahana?’

EAHA ’TURA I TO TATOU NEI TAU?

A feruri na eaha te tupu ia puhapa taue noa te tahi pǔpǔ taata hamani ino i to oe oire. E ino roa iho â to oe oraraa e to te feia tapiri! I teie nei, a feruri na i to muri nei tupuraa: E melahi mau Satani e ta ’na mau demoni tei orure hau i te Atua e ua huri-taue-hia mai ratou i te fenua nei. Eaha ïa te tupu? A feruri na i ta oe e ite ra i roto i te mau vea i ǒ nei e na te ao:

  • Noa ’tu te mau ravea e ravehia ra na te ao, aita anei oe e ite ra te ino noa ’tura te taata e ua rahi roa te mau ohipa hamani-ino-raa?

  • Noa ’tu te haapeapearaa a te mau metua e rave rahi, aita anei oe e ite ra ua rahi roa te peu tahutahu i roto i te mau faaanaanataeraa?

  • Noa ’tu te mau tutavaraa maitai a te taata, aita anei oe e ite ra te ino noa ’tura te fenua?

  • Aita anei oe e ite ra ua ino roa te oraraa o te taata mai te huru ra, te vai ra te hoê o te faatupu ra i te mau mauiui o te huitaata?

A hi‘o na i ta te Bibilia e parau ra no nia i tei faatupu ra i te reira: “Hurihia ’tura hoi te teni rahi i rapae, o taua ophi tahito ra ïa, o tei parauhia o te diabolo ra, e o Satani hoi, o tei haavare i to te ao atoa nei; i hurihia oia i rapae i nia iho i te fenua nei, e ta ’na mau melahi atoa ua huri-atoa-hia . . . E ati ra hoi to te fenua e to te tai, tei raro atu na hoi te diabolo ia outou na; e riri rahi hoi to ’na, no te mea ua ite oia e maa taime poto to ’na e toe nei.” (Apokalupo 12:9, 12) I to ratou hi‘opoaraa i te reira, e rave rahi tei farii e melahi ino mau Satani e te faaohipa ra oia i to ’na mana no te haavî i te ao e haaati ra ia tatou.

Te na ô ra paha oe, ‘Eaha te rave ia paruruhia vau?’ Ua tano oe i te haapeapea. E faaite atu to muri nei tumu parau i te tahi mau mana‘o e tauturu atu.

^ par. 12 O Iehova te i‘oa o te Atua i roto i te Bibilia.