Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TENUARE 2015

 TUMU PARAU MATAMUA | MEA MAU ANEI SATANI?

Mea tia anei ia mǎta‘u ia Satani?

Mea tia anei ia mǎta‘u ia Satani?

Mai te mǎhu monoxyde de carbone, eita Satani e ite-mata-hia e mea ino oia

Mea fifi roa ia ite, eita hoi te reira e ite-mata-hia e aita atoa e hau‘a. Ma te ore e haapao, e nehenehe te taata e pohe. Ua hau atu paha i te afaraa o te feia i taero na te ao tei pohe no te mǎhu parauhia monoxyde de carbone. Eiaha râ e haapeapea, te vai nei e rave rahi ravea no te faaite mai te mâi ra tera mǎhu e no te paruru ia oe. Ma te paari, e rave rahi tei tuu i ǒ ratou i te mau matini faaararaa o te ta‘i ia mâi tera mǎhu.

E melahi ino mau Satani e mai te mǎhu monoxyde de carbone, eita oia e ite-mata-hia. Aita râ te Atua i vaiiho noa mai ia tatou mai tera. Eita oe e mǎta‘u ia Satani ia haafaufaa oe i to muri nei mau tauturu no ǒ mai i te Atua:

To tiamâraa ia maiti. Te na ô ra te Iakobo 4:7: “E patoi atu i te diabolo, e na ’na e maue ê atu.” Noa ’tu e mana to Satani, eita ta ’na e nehenehe e faahepo ia oe ia faatupu i te tahi ohipa ta oe e ore e hinaaro e rave. E tiamâraa to oe ia maiti! Te parau ra te Petero 1, 5:9 ia “patoi atu ïa [i te Diabolo] ma te faaroo turori ore.” A haamana‘o, e toru taime to Iesu patoiraa ’tu ma te aueue ore, i muri a‘e, ua vaiiho Satani ia ’na. (Mataio 4:11) E nehenehe atoa oe e maiti i te patoi i ta Satani mau raveraa.

Te auhoaraa e te Atua. Te faaitoito mai ra te Iakobo 4:8 ia “haafatata ’tu i te Atua.” O Iehova iho tera e ani ra ia oe ia faatupu i te taairaa piri e o ’na. Eaha ïa te rave? Na mua, a haapii i te Bibilia no te ite atu â o vai o ’na. (Ioane 17:3) Ma te na reira, e here oe ia Iehova e e itoito-atoa-hia i te rave i to ’na hinaaro. (Ioane 1, 5:3) Ia haafatata oe i to Metua i te ra‘i, eaha ta ’na e rave? Te na ô atoa ra te Iakobo, “e haafatata mai” te Atua ia oe.

E faanahoraa ta Iehova no te paruru ia oe

Te parururaa papu. Te taiohia ra i roto i te Maseli 18:10: “Te i‘oa o Iehova ra, e pare etaeta ïa; te horo nei te parau-tia i reira e ua ora ihora.” E ere te auraa, ua riro te i‘oa o te Atua ei taritoa no te paruru i te taata. E nehenehe râ te feia e haafaufaa mau i te i‘oa o te Atua e ani i ta ’na parururaa i te mau taime atoa.

Te tahi hi‘oraa maitai. Ua rave te feia i ô apî i roto i te amuiraa Kerisetiano no Ephesia i te tahi ohipa papu ia au i te Ohipa 19:19: “E rave rahi hoi to te feia peu huru ê i hopoi mai i ta ratou mau buka, ua tutui ihora i te auahi, i mua i te aro o te taata atoa; ua taio ihora i te moni i te hoo o taua mau  buka ra, e itea ihora, e pae ahururaa te tausani i te moni ario.” * Ua tutui tera mau Kerisetiano i te mau tao‘a atoa tei taaihia i te peu tahutahu noa ’tu mea moni te reira. E maitai-atoa-hia tatou i tera hi‘oraa i teie mahana. Ua rahi roa te peu tahutahu i roto i teie nei ao. E ere paha te tahi peu aore ra tao‘a iti i te mea ino, e nehenehe râ te reira e riro ei uputa no te mau demoni. Mea faufaa roa ia haapae roa i tera mau tauihaa noa ’tu te moni e te faufaaraa o te reira.—Deuteronomi 18:10-12.

Tae roa ’tu i te 50raa o to ’na matahiti, aita Rogelio, faahitihia i te haamataraa o teie tumu parau, i tiaturi mea mau te Diabolo. Ua taui râ to ’na mana‘o i teie nei. No te aha? Te na ô ra oia: “A tahi ra vau e fana‘o ai i te hoê Bibilia. Ma te ite i ta te mau Papai e haapii ra, ua papu ia ’u mea mau te Diabolo. Te paruru atoa mai ra tera ite ia ore ia vaiiho ia ’na ia mana i nia ia ’u.”

“Ma te ite i ta te mau Papai e haapii ra, ua papu ia ’u mea mau te Diabolo. Te paruru atoa mai ra tera ite ia ore ia vaiiho ia ’na ia mana i nia ia ’u”

E hinaaro anei oe e ite i te mahana aita faahou Satani? Ua tohu te mau Papai i te taime e hurihia ’i te Diabolo, tei haavare e rave rahi, “i roto i te roto auahi e te gopheri.” (Apokalupo 20:10) Eita iho â te tahi melahi e mauiui i te auahi ura. Mea tano ïa ia mana‘o e faahoho‘araa te roto auahi no te haamouraa mure ore. Aita faahou Satani a muri a‘e. Auê oaoaraa no te feia e here ra i te Atua!

A tiai noa ’i, a tamau i te haapii i te mau mea atoa ta oe e nehenehe no nia ia Iehova e ta ’na mau aratairaa. * A feruri na ia ora oe i te mahana e nehenehe mau ai e parau, “Aita faahou Satani!”

^ par. 8 Mai te peu e moni ario no Roma, e faufaa rahi mau to te reira! E titauhia hoi 50 000 mahana ohipa no te fana‘o i tera faito moni.

^ par. 11 No te ite atu â no nia ia Satani e te peu tahutahu, a hi‘o i te pene 10 o te buka Eaha ta te Bibilia e haapii mau ra? A ani i te tahi Ite no Iehova no te fana‘o i tera buka.

No te ite atu â

Eaha te opuaraa a te Atua no te fenua?

Te faataa ra te Bibilia no te aha te Atua i poiete ai i te fenua, afea te mauiui e ore ai, eaha te a muri a‘e o te fenua, e o vai te ora i reira.

Te mau varua—To ratou mana i nia ia tatou

Te faahiti ra te Bibilia i te parau o te mau melahi e te mau demoni. Mea mau anei teie mau varua? E mana anei to ratou i nia i to oe oraraa?