Cameron: Jon, oaoa roa vau i te farerei faahou ia oe. Mea au na ˈu ta tâua mau aparauraa Bibilia i te mau hebedoma atoa. * Eaha to oe huru?

Jon: Maitai roa. Mauruuru.

Cameron: Mea maitai roa ïa. I te hebedoma i mairi, ua aparau tâua no te aha te mau Ite no Iehova e parau ai ua haamata te Basileia o te Atua i te faatere i 1914. * Ua hiˈopoa tâua i te tahi haapapuraa o te reira i roto i te Bibilia. Te tahi ïa parau tohu o te pene 4 o te buka a Daniela. Te haamanaˈo ra oe eaha tera parau tohu?

Jon: Te moemoeâ ïa a te arii Nebukanesa no nia i te tahi tumu raau rahi.

Cameron: Tera. I roto i ta ˈna moemoeâ, ua ite Nebukanesa i te tahi tumu raau rahi teitei roa tei naea i te raˈi. Ua faaroo oia i te melahi a te Atua ia faaue ia tâpûhia te reira, ia vaiihohia râ te tumu e te aˈa. I muri aˈe i te hoê tau, “ia hitu noa ˈtu te matahiti,” e tupu faahou tera tumu raau. * Ua aparau atoa tâua no te aha e piti tupuraa to tera parau tohu. Te haamanaˈo ra oe eaha te tupuraa matamua?

Jon: E, ua tupu i nia ia Nebukanesa. Ua moe to ˈna hiroa e hitu matahiti.

Cameron: Tera. Ua moe te hiroa o Nebukanesa i te hoê tau. No reira oia i ore ai e nehenehe faahou e faatere. E tupuraa rahi aˈe râ to tera parau tohu. Ua itehia te reira i te taime aita faahou e tia no ta te Atua faatereraa i nia i te fenua nei no te hoê tau, e hitu ïa tau. Mai ta tâua i ite, ua haamata na hitu tau a haamouhia ˈi Ierusalema i 607 hou te Mesia. Mai tera matahiti, aita faahou e arii e tia no te Atua ra o Iehova no te faatere i to ˈna nunaa. I te hopea râ o na hitu tau, e faatoroa te Atua i te tahi Arii apî no to ˈna nunaa, e tera Arii no te raˈi ïa o ˈna. E nehenehe e parau, ia hope na hitu tau, e haamata te Basileia i te raˈi o te Atua i te faatere. Ua ite ê na tâua inafea na hitu tau i haamata ˈi. Mea faufaa ïa i teie nei ia ite eaha te maoro o te reira. I ǒ tâua e papu ai inafea te Basileia o te Atua i haamata ˈi i te faatere. Ua taa maitai anei ia oe i ta tâua i hiˈopoa aˈenei?

 Jon: E, mea au roa tera mau haamanaˈoraa.

Cameron: Teie nei, e paheru faahou anaˈe. E aparau tâua eaha te maoro o tera e hitu tau. Arauaˈe ra, ua hiˈopoa faahou vau i tera tumu parau no te haamanaˈo i te mau vahi faufaa. E tamata vau i te faataa maitai atu.

Jon: Na reira.

Cameron: I roto i te tupuraa matamua o te parau tohu i tupu i nia ia Nebukanesa, te maoro o na hitu tau, mea papu ïa e hitu matahiti. I roto râ i te tupuraa rahi aˈe taaihia i te Basileia o te Atua, e ere ïa te maoro e hitu matahiti.

Jon: No te aha oe e parau ai mai tera?

Cameron: A haamanaˈo na, ua haamata na hitu tau i te haamouraahia Ierusalema i 607 hou te Mesia. Ia taiohia e hitu matahiti i muri aˈe, e tapae tâua i te matahiti 600 hou te Mesia. Aita râ hoê aˈe ohipa taa ê i tupu i tera matahiti i roto i te faatereraa a te Atua. Hau atu â, mai ta tâua i hiˈopoa, tau senekele i muri aˈe, i te taime tei te fenua Iesu, ua faaite oia aita â na hitu tau i hope atura.

Jon: A e, te haamanaˈo ra vau i teie nei.

Cameron: No reira i ǒ nei, eiaha ïa e taio e hitu matahiti, e tau maoro atu â hoi tera.

Jon: Ehia ïa maororaa?

Cameron: Te tauturu mai ra te buka Bibilia Apokalupo, tei taai-roa-hia i te buka Daniela, ia ite eaha te maoro o na hitu tau. Te faaitehia ra i roto, toru tau e te afa, e au ïa 1 260 mahana. * Ia tataipiti tâua e toru tau e te afa, e noaa mai e hitu tau, e 2 520 ïa mahana. Te taa noa ra â ia oe?

Jon: E. Aita râ vau e taa ra nafea te reira e faaite mai ai ua haamata te Basileia o te Atua i te faatere i 1914!

Cameron: Teie nei, e hiˈo anaˈe i te taairaa. I te tahi taime i roto i te mau parau tohu Bibilia, e taiohia hoê mahana no te hoê matahiti. * Ia haapao tâua i te taioraa hoê mahana, hoê matahiti, te maoro o na hitu tau, e 2 520 matahiti. Ia taiohia e 2 520 matahiti i muri aˈe 607 hou te Mesia, e tapae tâua i te matahiti 1914. * Ua hope ïa na hitu tau i 1914 e ua haamata Iesu i te faatere ei Arii o te Basileia o te Atua i tera matahiti. E tupuraa rahi mau tei itehia na te ao nei mai tera matahiti e ua faaite ê na te Bibilia e tupu te reira i te mau mahana hopea.

Jon: Eaha ïa tera mau tupuraa?

Cameron: A hiˈo na i ta Iesu i parau i roto i te Mataio 24:7. No nia i te taime e haamata ˈi oia i te faatere i te raˈi, ua parau Iesu: “E tia mai hoi te tahi fenua e aro mai i te tahi fenua, e te tahi basileia e aro mai i te tahi basileia; e oˈe hoi . . . e e aueue fenua i tera vahi, i tera vahi.” Ua tohu ïa Iesu e tupu te oˈe e te aueueraa fenua i te mau mahana hopea. Ua tupu ê na râ te reira i te mau senekele na mua ˈˈe, e ere anei?

Jon: E hoi.

Cameron: I roto i tera irava, ua tohu atoa Iesu e tupu te tamaˈi ia riro oia ei Arii o te Basileia o te Atua. Ua faaite te buka Bibilia Apokalupo, eita te tamaˈi e tupu i te hoê noa vahi, e itehia râ te reira na te ao atoa nei i te mau mahana hopea. * Te haamanaˈo ra oe inafea te tamaˈi rahi matamua i tupu ai?

 Jon: I 1914 ra. Mai ta oe i parau, i te hoê â matahiti i haamata ˈi Iesu i te faatere! Aita vau i manaˈo aˈenei i te taairaa o tera na tupuraa!

Cameron: Ma te amui i ta tâua i ite no nia i te parau tohu o na hitu tau e te tahi atu mau parau tohu Bibilia no nia i te mau mahana hopea, e auraa mau to te reira. Ua papu i te mau Ite no Iehova, ua haamata Iesu i te faatere ei Arii o te Basileia i 1914 e mai tera matahiti, te ora nei tatou i te mau mahana hopea. *

Jon: Te tamata noa ra vau i te taa maitai i te mau mea atoa ta tâua i haapii.

Cameron: E ere iho â i te mea ohie. Mai ta ˈu i parau atu, ua titau-atoa-hia te taime no ˈu no te taa maitai i te reira. Maitai pai ua tauturu ta tâua aparauraa ia oe ia taa, noa ˈtu aita te matahiti 1914 i papaihia i roto i te Bibilia, te tuea ra te mau tiaturiraa a te mau Ite no Iehova i ta te mau Papai e haapii ra no nia i tera matahiti.

Jon: Mea faahiahia roa na ˈu ia oe. Noa ˈtu eaha ta oe e parau, e faaite iho â oe i te hoê irava e haapapu i te reira. Aita oe e horoa noa ˈˈe i to oe iho manaˈo. Tera râ, no te aha e ere i te mea ohie ia taa? No te aha te Atua i ore ai i parau noa mai i roto i te Bibilia e haamata Iesu i te faatere i te raˈi i te matahiti 1914?

Cameron: E uiraa maitai roa tera Jon. Aita te auraa o te mau mea e rave rahi i faataahia i roto i te Bibilia. No te aha ïa te Atua i hinaaro ai ia tutava te taata i te taa i ta ˈna i haapapai i roto i te Bibilia? Peneiaˈe, e nehenehe tâua e aparau no nia i te reira i teie hebedoma i mua.

Jon: Na reira ïa.