E haere tatou ma te iˈoa o Iehova e a muri noa ˈtu!
E haere tatou ma te iˈoa o Iehova e a muri noa ˈtu!
“E haere . . . tatou ma te iˈoa o Iehova, o to tatou ïa Atua e a muri noa ˈtu.”—MIKA 4:5.
1. Eaha nau poroi e faataahia ra i roto i te Mika pene 3 e tae atu i te pene 5?
E PARAU ta Iehova na to ˈna nunaa, e te faaohipa ra oia ia Mika ei peropheta na ˈna. Te opua ra te Atua e ohipa mai i nia i te feia rave hara. E faautua oia ia Iseraela no te taivaraa. Auaa râ, e haamaitai Iehova i te feia e haere ra ma to ˈna iˈoa. Te faataa-maitai-hia ra teie nau poroi i roto i te pene 3 e tae atu i te pene 5 o te parau tohu a Mika.
2, 3. (a) E mea tia ia faaite te mau aratai o Iseraela i teihea huru maitai, eaha râ ta ratou e rave mau ra? (b) E nafea outou e faataa ˈi i te huru paraparau i faaohipahia i roto i te Mika 3:2, 3?
2 Te na ô ra te peropheta a te Atua e: ‘E faaroo mai na, e te feia rarahi i ǒ Iakoba ra, e o outou, e te hui arii i te utuafare o Iseraela; eiaha outou ia ite i te parau tia ra?’ Oia mau, tera tei tiaturihia ia rave ratou, te aha mau ra râ ratou? Te na ô râ o Mika e: “O outou o tei riri i te maitai, e o tei hinaaro i te ino; o tei hohore i to ratou iri no nia ia ratou, e to ratou iˈo no nia i to ratou mau ivi; o tei amu i te iˈo o to ˈu ra mau taata, e ua hohore i te iri no nia ia ratou ra; e ua ofatifati i to ratou mau ivi, e ua tufa ia ratou mai te maa i roto i te pani, e mai te iˈo i roto i te farii rahi.”—Mika 3:1-3.
3 A hiˈo na, te haavî ra te feia aratai i te feia veve ravea ore! E taa ohie i te feia e faaroo ra ia Mika te huru paraparau i faaohipahia i ǒ nei. Ia faaineinehia te hoê mamoe i tupaihia na roto i te tunu-pape-raa ˈtu, e hohore-na-mua-hia te iri e tâpûpûhia ˈtu ai. I te tahi taime, e ofatihia te mau ivi ia noaa mai te puo. E tunu-pape-hia te iˈo e te mau ivi i roto i te hoê pani rahi, mai tei faahitihia e Mika. (Ezekiela 24:3-5, 10) Auê ïa faahohoˈaraa tano maitai no te hamani-ino-raa a te feia aratai iino i te nunaa i te tau o Mika!
Te titau ra Iehova e ia faaohipa tatou i te parau-tia
4. Eaha te taa-ê-raa i rotopu ia Iehova e te feia aratai o Iseraela?
4 E taa-ê-raa rahi mau to rotopu i te Tiai mamoe î i te here ra o Iehova e teie feia aratai o Iseraela. No te mea aita ratou i faaohipa i te parau-tia, aita ratou i amo i ta ratou hopoia e paruru i te nǎnǎ. Area râ, ua tarere ratou ma te miimii i te mau mamoe taipe, a faaere ai ia ratou i te parau-tia e a haamanii ai “i te toto,” mai tei parauhia i roto i te Mika 3:10. Eaha ta tatou e haapii mai na roto i teie tupuraa?
5. Eaha ta Iehova e titau ra i te feia e hopoia ta ratou i roto i to ˈna nunaa?
5 Te titau ra te Atua ia faaohipahia te parau-tia e te feia e hopoia ta ratou i roto i to ˈna nunaa. Tera te mea ta tatou e ite ra i roto i te mau tavini a Iehova i teie tau. Hau atu â, e tuati te reira i te Isaia 32:1, o te na ô ra e: “Inaha, e parahi mai te hoê arii ma te hau parau-tia ra, e te tahi pǔpǔ arii atoa ra ma te parau au.” I te tau râ o Mika, eaha ta tatou e ite atu? E onoono “tei riri i te maitai, e o tei hinaaro i te ino” i te haapiˈo i te parau-tia.
Ta vai ma mau pure te pahonohia?
6, 7. Eaha te manaˈo faufaa e haamahitihitihia ra i roto i te Mika 3:4?
6 E tia anei i te feia iino no te tau o Mika ia manaˈo e e farii maitai Iehova ia ratou? Eiaha ïa! Te na ô ra te Mika 3:4 e: “Ei reira ratou e pii atu ai ia Iehova, e ore râ oia e faaroo mai ia ratou; e purou oia i to ˈna mata ia ratou ia tae i taua mahana ra, no te mea ua ino ta ratou parau.” Te haamahitihiti ra te reira i te hoê manaˈo faufaa roa.
7 Eita o Iehova e pahono i ta tatou mau pure ia rave tatou i te hara. Mai te reira mau â mai te peu e e piti huru oraraa to tatou, te huna ra i ta tatou hara a parau ai e te tavini ra tatou i te Atua ma te haapao maitai. Ia au i te Salamo 26:4, ua himene o Davida e: “Aore au i parahi i roto i te mau taata haapao ore i te parau, aore hoi i amui i roto i te feia haavare.” E ore roa ˈtu ïa Iehova e pahono i te mau pure a te feia e opua ra e haapao ore i ta ˈna Parau!
Faaitoitohia e te varua o te Atua
8. Eaha tei faaarahia ˈtu i te mau peropheta haavare no te tau o Mika?
8 Eaha râ te feia aratai i te pae varua o Iseraela i te matau i te peu hairiiri! Na te mau peropheta haavare e haapiˈo ra i te nunaa o te Atua i te pae varua. E tuô te feia aratai nounou taoˈa e, “E hau,” e faatupu mau râ ratou i te tamaˈi i te taata atoa e ore e tuu mai i te maa i to ratou vaha. “E teie nei,” ta Iehova ïa e parau ra, “ei rui to outou eiaha ei orama, ei pouri to outou eiaha ei tohu; e mairi hoi te mahana i nia i te mau peropheta, e riro hoi te mahana i te pouri i nia ia ratou. Ei reira te mau hiˈo e haama ˈi, e e maheahea te feia tohu; oia ïa, e tapoˈi anaˈe ratou i to ratou vaha.”—Mika 3:5-7a.
9, 10. Eaha te auraa ‘e tapoˈi i te vaha,’ e no te aha aita e tumu e na reira ˈi o Mika?
9 No te aha ‘e tapoˈi ai i te vaha’? No te haama e na reira ˈi te feia iino no te tau o Mika. E mea tia iho â i teie feia iino ia haama. “E ore te Atua e parau mai” ia ratou. (Mika 3:7b) Eita roa ˈtu Iehova e haapao mai i te mau pure a te tahi noa ˈˈe taata ino teoteo.
10 Aita e tumu ‘e tapoˈi ai Mika i to ˈna vaha.’ Aita oia e haama ra. E pahono Iehova i ta ˈna mau pure. A tapao na i te Mika 3:8, i reira te peropheta haapao maitai e parau ai e: ‘Ua î mau râ vau i te puai, i te varua o Iehova, e te parau tia, e te etaeta.’ Auê ïa o Mika i te mauruuru e, i te roaraa o ta ˈna taviniraa maoro e te haapao maitai, ua “î” noa oia “i te puai, i te varua o Iehova”! Ua faaitoito te reira ia ˈna ia “faaite ia Iakoba i ta ˈna parau ino, e ia Iseraela i ta ˈna hara.”
11. E nafea te taata e faaitoitohia ˈi ia poro i te mau poroi a te Atua?
11 Ua hinaaro Mika i te puai e hau aˈe i to te taata no te poro i te poroi faautuaraa a te Atua. Mea faufaa roa te varua, aore ra puai ohipa, o Iehova. E o tatou ïa? E nehenehe ta tatou ohipa pororaa e ravehia mai te peu noa e e faaitoito Iehova ia tatou na roto i to ˈna varua moˈa. Mea papu maitai e eita roa ˈtu te mau tamataraa i te poro e manuïa ia rave tatou i te hara ma te opua. Eita ïa te Atua e pahono i ta tatou mau pure no te horoa mai i te itoito no te rave i teie ohipa. Eita roa ˈtu iho â ïa e tia ia tatou ia poro i te mau poroi haavaraa a to tatou Metua i te raˈi aita anaˈe “te varua o Iehova” i nia ia tatou. Na roto i te mau pure o te faaroohia e te tauturu a te varua moˈa, e tia ia tatou ia poro i te parau a te Atua ma te mǎtaˈu ore, mai ia Mika.
12. No te aha i tia ˈi i te mau pǐpǐ matamua a Iesu ‘ia parau noa i te parau a te Atua ma te mǎtaˈu ore’?
12 Te haamanaˈo ra paha outou i te aamu i roto i te Ohipa 4:23-31. A feruri na e e pǐpǐ outou na Iesu no te senekele matamua. Te tutava ra te feia hamani ino aoaoa i te haamamû i te mau pǐpǐ a te Mesia. E pure râ teie feia taiva ore i to ratou Fatu e Arii, ma te taparuparu e: “E hiˈo mai oe, e te Fatu, i ta ratou nei haamǎtaˈuraa mai; e faaitoito mai i to mau tavini ia parau noa i to parau ma te mǎtaˈu ore.” Eaha te faahopearaa? A pure ai ratou, aueue ihora ta ratou vahi e apoo ra, î maira ratou atoa i te varua moˈa e ua parau noa ihora i te parau a te Atua ma te mǎtaˈu ore. Ia fariu ïa tatou ia Iehova ra na roto i te pure e ia tiaturi i ta ˈna tauturu maoti te varua moˈa a rave ai tatou i ta tatou taviniraa.
13. Eaha te tupu mai i nia ia Ierusalema e ia Samaria, e no te aha?
13 A feruri â na i te tau o Mika. Ia au i te Mika 3:9-12, e haava te feia faatere taparahi taata ma te petahia, e haapii te mau tahuˈa ma te aufauhia, e e rave te mau peropheta haavare i te peu hiˈohiˈo no te moni. E ere i te mea maere ia faaoti te Atua e “e riro” o Ierusalema, te oire pu o Iuda, “ei puea”! I te mea e ua parare te haamoriraa hape e te viivii morare i Iseraela atoa, ua faauruahia o Mika no te faaara e e faariro te Atua ia Samaria ei “puea.” (Mika 1:6) Oia mau, e ora paha te peropheta e ia ite roa ˈtu oia i te haamouraa o Samaria e te mau nuu Asura mai tei tohuhia, i te matahiti 740 H.T.T. (Te mau arii 2, 17:5, 6; 25:1-21) Mea maramarama maitai e maoti noa te puai o Iehova e porohia ˈi teie mau poroi etaeta no nia ia Ierusalema e ia Samaria.
14. Mea nafea te parau tohu i roto i te Mika 3:12 i te tupuraa, e e nafea te reira ia ohipa i nia ia tatou e tia ˈi?
14 Eita roa ˈtu e tia ia Iuda ia ape i te faautuaraa a Iehova. Ia au i te parau tohu i roto i te Mika 3:12, e “arotehia Ziona mai te aua.” I te mea e te ora nei tatou i te senekele 21, ua ite tatou e ua tupu taua mau mea ra i to Babulonia faaanoraa ia Iuda e ia Ierusalema i te matahiti 607 H.T.T. Ua tupu te reira e rave rahi matahiti i muri aˈe i to Mika tohuraa, ua papu râ ia ˈna e e tupu iho â. E mea tia atoa ïa ia tiaturi tatou e e mou teie nei faanahoraa ino o te mau mea i te “mahana o te Atua” i tohuhia.—Petero 2, 3:11, 12.
E faatitiaifaro Iehova i te mau mea
15. Na roto i ta outou iho parau, e nafea outou e faataa ˈi i te parau tohu i roto i te Mika 4:1-4?
15 Ia hiˈo tatou i muri, e ite tatou e e poro Mika i muri iho i te hoê poroi tiaturiraa oaoa roa. E mau parau faaitoito mau ta tatou e ite ra i roto i te Mika 4:1-4 (MN)! Te na ô ra Mika e: “E riro ia tae i te mau mahana hopea ra, e faatiahia ˈi te mouˈa ra o te fare o Iehova i nia i te tupuai mouˈa, e faateiteihia ïa i nia i te mau aivi; e tairuru atoa mai te mau etene i reira. . . . E na ˈna e haava i roto i te taata atoa e rave rahi, e na ˈna e [faatitiaifaro i te mau mea] i roto i te mau fenua puai i te atea ê ra; e tiapai ratou i ta ratou ˈoˈe ei auri arote, e ta ratou mau mahae ei tipi tope vine ïa: e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi. E parahi râ ratou o te taata atoa i raro aˈe i ta ˈna iho vine, e i raro aˈe i ta ˈna iho suke, e aore roa e taata e haamǎtaˈu mai ia ratou: o te vaha hoi o Iehova sabaota ra, tei parau mai.”
16, 17. E nafea te Mika 4:1-4 e tupu ai i teie mahana?
16 O vai ma “te taata atoa e rave rahi” e “te mau fenua puai” i faahitihia i ǒ nei? E ere ïa te mau fenua e te mau faatereraa o teie nei ao. Te faahiti ra râ te parau tohu i te mau taata no te mau fenua atoa tei tahoê i roto i te taviniraa moˈa i nia i te mouˈa o te haamoriraa mau a Iehova.
17 Ia au i te parau tohu a Mika, e fatata te haamoriraa viivii ore a Iehova i te haapaohia na te ao atoa. I teie nei, te haapiihia ra te feia “[aau farii e tano] no te ora mure ore” i te mau eˈa o Iehova. (Ohipa 13:48; MN) Te haava ra o Iehova e te faatitiaifaro ra i te mau mea i te pae varua no te feia faaroo e paturu ra i te Basileia. E ora ˈtu ratou i “te ati rahi” ei melo o te “feia rahi roa.” (Apokalupo 7:9, 14) I te mea e ua tiapai ratou i ta ratou mau ˈoˈe ei auri arote, te ora ê na ra ratou i teie nei i roto i te hau e te mau hoa Ite no Iehova e o vetahi ê atoa. Auê te oaoa e ia parahi i rotopu ia ratou!
Faaoti maite e haere ma te iˈoa o Iehova
18. E taipe ‘te parahiraa i raro aˈe i ta ˈna iho vine e ta ˈna iho tumu suke,’ no te aha?
18 I to tatou nei tau e te vai ra te mǎtaˈu i nia i te fenua mai te hoê ata faarumaruma, te oaoa roa nei tatou e mea rahi teie e haapii nei i te mau eˈa o Iehova. Te tiai ru nei tatou i te tau e fatata roa maira i teie nei e ore roa ˈi taua feia here i te Atua atoa ra e haapii faahou i te tamaˈi, e parahi ai râ i raro aˈe i ta ratou iho vine e ta ratou iho tumu suke. E pinepine te mau tumu suke i te tanuhia i roto i te mau ô vine. (Luka 13:6) Te parahiraa i raro aˈe i ta ˈna iho vine e ta ˈna iho tumu suke, e taipe ïa no te mau huru tupuraa hau, te ruperupe, e te panoonoo ore. I teie nei atoa, e horoa mai to tatou taairaa e o Iehova i te hau o te feruriraa e te panoonoo ore i te pae varua. Ua raea anaˈe taua mau huru tupuraa ra i raro aˈe i te faatereraa a te Basileia, eita tatou e mǎtaˈu faahou e e ite tatou i te panoonoo ore hope.
19. Eaha te auraa e haere ma te iˈoa o Iehova?
19 No te fanaˈo i te farii maitai e te haamaitairaa a te Atua, e mea titauhia ia haere tatou ma te iˈoa o Iehova. Te faaite-maitai-hia ra te reira i roto i te Mika 4:5, te na ô ra hoi te peropheta e: “E haere noa te mau taata ěê atoa ma te iˈoa anaˈe o to ˈna iho atua; e haere râ tatou ma te iˈoa o Iehova, o to tatou ïa Atua e a muri noa ˈtu.” Te haereraa ma te iˈoa o Iehova, e ere noa ïa i te parauraa e o ˈna to tatou Atua. E ere noa atoa i te apitiraa i roto i te mau putuputuraa Kerisetiano e te pororaa i te Basileia, noa ˈtu e mea faufaa roa te reira. Mai te peu e te haere ra tatou ma te iˈoa o Iehova, ua pûpûhia ïa tatou ia ˈna e te faaitoito maite ra i te tavini ia ˈna no to tatou here ia ˈna ma to tatou nephe atoa. (Mataio 22:37) Ei feia haamori mau, ua faaoti maite tatou e haere ma te iˈoa o to tatou Atua ra o Iehova e a muri noa ˈtu.
20. Eaha tei tohuhia i roto i te Mika 4:6-13?
20 I teie nei, e hiˈopoa anaˈe na i te mau parau tohu i roto i te Mika 4:6-13. E mea tia ia hopoi-tîtî-hia “te tamahine a Ziona” “e tae noa ˈtu i Babulonia.” O te reira mau â tei tupu i nia i te feia no Ierusalema i te senekele 7 H.T.T. Teie râ, te faaite ra te parau tohu a Mika e e hoˈi te hoê toea i Iuda, e ia haamau-faahou-hia o Ziona, e haapao maite o Iehova e ua faahuˈahuˈahia to ˈna mau enemi.
21, 22. Mea nafea te Mika 5:2 i te tupuraa?
21 Te tohu ra te Mika pene 5 i te tahi atu mau tupuraa rarahi. Ei hiˈoraa, a tapao na eaha te parauhia ra i roto i te Mika 5:2-4. Te tohu ra o Mika e mai roto mai ia Betelehema e tae mai ai te hoê Arii faatoroahia e te Atua, “mai tahito mai â hoi to ˈna haerea” mai. E faatere oia ei tiai mamoe “ma te puai o Iehova.” Hau atu â, e rahi teie Arii eiaha noa i Iseraela, “e tae noa ˈtu [râ] i te hopea mai o te fenua.” Aita paha te rahiraa o to te ao i ite o vai oia, no tatou râ, e ere ïa i te parau huna.
22 O vai te taata faufaa roa ˈˈe i fanauhia aˈenei i Betelehema? E o vai ‘te rahi e tae noa ˈtu i te hopea mai o te fenua’? Aita ˈtu ïa maori râ o te Mesia, o Iesu Mesia! I to Heroda uiraa i te mau tahuˈa rarahi e te mau papai parau ihea te Mesia e fanauhia ˈi, ua pahono ratou e: “Ei Bete-lehema Iudea nei.” Ua faahiti atoa ratou i te mau parau o te Mika 5:2. (Mataio 2:3-6) Ua ite atoa te tahi pae o te feia au noa i te reira, te faahiti ra hoi te Ioane 7:42 i ta ratou i parau: “Aore anei i na ô mai te parau i papaihia ra e, No te fetii o Davida te Mesia, no Bete-lehema no te oire no reira Davida ra?”
Haumârû mau no te taata
23. Eaha te tupu nei ia au i te Mika 5:7?
23 Te faahiti ra te Mika 5:5-15 i te hoê aroraa a to Asura tei manuïa maa taime poto noa e te faaite ra e e tahoo te Atua i nia i te mau nunaa faaroo ore. Te fafau ra te Mika 5:7 i te hoˈiraa o te hoê toea ati Iuda tatarahapa i to ratou fenua, e au atoa râ tera mau parau i to tatou tau. Te na ô ra Mika e: “E vai â te toea o Iakoba i roto i te taata atoa ra e rave rahi, mai te hau no ǒ ia Iehova ra, mai te tuâ ûa i nia i te aihere ra.” Te faaohipahia ra teie faataiperaa nehenehe no te tohu e e riro te toea o Iakoba, aore ra Iseraela, i te pae varua, ei haamaitairaa a te Atua i te nunaa. Te oaoa nei ta Iesu mau “mamoe ê atu” o te tiaturi ra e ora i te fenua nei, i te tavini ma te aau hoê e te toea no teie tau o ‘te Iseraela o te Atua,’ a tauturu atu ai i te tamǎrû ia vetahi ê i te pae varua. (Ioane 10:16; Galatia 6:16; Zephania 3:9) I te reira paeau, te vai ra te tahi atu manaˈo e mea tia ia feruri maite. Ei feia poro i te Basileia, e mea maitai ia poihere tatou paatoa i ta tatou fanaˈoraa taa ê e hopoi i te haumârû mau ia vetahi ê.
24. Eaha te mau manaˈo o te Mika pene 3 e tae atu i te pene 5 ta outou i putapû?
24 Eaha ta outou i haapii mai na roto i te pene 3 e tae atu i te pene 5 o te parau tohu a Mika? Peneiaˈe teie mau manaˈo: (1) Te titau ra te Atua ia faaohipahia te parau-tia e te feia e hopoia ta ratou i roto i to ˈna nunaa. (2) Eita Iehova e pahono i ta tatou mau pure ia rave tatou i te hara ma te opua. (3) E nehenehe ta tatou ohipa pororaa e ravehia mai te peu noa e e faaitoito te Atua ia tatou na roto i to ˈna varua moˈa. (4) No te fanaˈo i te farii maitai a te Atua, e mea titauhia ia haere tatou ma te iˈoa o Iehova. (5) Ei feia poro i te Basileia, e mea maitai ia poihere tatou i ta tatou fanaˈoraa taa ê e hopoi i te haumârû mau i te taata. Ua putapû paha outou i te tahi atu mau manaˈo. Eaha ˈtu â ta tatou e nehenehe e haapii mai na roto i teie buka bibilia parau tohu? E tauturu mai to muri iho tumu parau ia huti mai i te mau haapiiraa e au ia faaohipa na roto i na pene hopea e piti o te parau tohu a Mika o te haapuai i te faaroo.
E nafea outou e pahono ai?
• Eaha ta te Atua e titau ra i te feia aratai i roto i to ˈna nunaa?
• No te aha e mea faufaa ˈi te pure e te varua moˈa i roto i ta tatou taviniraa ia Iehova?
• E nafea te taata e ‘haere ai ma te iˈoa o Iehova’?
[Uiraa Haapiiraa]
[Hohoˈa i te api 13]
E nehenehe anei outou e faataa i te faahohoˈaraa a Mika no nia i te pani rahi?
[Hohoˈa i te api 14]
Mai ia Mika, te faaitoito nei tatou i te rave i ta tatou taviniraa