Ihea e itea mai ai te hau o roto mai?

Mea rahi te mau taa-ê-raa i rotopu i to tatou tau e te tau o Thoreau, tei faahitihia i roto i te tumu parau na mua ˈtu. Te hoê o te mau taa-ê-raa, oia hoi, i teie mahana, aita e erehia ra te mau aˈoraa nafea ia fanaˈo i te hau o te feruriraa. E pûpû te mau tahuˈa manava, te feia papai i te mau buka tauturu—e tae noa ˈtu te mau papai vea—i to ratou mau manaˈo. E tauturu paha ta ratou aˈoraa no te hoê taime poto; no te mau ravea maitai maoro râ, e hinaarohia ïa te hoê mea hohonu atu â. O te mea ïa i itea mai e te mau taata i faahitihia i roto i te tumu parau na mua ˈtu.

MEA taa ê te huru oraraa o Antônio, o Marcos, o Gerson, o Vania e o Marcelo e mea taa ê to ratou mau fifi. E toru aˈe râ mau mea e au ia ratou paatoa. A tahi, te vai na ratou ma “te tiaturiraa ore, e aore hoi e Atua i te ao nei.” (Ephesia 2:12) A piti, te hinaaro rahi ra ratou i te hau o te feruriraa. E a toru, ua itea mai ia ratou paatoa te hau o roto mai ta ratou i hinaaro i muri aˈe i to ratou fariiraa i te hoê haapiiraa Bibilia e te mau Ite no Iehova. A haere ai ratou i mua, ua ite maira ratou e te anaanatae maira te Atua ia ratou. Oia mau, mai ta Paulo i parau atu i to Ateno i to ˈna ra tau, “aita” te Atua  “i atea ê atu ia tatou atoa nei.” (Ohipa 17:27) Ia papu maitai ia tatou te reira, e riro ïa ei tumu rahi e fanaˈo ai i te hau o roto mai.

No te aha e iti roa ˈi te hau?

Te faaite maira te Bibilia e piti tumu rahi e ere ai te hau—te hau o roto mai anei aore ra i rotopu i te taata—i te ao nei. Te faataahia ra te matamua i roto i te Ieremia 10:23: “E ere tei te taata iho to ˈna haerea; e ere hoi tei taua taata e haere ra i te haapao i to ˈna taahiraa.” Aita to te taata e paari aita atoa e ite-atea-raa no te faatere ia ˈna iho ma te tauturu ore, e te tauturu hoê roa e te faufaa mau, no ǒ mai ïa i te Atua ra. Eita roa ˈtu e noaa te hau maoro i te taata e ore e imi i te aratairaa a te Atua. Te itehia ra te piti o te tumu e erehia ˈi te hau, i roto i te mau parau a te aposetolo Ioane: “Te vai noa nei to te ao atoa i raro aˈe i taua varua ino ra.” (Ioane 1, 5:19) Aita anaˈe te aratairaa a te Atua, e faataupupu-noa-hia te mau tutavaraa a te taata no te fanaˈo i te hau e te mau ohipa a te mea itea ore o te vai mau ra râ—e te puai roa—te “varua ino ra” o Satani.

No teie na tumu e piti—oia hoi eita te rahiraa o te taata e imi i te aratairaa a te Atua e te ohipa rahi nei Satani i te ao nei—mea peapea roa te huru o te huitaata atoa. Ua faataa maitai te aposetolo Paulo i te reira: “Te uuru tahi nei te mau mea atoa i hamanihia nei ma te mauiui fanau ra e tae roa aˈenei i teie nei mahana.” (Roma 8:22) O vai te nehenehe e patoi i teie parau? I te mau fenua taoˈa rahi e oia atoa i te mea veve, e faaere te mau fifi utuafare, te ohipa ino, te parau-tia ore, te mau tatamaˈiraa, te papu ore o te ihiihi, te riri i te tahi atu opu taata, te faaheporaa, te maˈi e e rave rahi atu â, i te taata i to ratou hau o te feruriraa.

Ihea e itea mai ai te hau o roto mai

I to Antônio, Marcos, Gerson, Vania e Marcelo haapiiraa i te Parau a te Atua, te Bibilia, ua haapii ratou i te mau mea tei taui i to ratou oraraa. A tahi, ua haapii ratou e e taui te huru o te ao nei ia tae i te hoê mahana. E ere noa i te hoê tiaturiraa mohimohi e e maitaihia mai te mau mea atoa i te pae hopea. E tiaturiraa mau e te niu-maitai-hia e e opuaraa ta te Atua no te huitaata e i teie nei â, e nehenehe tatou e fanaˈo i taua opuaraa ra ia rave tatou i to ˈna hinaaro. Ua faaohipa ratou i ta ratou i haapii i roto i te Bibilia i roto i to ratou oraraa, e ua maitai mai te mau mea no ratou. Ua itea mai ia ratou te oaoa e te hau rahi aˈe i ta ratou i manaˈo na e e nehenehe.

Aita Antônio e haere faahou ra i roto i te mau patoiraa e te mau aroraa i te pae o te ohipa. Ua ite oia e mea taotiahia e e taime poto noa to te mau tauiraa e faatupuhia na roto i taua ravea ra. Ua haapii teie faatere ohipa tahito no nia i te Basileia o te Atua. O te Basileia ïa ta te mau mirioni taata e pure ra ia faahiti ratou i te Pure a te Fatu (aore ra, te To matou Metua) e ia parau atu ratou i te Atua e: “Ia tae mai to oe Basileia.” (Mataio 6:10a, New International Version) Ua haapii Antônio e e faatereraa mau te Basileia o te Atua tei nia i te raˈi o te hopoi mai i te hau mau na te huitaata.

Ua haapii o Marcos i te faaohipa i te mau aˈoraa Bibilia paari no nia i te faaipoiporaa. Ei faahopearaa, ua tahoê faahou teie taata politita tahito i ta ˈna vahine e te oaoa nei oia. Te ru atoa ra oia i te tau e fatata maira i reira te Basileia o te Atua e mono ai i te faanahoraa nounou e te miimii o te ao nei na roto i te hoê ao maitai aˈe. Ua taa hohonu atu â ia ˈna te pereota i roto i te Pure a te Fatu e na ô ra e: “Ia haapaohia to oe hinaaro i te fenua nei mai tei te raˈi atoa ra.” (Mataio 6:10b, NIV) Ia oti te hinaaro o te Atua i te haapaohia i te fenua nei, e ite te taata i te hoê oraraa aitâ i itehia aˈenei.

E o Gerson? Eita oia e oere haere e e eiâ faahou. E auraa to te oraraa o teie tamarii i faaea noa na i rapae, i teie nei, no te mea e faaohipa oia i to ˈna itoito no te tauturu ia vetahi ê ia itea mai te hau o roto mai. Mai ta teie mau aamu e faaite ra, e nehenehe mau â te haapiiraa i te Bibilia e te  faaohiparaa i ta ˈna e parau ra e taui i te oraraa o te hoê taata e ia maitai aˈe.

Te hau o roto mai i roto i te hoê ao arepurepu

Te taata rahi roa ˈˈe i roto i te tuatapaparaa o te rave roa i te hinaaro o te Atua, o Iesu Mesia ïa, e ia haapii te taata i te Bibilia e te mau Ite no Iehova, e haapii rahi ratou no nia ia ˈna. I te po i fanau ai oia, ua himene te mau melahi i te mau arueraa i te Atua: “Ia haamaitaihia te Atua i nia i te raˈi teitei, ei hau to teie nei ao, e ia ite auhia mai te taata nei.” (Luka 2:14) I to Iesu paariraa mai, ua haapeapea oia i te haamaitai i te oraraa o te taata. Ua taa ia ˈna to ratou mau manaˈo hohonu e ua faaite oia i te aau aroha taa ê i te feia i hepohepo e i tei maˈi. E, ia au i te mau parau a te mau melahi, ua hopoi mai oia i te tahi maa hau o roto mai na te feia mǎrû. I te hopea o ta ˈna taviniraa, ua parau oia i ta ˈna mau pǐpǐ e: “E hau ta ˈu e vaiiho ia outou nei, o to ˈu nei hau ta ˈu e ho atu no outou; e ere mai ta to te ao nei horoa ta ˈu horoa ia outou. Eiaha e taiâ to outou aau, eiaha hoi e mǎtaˈu.”—Ioane 14:27.

Ua hau atu Iesu i te hoê noa rima tauturu huitaata. Ua faaau oia ia ˈna iho i te hoê tiai mamoe, e ta ˈna mau pǐpǐ mǎrû i te mamoe i to ˈna parauraa e: “I haere mai nei au ia noaa to ratou ora, e ia rahi atu â te ora. O vau te tiai mamoe maitai. E horoa te tiai mamoe maitai i to ˈna iho ora no te mamoe.” (Ioane 10:10, 11) Oia, ma te taa ê roa i te mau aratai e rave rahi i teie mahana o te haapao noa ia ratou iho na mua, ua horoa Iesu i to ˈna ora no ta ˈna mau mamoe.

Nafea tatou e faufaahia ˈi i ta Iesu i rave? Mea matau maitai i te rahiraa te mau parau ra: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16) No te faaohipa i te faaroo ia Iesu, na mua roa, e titauhia ia noaa te ite no nia ia ˈna e to ˈna Metua o Iehova. E nehenehe te ite i te Atua e ia Iesu Mesia e faatupu i te taairaa piri roa e te Atua ra o Iehova o te tauturu ia noaa ia tatou te hau o te feruriraa.

Ua parau Iesu e: “E faaroo mai ta ˈu ra mamoe i to ˈu reo . . . , ua ite au ia ratou, e e pee mai hoi ratou ia ˈu. E e horoa ˈtu â hoi au i te ora mure ore no ratou; e ore roa ratou e pohe, e e ore roa hoi ratou i roto i tau rima nei e riro i te haru ia vetahi ê.” (Ioane 10:27, 28) E mau parau mahanahana mau teie! Parau mau, ua faahiti Iesu i te reira fatata a piti tausani matahiti aˈenei, hoê â râ te puai i teie nei e i taua tau ra. Eiaha roa ˈtu e haamoe e te ora e te ohipa noa râ Iesu, a faatere ai i teie nei ei Arii faateronohia o te Basileia o te Atua i te raˈi. Mai i to ˈna tiaraa mai i te fenua nei ahia matahiti aˈenei, te haapeapea noa râ oia no te feia mǎrû o te hinaaro rahi i te hau o te feruriraa. Hau atu â, o o ˈna noâ te Tiai mamoe o ta ˈna mau mamoe. Ia pee tatou ia ˈna, e tauturu mai oia ia noaa ia tatou te hau o roto mai, tae noa ˈtu te tiairaa ma te tiaturi i te hau taatoa no a muri aˈe—oia atoa ïa i te ore-roa-raa te haavîraa uˈana, te tamaˈi, e te ohipa ino.

E noaa mai te mau haamaitairaa mau maoti te iteraa e te tiaturiraa e e tauturu mai Iehova ia tatou na roto ia Iesu. A haamanaˈo na ia Vania, tei vaiihohia ei tamahine apî ma te mau hopoia teimaha e tei manaˈo na e ua haamoe te Atua ia ˈna? I teie nei, ua ite Vania e aita te Atua i faarue ia ˈna. Te na ô ra oia e: “Ua haapii au e e ihotaata mau te Atua e te mau huru maitatai au mau. Ua turai to ˈna here ia ˈna ia tono mai i ta ˈna Tamaiti i te fenua nei e horoa i te ora no tatou. Mea faufaa roa ia ite i te reira.”

Te haapapu ra o Marcelo e mea mau iho â to ˈna taairaa e te Atua. Teie te manaˈo o teie taata e haere noa na e arearea: “E pinepine aita te feia apî i ite eaha te ohipa e rave, e i te pae hopea, e haamauiui ratou ia ratou iho. E topa te tahi pae i  roto i te rave-hua-raa i te raau taero, mai ia ˈu iho. Te hinaaro nei au e ia haamaitaihia e rave rahi atu â, mai ia ˈu nei, na roto i te haapiiraa i te parau mau no nia i te Atua e ta ˈna Tamaiti.”

Maoti te hoê haapii-maitai-raa i te Bibilia, ua faatupu o Vania e o Marcelo i te hoê faaroo puai i te Atua e te hoê tiaturi i to ˈna hinaaro mau e tauturu ia ratou ia faaruru i to ratou mau fifi. Ia rave tatou i ta ratou i rave—oia hoi e haapii i te Bibilia e e faaohipa i ta ˈna e parau ra—e itea mai ia tatou te hoê faito rahi hau o roto mai, mai ia ratou atoa ra. I reira ïa te faaitoitoraa a te aposetolo Paulo e au mau ai ia tatou: “Eiaha outou e ahoaho noa ˈtu i te mau mea atoa nei; e faaite hua râ i to outou hinaaro i te mau mea atoa nei i te Atua, i te pure, i te aniraa ˈtu ma te haamaitai. E na te hau a te Atua, o tei hau ê atu i te ite taata nei, e faaitoito mai i to outou aau, e to outou manaˈo i te Mesia nei ia Iesu.”—Philipi 4:6, 7.

Te iteraa mai i te hau mau i teie mahana

Te aratai ra Iesu Mesia i te feia e hiaai ra i te parau mau i nia i te eˈa o te aratai i te ora mure ore i roto i te paradaiso fenua. A aratai ai oia ia ratou i roto i te haamoriraa viivii ore a te Atua, e ite mai ratou i te hau e au i ta te Bibilia e faataa ra: “E parahi hoi to ˈu ra mau taata i roto i te fare mau e te peapea ore, e tia i roto i te parahiraa ora, e te vahi hauti-ore-hia mai.” (Isaia 32:18) E e hiˈoraa atea noa tera o te hau ta ratou e fanaˈo a muri aˈe. Te taio nei tatou e: “Area te feia mǎrû ra, e parahi ïa i te fenua, e oaoa ratou i te rahi o te hau ra. E parahi te feia parau-tia i nia i te fenua, e parahi tamau â ratou i reira.”—Salamo 37:11, 29.

E nehenehe anei ïa tatou e fanaˈo i te hau o roto mai? E. Hau atu â, e nehenehe e papu ia tatou e fatata roa te Atua i te haamaitai i te feia faaroo i te hau aitâ i itehia aˈenei. No te aha ïa e ore ai e ani ia ˈna na roto i te pure e horoa mai i to ˈna hau no outou? Mai te peu e e fifi to outou o te faaere ia outou i te hau, a pure mai ta te arii Davida i pure: “Ua rahi iho nei te mauiui o tau aau: e faaora oe ia ˈu i tau mau ati nei. E hiˈo mai oe i tau pohe e tau mauiui, e faaore mai oe i tau mau hara atoa nei.” (Salamo 25:17, 18) Ia papu ia outou e e faaroo te Atua i taua mau pure ra. E faatoro oia i to ˈna rima e horoa i te hau na te feia atoa e imi i te reira ma te aau haavare ore. Te tamahanahanahia maira tatou ma te here e: “Te fatata maira Iehova i te feia e tiaoro atu ia ˈna, i te feia atoa i tiaoro atu ia ˈna ma te haavare ore. E faatia oia i te hinaaro o te feia i mǎtaˈu ia ˈna, e faaroo mai oia i ta ratou tiaoro, e e faaora hoi ia ratou.”—Salamo 145:18, 19.

[Parau iti faaôhia i te api 5]

Aita to te taata e paari aita atoa e ite-atea-raa no te faatere ia ˈna iho ma te tauturu ore, e te tauturu hoê roa e te faufaa mau, no ǒ mai ïa i te Atua ra

[Parau iti faaôhia i te api 6]

E nehenehe te ite i te Atua e ia Iesu Mesia e faatupu i te taairaa piri roa e te Atua ra o Iehova o te tauturu ia noaa ia tatou te hau o te feruriraa

[Hohoˈa i te api 7]

E tauturu te peeraa i te aˈoraa Bibilia ia ora i te hoê oraraa utuafare hau