Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TENUARE 2015

Ua ite i te tamahanahanaraa i te taime i hinaaro roa ’i au i te reira

Ua ite i te tamahanahanaraa i te taime i hinaaro roa ’i au i te reira

I roto i te pape, ua taa oioi ia ’u e fifi tei tupu. Ua tamata i te fariu i to ’u upoo i rapae no te huti i te aho, aita râ te mau uaua i‘o o to ’u a‘î i hauti noa ’‘e. Ua riaria roa vau e ua tamata i te huri ia ’u, aita râ to ’u mau rima e ava‘e i hinaaro e hauti. Ua haamata te pape i te ô i roto i to ’u mahaha. I te ava‘e Tiunu 1991, ua taui roa to ’u oraraa.

UA FANAUHIA vau i te oire Szerencs e ua paari i te oire iti Tiszaladány i te pae apatoerau hitia o te râ o Honegeria. I te ava‘e Tiunu 1991, ua haere au e vetahi hoa i te tahi vahi matau-ore-hia o te anavai Tisza. Ma te mana‘o e mea hohonu tera vahi, ua ou‘a vau i roto i te pape. Auê te hape e! Ua fati e toru ivi o to ’u a‘î e ua ino to ’u mootuaio. Ua ite te tahi hoa aita faahou vau e hauti ra e ua rave mǎrû ia ’u no te huti mai i rapae hou vau a paremo roa ’i.

Aita to ’u hiroa i moe noa ’‘e e ua taa ia ’u e fifi rahi tei tupu. Ua niuniuhia te fare utuuturaa ma‘i ru e ua tae mai hoê manureva tautau no te afai ia ’u i te fare ma‘i. Ua tâpûhia vau ia ore to ’u mootuaio ia ino roa ’tu â. I muri a‘e, ua afaihia vau i Budapest i roto i te tahi pu e haapao i te feia i tâpûhia. E toru ava‘e to ’u tarava-noa-raa. Noa ’tu e nehenehe ta ’u e hauti i to ’u upoo, ua ino roa to ’u mau uaua i‘o mai te tapono e tae roa ’tu te toea o te tino. E 20 matahiti to ’u, e titauhia râ te tauturu a te tahi atu taata no te mau mea atoa. Ua tâhiti roa vau e ua hinaaro ïa e pohe.

I te taime a nehenehe ai au e ho‘i i te fare, ua haapiihia to ’u na metua e nafea ia rave ia ’u. E ere râ te ohipa nainai, ua rohirohi e ua hepohepo hoi raua. Hoê matahiti i muri a‘e, o vau tei topa i roto i te hepoheporaa. Ua tauturuhia vau e te tahi taata, to ’na toroa te faaitoitoraa ia ’u ia taui i to ’u huru feruriraa noa ’tu to ’u tupuraa.

Ua haamata atoa vau i te feruri mau i te oraraa. No te aha tatou i hamanihia ’i? No te aha vau i roohia ’i i tera ati? Ua taio vau i te mau vea e buka no te imi i te pahonoraa. Ua tamata atoa i te taio i te Bibilia, mea paari roa râ no ’u ia taa e ua taora ’tura i te tauera. Ua aparau vau e te tahi perepitero, aita râ i mauruuru i ta ’na i parau mai.

I 1994, e piti Ite no Iehova tei haere mai e farerei i to ’u metua tane e ua ani atu oia ia aparau  raua ia ’u. Ua faaroo vau a faataa ’i raua i te opuaraa a te Atua ia faariro i te fenua ei paradaiso e ia faaore i te ma‘i e te mauiui. Mea maitai te reira, ua feaa râ vau i te tiaturi i tera mau parau. Noa ’tu râ, ua farii au e piti papai no te taa i te Bibilia. Otiraa te reira i te taiohia e au, ua pûpû mai te mau Ite ia haapii i te Bibilia e ua farii au. Ua faaitoito atoa mai ratou ia pure.

Ua papu atoa e te tâu‘a mau ra te Atua ia ’u

I roto i ta matou mau aparauraa, ua pahonohia e rave rahi o ta ’u mau uiraa maoti te Bibilia. Ua papu atoa e te tâu‘a mau ra te Atua ia ’u. Ua tamau â vau i te haapii i te Bibilia e piti matahiti e i te 13 no Tetepa 1997, ua bapetizohia vau i te fare i roto i te fare hopuraa pape. Tera te tahi mahana oaoa roa ’‘e o to ’u oraraa.

I 2007, ua afaihia vau i Budapest no te faaea i te tahi fare no te mau huma mero. Ua nehenehe au e faaite ia vetahi ê i te mau ohipa faahiahia ta ’u i haapii. Mea maitai ana‘e te mahana, e nehenehe au e haere i rapae no te aparau i te taata. E faaohipa vau i te tahi parahiraa faaterehia e te matini, na to ’u râ taa e aratai i te reira.

No te maitai o te tahi utuafare o ta ’u amuiraa, ua noaa ia ’u te moni no te hoo mai i te matini roro uira afaifai o te haa ia hauti au i to ’u upoo. Ma tera ravea, e nehenehe au e niuniu na roto i te Internet e e papai i te feia aita i to ratou fare a poro atu ai ta ’u amuiraa. Ma te tauturu ia vetahi ê mai tera, ua aravihi atu â vau no te faaite i te taata i to ’u mana‘o e ia ore ia haapao noa ia ’u.

Te faaite ra vau i te poroi o te Bibilia na roto i te Internet maoti te tahi matini e haa ia hauti au i to ’u upoo

E nehenehe atoa vau e haere i te mau putuputuraa Kerisetiano. Ia tae atu vau, e amo to ’u mau taeae Kerisetiano ia ’u i nia i to ’u parahiraa e tae roa i te tahua matamua o te tahi fare i reira e vai ai te Piha a te Basileia. I te putuputuraa, ia anihia te taatoaraa ia pahono, e amo te taeae i pihai iho ia ’u i to ’na rima no ’u. E tapea oia i ta ’u Bibilia aore ra ta ’u buka a horoa ’i au i ta ’u pahonoraa.

E mauiui noa to ’u tino, e hinaaro tamau vau i ta vetahi ê tauturu e te tahi mau taime, e hepohepo atoa. Auê râ tamahanahanaraa ia fana‘o i te auhoaraa e te Atua ra o Iehova! Ua ite hoi au te faaroo ra oia ia haamahora ’tu vau i to ’u aau. E faaitoito atoa mai te taio-tamau-raa i te Bibilia e te mau taeae e tuahine Kerisetiano. Maoti to ratou auhoaraa, ta ratou tauturu e pure no ’u, ua tia ia ’u ia faaite noa i te mana‘o tano e te huru maitai.

Ua horoa mai Iehova i te tamahanahanaraa i te taime i hinaaro roa ’i au i te reira. Maoti oia, te tiaturi atoa ra vau e fana‘o i te ea maitai i roto i te ao apî. No reira, te tiai ru nei au i te taime e nehenehe ai au e ‘hahaere, e ou‘a e e haamaitai’ ia ’na no to ’na here e maitai faito ore.—Ohipa 3:6-9.

No te ite atu â

A faaoromai no te mea te vai ra te tiaturiraa

E nehenehe te tiaturiraa e tauturu ia oe ia faaoromai.

A faaoromai no te mea te vai ra te tauturu

Toru mana‘o e nehenehe e tauturu ia oe ia faaoromai.

Ia tupu te ati

E nehenehe te Bibilia e tauturu ia oe ia faaoromai i te ati.