Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TENUARE 2015

 TAUTURU NO TE UTUAFARE | NO TE METUA

Ia haavare to tamarii

Ia haavare to tamarii

TE FIFI

Te hauti ra ta oe tamarii e pae matahiti i roto i te piha. Faaroo ’tura oe ua topa te tahi mea. Haere a‘era oe e hi‘o e te itehia ra te mau hu‘ahu‘a o te tahi farii tiare i pihai iho ia ’na. Na to ’na noa hoho‘a e faaite atu no ’na te hape.

Ma te riri, na ô atura oe, “ua parari anei tera farii tiare ia oe?”

Oioi oia i te pahono, “aita mama!”

E ere a tahi ra to tamarii e pae matahiti e haavare ai. Mea tia anei ia haapeapea?

EAHA TE TIA IA ITE?

Mea ino te mau parau haavare atoa. Te faaite ra te Bibilia mea au ore na te Atua ra o Iehova i “te arero haavare.” (Maseli 6:16, 17) I roto i te ture i horoahia ia Iseraela, e faautua-etaeta-roa-hia te feia e haavare ia vetahi ê.—Levitiko 19:11, 12.

Mea taa ê râ te mau parau haavare atoa. Mea ino roa vetahi haavare, e parauhia hoi te reira no te haamauiui i te taata. No te haama aore ra no te tahi faautuaraa, e haavare paha vetahi i mua i te faaheporaa. (Genese 18:12-15) Mea ino te mau haavare atoa, mea taa ê râ vetahi. Ia haavare to tamarii, a haapao i to ’na faito matahiti e te tumu e huna ’i oia i te parau mau.

A faaafaro i tera fifi i te tamariiraa. Ua papai te taote David Walsh, “e haapiiraa faufaa roa no te mau tamarii ia faaite i te parau mau noa ’tu e ere te mea ohie. E maitai te taairaa e vetahi ê ia tiaturi te tahi i te tahi e e ore tera tiaturi no te haavare.” *

Eiaha e haapeapea roa ino. Ua haavare ta oe tamarii, e ere râ te auraa e riro iho â oia ei taata ino. A haamana‘o, te parau ra te Bibilia: “Ua mau roa te maamaa i roto i te aau o te tamarii.” (Maseli 22:15) E faaite vetahi tamarii i te haerea maamaa ma te haavare. Peneia‘e te mana‘o ra ratou tera te ravea ohie a‘e ia ore ratou ia faautuahia. Mea faufaa roa râ to huru ia tupu te reira.

 TA OE E NEHENEHE E RAVE

A feruri no te aha to tamarii i haavare ai. Ua mǎta‘u anei ia faautua ’tu oe? Ua hinaaro anei ia inoino oe? Ua hamani anei oia i te mana‘o ia au atu vetahi ê ia ’na? No to ’na faito matahiti, aita anei oia i na reira no te mea aita o ’na i taa ’tura mea taa ê te tupuraa mau e te aamu hamanihia? Ia ite oe no te aha to tamarii i haavare ai, e a‘o maitai a‘e oe ia ’na.—Aratairaa Bibilia: Korinetia 1, 13:11.

I te tahi taime, eiaha e ui. I roto i te tupuraa i te omuaraa, noa ’tu ua ite te mama eaha tei tupu, ma te riri ua ui oia i ta ’na tamarii: “Ua parari anei tera farii tiare ia oe?” Ua haavare te tamarii peneia‘e no te mea ua riri to ’na mama. A feruri na râ ahiri te mama i parau noa: “Auê hoi e, ua parari te farii tiare ia oe!” Ma te ore e ui, eita te tamarii e turaihia ia haavare e e tauturuhia oia ia faaite i te parau mau.—Aratairaa Bibilia: Kolosa 3:9.

A haapopou atu. Mea ohie a‘e ia haapii i te tamarii no to ratou hinaaro e faaoaoa i to ratou na metua. Ia ite ïa to tamarii mea faufaa no to outou utuafare ia faaite i te parau mau e tera te tumu e ani ai oe eiaha ia haavare.—Aratairaa Bibilia: Hebera 13:18.

A faataa maitai i te tamarii mai te peu e haavare te tahi taata, eita oia e tiaturi-faahou-hia e mea fifi roa no vetahi ê ia tiaturi faahou ia ’na. A faaitoito ia ’na ia faaite i te haerea maitai ma te haapopou atu ia faaite oia i te parau mau. E nehenehe oe e na ô, “ua oaoa roa vau i to oe faaiteraa i te parau mau.”

A horoa i te hi‘oraa. Papu maitai, eita te tamarii e faaite i te parau mau ia faaroo oia ia oe ia na ô, “a parau atu aita vau i te fare” no te mea aita oe e hinaaro e paraparau i te taata i niuniu atu. Aore ra, “e faaea noa vau i te fare, e ma‘i to ’u,” no te mea e hinaaro noa oe e tamǎrû ia oe.—Aratairaa Bibilia: Iakobo 3:17.

A haafaufaa i te Bibilia. E faaitoito te mau aratairaa e aamu Bibilia ia faaite i te parau mau. E nehenehe te buka Écoute le grand Enseignant piahia e te mau Ite no Iehova e tauturu i to tamarii ia farii i te mau aratairaa Bibilia. E ite oe i te pene 22 “Pourquoi nous ne devons pas mentir” o (A hi‘o te tahi tuhaa o te reira i roto i te tumu parau tarenihia “Te tahi buka e tauturu i to tamarii.”)

^ par. 11 No roto mai i te buka, No te aha e titauhia ia parau aita i te mau tamarii atoa e te ravea no te mau metua ia na reira. (Beretane)