Eaha to roto?

Mau faaho'iraa ê

Tapura tumu parau

Ite no Iehova

Tahiti

A ARA MAI NA! TENUARE 2015

 TUMU PARAU MATAMUA

Eaha te tia ia ite no nia i te ma‘i roro?

Eaha te tia ia ite no nia i te ma‘i roro?

No ite-noa-hia ’tura e ma‘i to Claudia i roto i to ’na roro, e taui noa to ’na huru e e ahoaho atoa no te tahi ati i tupu taue. Te na ô ra oia: “E au e aita faahou ta ’u e nehenehe e huti i to ’u aho. Mea haama roa ia parauhia e ma‘i roro to ’u, mea fifi roa ia farii.”

Ua parau Mark, te tane a Claudia: “Aita vau i farii oioi i to mâua tupuraa, ua taa râ ia ’u i muri a‘e mea faufaa roa ia turu vau i ta ’u vahine.”

MAI te aha to huru ia itehia e ma‘i roro to oe aore ra to te tahi taata herehia? Auaa, e nehenehe te ma‘i roro e rapaauhia. E hi‘opoa ana‘e te tia ia ite ia taa maitai atu â oe eaha te ma‘i roro. *

 Te tia ia ite no nia i te ma‘i roro

Ia au i te Taatiraa no te ea na te ao (OMS), tau hanere mirioni taata tei roohia i te mau ma‘i roro na te ao nei a taui atu ai te oraraa o te feia ta ratou e here ra. Hoê taata i nia e maha te roohia i te ma‘i roro i te hoê taime i roto i te oraraa. No te ahoaho i parare roa ’i te reira. I roto i te mau ma‘i roro atoa, o te ma‘i schizophrénie e bipolaire te haafifi mau i te oraraa. Noa ’tu e rave rahi taata tei roohia i te reira, e hunahia e e haafaufaa-ore-hia te ma‘i roro, e hi‘o-ino-atoa-hia te feia i roohia i tera mau ma‘i.

Ia au noa â i te OMS, no te haama ia faaite e ma‘i roro to ratou, e rave rahi te patoi i te mau ravea rapaauraa.

Ia au i te tahi taatiraa i Marite no te feia i roohia i te ma‘i roro, noa ’tu te mau ravea rapaauraa, fatata 60 i nia i te hanere o te mau taata paari e 50 i nia i te hanere o te feia apî, mai te 8 e tae atu 15 matahiti, tei ore i rapaauhia i te matahiti i mairi a‘enei i te Hau Amui.

 Faataaraa no nia i te ma‘i roro

Eaha te ma‘i roro? Ua faataa te feia hi‘opoa aravihi i te reira mai te tahi fifi e tupu i roto i te feruriraa, te huru e te haerea o te tahi taata. No tera hoho‘a ma‘i, e pinepine mea fifi no tera taata ia farerei ia vetahi ê e ia faaoromai i te mau tupuraa o te oraraa.

E ere râ te auraa e roohia oe i tera ma‘i mea paruparu ana‘e to tino

Ia au i te huru o te taata, te mauiui e te mau tupuraa ta ’na i ite, e nehenehe te mau tapao faaite o te ma‘i roro e vai maoro e e puai atu â. O vai te roohia i te ma‘i roro? Te tane e vahine, te taata paari e apî, te feia no te mau ta‘ere, nunaa taata e haapaoraa atoa, tei haere i te haapiiraa teitei aore ra eita, tei veve e tei tao‘ahia. E ere râ te auraa e roohia oe i tera ma‘i mea paruparu ana‘e to tino. Na roto i te mau ravea rapaauraa tano, e nehenehe te feia i roohia i tera ma‘i e mauruuru i te oraraa e e oaoa mau.

Ravea rapaauraa i te ma‘i roro

E rave rahi ma‘i roro ta te mau taote e nehenehe e rapaau maitai. Na mua roa râ, mea faufaa ia hi‘opoahia te taata ma‘i e te tahi taote papu tei matau i te rapaau i te feia e ma‘i roro to ratou.

E faufaahia te feia ma‘i i te taime noa e farii ai ratou i te rapaauraa tano. Eiaha ïa ratou ia taiâ i te faaite e ma‘i roro to ratou. Ua riro atoa te aparauraa e te mau taote aravihi ei ravea rapaauraa. E tauturu atu hoi ratou ia taa eaha tera ma‘i, nafea ia faaafaro i te fifi e ia tamau noa i te farii i te mau ravea rapaauraa. I tera mau farereiraa, mea faufaa roa te faaitoitoraa e te turu a te tahi fetii aore ra hoa.

E rave rahi tei nehenehe e faaoromai a taa ’i ia ratou eaha mau na tera ma‘i e a haapao ai i te ravea rapaauraa a te mau taote. Te na ô ra Mark tei faahitihia ’tu na, “hou a itehia ’i te ma‘i o ta ’u vahine, mea iti roa to mâua ite no nia i te ma‘i roro. Ua haapii râ mâua ia faaafaro hoê fifi i te taime e ia faatano i to mâua huru i mua i te tupuraa. I te roaraa o te tau, ua faufaahia mâua i te turu papu a te mau taote, oia atoa a te fetii e hoa.”

Na mua roa râ, mea faufaa ia hi‘opoahia te taata ma‘i e te tahi taote papu tei matau i te rapaau i te feia e ma‘i roro to ratou

Tera atoa te mana‘o o Claudia. Te faaî ra oia, “a itehia ’i eaha to ’u ma‘i, ua mana‘o  vau eita ta ’u e nehenehe faahou e rave i ta ’u e hinaaro. Ua haafifi te ma‘i ia mâua toopiti, ua taa râ ia ’u e nehenehe e faaoromai i te mau fifi rahi roa ’‘e. Noa ’tu te ma‘i roro, ua faaitoito noa vau ma te farii noa i te rapaauraa a te mau taote, ma te haapao i to ’u mau taairaa e vetahi ê e ma te ore e ru i te rave i te tahi ohipa.”

Mea faufaa roa te ite papu no nia i te Atua

Aita te Bibilia e faaite ra e nehenehe te mau ma‘i e ora ia ite te taata o vai te Atua. Ua tamahanahana e ua faaitoito râ ta te Bibilia e haapii ra e rave rahi utuafare na te ao. Te faaite papu ra hoi te reira e te tâu‘a mai ra iho â to tatou Atua poiete î i te here ma te tamahanahana i te feia “aau paruparu” e “te taata aau taiâ.”—Salamo 34:18.

E ere te Bibilia i te tahi buka no te rapaau i te ma‘i. Te faaite mai ra râ te reira i te aratairaa papu e tauturu ia tatou ia faaoromai i te hepohepo e te mau tupuraa ahoaho. E ite atoa tatou i te tiaturiraa no a muri a‘e ia ore roa te ma‘i e te mauiui i te fenua nei. Teie te parau fafau a te Bibilia: “Ei reira e faaaraarahia ’i te mata o te matapo ra, e amaha hoi te tari‘a o te feia tari‘a turi ra: ei reira te pirioi e ou‘au‘a noa ’i mai te aili, e himene mai hoi te vaha o te taata vava ra.”—Isaia 35:5, 6.

^ par. 5 I roto i teie tumu parau, e tano te parau ma‘i roro no te mau ma‘i atoa i roto i te roro mai te faataui i te huru e te haerea o te tahi taata.

^ par. 32 I roto i te A ara mai na!, aita e faaitoitohia ra ia farii i te tahi ravea rapaauraa taa ê. Ia ara te mau Kerisetiano eiaha ia ofati i te mau faaueraa Bibilia a farii ai i te tahi ravea rapaauraa.

^ par. 40 A hi‘o i te tumu parau, “Te ahoaho: ravea no te faaiti mai” i roto i te A ara mai na! Tiurai–Atete 2014.