Nghena endzeni

Hundzela eka leswi nga endzeni

Ndlela Yo Lemuka Vugandzeri Bya Ntiyiso

Ndlela Yo Lemuka Vugandzeri Bya Ntiyiso

 Ndlela Yo Lemuka Vugandzeri Bya Ntiyiso

VUKHONGERI byo tala byi vula leswaku leswi byi swi dyondzisaka swi huma eka Xikwembu. Hikwalaho, hi fanele hi yingisa marito ya Yohane muapostola wa Yesu, la tsaleke a ku: “Varhandziwa, mi nga kholwi marito hinkwawo lama huhuteriweke, kambe kambisisani marito lama huhuteriweke mi vona loko swi ri leswaku ma huma eka Xikwembu, hikuva ku humelele vaprofeta vo tala va mavunwa emisaveni.” (1 Yohane 4:1) Hi nga wu vona njhani nchumu loko wu huma eka Xikwembu?

Nchumu wihi ni wihi lowu humaka eka Xikwembu wu kombisa vumunhu bya xona, ngopfu-ngopfu mfanelo ya xona leyikulu, ku nga rirhandzu. Hi xikombiso, tinhompfu ta hina, leti endlaka leswaku hi twa nun’hwelo wa mintsembyana, swiluva kumbe xinkwa lexa ha ku bakiwaka, i xikombiso xa rirhandzu ra Xikwembu. Vuswikoti bya hina byo vona dyambu loko ri pela, phaphatana kumbe ku n’wayitela ka n’wana swi kombisa rirhandzu leri Xikwembu xi nga na rona eka hina. Hilaha ku fanaka hi kota ku twa vuyimbeleri byo xonga, noti wa xinyenyana, kumbe rito ra munhu loyi hi n’wi rhandzaka. Ni ndlela leyi hi tumbuluxiweke ha yona, hambi hi nga hetisekanga, yi kombisa rirhandzu ra Xikwembu. Hi yona mhaka leyi nkarhi ni nkarhi hi vonaka ku hetiseka ka marito ya Yesu lama nge: “Ku nyika swi tisa ntsako lowukulu ku tlula ku amukela.” (Mintirho 20:35) Hi tsakela ku kombisa rirhandzu eka van’wana hikuva hi tumbuluxiwe “hi xifaniso xa Xikwembu.” (Genesa 1:27) Hambileswi Yehovha a nga ni timfanelo tin’wana to tala, rirhandzu hi yona mfanelo leyikulu eka vumunhu byakwe.

Matsalwa lama humaka eka Xikwembu ma fanele ma kombisa leswaku xi ni rirhandzu. Vukhongeri bya misava byi ni matsalwa yo tala ya khale. Xana matsalwa wolawo ma swi kota ku kombisa rirhandzu ra Xikwembu?

Mhaka ya xiheri hileswaku matsalwa ya vukhongeri ya khale a ma boxi swo tala hi ta ndlela leyi Xikwembu xi hi rhandzaka ha yona kumbe ndlela leyi hi nga rhandzaka Xikwembu ha yona. Kutani, vanhu va timiliyoni a va kumi nhlamulo loko va vutisa va ku, “Ha yini hi vona vumbhoni bya rirhandzu ra Xikwembu eka ntumbuluko kasi maxangu ni vuhomboloki swi ya emahlweni?” Hi hala tlhelo, Bibele hi yona ntsena buku ya vukhongeri ya khale leyi yi ri hlamuselaka hi vuenti rirhandzu ra Xikwembu. Nakambe yi hi dyondzisa ndlela yo kombisana rirhandzu.

Buku Leyi Vulavulaka Hi Rirhandzu

Rito ra Xikwembu, Bibele, ri vulavula hi Yehovha tanihi “Xikwembu xa rirhandzu.” (2 Vakorinto 13:11) Bibele yi hlamusela ndlela leyi rirhandzu ri susumeteleke Yehovha ha yona leswaku a nyika vanhu vo sungula vutomi, lebyi byi nga riki na mavabyi ni rifu. Kambe ku xandzukela vulawuri bya Xikwembu swi vangele vanhu ku xaniseka. (Deteronoma 32:4, 5; Varhoma 5:12) Yehovha u teke goza a vuyetela leswi lahliweke. Rito ra Xikwembu ri ri: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku  un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Matsalwa yo Kwetsima ma paluxa rirhandzu ra Xikwembu hilaha ku engetelekeke loko ma hlamusela ndlela leyi Xikwembu xi yi lunghiseleleke ha yona hulumendhe leyi hetisekeke hi ku tirhisa Yesu leswaku a kondletela ku rhula eka vanhu lava yingisaka.—Daniyele 7:13, 14; 2 Petro 3:13.

Bibele yi katsakanya leswi vanhu va languteriweke ku swi endla, hi marito lawa: “‘U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.’ Lexi hi xona xileriso lexikulu ni xo sungula eka hinkwaswo. Xa vumbirhi, lexi fanaka na xona, xi ri, ‘U fanele u rhandza warikwenu kukota loko u tirhandza.’ Nawu hinkwawo [wu] titshege hi swileriso leswi swimbirhi.” (Matewu 22:37-40) Bibele yi vula leswaku yi huhuteriwe hi Xikwembu. Leswi yi kombisaka kahle vumunhu bya xona, hi nga tiyiseka leswaku yi huma eka “Xikwembu xa rirhandzu.”—2 Timotiya 3:16.

Hi ku tirhisa nkongomiso lowu wun’we, hi nga kota ku vona leswaku hi wahi matsalwa ya khale lawa hakunene ma humaka eka Xikwembu. Nakambe rirhandzu ri kombisa vagandzeri va ntiyiso hikuva va tekelela Xikwembu eku kombiseni ka rirhandzu.

Ndlela Yo Vona Vanhu Lava Rhandzaka Xikwembu

Lava rhandzaka Xikwembu hakunene va vonaka, ngopfu-ngopfu sweswi, tanihi leswi hi hanyaka eminkarhini leyi Bibele yi yi vitanaka ‘masiku yo hetelela.’ Vanhu va nyanya ku va lava “tirhandzaka, varhandzi va mali, . . . lava rhandzaka mintsako ku ri ni ku rhandza Xikwembu.”—2 Timotiya 3:1-4.

Xana u nga va vona njhani vanhu lava rhandzaka Xikwembu? Bibele yi ri: “Ku rhandza Xikwembu, hi kona ku hlayisa swileriso swa xona.” (1 Yohane 5:3) Ku rhandza Xikwembu swi susumetela vanhu leswaku va xixima mimpimanyeto ya mahanyelo ya Bibele. Hi xikombiso, Rito ra Xikwembu ri ni milawu malunghana ni rimbewu ni vukati. Vuxaka bya rimbewu byi pfumeleriwa ntsena eka lava va ngheneleke vukati, naswona vukati a byi fanele byi va bya vutomi hinkwabyo. (Matewu 19:9; Vaheveru 13:4) Loko wansati un’wana wa le Spain loyi a dyondzeleke ta vukhongeri a ye eka nhlangano lowu eka wona Timbhoni ta Yehovha ti dyondzaka milawu ya mahanyelo ya Bibele, u te: “Nhlangano wa kona wu ndzi akile, ku nga ri hi tinkulumo ta Matsalwa ntsena kambe ni hi vun’we lebyi nga exikarhi ka vanhu lava ni mahanyelo ya vona lamanene.”

Ku engetela eka ndlela leyi va rhandzaka Xikwembu ha yona, swa olova ku vona Vakreste va ntiyiso hikwalaho ka ndlela leyi va rhandzaka vaakelani va vona ha yona. Ntirho wa vona wa nkoka i ku vulavula ni van’wana hi ta ntshembo wun’we ntsena wa vanhu, ku nga Mfumo wa Xikwembu. (Matewu 24:14) Ku hava nchumu lowu nga vuyerisaka vaakelani va vona hilaha ku nga heriki handle ko va pfuna leswaku va kuma vutivi bya Xikwembu. (Yohane 17:3) Vakreste va ntiyiso va kombisa rirhandzu ni hi tindlela tin’wana. Va pfuna lava xanisekaka. Hi xikombiso, loko ku tsekatseka ka misava ku vange khombo le Italy, phepha-hungu ra kwalaho ri vike leswaku Timbhoni ta Yehovha ti “endla swilo hi ndlela leyi humelelaka, ti pfuna lava xanisekaka ku nga khathariseki leswaku va le vukhongerini byihi.”

Ku engetela eka ku rhandza Xikwembu ni vaakelani, Vakreste va ntiyiso va rhandzana. Yesu u te: “Ndzi mi nyika xileriso lexintshwa, leswaku mi rhandzana; tanihi leswi ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina, loko mi rhandzana.”—Yohane 13:34, 35.

Xana rirhandzu leri Vakreste va ntiyiso va nga na rona eka van’wana ra vonaka? Ema loyi a tirhaka emutini wun’wana u anakanye tano. U tirha eLa Paz, le Bolivia, laha xihlawuhlawu xi hambanisaka swigwili ni swisiwana. U te: “Siku ro sungula loko ndzi ye enhlanganweni wa Timbhoni ta Yehovha, ndzi vone jaha rin’wana leri ambaleke kahle ri tshame ni wansati un’wana wa Muindiya ri ri karhi ri vulavula na yena. A ndzi nga si tshama ndzi vona nchumu wo tano. Ku sukela kwalaho, ndzi swi xiyile leswaku lava va fanele va ri vanhu va Xikwembu.” Hilaha ku fanaka, wansati un’wana wa le Brazil la vuriwaka Miriam u te: “A ndzi nga swi tivi leswaku ndzi nga wu kuma njhani ntsako, hambi ku ri endyangwini wa ka hina. Ndzi sungule ku vona rirhandzu ra xiviri exikarhi  ka Timbhoni ta Yehovha.” Le United States mukongomisi wa timhaka eka xitichi xa thelevhixini u tsarile: “Loko vanhu vo tala a va hanya hi ndlela leyi vukhongeri bya n’wina byi nga xiswona, tiko leri a ri nga ta va eka xiyimo lexi ri nga eka xona. Ndzi un’wana wa vaviki va mahungu lava tivaka leswaku nhlengeletano ya n’wina yi sekeriwe erirhandzwini ni le ka ripfumelo leri tiyeke eka Mutumbuluxi.”

Lava Vukhongeri Bya Ntiyiso

Rirhandzu hi rona ri hlawulekisaka vukhongeri bya ntiyiso. Yesu u fanise ku kuma vukhongeri bya ntiyiso ni ku kuma gondzo lerinene kutani u hlawula ku famba ha rona. Hi rona ntsena gondzo leri yisaka evuton’wini lebyi nga heriki. Yesu u te: “Nghenani hi nyangwa leyo khuma; hikuva gondzo leri yisaka endzovisweni ri anamile ri tlhela ri pfuleka, naswona va tele lava nghenaka ha rona; kambe nyangwa leyi yisaka evuton’wini yi khumile, ni gondzo ra kona ri larile, naswona a hi vangani lava ri kumaka.” (Matewu 7:13, 14) I ntlawa wun’we ntsena wa Vakreste va ntiyiso lowu fambaka hi vun’we na Xikwembu egondzweni ra vugandzeri bya ntiyiso. Hikokwalaho, i swa nkoka leswaku u hlawula vukhongeri byihi. Loko wo ri kuma gondzo rero kutani u hlawula ku famba ha rona, u ta va u kume ndlela leyinene ya vutomi hikuva hi yona ndlela ya rirhandzu.—Vaefesa 4:1-4.

Wa nga vona ntsako lowu u nga vaka na wona loko u famba hi gondzo ra vugandzeri bya ntiyiso! Swi fana ni ku famba ni Xikwembu. Eka Xikwembu u nga dyondza vutlhari ni rirhandzu leswaku u va ni vuxaka lebyinene ni van’wana. Eka xona u nga dyondza hi ta xikongomelo xa vutomi, naswona u nga twisisa switshembiso swa Xikwembu kutani u va ni ntshembo hi vumundzuku. A wu nge tisoli hi ku lava vugandzeri bya ntiyiso.

[Xifaniso lexi nga eka tluka 5]

Eka matsalwa hinkwawo ya khale ya vukhongeri, i Bibele ntsena leyi paluxaka rirhandzu ra Xikwembu

[Swifaniso leswi nga eka tluka 7]

Vakreste va ntiyiso va vonaka hikuva va kombisa rirhandzu