Nghena endzeni

Hundzela eka leswi nga endzeni

Pfuna Van’wana Leswaku Va Yingisa Leswi Bibele Yi Swi Dyondzisaka

Pfuna Van’wana Leswaku Va Yingisa Leswi Bibele Yi Swi Dyondzisaka

 Pfuna Van’wana Leswaku Va Yingisa Leswi Bibele Yi Swi Dyondzisaka

“Loko ku ri leyi nga emisaveni leyinene, hi lava, endzhaku ko twa rito hi mbilu yo xonga, leyinene, va ri hlayisaka ivi va veka mihandzu hi ku tiyisela.”—LUKA 8:15.

1, 2. (a) Buku leyi nge Xana Bibele Yi Dyondzisa Yini Hakunene? yi lunghiseleriwe xikongomelo xihi? (b) Emalembeni ya sweswinyana, Yehovha u ma katekise njhani matshalatshala ya vanhu vakwe yo endla vadyondzisiwa?

“BUKU leyi yi kahle ngopfu. Swichudeni swa mina swa yi rhandza. Ndza yi rhandza. U nga swi kota ku sungula tidyondzo ta Bibele ni vanhu hi buku leyi u lo yima kunene.” Phayona rin’wana leri nga Mbhoni ya Yehovha ri vule marito wolawo malunghana ni buku leyi nge Xana Bibele Yi Dyondzisa Yini Hakunene? * Loko a vulavula hi buku leyi fanaka, muhuweleri un’wana wa Mfumo la dyuhaleke u te: “Ndzi kote ku pfuna vanhu vo tala leswaku va tiva Yehovha eka malembe ya 50 lawa se ndzi nga na wona ndzi ri karhi ndzi hiseka entirhweni wo chumayela. Kambe ku vula ntiyiso, buku leyi yi famba emahlweni. Swifaniso swa yona leswi phyuphyisaka ni swikombiso swa yona swa tsakisa.” Xana u titwa hi ndlela leyi fanaka hi buku leyi nge Leswi Bibele Yi Swi Dyondzisaka? Buku leyi leyi pfunaka ku dyondza Bibele yi lunghiseleriwe ku ku pfuna leswaku u hetisisa xileriso xa Yesu lexi nge: “Hikokwalaho fambani mi ya endla vanhu va matiko hinkwawo va va vadyondzisiwa, . . . mi va dyondzisa ku hlayisa swilo hinkwaswo leswi ndzi mi leriseke swona.”—Matewu 28:19, 20.

2 A swi kanakanisi leswaku Yehovha wa tsaka loko a ri karhi a vona Timbhoni takwe ta kwalomu ka 6,6 wa timiliyoni ti yingisa xileriso xa Yesu xa ku endla vadyondzisiwa hi ku tirhandzela. (Swivuriso 27:11) Swi le rivaleni leswaku Yehovha u katekisa matshalatshala ya tona. Hi xikombiso, hi lembe ra ntirho ra 2005, mahungu lamanene a ma chumayeriwa ematikweni ya 235 naswona hi xiringaniso ku fambisiwe tidyondzo ta Bibele leti tlulaka 6 061 500. Hikwalaho ka sweswo, vanhu vo tala va ‘twe rito ra Xikwembu kutani va ri amukela, ku nga ri kukotisa rito ra vanhu, kambe, va ri amukele hilaha ri nga hakona hakunene rito ra Xikwembu.’ (1 Vatesalonika 2:13) Eka malembe mambirhi lama hundzeke, vadyondzisiwa lavantshwa lava tlulaka hafu ya miliyoni va hundzule vutomi bya vona byi fambisana ni milawu ya Yehovha kutani va tinyiketela eka Yena.

3. Hi swihi swivutiso leswi hi nga ta swi tlhuvutsa eka xihloko lexi malunghana ni ku tirhisiwa ka buku leyi nge Leswi Bibele Yi Swi Dyondzisaka?

3 Xana sweswinyana u swi tsakerile ku fambisela munhu dyondzo ya Bibele? Emisaveni hinkwayo, ka ha ri ni vanhu lava nga ni “mbilu yo xonga” lava endzhaku ko twa rito ra Xikwembu va nga ta ‘ri hlayisa ivi va veka mihandzu hi ku tiyisela.’ (Luka 8:11-15) A hi kambisiseni ndlela leyi u nga yi tirhisaka ha yona buku leyi nge Leswi Bibele Yi Swi Dyondzisaka, entirhweni wo endla vadyondzisiwa. Eka bulo  ra hina hi ta tlhuvutsa swivutiso swinharhu: (1) U nga yi sungula njhani dyondzo ya Bibele? (2) Hi tihi tindlela to dyondzisa leti tirhaka ngopfu? (3) U nga n’wi pfuna njhani munhu leswaku a nga vi xichudeni ntsena kambe a tlhela a va mudyondzisi wa Rito ra Xikwembu leri tsariweke, ku nga Bibele?

Ndlela Leyi U Nga Sungulaka Dyondzo Ya Bibele Ha Yona

4. Ha yini van’wana va kanakana ku dyondza Bibele, naswona u nga ha va pfuna njhani ku hlula ku kanakana ka vona?

4 Loko a wo komberiwa ku tsemakanya xinambyana lexi anameke hi goza rin’we, u nga ala ku endla tano. Kambe loko a ku lo vekiwa maribye lawa u nga ta famba ehenhla ka wona, a wu ta swi tsakela swinene ku ringeta ku tsemakanya. Hilaha ku fanaka, munhu la khomekeke a nga ha kanakana ku dyondza Bibele. N’wini wa muti a nga ha ehleketa leswaku ku laveka nkarhi wo tala ni ku tikarhata leswaku a yi dyondza. U nga n’wi pfuna njhani leswaku a hlula ku kanakana ka yena? Hi ku tshamela ku va ni mabulo yo koma ni lama dyondzisaka, u nga tirhisa buku leyi nge Leswi Bibele Yi Swi Dyondzisaka leswaku u kongomisa munhu eka dyondzo ya Rito ra Xikwembu ya nkarhi na nkarhi. Loko u lunghiselela kahle, riendzo rin’wana ni rin’wana ro vuyela leri u ri endlaka ri ta fana ni buloho leri n’wi pfunaka ku aka vuxaka na Yehovha.

5. Ha yini u fanele u hlaya buku leyi nge Leswi Bibele Yi Swi Dyondzisaka?

5 Hambiswiritano, emahlweni ko pfuna munhu un’wana leswaku a vuyeriwa eka buku leyi nge Leswi Bibele Yi Swi Dyondzisaka, u fanele u yi tiva kahle buku leyi. Xana se u yi hlaye hinkwayo buku leyi? Vatekani van’wana va fambe ni buku leyi loko va teka riendzo naswona va sungule ku yi hlaya loko va ri elwandle va beriwa hi moya. Loko wansati un’wana wa kwalaho la xaviselaka vavalangi swilo a ri karhi a tshinela ekusuhi na vona, u xiye nhloko-mhaka leyi nge Xana Bibele Yi Dyondzisa Yini Hakunene? U byele vatekani lava leswaku tiawara ti nga ri tingani leti hundzeke, u khongerile malunghana ni xivutiso xexo, a kombela Xikwembu leswaku xi n’wi nyika nhlamulo. Vatekani lava va nyike wansati loyi kopi ya buku leyi hi ntsako. Xana u “tixavel[e] nkarhi” wo hlaya buku leyi, kumbexana u yi hlaya ra vumbirhi, loko u ri karhi u rindze swo karhi kumbe hi nkarhi wo wisa entirhweni kumbe exikolweni? (Vaefesa 5:15, 16) Loko u endla tano, u ta yi tiva kahle buku leyi leyi pfunaka ku dyondza Bibele naswona swi nga ha ku pfulela tindlela to vulavula ni van’wana malunghana ni rungula ra yona.

6, 7. U nga yi tirhisa njhani buku leyi nge Leswi Bibele Yi Swi Dyondzisaka ku sungula tidyondzo ta Bibele?

6 Loko u fambisela vanhu buku leyi entirhweni wo chumayela, swi tirhise kahle swifaniso, matsalwa ni swivutiso leswi nga eka matluka 4, 5 na 6. Hi xikombiso, u nga ha sungula bulo hi ku vutisa u ku, “Malunghana ni swiphiqo hinkwaswo leswi vanhu va langutanaka na swona namuntlha, u ehleketa leswaku hi xihi xihlovo xa nkongomiso lowu tshembekaka?” Endzhaku ko yingisela hi vukheta nhlamulo ya munhu yoloye, hlaya 2 Timotiya 3:16, 17, kutani u hlamusela leswaku Bibele yi nyikela ntlhantlho wa xiviri wa swiphiqo swa vanhu. Komba n’wini wa muti matluka 4 na 5, kutani u n’wi vutisa: “Eka swiyimo leswi kombisiweke eka matluka lawa, hi xihi lexi ku karhataka ngopfu?” Loko a ku komba xin’we, n’wi khomise buku ivi u hlaya eBibeleni ya wena tsalwa leri kombisiweke. Endzhaku ka sweswo, hlaya tluka 6 kutani u vutisa n’wini wa muti u  ku, “Eka swivutiso swa tsevu leswi kombisiweke ehansinyana ka tluka leri, hi xihi lexi u nga tsakelaka ku kuma nhlamulo ya xona?” Loko a hlawula xin’we, n’wi kombe ndzima leyi hlamulaka xivutiso xolexo, u n’wi siyela buku kutani u endla malunghiselelo lama tiyeke yo tlhela u n’wi endzela leswaku mi ta bula hi xivutiso xexo.

7 Xingheniso lexi xa ha ku kombisiwaka xi nga teka timinete ta kwalomu ka ntlhanu. Hambiswiritano, eka timinete teto ti nga ri tingani, u ta va u swi xiyile swilo leswi karhataka n’wini wa muti, u ta va u hlaye matsalwa mambirhi ni ku hlamusela ndlela leyi ma tirhaka ha yona swin’we ni ku veka xisekelo xo tlhela u vuya. Bulo ra wena ro koma ni n’wini wa muti swi nga endleka ku ri bulo leri khutazaka ni leri chavelelaka swinene leri se ku hundzeke nkarhi wo leha a nga si va na rona. Hikwalaho ka sweswo, hambi ku ri munhu la khomekeke a nga swi langutela hi mahlo-ngati ku tlhela a va ni bulo leri tekaka timinete ti nga ri tingani na wena loko u ri karhi u n’wi pfuna ku teka goza leri landzelaka ro ya ‘egondzweni leri yisaka evuton’wini.’ (Matewu 7:14) Hi ku famba ka nkarhi, loko ku tsakela ka n’wini wa muti ku kula, ku fanele ku lehisiwa ni nkarhi wa dyondzo. Sweswo swi nga endliwa hi ku kombela leswaku mi dyondza nkarhi wo lehanyana mi tshame ehansi.

Tindlela To Dyondzisa Leti Tirhaka Swinene

8, 9. (a) U nga xi lunghiselela njhani xichudeni xa wena xa Bibele leswaku xi kota ku langutana ni swihinga ni miringo leyi xi nga ha hlangavetanaka na yona? (b) Swilo leswi nga tshwiki leswi tirhisiwaka ku aka ripfumelo leri tiyeke swi nga kumiwa kwihi?

8 Loko munhu a kala a sungula ku yingisa leswi Bibele yi swi dyondzisaka, u ta langutana ni swihinga leswi nga ta sivela nhluvuko wakwe. Muapostola Pawulo u te: “Hinkwavo lava navelaka ku hanya hi ku tinyiketela loku nga ni vukwembu hi ku fambisana na Kreste Yesu na vona va ta xanisiwa.” (2 Timotiya 3:12) Pawulo u fanise miringo yoleyo ni ndzilo lowu nga lovisaka swilo swo aka ha swona swa xiyimo xa le hansi kambe wu siya swilo swo tanihi nsuku, silivhere ni maribye ya risima. (1 Vakorinto 3:10-13; 1 Petro 1:6, 7) Leswaku u pfuna xichudeni xa wena xa Bibele ku hlakulela timfanelo leti lavekaka leswaku xi langutana ni miringo leyi yi nga ha xi hlaselaka, u fanele u xi pfuna leswaku xi aka hi swilo leswi nga tshwiki.

9 Mupisalema u fanisa “marito ya Yehovha” ni “silivhere leyi tengisiweke ekheleni ro tengisa leri nga emisaveni, leyi tengisiweke ka nkombo.” (Pisalema 12:6) Entiyisweni, Bibele yi ni swilo hinkwaswo swa risima leswi nga tirhisiwaka ku aka ripfumelo leri tiyeke. (Pisalema 19:7-11; Swivuriso 2:1-6) Naswona buku leyi nge Leswi Bibele Yi Swi Dyondzisaka yi kombisa ndlela leyinene yo tirhisa Matsalwa.

10. U nga yi dzikisa njhani miehleketo ya xichudeni eBibeleni?

10 Loko mi ri karhi mi dyondza, dzikisa miehleketo ya xichudeni eka matsalwa lama nga eka ndzima leyi mi yi hlayaka. Tirhisa swivutiso leswaku u pfuna xichudeni xi twisisa tindzimana ta xisekelo ta Bibele ni ku ti tirhisa evuton’wini bya xona. Tivonele leswaku u nga xi byeli leswaku xi endla yini. Ematshan’weni ya sweswo, tekelela xikombiso xa Yesu. Loko wanuna un’wana la tivaka Nawu a n’wi vutise xivutiso, Yesu u hlamurile: “Xana ku tsariwe yini eNawini? Xana u hlayisa ku yini?” Wanuna loyi u hlamule hi ku ya hi Matsalwa, kutani Yesu u n’wi pfune ku vona ndlela leyi a nga wu tirhisaka ha yona nsinya wolowo wa nawu eka yena n’wini. Hi ku tirhisa xifaniso, Yesu u tlhele a pfuna wanuna loyi ku vona ndlela leyi dyondzo yoleyo yi faneleke yi n’wi khumba ha yona. (Luka 10:25-37) Buku leyi nge Leswi Bibele Yi Swi Dyondzisaka yi ni swikombiso swo tala swo olova leswi u nga swi tirhisaka ku pfuna xichudeni ku tirhisa misinya ya milawu ya Matsalwa eka xona.

11. Mi nga hlaya rungula ro tanihi kwihi eka dyondzo ha yin’we?

11 Buku leyi nge Leswi Bibele Yi Swi Dyondzisaka yi tirhisa ririmi ro olova ni leri pakanisaka ku hlamusela Rito ra Xikwembu, tanihi leswi Yesu a hlamuseleke tidyondzo leti rharhanganeke hi marito yo olova. (Matewu 7:28, 29) Tekelela xikombiso xa yena. Hlamusela rungula hi ndlela leyi olovaka, leyi twisisekaka ni leyi pakanisaka. U nga tsutsumi loko mi ri karhi mi dyondza. Ematshan’weni ya sweswo, swiyimo ni vuswikoti bya xichudeni a ku ve swona leswi lawulaka leswaku mi ta hlaya tindzimana tingani eka dyondzo ha yin’we. Yesu a a byi tiva vuswikoti bya vadyondzisiwa va yena leswaku byi fika kwihi, kutani a nga va dyondzisanga rungula ro tala ku tlula leri a va ri lava hi nkarhi wolowo.—Yohane 16:12.

12. Xiengetelo xi fanele xi tirhisiwa njhani?

12 Buku leyi nge Leswi Bibele Yi Swi Dyondzisaka yi ni xiengetelo lexi nga ni tinhloko-mhaka ta 14. Wena tanihi mudyondzisi wa xona u fanele u vona  ndlela leyi rungula leri ri nga tirhisiwaka ha yona hilaha ku humelelaka, hi ku ya hi xilaveko xa xichudeni. Hi xikombiso, loko xichudeni swi xi tikela ku twisisa mhaka yo karhi kumbe xi ri ni swivutiso etimhakeni to karhi hikwalaho ka tidyondzo leti a xi pfumela eka tona eku sunguleni, swi nga ha va swi ringene ku xi komba xiyenge lexi faneleke eka xiengetelo kutani u xi byela leswaku xi tihlayela mhaka ya kona. Kambe minkarhi yin’wana, swilaveko swa xichudeni hi swona swi nga ku byelaka leswaku u hlaya na xona mhaka ya kona. Xiengetelo lexi xi ni tinhloko-mhaka ta nkoka leti sekeriweke eMatsalweni to tanihi leyi nge “I Yini Leswi Rito ‘Moya-xiviri’ Ni ‘Moya’ Ma Vulaka Swona Hakunene?” ni leyi nge “Ku Hlamuseriwa Ka ‘Babilona Lonkulu.’” U nga ha lava ku bula hi tinhloko-mhaka leti ni xichudeni xa wena. Leswi tinhloko-mhaka leti ku buriwaka ha tona eka xiengetelo ti nga riki na swivutiso, u ta boheka ku ri tiva kahle rungula rolero leswaku u kota ku tiendlela swivutiso leswi twisisekaka.

13. Xikhongelo xi hetisisa xiphemu xihi eku tiyiseni ka ripfumelo?

13 Pisalema 127:1 yi ri: “Loko Yehovha a nga yi aki yindlu, i swa hava leswi vaaki va yona va tirheke hi matimba eka yona.” Hikokwalaho, loko u ri karhi u lunghiselela ku fambisa dyondzo ya Bibele, khongela eka Yehovha u kombela mpfuno. Xikhongelo xa wena xo sungula ni xo hetelela eka dyondzo ha yin’we xi fanele xi kombisa leswaku u ni vuxaka lebyikulu na Yehovha. Khutaza xichudeni leswaku xi khongela eka Yehovha xi kombela vutlhari leswaku xi kota ku twisisa Rito ra Yena swin’we ni matimba leswaku xi kota ku tirhisa ndzayo ya rona. (Yakobo 1:5) Loko xichudeni xi endla tano, xi ta va ni matimba yo kota ku tiyisela miringo naswona xi ta ya emahlweni xi tiya eripfumelweni.

Pfuna Swichudeni Swa Bibele Leswaku Swi Va Vadyondzisi

14. Hi wihi nhluvuko lowu swichudeni swa Bibele swi faneleke swi wu endla?

14 Leswaku swichudeni swa hina swa Bibele swi kota ku hlayisa “swilo hinkwaswo” leswi Yesu a swi leriseke vadyondzisiwa vakwe, swi fanele swi endla nhluvuko swi nga ha vi swichudeni swa Rito ra Xikwembu ntsena kambe swi tlhela swi va vadyondzisi va rona. (Matewu 28:19, 20; Mintirho 1:6-8) I yini leswi u nga swi endlaka leswaku u pfuna xichudeni xi endla nhluvuko wolowo wa moya?

15. Ha yini u fanele u khutaza xichudeni xa wena xa Bibele leswaku xi va kona eminhlanganweni ya Vukreste?

15 Ku sukela eka dyondzo yo sungula, rhamba xichudeni leswaku xi famba na wena eminhlanganweni ya vandlha. Xi hlamusele leswaku eminhlanganweni hi laha u kumaka kona ndzetelo tanihi mudyondzisi wa Rito ra Xikwembu. Ku ringana mavhiki yo hlayanyana, tirhisa timinete ti nga ri tingani endzhaku ka dyondzo ha yin’we ya Bibele leswaku u hlamusela nongonoko wa ndzetelo wa moya lowu u wu kumaka eminhlanganweni ni le tinhlengeletanweni to hambana-hambana. Vulavula hi ku hiseka hi leswi u vuyeriwaka hi swona eka swiendlakalo leswi. (Vaheveru 10:24, 25) Loko xichudeni xi kala xi sungula ku ya eminhlanganweni nkarhi na nkarhi, xi nga ha va mudyondzisi wa Rito ra Xikwembu.

16, 17. Hi tihi tipakani tin’wana leti xichudeni xa Bibele xi nga tivekelaka tona xi tlhela xi ti fikelela?

16 Pfuna xichudeni xa wena xa Bibele leswaku xi tivekela tipakani leti xi nga ta kota ku ti fikelela. Hi xikombiso, xi khutaze leswaku xi vulavula ni vanghana kumbe maxaka hi leswi xi swi dyondzaka. Nakambe ringanyeta leswaku xi tivekela pakani ya ku hlaya Bibele hinkwayo. Loko u xi pfuna ku tivekela xiyimiso xa ku hlaya Bibele nkarhi na nkarhi ni ku xi namarhela, mukhuva lowu wu ta xi pfuna ni loko se xi khuvuriwile. Ku tlula kwalaho, ha yini u nga ringanyeti leswaku xichudeni xi tivekela pakani ya ku tsundzuka ndzimana yin’we ya Bibele leyi hlamulaka xivutiso-nkulu eka ndzima yin’wana ni  yin’wana ya buku leyi nge Leswi Bibele Yi Swi Dyondzisaka? Loko xi endla tano, xi ta va ‘mutirhi la nga riki na nchumu wo khomiwa hi tingana ha wona, la ri tamelaka khwatsi rito ra ntiyiso.’—2 Timotiya 2:15.

17 Ematshan’weni yo dyondzisa xichudeni ku phindha leswi matsalwa ma swi vulaka kumbe ku ma vula hi mavekelo lama hambaneke, xi khutaze leswaku xi hlamusela ndlela leyi tindzimana to karhi ta Bibele ti fambisanaka ha yona ni nhloko-mhaka leyi mi yi hlayaka loko xi nyikela nhlamulo eka lava lavaka ku tiva hi ta ntshembo wa xona. Ku endla minkombiso yo koma swi nga ha pfuna, laha u nga tiendlaka xaka kumbe mutirhi-kulobye loyi a n’wi kombelaka leswaku a hlamusela tidyondzo ta yena. Loko xichudeni xi hlamula, xi kombe ndlela leyi xi nga hlamulaka ha yona “hi moya wo rhula ni xichavo lexi enteke.”—1 Petro 3:15.

18. Loko xichudeni xa Bibele xi faneleka ku va muhuweleri la nga khuvuriwangiki, hi wihi mpfuno lowu engetelekeke lowu u nga xi nyikaka wona?

18 Hi ku famba ka nkarhi, xichudeni xi nga ha fanelekela ku huma nsimu. Kandziyisa leswaku i lunghelo ku va munhu a pfumeleriwa ku hlanganyela entirhweni lowu. (2 Vakorinto 4:1, 7) Loko vakulu va kume leswaku xichudeni xa faneleka ku va muhuweleri la nga khuvuriwangiki, xi pfune ku lunghiselela xingheniso xo olova kutani u famba na xona entirhweni wo chumayela. Hambeta u tirha na xona nkarhi na nkarhi eka tindlela to hambana-hambana to chumayela, naswona xi dyondzise ndlela leyi xi nga lunghiselelaka ha yona maendzo yo vuyela ni ku ma endla hi ndlela leyi humelelaka. Xikombiso xa wena lexinene hi xona lexi nga ta va ni nsusumeto lowunene.—Luka 6:40.

‘Tiponise Wena Swin’we Ni Lava Va Ku Yingisaka’

19, 20. Hi yihi pakani leyi hi faneleke hi va na yona, naswona ha yini?

19 A swi kanakanisi leswaku ku pfuna munhu leswaku a va ni “vutivi lebyi kongomeke bya ntiyiso” swi lava ku tikarhata lokukulu. (1 Timotiya 2:4) Hambiswiritano, a swi talanga swilo leswi tsakisaka evuton’wini leswi nga fanisiwaka ni ntsako wa ku pfuna munhu leswaku a yingisa leswi Bibele yi swi dyondzisaka. (1 Vatesalonika 2:19, 20) Hakunene hi ni lunghelo ro va “vatirhi-kulobye ni Xikwembu” entirhweni lowu wa misava hinkwayo wo dyondzisa!—1 Vakorinto 3:9.

20 Hi ku tirhisa Yesu Kreste ni tintsumi leti nga ni matimba, ku nga ri khale Yehovha u ta humesa xigwevo xo vava eka lava “va nga xi tiviki Xikwembu ni lava va nga ma yingisiki mahungu lamanene malunghana ni Hosi ya hina Yesu.” (2 Vatesalonika 1:6-8) Vutomi bya vona byi le khombyeni. Xana u nga tivekela pakani ya leswaku u fambisa dyondzo yin’we ya Bibele ya le kaya hi buku leyi nge Xana Bibele Yi Dyondzisa Yini Hakunene? Leswi u hlanganyelaka entirhweni lowu, u ni lunghelo ro “tiponisa wena swin’we ni lava va ku yingisaka.” (1 Timotiya 4:16) Sweswi ku tlula rini na rini, i swa xihatla leswaku hi pfuna van’wana va yingisa leswi Bibele yi swi dyondzisaka.

[Nhlamuselo ya le hansi]

^ par. 1 Yi kandziyisiwe hi Timbhoni ta Yehovha.

Xana U Dyondze Yini?

• Buku leyi nge Leswi Bibele Yi Swi Dyondzisaka yi lunghiseleriwe xikongomelo xihi?

• U nga ti sungula njhani tidyondzo ta Bibele hi ku tirhisa buku leyi nge Leswi Bibele Yi Swi Dyondzisaka?

• Hi tihi tindlela to dyondzisa leti tirhaka swinene?

• U nga xi pfuna njhani xichudeni leswaku xi va mudyondzisi wa Rito ra Xikwembu?

[Swivutiso Swa Dyondzo]

[Xifaniso lexi nga eka tluka 26]

Xana u yi tirhisa hi ndlela leyi vuyerisaka buku leyi?

[Xifaniso lexi nga eka tluka 27]

Bulo ro koma ri nga susumetela munhu leswaku a navela ku va ni vutivi bya Bibele

[Xifaniso lexi nga eka tluka 29]

I yini leswi u nga swi endlaka leswaku u kongomisa miehleketo ya xichudeni eBibeleni?

[Xifaniso lexi nga eka tluka 30]

Pfuna xichudeni xa Bibele leswaku xi endla nhluvuko