Nghena endzeni

Hundzela eka leswi nga endzeni

Wanuna Ni Wansati—Va Endleriwe Ku Pfunana

Wanuna Ni Wansati—Va Endleriwe Ku Pfunana

Wanuna Ni Wansati—Va Endleriwe Ku Pfunana

WANUNA ni wansati va navela ku va swin’we minkarhi hinkwayo. I Xikwembu lexi endleke leswaku va va ni ku navela koloko. Yehovha u vone leswaku a swi nga ri swinene leswaku wanuna wo sungula Adamu, a hambeta a tshama a ri yexe. Kutani Xikwembu xi endlele wanuna “mupfuni, a va muhetisisi wa yena.”

Yehovha u endle leswaku Adamu a khomiwa hi vurhongo lebyikulu, kutani a teka rin’wana ra timbambu takwe “a vumba wansati hi rimbambu . . . kutani a n’wi tisa eka wanuna.” Adamu a a tsake swinene loko a hlanganisiwa ni xivumbiwa lexo saseka xa Yehovha lerova u te: “Eku heteleleni leri i rhambu ra marhambu ya mina ni nyama ya nyama ya mina.” Leswi a a ri ni timfanelo ta xisati, Evha, wansati la hetisekeke a a rhandzeka hakunene. Naswona Adamu la hetisekeke a a faneriwa hi ku xiximiwa hikwalaho ka xindzhuti xakwe xa xinuna. A va endleriwe ku pfunana. Bibele yi ri: “Hikokwalaho wanuna u ta siya tata wakwe ni mana wakwe naswona u fanele ku namarhela nsati wakwe, kutani va fanele va va nyama yin’we.”—Genesa 2:18-24.

Hambiswiritano, namuntlha mindyangu yo tala ya avana naswona vavanuna ni vavasati va tala ku nga khomani kahle kumbe va va ni vutianakanyi. Moya wa ku phikizana lowu nga kona exikarhi ka vavanuna ni vavasati wu endle leswaku ku va ni timholovo. Leswi hinkwaswo a ku nga ri xona xikongomelo xa Xikwembu hi wanuna ni wansati. Wanuna a a vumberiwe leswaku a hetisisa xiphemu xa nkoka emisaveni. Wansati a a fanele a hetisisa xiphemu xo hlawuleka ni xa risima tanihi muhetisisi wa nuna wakwe. A va fanele va tirha swin’we hi ku twanana. Ku sukela loko munhu a vumbiwile, vavanuna ni vavasati lava xiximaka lunghiselelo ra Xikwembu va ringete ku endla mintirho leyi Yehovha a va vekeleke yona hi ku tshembeka, kutani sweswo swi endle leswaku va va ni ntsako lowukulu ni ku eneriseka. Hi yihi mintirho ya kona naswona hi nga yi endla njhani?

[Xifaniso lexi nga eka tluka 3]

Wanuna ni wansati va vumberiwe ku endla mintirho yo hlawuleka eka lunghiselelo ra Xikwembu