Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Muhlengeleti a a vula yini loko a ku u kume “munhu wun’we eka vanhu va gidi” kambe “exikarhi ka lava hinkwavo a [nga] kumanga wansati”?—Eklesiasta 7:28.

Leswaku hi ma twisisa kahle marito lawa lama huhuteriweke, hi fanele hi rhanga hi twisisa ndlela leyi Xikwembu xi va langutaka ha yona vavasati. Bibele yi vulavula hi Rhuti, n’wingi wa Nawomi lowa noni tanihi “wansati lonene ngopfu.” (Rhuti 3:11) Hi ku ya hi Swivuriso 31:10, wansati la fanelekaka “nkoka wakwe wu wu tlula ekule wa tikorala.” (An American Translation) Kutani, xana Hosi Solomoni wa le Israyele wa khale a a vula yini loko a ku: “Exikarhi ka vanhu va 1 000, ndzi kume wanuna un’we ntsena wo nkhenseka, kambe wansati, a ndzi kumanga na un’we”?—Bibele—Mahungu Lamanene.

Mongo wa ndzimana leyi wu kombisa leswaku mahanyelo yo biha a ma tinyike matimba exikarhi ka vavasati va le nkarhini wa Solomoni. (Eklesiasta 7:26) Sweswo swi nga va swi vangiwe ngopfu hi nkucetelo wa vavasati vambe lava a va gandzela Bali. Na Hosi Solomoni u kuceteriwe hi vavasati vakwe vo tala lava humaka ematikweni mambe. Bibele yi ri: “A va ni vasati va 700 lava a va ri tihosana ta xisati, ni vasati lavatsongo va 300, hakatsongo-tsongo vasati vakwe va voyamisa mbilu yakwe” leswaku a gandzela swikwembu swa mavunwa. (1 Tihosi 11:1-4) Mahanyelo ya vavanuna na wona a ma bihile, a swi tika ku kuma hambi wanuna wun’we ntsena wo lulama eka vanhu va gidi. Solomoni wa gimeta a ku: “Ndzi kume leswi ntsena, leswaku Xikwembu xa ntiyiso xi endle vanhu va va vo lulama, kambe vona va tilukele mano yo tala.” (Eklesiasta 7:29) Lawa i makumu ya mhaka malunghana ni vanhu—rixaka ra vanhu, ku nga ri wanuna loko a ringanisiwa ni wansati. Hikwalaho, marito lama kumekaka eka Eklesiasta 7:28 ma fanele ma tekiwa tanihi nhlamuselo leyi vulavulaka hi ku angarhela hi mahanyelo ya vanhu va le sikwini ra Solomoni.

Hambiswiritano, ndzimana leyi yi nga ha va ni nhlamuselo yin’wana. Swi nga ha endleka yi ri vuprofeta, hikuva a nga si tshama a va kona wansati la yingiseke Yehovha hi ndlela leyi hetisekeke. Kambe u ve kona wanuna wo tano—Yesu Kreste.—Varhoma 5:15-17.

[Xifaniso lexi nga eka tluka 31]

“Munhu wun’we eka vanhu va gidi”