DYONDZO 60
Yana eMahlweni U Tiyisa Vuxaka Bya Wena Na Yehovha
Ku sukela loko u sungule dyondzo leyi ya Bibele, u dyondze swo tala hi Yehovha. Swilo leswi u swi dyondzeke swi ku endle u n’wi rhandza swinene lerova kumbexana se u tinyiketerile eka yena ni ku khuvuriwa. Loko u nga si khuvuriwa, kumbexana u ehleketa hi ku endla tano ku nga ri khale. Kambe loko se u khuvuriwile, a swi helelanga kwalaho. U nga ya emahlweni u tshinela eka Yehovha hilaha ku nga heriki. Njhani?
1. Hikwalaho ka yini u fanele u ya emahlweni u tiyisa vunghana bya wena na Yehovha?
Hi fanele hi tikarhatela ku ya emahlweni hi tiyisa vunghana bya hina na Yehovha. Hikwalaho ka yini? “Leswaku hi nga tshuki hi hambuka.” (Vaheveru 2:1) I yini leswi nga hi pfunaka leswaku hi ya emahlweni hi tirhela Yehovha hi ku tshembeka? I ku va hi nga tshiki ku chumayela ni ku tlhela hi lava tindlela tin’wana to tirhela Xikwembu hilaha ku heleleke. (Hlaya Vafilipiya 3:16.) Ku tirhela Yehovha i nchumu wa nkoka swinene evuton’wini!—Pisalema 84:10.
2. I yini swin’wana leswi u faneleke u ya emahlweni u swi endla?
Hambileswi dyondzo leyi ya Bibele yi helaka, u fanele u ya emahlweni u hanya tanihi Mukreste. Bibele yi vula leswaku hi fanele hi “ambala vumunhu lebyintshwa.” (Vaefesa 4:23, 24) Loko u ya emahlweni u dyondza Rito ra Xikwembu u tlhela u va kona etinhlengeletanweni ta vandlha, u ta dyondza swilo leswintshwa hi Yehovha. Lava tindlela ta ku n’wi tekelela evuton’wini bya wena. Yana emahlweni u cinca mahanyelo leswaku u tsakisa Yehovha.
3. Yehovha u ta ku pfuna njhani leswaku u tiyisa vuxaka bya wena na yena?
Bibele yi ri: “Xikwembu . . . xi ta hetisa ku leteriwa ka n’wina. Xi ta mi tiyisa, xi mi nyika matimba, xi ta endla leswaku mi nga tsekatseki.” (1 Petro 5:10) Hinkwerhu ha ringiwa. Kambe Yehovha u hi nyika leswi hi swi lavaka leswaku hi tshama hi tiyile. (Pisalema 139:23, 24) U ku tshembisa ku ku nyika matimba yo navela ku n’wi tirhela hi ku tshembeka.—Hlaya Vafilipiya 2:13.
ANAKANYISISA
Twana leswi nga ku pfunaka leswaku u ya emahlweni u tiyisa vuxaka bya wena na Yehovha ni ndlela leyi a nga ta ku katekisa ha yona.
4. Tshama u ri karhi u vulavurisana ni Munghana wa wena
Ku khongela ni ku dyondza Bibele swi ku pfune leswaku u va munghana wa Yehovha. Swilo sweswo swi nga ku pfuna njhani leswaku u tshinela swinene eka yena?
Hlaya Pisalema 62:8, ivi mi bula hi xivutiso lexi:
-
Leswaku u tiyisa vunghana bya wena na Yehovha, u nga swi antswisa njhani swikhongelo swa wena?
Hlaya Pisalema 1:2 ni nhlamuselo ya le hansi, ivi mi bula hi xivutiso lexi:
-
Leswaku u tiyisa vunghana bya wena na Yehovha, u nga yi antswisa njhani ndlela leyi u hlayaka Bibele ha yona?
U nga endla yini leswaku u vuyeriwa eka dyondzo ya wena ya munhu hi yexe? Leswaku u vona swin’wana leswi u nga swi endlaka, tlanga VHIDIYO, ivi mi bula hi swivutiso leswi landzelaka.
-
Hi swihi swiringanyeto leswi nga eka vhidiyo leyi leswi u nga swi tirhisaka?
-
Hi tihi tinhlokomhaka leti u nga tsakelaka ku dyondza hi tona?
5. Kunguhata tindlela tin’wana to tirhela Yehovha
Ku tivekela leswi u lavaka ku swi fikelela loko u ri karhi u tirhela Yehovha swi ta ku pfuna leswaku u ya emahlweni u va munghana wakwe. Tlanga VHIDIYO, ivi mi bula hi xivutiso lexi landzelaka.
-
Eka vhidiyo leyi, Cameron u vuyeriwe njhani hi ku kunguhata ndlela leyi a lavaka ku tirhela Yehovha ha yona hi xitalo?
A hi vanhu hinkwavo lava nga rhurhelaka etikweni rin’wana leswaku va ya chumayela. Kambe, hi nga tivekela leswi hi nga kotaka ku swi fikelela. Hlaya Swivuriso 21:5, ivi u anakanya hi leswi u nga ha lavaka ku swi fikelela . . .
-
evandlheni.
-
ensin’wini.
Leswi vuriwaka hi ndzimana leyi swi nga ku pfuna njhani ku fikelela leswi u lavaka ku swi endla?
Swin’wana leswi u nga tiyimiselaka ku swi endla
-
Antswisa swikhongelo swa wena.
-
Hlaya Bibele hinkwayo.
-
Tiva un’wana ni un’wana evandlheni.
-
Sungula dyondzo ya Bibele u tlhela u yi fambisa.
-
Teka vuphayona bya nkarhinyana kumbe bya nkarhi hinkwawo.
-
Loko u ri makwerhu wa xinuna, tikarhatele ku va nandza wa vutirheli.
6. Tiphine hi vutomi hilaha ku nga heriki!
Hlaya Pisalema 22:26, ivi mi bula hi xivutiso lexi:
-
U nga endla yini leswaku u tiphina hi vutomi sweswi ni hilaha ku nga heriki?
NKATSAKANYO
Yana emahlweni u tiyisa vunghana bya wena na Yehovha u tlhela u kunguhata ku endla leswi engetelekeke entirhweni wa yena. Kutani u nga tiphina hi vutomi hilaha ku nga heriki!
Mpfuxeto
-
Hikwalaho ka yini u nga swi tshembaka leswaku Yehovha u ta ku pfuna u n’wi tirhela hi ku tshembeka?
-
U nga byi tiyisa njhani vunghana bya wena na Yehovha?
-
Ku tivekela leswi u lavaka ku swi fikelela entirhweni wa Yehovha swi ta ku pfuna njhani leswaku u ya u tshinela eka yena?
KUMA LESWI ENGETELEKEKE
I yini swa nkoka swinene eka Yehovha, xana i ku endla nchumu wun’we lowu kombisaka ku tinyiketela eka yena kumbe i ku tshembeka vutomi bya hina hinkwabyo?
Malandza yo tshembeka ya Yehovha na wona ma nga heleriwa hi ntsako. Vona leswaku ma nga tlhela ma wu kuma njhani.
U nga swi kunguhata njhani swilo leswi u lavaka ku swi endla entirhweni wa Yehovha ni ku tlhela u swi fikelela?
“Tivekele Tipakani Ta Moya Leswaku U Dzunisa Muvumbi Wa Wena” (Xihondzo xo Rindza, July 15, 2004)
Hikwalaho ka yini swi ri swa nkoka leswaku hi va Vakreste lava wupfeke naswona u nga swi kotisa ku yini sweswo?