DYONDZO 11
Leswi Nga Ku Pfunaka Leswaku U Vuyeriwa Swinene Loko U Hlaya Bibele
U titwa njhani hi ku sungula ntirho lowukulu? Kumbexana wo vhela u hela matimba. Kambe leswaku wu ku olovela u nga ha wu endla hakatsongotsongo. Swi tano ni hi ku hlaya Bibele. U nga ha tivutisa, ‘Ndzi nga sungula kwihi?’ Eka nhlokomhaka leyi, hi ta kambisisa tindlela to olova leti u nga ti tirhisaka leswaku u rhandza ku hlaya Bibele.
1. Hikwalaho ka yini hi fanele hi hlaya Bibele siku ni siku?
Munhu la hlayaka Bibele, kumbe “nawu wa Yehovha” siku ni siku, u ta tsaka naswona swilo swi ta n’wi fambela kahle. (Hlaya Pisalema 1:1-3.) Sungula hi ku hlaya Bibele timinete ti nga ri tingani siku ni siku. Loko u ya u tolovela ku hlaya Rito ra Xikwembu, u ta ya u swi rhandza ku ri hlaya.
2. I yini lexi nga ku pfunaka leswaku u vuyeriwa loko u hlaya Bibele?
Hi fanele hi dzikisa miehleketo ya hina leswaku hi kota ku vuyeriwa swinene loko hi hlaya Bibele. Hi fanele hi hlaya hi tlhela hi “anakanyisisa” hi leswi hi swi hlayeke. (Yoxuwa 1:8, nhlamuselo ya le hansi) Loko u ri karhi u yi hlaya, tivutise swivutiso swo fana ni leswi: ‘Mhaka leyi yi ndzi byela yini hi Yehovha Xikwembu? Ndzi nga swi tirhisa njhani leswi evuton’wini bya mina? Ndzi nga va pfuna njhani van’wana hi tindzimana leti?’
3. U nga wu kuma njhani nkarhi wo hlaya Bibele?
Xana swa ku tikela ku kuma nkarhi wa ku hlaya Bibele? Vo tala va hina swa hi tikela. Ringeta ku “wu tirhisa kahle nkarhi wa [wena].” (Vaefesa 5:16) U nga endla leswi hi ku tivekela nkarhi wo hlaya Bibele siku ni siku. Van’wana va tivekela nkarhi wo hlaya Bibele nampundzu. Van’wana va hlawula ku hlaya Bibele kwala sikwini, kumbe hi nkarhi wo wisa. Kasi van’wana va hlaya Bibele nimadyambu va nga si etlela. U vona onge hi wihi nkarhi wa kahle wo va u hlaya Bibele?
ANAKANYISISA
Dyondza leswi u nga swi endlaka leswaku u tsakela ku hlaya Bibele. Dyondza ku lunghiselela kahle leswaku u ta vuyeriwa swinene eka dyondzo ya wena ya Bibele.
Hi nga dyondza ku rhandza ku hlaya Bibele ku fana ni loko hi dyondza ku rhandza swakudya swo karhi
4. Rhandza ku hlaya Bibele
Swi nga ha ku tikela loko u sungula ku hlaya Bibele. Hambiswiritano, hi nga “[tikarhatela] ku navela” ku yi hlaya, ku fana ni munhu loyi a tidyondzisaka ku rhandza swakudya swo karhi. Hlaya 1 Petro 2:2, ivi mi bula hi xivutiso lexi:
-
U vona onge loko wo hlaya Bibele masiku hinkwawo, u nga sungula ku yi rhandza ni ku tshama u swi langutele hi mahlongati ku yi hlaya?
Tlanga VHIDIYO leswaku u vona ndlela leyi vanhu van’wana va sunguleke ku rhandza ku hlaya Bibele ha yona. Ivi mi bula hi swivutiso leswi landzelaka.
-
Vantshwa va le ka vhidiyo leyi, va swi hlule njhani swilo leswi a swi va sivela ku hlaya Bibele?
-
I yini lexi va pfuneke leswaku va nga tshiki ku hlaya Bibele?
-
I yini leswi va swi endleke leswaku va tiphina hi ku hlaya Bibele?
Leswi nga ku pfunaka ku sungula ku hlaya Bibele:
-
Hlawula Bibele leyi nga ni rungula ra ntiyiso leyi yi tsariweke hi ririmi ra masiku lama. Ringeta ku hlaya Bibele—Matsalwa Yo Kwetsima Ya Misava Leyintshwa loko yi ri kona hi ririmi ra wena.
-
Sungula hi ku hlaya timhaka leti ku tsakisaka swinene. Leswaku u vona leswaku u nga swi endla njhani, vona chati leyi nge “Sungula Ku Hlaya Bibele.”
-
Fungha laha u heteleleke ku hlaya kona. Tirhisa chati leyi nge “Tiva Laha U Fikeke Kona Loko U Hlaya Bibele” leyi nga eka buku leyi.
-
Tirhisa JW Library®app. Eka app leyi, u nga hlaya Bibele ni ku tlhela u yi yingisela hi smartphone kumbe tablet ya wena kun’wana na kun’wana laha u nga kona.
-
Tirhisa swiengetelo swa Bibele—Matsalwa Yo Kwetsima Ya Misava Leyintshwa. Swi ni mimepe, tichati ni tinhlamuselo ta marito ya le Bibeleni leswi nga ta endla u tiphina hi ku hlaya Bibele.
5. Lunghiselela dyondzo ya wena ya Bibele
Hlaya Pisalema 119:34, ivi mi bula hi xivutiso lexi:
-
Hikwalaho ka yini swi ri swa nkoka ku khongela u nga si hlaya Bibele kumbe u nga si lunghiselela dyondzo ya wena ya Bibele?
U nga endla njhani leswaku u vuyeriwa swinene loko u ri karhi u dyondza buku leyi? Loko u ri karhi u lunghiselela nhlokomhaka yo karhi eka buku leyi, ringeta ku endla leswi landzelaka:
-
Hlaya tindzima to sungula ta nhlokomhaka yoleyo.
-
Hlaya matsalwa u tlhela u vona ndlela leyi ma fambisanaka ha yona ni mhaka leyi u yi hlayaka.
-
Fungha nhlamulo ya xivutiso xa ndzima yin’wana ni yin’wana; leswi swi ta ku pfuna leswaku u kota ku bula ni mudyondzisi wa wena hi nhlokomhaka leyi mi dyondzaka ha yona.
Xana a wu swi tiva?
Timbhoni ta Yehovha ti tirhise Tibibele to hambanahambana. Kambe hi rhandza Bibele—Matsalwa Yo Kwetsima Ya Misava Leyintshwa hikuva yi ni rungula leri nga ntiyiso, ya twisiseka naswona yi tirhisa vito ra Xikwembu.—Hlaya nhlokomhaka leyi kumekaka eka Website leyi nge “Xana Timbhoni Ta Yehovha Ti Ni Bibele Ya Tona?”
VAN’WANA VA RI: “Ku hlaya Bibele swa lolohisa. A ndzi na nkarhi wa yona.”
-
Wena u ri yini?
NKATSAKANYO
Leswaku u vuyeriwa swinene loko u hlaya Bibele, tivekele nkarhi wo yi hlaya, khongela leswaku u kota ku twisisa leswi u swi hlayaka ni ku tlhela u lunghiselela buku leyi ka ha ri ni nkarhi.
Mpfuxeto
-
I yini lexi nga ku pfunaka leswaku u vuyeriwa swinene loko u ri karhi u hlaya Bibele?
-
Hi wihi nkarhi lowu u nga tivekelaka wona wo hlaya Bibele?
-
Hikwalaho ka yini swi ri swa nkoka ku lunghiselela buku ya wena loko mi nga si dyondza?
KUMA LESWI ENGETELEKEKE
Xiya tindlela tin’wana leti u nga ti tirhisaka leswaku u vuyeriwa swinene loko u hlaya Bibele.
“Ndlela Leyi U Nga Pfunekaka Ha Yona Loko U Hlaya Bibele” (Xihondzo xo Rindza No. 1 2017)
Dyondza tindlela tinharhu to hlaya Bibele.
Twana leswi nga ku pfunaka leswaku u tiphina hi ku hlaya Bibele.
Kuma swiringanyeto swo hlaya Bibele eka vanhu lava ku nga khale va ri karhi va yi hlaya.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
