DYONDZO 26
Hikwalaho Ka Yini Ku Endleka Swilo Swo Biha Hi Tlhela Hi Xaniseka?
Loko hi weriwe hi khombo hi tala ku vutisa hi ku, “hikwalaho ka yini?” Ha tsaka hileswi Bibele yi hlamulaka xivutiso lexi!
1. Sathana u byi vange njhani vubihi emisaveni?
Sathana Diyavulosi u xandzukele Xikwembu. A a lava ku fuma, kutani u kucetele vanhu vo sungula, ku nga Adamu na Evha leswaku na vona va xandzuka. Sathana u endle sweswo hi ku hembela Evha. (Genesa 3:1-5) U n’wi endle a ehleketa leswaku ku ni swilo leswinene leswi Yehovha a n’wi tsonaka swona. Kahlekahle a a lava vanhu va ehleketa leswaku va ta tsaka loko va nga xi yingisi Xikwembu. Sathana u sungule ku hemba hi ku byela Evha leswaku a nge fi. Hi yona mhaka leyi Bibele yi vulaka leswaku Sathana “i muhembi ni tata wa mavunwa.”—Yohane 8:44.
2. Adamu na Evha va hlawule ku endla yini?
Yehovha a a nga va tsonanga nchumu Adamu na Evha. A a va byele leswaku va nga tidyela eka mirhi hinkwayo ya le ntangeni wa Edeni handle ka wun’we ntsena. (Genesa 2:15-17) Kambe va hlawule ku dya mihandzu ya murhi wolowo. Evha “a kha muhandzu a dya.” Kutani Adamu “na yena a dya.” (Genesa 3:6) A va xi yingisanga Xikwembu. Leswi Adamu na Evha a va hetisekile a swi va olovela ku endla leswinene. Kambe loko va hlawule ku nga xi yingisi Xikwembu hi vomu, va dyohile va tlhela va kombisa leswaku a va lavi ku fumiwa hi xona. Ku va va endle tano, swi va vangele maxangu.—Genesa 3:16-19.
3. Hi katseka njhani eka mhaka leyi nga endla hi Adamu na Evha?
Loko Adamu na Evha va dyohile, va sungule ku ka va nga ha hetiseki ivi vana va vona va nga hetiseki ku fana na vona. Bibele yi vula leswi hi Adamu: ‘Xidyoho xi nghene emisaveni hi munhu un’we, ni rifu ri nghene hikwalaho ka xidyoho, kutani rifu ri tlulele vanhu hinkwavo.’—Varhoma 5:12.
Swi tele leswi endlaka hi xaniseka. Mikarhi yin’wana hi xaniseka hikwalaho ka swiboho leswi hoxeke leswi hi swi endlaka. Mikarhi yin’wana hi xaniseka hikwalaho ka leswi vanhu van’wana va endlaka swiboho leswi hoxeke. Mikarhi yin’wana ha xaniseka hileswi ku tshukaka ku endleka swilo swo biha laha hi nga kona hi nga swi langutelanga.—Hlaya Eklesiasta 9:11.
ANAKANYISISA
Kambisisa leswaku hikwalaho ka yini ku nga ri Xikwembu lexi vangaka swilo swo biha ni maxangu lama hi ma vonaka namuntlha, u tlhela u vona leswaku xi titwa njhani loko hi xaniseka.
4. I mani la endlaka hi xaniseka?
Vanhu vo tala va tshemba leswaku Xikwembu hi xona xi fumaka misava. Xana sweswo i ntiyiso? Tlanga VHIDIYO.
Hlaya Yakobo 1:13 na 1 Yohane 5:19, ivi mi bula hi xivutiso lexi:
-
Xana Xikwembu hi xona xi vangaka ku xaniseka ni swilo swo biha?
5. Vona leswi endlekeke hi mpfhuka Sathana a sungule ku fuma
Hlaya Genesa 3:1-6, ivi mi bula hi swivutiso leswi:
-
Sathana u hembe a ku yini?—Vona ndzimana 4 na 5.
-
Sathana u n’wi kanganyise njhani Evha leswaku a tshemba leswaku Yehovha a a va tsona swo karhi?
-
Hi ku ya hi Sathana, xana vanhu va nga tsaka loko va fumiwa hi Yehovha?
Hlaya Eklesiasta 8:9, ivi mi bula hi xivutiso lexi:
-
Ku endleka yini leswi misava yi nga fumiwiki hi Yehovha?
-
Adamu na Evha a va hetisekile naswona a va hanya eParadeyisini. Kambe va yingise Sathana ivi va xandzukela Yehovha
-
Loko Adamu na Evha va xandzuka, vanhu hinkwavo va ve ni xidyoho, va xaniseka va tlhela va fa
-
Yehovha u ta herisa xidyoho, ku xaniseka ni rifu. Ku fana ni le ku sunguleni, vanhu va ta va lava hetisekeke va hanya eParadeyisini
6. Yehovha u twa ku vava loko hi xaniseka
Xana Xikwembu xi na mhaka loko hi xaniseka? Xiya leswi Hosi Davhida na muapostola Petro va swi tsaleke. Hlaya Pisalema 31:7 na 1 Petro 5:7, ivi mi bula hi xivutiso lexi:
-
U titwa njhani ku tiva leswaku Yehovha wa swi vona naswona u twa ku vava loko hi xaniseka?
7. Xikwembu xi ta herisa ku xaniseka
Hlaya Esaya 65:17 na Nhlavutelo 21:3, 4, ivi mi bula hi xivutiso lexi:
-
Hikwalaho ka yini swi chavelela ku tiva leswaku Yehovha u ta herisa swilo hinkwaswo leswi karhataka vanhu?
Xana a wu swi tiva?
Mavunwa ya Sathana yo sungula ma thyakise Yehovha vito. U onhe ndhuma ya Yehovha hi ku vula leswaku a nga na rirhandzu naswona a hi Mufumi lonene. Ku nga ri khale, Yehovha u ta herisa swiphiqo hinkwaswo swa vanhu a tlhela a basisa vito rakwe. Hi marito man’wana, u ta swi kombisa leswaku u fuma hi ndlela leyinene. Mhaka ya ku basisiwa ka vito ra Yehovha hi yona ya nkoka swinene ku tlula swilo hinkwaswo.—Matewu 6:9, 10.
VAN’WANA VA RI: “Loko hi xaniseka Xikwembu xo hi ringa.”
-
Wena u ri yini?
NKATSAKANYO
Sathana Diyavulosi ni vanhu vambirhi vo sungula hi vona va endleke leswaku ku va ni vubihi emisaveni. Yehovha u twa ku vava loko hi xaniseka naswona u ta ku herisa ku nga ri khale.
Mpfuxeto
-
Sathana Diyavulosi u hembele Evha a ku yini?
-
Ku xandzuka ka Adamu na Evha ku hi khumbe njhani?
-
Hi swi tivisa ku yini leswaku Yehovha a nga tsaki loko hi xaniseka?
KUMA LESWI ENGETELEKEKE
Twana leswaku Bibele yi xi hlamusela njhani xidyoho.
Twana hi mhaka leyi Sathana Diyavulosi a yi sunguleke entangeni wa Edeni.
“Ha Yini Xikwembu Xi Pfumelela Ku Xaniseka?” (Xihondzo xo Rindza, January 1, 2014)
Twana tinhlamulo leti twalaka ta xivutiso lexi xa nkoka swinene.
Twana leswaku wanuna loyi u dyondze yini hi ku xaniseka loku a a ku vona ku endleka.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
