CHIGAŴA 1
Muthembengi Chiuta Kuti Nthengwa Yinu Yije Yalikondwa
“Kutuwa ku mtendeku chata wanguŵachita munthurumi ndi munthukazi.”
Yehova * Chiuta ndiyu wangukwatiska nthengwa yakwamba. Bayibolo likamba kuti wangupanga munthukazi wakwamba ndipu “wangumutole ku munthu yo.” Adamu wati wamuwona, wangukondwa ukongwa ndipu wanguti: “Uyu sonu nchiwanga cha viwanga vangu ndi nyama ya nyama yangu.” (Chiyambo 2:22, 23) Mazuŵa nganu napu, Yehova wakhumba kuti ŵanthu akutolana ajengi mwalikondwa.
Asani mwaŵanthu mwatolana ŵaka, muwona nge kuti mukumanengi ndi suzgu lelosi cha. Kweni uneneska ngwakuti chinanga munthurumi ndi munthukazi ayanjani wuli, akumana mbwenu ndi masuzgu chifukwa chakuti wosi mbakubuda. (1 Ŵakorinte 7:28) Mukabuku yaka, mwe fundu za m’Bayibolo zo zingakuwovyani kuja ndi nthengwa yalikondwa asani mungazigwiriskiya nchitu.
1 MUFISKENGI UDINDU WO YEHOVA WAKUKUPASKANI
VO BAYIBOLO LIKAMBA: Munthurumi ndiyu mutu wa banja.
Asani mukuto, Yehova wakhumba kuti mumuphweriyengi umampha ukongwa muwolu winu. (1 Petro 3:7) Iyu wangumupanga kuti waje wakukuwovyani kweniso munyinu wakwenere ndipu wakhumba kuti mumupaskengi ulemu wakumwenere kweniso mumuyanjengi. (Chiyambo 2:18) Asani mutimwanja ukongwa muwolu winu, muyesesengi kudanjizga vakukhumba vaki m’malu mwakudanjizga vo mukhumba imwi.
Asani mukuyirwa, Yehova wakhumba kuti mutumbikengi ukongwa murumu winu ndipu mumuwovyengi kufiska udindu waki nge mutu. (1 Ŵakorinte 11:3; Ŵaefesu 5:33) Mukoliyanengi ndi murumu winu pa vo wasankha ndipuso mumuwovyengi ndi mtima wosi. (Ŵakolose 3:18) Asani muchitengi viyo, mujengi munthukazi wakutowa ukongwa kwa murumu winu kweniso kwaku Yehova.
VO MUNGACHITA:
-
Fumbani munthu yo mukutolana nayu kuti wakukambiyeni vo mungachita kuti muje munthurumi pamwenga munthukazi wamampha. Vwisiyani mwakuphwere ndipu yesesani kusintha
-
Muzikirengi. Vitongi nyengu yitali kuti muziŵi vo mungachita kuti weyosi wakondwengi
2 MUŴANAŴANIYENGI UKONGWA MO MUNYINU WAVWIYA
VO BAYIBOLO LIKAMBA: Muyesesengi kuziŵa vo munthu yo mukutolana nayu watanja. (Ŵafilipi 2:3, 4) Mumuwonengi kuti ngwakuzirwa ukongwa kweniso mungaluwanga cha kuti Yehova wakhumba kuti ateŵeti ŵaki ajengi akufwasa ku ŵanthu wosi. (2 Timote 2:24) “Walipu mweniyo mazu ngaki ngaruŵi nge wuli nkhulasa kwa lipanga, kweni lilimi la wazeru lituza ndi kuchizga.” Fundu iyi, yititisambiza kuti tiŵanaŵanengi dankha techendalongoro. (Nthanthi 12:18) Mzimu waku Yehova ukuwovyeningi kuti mulongorongi mwaulemu kweniso mwachanju.
VO MUNGACHITA:
-
Mwechendakambiskani nkhani yikulu ndi munthu yo mukutolana nayu, rombani kuti Chiuta wakupaskeni mtima wakuzikira ndipuso kuti mukambiskani mwakufwatuka
-
Muŵanaŵaniyengi dankha vo mukhumba kukamba kweniso mo mungakambiya
3 MUKAMBIRANENGI VO MUŴANAŴANA
VO BAYIBOLO LIKAMBA: Asani mwatolana, muja “liŵavu limoza.” (Mateyu 19:5, NW) Chinanga ve viyo, mwe ŵanthu ŵaŵi akupambana ndipu mungaja ndi maŵanaŵanu ngakuyanana cha. Mwaviyo, mukhumbika kusambira mo mungachitiya kuti mukoliyanengi ndi maŵanaŵanu nga munyinu kweniso muvwengi nge mo wavwiya. (Ŵafilipi 2:2) Kukolerana nkhwakukhumbika ukongwa asani musankha vakuchita. Bayibolo likamba kuti: “Vakulongosoleka vichitika ndi chipangu [“asani ŵanthu apangana,” NW].” (Nthanthi 20:18) Mugwiriskiyengi nchitu fundu za m’Bayibolo kuti zikuwovyeningi kusankhiya limoza vinthu vakukhumbika.
VO MUNGACHITA:
-
Mukambiyengi munthu yo mukutolana nayu maŵanaŵanu nginu kweniso mo muvwiya
-
Mwechendazomeri kuchita chinthu chinyaki chechosi, mukambiyengi dankha munthu yo mukutolana nayu
^ ndimi 4 Yehova ndilu zina chayilu laku Chiuta.
Mungayanja Kuŵerenga so Nkhani Izi
CHIGONGWI CHA MLINDA
Anthurumi—Muchitengi Vinthu Mwachanju ndi Awolu Ŵinu
M’banja mungaŵa masuzgu chinanga kuti lingaŵa lakukhupuka.
MAFUMBU NGO BAYIBOLU LIMUKA
Kumbi Bayibolu Lingandiwovya Kuja ndi Banja Lalikondwa?
Ulongozgi wazeru wakutuliya mu Bayibolu wawovya anthulumi ndi anthukazi anandi kuja ndi banja lalikondwa.
