Masalimo 19:1-14
Ku wakulongozga sumu. Sumu yaku Davidi.
19 Vakuchanya vipharazga unkhankhu waku Chiuta;+Vamude vipharazga ntchitu za manja ngaki.+
2 Zuŵa ndi zuŵa vituzga mazu,Ndipu usiku ndi usiku vivumbuwa zeru.
3 Vilongoro cha, ndipu vilivi mazu;Mazu ngaki ngavwika cha.
4 Kweni kupoma kwaki kwafika* mucharu chosi,Ndipu uthenga waki wafika kuvigoti va charu chapasi.+
Lumwi walijinthiya hema kuchanya;
5 Le nge munthulumi mweneku wa nthengwa yo watuwa muchipinda chakunozgekiyamu zowala;Likondwa nge munthu wanthazi yo watchimbiya munthowa yaki.
6 Lituwa kuchigoti chinyaki cha kuchanya,Ndipu lizunguliya mpaka kuchigoti chinyaki;+Palivi cho chibisama kuti chileki kuvwa kotcha kwaki.
7 Dangu laku Yehova ndakufikapu,+ liweziyamu nthazi.*+
Vikumbusu vaku Yehova vakuthembeka,+ vitimupaska zeru yo waleka kuziŵa vinandi.+
8 Marangu ngaku Yehova ngarunji, ngakondwesa mtima;+Dangu laku Yehova ndakutowa, lingweruska masu.+
9 Kopa Yehova+ nkhwakutowa, kuŵengepu mpaka muyaya.
Vyeruzgu vaku Yehova vauneneska, kweniso vaurunji.+
10 Vakukhumbirika ukongwa kuluska golidi,Kuluska golidi wamampha* ukongwa,+Ndipuso vakunowa kuluska uchi,+ uchi wo unthonya muvisa.
11 Mteŵeti winu watcheŵeskeka navu;+Asani munthu wativisunga, walonde mphotu yikulu.+
12 Ndiyani yo wangajiziŵa vo wanangisa?+
Nditoweseni ku maubudi ngo ndachita kwambula kuziŵa.
13 Kanizani mteŵeti winu kuti waleki kuchita vinthu mwakujikuzga;+Mungazomerezanga cha kuti kundithereski.+
Mwaviyo, ndijengi wakufikapu,+Ndipuso wambula mulandu pa nkhani ya maubudi ngakulu.*
14 Mazu nga pamulomu pangu ndipuso vinthu vo ndilunguruka mumtima mwangu,Vikukondweseningi yimwi Yehova,+ Jalawi langu+ ndipuso wakundiwombo.+
Mazu Ngam'mphata
^ Yapa pangafwatulikiya so kuti, “vingwi vaki vakupimiya vafika.”
^ Pamwenga kuti, “liweziyamu umoyu.”
^ Pamwenga kuti, “wakuyengetulika.”
^ Pamwenga kuti, “maubudi nganandi.”
