Nthanthi 12:1-28
12 Munthu yo watanja ulongozgi watanja kuziŵa vinthu,+Kweni yo watinkha kuchenyeka waŵanaŵana umampha cha.*+
2 Yehova wakondwa ndi munthu wamampha,Kweni watinkha munthu yo wanozga viŵembu.+
3 Palivi munthu yo wavikilirika chifukwa cha kuchita vinthu viheni,+Kweni ŵanthu arunji azamuchesulika cha.
4 Munthukazi wazeru ntchisoti chaufumu kwa mulumu waki,+Kweni yo wachita vinthu vakuchitiska soni we nge chinthu chakuvundisa viwanga va mulumu waki.+
5 Maŵanaŵanu nga ŵanthu arunji ngakunyoloka,Kweni ulongozgi wa ŵanthu aheni, ngwakupusisa.
6 Mazu nga ŵanthu aheni ntchiŵembu chakofya ukongwa,*+Kweni mulomu wa ŵanthu akunyoloka utaska.+
7 Asani ŵanthu aheni athereskeka, ajapu so cha,Kweni nyumba za ŵanthu arunji zilutirizgengi kujaku.+
8 Munthu wathamikika chifukwa cha kulongoro vinthu mwazeru,+Kweni munthu yo we ndi mtima wakunyongoroka, ŵanthu amuyuyuwengi.+
9 Nkhanthu kuja munthu wakusika uku we ndi mteŵetiKuluska kujipaska unkhankhu uku ulivi chakurya.*+
10 Munthu murunji waphwere viŵetu vaki,*+Kweni munthu muheni, chinanga ndi lisungu laki le nge nkhaza.
11 Yo walima charu chaki, wakhorwengi ndi chakurya,+Kweni yo wapenja vinthu vambula fundu walivi zeru.*
12 Munthu muheni wachitiya sanji cho ŵanthu aheni awonja,Kweni msisi wa munthu murunji upasengi vipasu.
13 Munthu muheni wawira mu mazu ngaki nga ubudi,+Kweni munthu murunji wapona ku masuzgu.
14 Munthu wakhorwa ndi vinthu vamampha kutuliya mu chipasu cha mazu ngaki,*+Ndipu ntchitu za manja ngaki zimuweriyengi.
15 Nthowa ya munthu muzereza, njamampha mumasu mwaki,+Kweni munthu wazeru wazomera ulongozgi.+
16 Munthu muzereza walongo ukali waki nyengu yeniyo,*+Kweni munthu wakuchenje waziŵaniza* kunyozeka.
17 Munthu yo wapereka ukaboni mwakugomezgeka wakamba uneneska,*Kweni kaboni waboza wakamba boza.
18 Mazu ngakukambika mwambula kuŵanaŵana umampha, ngagwaza nge lipanga,Kweni lilimi la munthu wazeru lichizga.+
19 Milomu yo yikamba uneneska yijengepu mpaka muyaya,+Kweni lilimi laboza lijengepu kwa kanyengu kamanavi ŵaka.+
20 Chinyengu che mumtima mwa ŵanthu wo anozga viŵembu,Kweni ŵanthu wo achiska chimangu* akondwa.+
21 Palivi chinthu chiheni cho chiwiyengi munthu murunji,+Kweni ŵanthu aheni alondiyengi chigaŵa chawu cha masuzgu.+
22 Milomu yo yikamba boza Yehova waseruka nayu,+Kweni wo achita vinthu mwakugomezgeka atimukondwesa.
23 Munthu wakuchenje wabisa vo waziŵa,Kweni mtima wa muzereza utuzga uzereza waki.+
24 Janja la munthu waphamphu lilamuliyengi,+Kweni manja nga munthu mulesi ngagwirengi ntchitu yaukapolu.+
25 Kufipa mtima kuchitiska kuti mtima wa munthu uziti,*+Kweni mazu ngamampha ngatiwuchiska.+
26 Munthu murunji wapenja malu ngaki ngakuliskaku viŵetu,Kweni nthowa ya ŵanthu aheni yitiŵalandizga.
27 Munthu mulesi watchimbiza cha nyama yaki yakuti waryi,+Kweni phamphu ntchuma chakuzirwa cha munthu.
28 Nthowa yaurunji yilongozge ku umoyu;+Ndipu munthowa yaki mulivi nyifwa.
Mazu Ngam'mphata
^ Pamwenga kuti, “ngwambula zeru.”
^ Mazu ngaki chayingu, “ngalindizga ndopa.”
^ Mazu ngaki chayingu, “chiŵandi.”
^ Pamwenga kuti, “umoyu wa chiŵetu chaki.”
^ Mazu ngaki chayingu, “we ndi mtima wambula zeru.”
^ Mazu ngaki chayingu, “mumulomu mwaki.”
^ Pamwenga kuti, “pa zuŵa lenilo.”
^ Mazu ngaki chayingu, “wabenekere.”
^ Mazu ngaki chayingu, “cho ntchaurunji.”
^ Mazu ngaki chayingu, “wo apereka ulongozgi wachimangu.”
^ Pamwenga kuti, “munthu wasuzgiki maŵanaŵanu.”
