Hen Mbakolose 2:1-23
2 Gadia m soo mer fa nen er m lu nôngon kwagh kpoghuloo sha ci wen, man sha ci u mba ken Laodishia,+ kua sha ci u mba ve lu a nenge a mo ishigh a ishigh ga la yô.
2 Ka sha u kwagh ne ma a sur ve asema+ shi ma ve lu gungur môm ken dooshima,+ nahan ma ve lu yôughyôugh sha akaa cii, inja na yô, ma ve lu a mkav u mimi, kua mfe u vough sha kwagh u icighan kwaghmyer u Aôndo la, ka Kristu je la.+
3 Ka ken a na i yer hanma kwaghfan man mfe u injaa cii ye.+
4 M ngu ôron kwagh ne sha er ma or a va bume ne sha zwanyohon ga yô.
5 Er m lu hen atô wen ga nahan kpa, m ngu vea ven ken jijingi, shi saan mo iyol u fan er ne lu eren kwagh sha inja sha inja,+ shi ne ne Kristu jighjigh taveraa yô.+
6 Nahan, er ne ngohol Kristu Yesu Ter yô, za nen hemen u zenden ken mzough vea na,
7 wa nen amise shi i maa ne ken a na,+ tile nen her dông sha jighjigh u nan,+ vough er yange i tese ne nahan, shi sughun nen Aôndo hanma shighe cii.+
8 Wa nen ikyo sha er or a hôn ne a dugh sha kwaghfan u taregh man mbamhen mba aiev man mba gbilinigh+ mba ve har sha aeren a uumace man sha akaa a tar u nengen ér ka a hange hange la ga yô; mbamhen mbara nahan, ka mba Kristu ga.
9 Gadia ka ken a na aeren a Aôndo cica cii a kohol a lu ye.+
10 Nahan ka sha a na i iv ne ye, un u a lu ityough sha gomoti kua tahav cii la.+
11 Ka sha mlu wen vea na la kpa i tsôngo ne ye, ka icôngo i sha ave i ka i tôndo or kwavyolough+ la ga, kpa ka icôngo i Kristu.+
12 Yange i ii ne a na imôngo sha batisema na la,+ shi ka sha mlu wen vea na la kpa i nder ne+ a na imôngo sha jighjigh u ne ne tom u ageegh u Aôndo, un u nder un shin ku la ye.+
13 Heela tseegh ga, shin er yange ne lu kpenegh sha akaabo a en kua ken mlu wen u sha iyol u ipyusuv la nahan kpa, Aôndo na ne mba uma a na imôngo.+ A de se akaabo a ase cii+
14 shi a kough* kwaghngeren u sha ave,+ u lu a atindi ker,+ u lu nan se ibo la.+ A mande kwagh shon sha kon,* a kar a mi kera.+
15 Ka sha u je a pon idyelegh u ugomoti man mbautahav ye; a yem a ve uikyangen, nahan a hee ve ken igbar,+ u tesen ér a hemba ve ityav gburu gburu.
16 Sha nahan yô, or a̱ de ôron ne ijir sha kwagh u ne yan shi ne man ga,+ shin sha kwagh u ma iniongo i eren shin uwer u he+ shin ma iyange i memen ga.+
17 Akaa la ka mure u akaa a a lu van la,+ kpa kwagh jim jim yô, ka Kristu.+
18 Or a̱ de yangen ne u zuan a iyua la ga,+ or u ka i doo nan u tesen ér nan hiden a iyol ijime, kpa i lu sha mimi ga, u nan civir mbatyomov, u ka nan “na jighjigh”* a akaa a nan nengen a mi la. Jighilii yô, mhen u nan u sha iyol la na nan gbe moron iyol a ityôkyaa shio tsô.
19 Nan kôr ave sha un u a lu ityough la gbang gbang ga,+ un u a lu nan iyol hanma kwagh u i soo, shi a ne alegh a iyol shon cii a zor vough vough sha uijuan man igbila, Aôndo a ne i lu vesen seer a seer la.+
20 Aluer ne mba kpenegh a Kristu imôngo ken akaa a tar u nenge ér ka a hange hange la yô,+ er nan ve shi ne eren kwagh inja er ne mba ken tar her nahana? Ne hide ne mba sha ikyev i atindi+ a a kaa ér:
21 “De tôôn ga, shi de benden sha nombor ga, shi de benden ave kpaa ga” ne here?
22 Atindi ne nga ôron kwagh u akaa a ka a̱ er kwagh a mi ve a saa ishe la, a har sha atindi man atesen a ior.+
23 Er i lu inja er kwaghfan ngu ken akaa la nahan kpa, ka gbenda u civir Aôndo u or ka nan tsua iyol i nan yô, shi ka iyol i hiden a mi ijime i sha mimi ga, kua u or eren iyol i nan ican,+ kpa akaa ne nga wasen or u hemban asaren a iyolough ga.
Ngeren mba shin kpe
^ Shin “a ese.”
^ Nenge Ngeren u Pasen Asember.
^ Ka mkaanem ma ka i ôr zum u or lu nyôron nongo a mbafanaôndo ga yô.
