Hen Mbafilipi 3:1-21
3 Nahan, anmgbianev av, za nen hemen u ember ken Ter.+ Uwer gbam u shi ngeren ne kwagh sha akaa a yange m vande ngeren ne kwagh sha mi la ga, man ka sha u kwaghbo a̱ de tseren ne ga yô.
2 Wa nen ikyo sha kwagh u ior mba ve eren kwagh er ka aniwaav* la; wa nen ikyo sha kwagh u mba ve eren ior akaa a nyoon la; wa nen ikyo sha kwagh u mba ka ve tôndo or ivav la.+
3 Gadia ka se i tsôngo se jim jim ye,+ se mba se lu eren icighantom sha jijingi u Aôndo shi se lu kaan ihyagh sha kwagh u Kristu Yesu,+ se lu suur sha iyol ga ne.
4 Jighilii yô, m ngu a atôakyaa a kaan ihyagh sha iyol kpaa.
Aluer or hen ér nan ngu a atôakyaa a kaan ihyagh sha iyol yô, mo m hemba ngun a mi cii:
5 i tsôngom sha iyange i sha anigheni,+ m due ken ikyurior i Iserael, ken ipyaven u Benyamin; m ngu Orheberu,+ mbamaren av lu Mbaheberu; sha kwagh u tindi yô, m lu Orfarishi;+
6 sha kwagh u ishima i tseen kpa, yange m tôv nongo* u Kristu a ican;+ hide sha kwagh u perapera u a har sha tindi u kuran la kpa, m tese mer m ngu a acôghor ga.
7 Nahan cii kpa, akaa a yange lum a mtsera la, kera ngam a mtsera ga,* sha ci u Kristu.+
8 Ka cii la ga, jighilii yô, m nenge akaa cii kera ngam a mtsera ga, sha ci u mfe u hemban cii, u sha kwagh u Terem Kristu Yesu la. Gadia ka sha ci na m te akaa cii kera ye, m nenge a mer ka ihyôghonov* dang, sha u Kristu a lu mtsera wam
9 shi me lu ken mzough vea na yô, ka sha ci u m ngu orperapera sha Tindi u kuran ga, kpa ka sha ci u perapera u a har sha u nan Kristu+ jighjigh la,+ ka perapera u or ka nana̱ na jighjigh ve Aôndo a nenge nan ér nan ngu orperapera la.+
10 Awashima wam yô, ka u fan un kua tahav mbu Un u yange nder un shin ku la,+ shi yan atsan a un kpa yange ya la,+ shi lumun u kpen imba ku i yange kpe la,+
11 sha u me nenge aluer ka u me fatyô u aren sha ian i va lun ken mba a va vande nderen ve shin ku mbara yô.+
12 U ngu wer m zua a iyua la shin i erem m hingir or u lun a myen shio kera ve ga, kpa m ngu nôngon sha afatyô wam cii+ mer me nenge aluer ka u me fatyô u zuan a iyua i Kristu Yesu a tsuam* ér m va zua a mi la kpaa yô.+
13 Anmgbianev, mo yô, m nenge mer m ngu a zua a iyua shon ve ga; kpa kwagh u a lu jighilii yô, ka un ne: Er m hungur a akaa a ken ijime,+ m lu naregh sha u me zua a akaa a ken hemen yô,+
14 m ngu nôngon sha afatyô wam cii mer me ar sha ian i va zuan a iyua+ i yemen sha,+ i Aôndo a lu yilan se sha mi ken Kristu Yesu la.
15 Sha nahan yô, se mba se vie yô,+ se henen nen sha akaa a m ter ne kwagh sha mi ne, man aluer ne mba henen kwagh sha ma gbenda ugen kpa, Aôndo una wase ne u henen kwagh sha gbenda ne.
16 Nahan, sea za ikyura nan nan kpa, se za nen hemen u zenden sha inja sha inja sha gbenda ne.
17 Anmgbianev, ne cii lu nen mba kaven mo,+ shi nengen nen ken mba zende ve u tese ér mba dondon ikyav i se ver ne la.
18 Gadia ior mba kpishi—ka m zer teren kwagh ve, hegen kpa m ngu teren kwagh ve a mliam ashe je—mba zende ve u tese ér mba mbahyomov mba ku u Kristu kpe sha kon* la yô.
19 Mkur ve ka mtim, man aôndo ve ka iyav vev, shi ka akaa a ve eren, a kunya ma u ker ve sha mi la, ka ve gema ve kaan ihyagh a mi ye, shi ishima ve ngi sha akaa a taregh.+
20 Kpa se yô, se mba ior+ i tar u sha,+ shi se mba veren ashe keghen oryiman u una due sha una va la, ka Ter wase Yesu Kristu je la,+
21 una va gema iyol yase i i gbe kwagh ga ne ia hingir er* iyol na i i lu a icivir la nahan,+ sha tahav nav mbu kpilighyol, mbu a lu geman akaa cii hingir sha ikyev na la.+
Ngeren mba shin kpe
^ Shin “mba ve lu wang ga.”
^ Nenge Ngeren u Pasen Asember.
^ Shin a fatyô u kaan ér, “m undu a sha ishima yam.”
^ Shin “icimbiv.”
^ Zwa Grika, “yange gbam sha uwe.”
^ Nenge Ngeren u Pasen Asember.
^ Zwa Grika, “ia lu kwaghmôm a.”
