Mbaajiriv 21:1-25
-
I yima ipyaven u Benyamin (1-25)
21 Tsô nomso mba Iserael bum ken Misepa+ kaa ér: “Or wase môm nana na Orbenyamin wan u nan u kwase ér nana vôso ga.”+
2 Nahan ior mbara mough za hen Betel+ za tema her sha ishigh ki Aôndo u mimi la zan zan aikighe; ve lu vaan genger genger sha ci u ishima vihi ve ker.
3 Shi ve lu kaan ér: “Yehova Aôndo u Iserael, er nan kwagh ne a er ken Iserael? Gba u ipyaven môm una tim ken Iserael nyian sha ci u nyi?”
4 Kpernan ior mough pepe maa atse sha u vea na iniav mbi nanden man iniav mbi bem her yô.+
5 Maa ior i Iserael kaa ér: “Ken uipyaven mba Iserael cii, ka unô yange ve kôndo ve va kohol sha ishigh ki Yehova ga?” Gadia yange ve er iceghzwa i vesen ér, aluer or kôndo va hen Yehova hen Misepa ga yô, a wua nan kpee a bunde ga.
6 Nahan kunya kôr ior i Iserael a anmgbian ve Benyamin, sha ci u kwagh u er un la. Ve kaa ér: “Nyian ne, i tôndo ipyaven i môm ken Iserael kera.
7 Se er nan ve se na mba ve shi her la kasev, er hegen se bum ken iti i Yehova+ ser, se na ve ônov asev mba kasev ve vôso ga nee?”+
8 Ve pine ér: “Ken uipyaven mba Iserael cii, ka unô yange ve kôndo ve va kohol sha ishigh ki Yehova hen Misepa ga?”+ Kwagh ka a er yô, or môm nan due ken Yabeshi-gileadi nan va ken afo, ape nongoior la lu la ga.
9 Shighe u i ôr iyenge i ior la, ve kav ér or môm ken mba ve tem ken Yabeshi-gileadi la nan lu her ga.
10 Tsô mkohol la tindi nomso mba hemban agee cii iorov 12,000 ker. Ve kaa a ve ér: “Za, za wua nen mba ve tem ken Yabeshi-gileadi la sha sanker, kasev man mbayev je kpaa.+
11 Ka kwagh u i gbe u ne er je ne: Wua nen hanma nomsoor man hanma kwase u nan vande yaven a nomsoor cii.”
12 Ve zua a mbayevkasev 400 ken ior mba ve tem ken Yabeshi-gileadi la; lu anuunaukase a a lu a vande yaven a nomsoor ga yô. Nahan ve va a ve ken afo a hen Shilo+ a a lu ken tar u Kaanan la.
13 Maa mba ve lu hen mkohol la cii tindi loho hen Mbabenyamin mba ve lu sha vande u Rimon la,+ ve kaa ér bem a lu a ve.
14 Nahan Mbabenyamin cin hide hen shighe la. Tsô ve na ve kasev mba ken Yabeshi-gileadi+ mba ve de ve, ve lu uma la, kpa ve zua a kasev ve na ve cica cii ga.
15 Kunya kôr ior mbara a Benyamin+ sha ci u kwagh u er un la, gadia Yehova va a mpav hen atô u uipyaven mba Iserael.
16 Nahan mbatamen mba mkohol la kaa ér: “Er yange i tim kasev mba ken Benyamin cii kera yô, se er nan ve se na nomso mba ve mase shin la kaseva?”
17 Ve gema ve kaa ér: “A gba u a na mba ve war ken Benyamin la dyako, sha er a tim ma ipyaven ken Iserael kera ga yô.
18 Se fatyô u nan ve ônov asev mba kasev ser ve vôso ga, sha ci u ior i Iserael bum ér: ‘Or u nana na Benyamin kwase la ifyan i kôr nan.’”+
19 Maa ve kaa ér: “Nenge! Hanma inyom ka i er iniongo i Yehova ken Shilo+ u a lu Betel vegher u ken imbusutarimese, a gem a lu sha gbenda u mough Betel yem Shekem vegher u sha ityoughkitaregh la, shi a lu Lebona vegher u ken imbusutariyan la.”
20 Tsô ve kaa a nomso mba Benyamin ér: “Za, za yer nen ken ishule i ikyon i wain.
21 Nahan ne nengen a agumaukase* a Shilo aa duen u za vinen amar a ve a sha ahwa la yô, hanma wen nana due ken ishule i ikyon i wain la nana za kôr môm ken agumaukase a Shilo, a hingir kwase u nan, maa ne hide ne yem ken tar u Benyamin.
22 Nahan uter shin anmgbianev vev mba nomso vea va yilan ijir hen a vese yô, se kaa a ve ser, ‘Zungwe nen se mhôônom sha ci ve, gadia se fatyô u nôngon ityav kôron kasev va nan hanma ve ga,+ shi ne kpa ne fatyô u nan ve kasev a u lun a ibo shio ga.’”+
23 Tsô nomso mba Benyamin er nahan vough. Hanma ve nan kôr kwase ken kasev mba ve lu vinen amar la. Mba been yô, ve cin ve hide hen dyako ve, ve va hide ve maa agar a ve,+ ve tema ker.
24 Maa Mbaiserael sambe hen ijiir la hen shighe la, hanma ve nan yem hen ipyaven u nan man tsombor u nan, shi hanma ve nan mough hen ijiir la nan yem hen dyako u nan.
25 Sha ayange la, tor lu ken Iserael ga.+ Nahan hanma or lu eren kwagh u lu vough sha ashe a nan yô.*
