Duteronomi 21:1-23
21 “Aluer i za nenge a or u i woo nan i kende ken toho ken tar u Yehova Aôndo wou a lu nan we ér u tema ker la, man i fa or u nan woo nan ga yô,
2 mbatamen ou kua mbaajiriv ou+ ve due, ve za kar mgbeica u ikyom-or la a agar a a lu ikyua la.
3 Nahan mbatamen mba hen gar u a hembe lun ikyua ikyua a ikyom shon la, ve za ken ikyumuile ve za kôr tulebua u i lu a vande eren tom a na ga, i lu a vande kangen un igbur kpaa ga yô.
4 Mbatamen mba hen gar la ve yem a tulebua la shin pev* u mngerem ma lu kuan shimi, ape i lu a vande kahan kwagh shin lôôn iyiav kpaa ga yô, ve za sombo tulebua la mon shin pev shon.+
5 “Nahan upristi, ka Mbalevi je la, ve kporom, sha ci u Yehova Aôndo wou tsua ve ér ve eren un tom,+ ve yôôn iveren ken iti i Yehova.+ Vea tese er a kuren ayôôso a tswam u dugh ker yô.+
6 Nahan mbatamen mba ve lu hen gar u a hembe lun ikyua ikyua a ikyom shon la cii ve ôô ave,+ ve̱ haa sha tulebua u i kever un mon shin pev shon la.
7 Maa ve kaa ér, ‘Ka ave ase a hee awambe ne inya ga, ashe ase kpa nenge er i hee a ga.
8 Yehova, de tsahan ior ou Iserael mba yange u paa ve la sha kwagh ne ga,+ shi de den wer ibo i awambe a orishôôgh i lu hen atô u ior ou Iserael ga.’+ Nahan a kera tsaha ve sha ci u iboawambe la ga.
9 Kape u kar a ibo i awambe a orishôôgh hen atô wou kera, sha u eren kwagh u vough sha ishigh ki Yehova je la.
10 “Zum u u ze u za nôngon ityav a mbahyomov ou man Yehova Aôndo wou a hemba ve sha ci wou, u kôr ve u hide a mi uikyangen,+
11 man u nenge a kwase u doonashe ken mba i kôr ve la, nan doo u ishima man u soo wer u vôso nan nana hingir kwase wou yô,
12 u fatyô u van a nan ken ya wou. Nana hondo ityough shi nana sôr akughur a nan.
13 Nana̱ er akondo a i za kôr nan a mi la iyol kera, maa nana lu hen ya wou. Nana vaa ter u nan kua ngô u nan uwer jimin.+ Nana been yô, u fatyô u tsan a nan; u hingir nom u nan, nan kpaa nana hingir kwase wou.
14 Kpa aluer kera va doo u a nan ga yô, de nan nana yem+ ape nan soo cii.* De teen nan ngohol inyaregh shin nzughul a nan ga, sha ci u u hee nan.
15 “Aluer or ngu a kasev uhar, kpa u môm hemba doon nan ishima a ugen la,* man ve uhar cii ve mar nan ônov mba nomso, man ka kwase u a doo nan ishima ga la a hii maren nan wan u nomso yô,+
16 sha iyange i nan lu nan ônov mba nan dyako la, a lumun ér nana tôô dyako u waniunda, nana na wan u kwase u a hembe doon nan ishima la, nana gema a undu wan u kwase u a doo nan ishima ga, u a lu waniunda kpôô kpôô la ga.
17 Nana wa ian i waniunda i wan u kwase u a doo nan ishima ga la ikyo, sha u nan un kwar kwa har ken akaa a nan lu a mi cii, sha ci u ka un a lu mhii u agee a nan a mar ye. Ian i waniunda la ka i na.+
18 “Aluer or ngu a wan u taver ityough shi hendan kwagh, u nan vende u ungwan imo i ter u nan shin ngô u nan,+ man ve nôngo ér vea kôôm nan kpa nan venda u keghen ato a ve yô,+
19 ter u nan man ngô u nan ve kôr nan ve za a mi hen mbatamen, hen hunda u gar u nan.
20 Ve kaa a mbatamen mba hen gar u nan la ér, ‘Wan wase ne ka wan u taver ityough shi hendan kwagh, lumun u ungwan imo yase ga. Ka or u wan hua+ shi hunden msôrom.’+
21 Maa nomso mba hen gar u nan cii, ve ta nan awen ve wua. Dugh kwagh u ifer her atô wou kera, nahan Iserael cii vea ungwa, mciem ma a gba ve iyol.+
22 “Aluer or er isholibo i i kom ku, man u wua nan,+ u hambe nan sha kon yô,+
23 ikyom i nan i de tse sha kon la ga.+ Kpa ii nan sha iyange la je, sha ci u or u i hambe nan sha kon yô nan ngu a ifyan i Aôndo iyol.+ De hôngor a tar wou u Yehova Aôndo wou a lu nan we ér u lu dyako wou la ga.+
