Aver yem sha atineakaa

Mbashiada mba Yehova

Tsua Zwa Tiv

Ka Nyi Bibilo i Ôr sha Kwagh u Inyamkyume I I Yer Ér Dinosaurs Laa?

Ka Nyi Bibilo i Ôr sha Kwagh u Inyamkyume I I Yer Ér Dinosaurs Laa?

Mlumun u Bibilo i ne yô

I ter kwagh u dinosaurs ken Bibilo jighilii ga. Nahan kpa, Bibilo kaa ér, ka Aôndo a “gba akaa cii” ye. Sha nahan yô, ikyav tese wang ér, inyamkyume ne kpa yange i lu ken akaa a Aôndo gba la. * (Mpase 4:11) Er Bibilo i ter kwagh u dinosaurs jighilii ga nahan kpa, i ôr kwagh i ter nongonyam u alaghga u lu tsombor môm a ve yô:

  • “Uzegembainyamev mba shin zegemnger.”—Genese 1:21.

  • “Hanma kwagh u a kper a kpela inya sha inja na.”—Genese 1:25.

  • “Inyamtoho i sha tar.”—Genese 1:25.

Inyamkyume i i yer ér Dinasaurs yange i due ken inyam igenee?

Akuhe a dinosaurs a i nenge a mi la tese ér, dinosaurs yange ve gema kure kure, inja er mba duen ken inyam igen nahan ga, kpa yange ve kpa i gba ve a gba. Kwagh ne zua sha kwagh u Bibilo i ôr ér Aôndo yange gba inyam cii la. U tesen ikyav yô, Upasalmi 146:6 pase kwagh u Aôndo nahan ér, “A gbe Sha man tar, kua zegemnger man akaa a a lu shimi cii.”

Lu hanma shighe dinosaurs ve lu uma?

Bibilo kaa ér annyamev mba shin mnger man mba sha tar cii yange i gba ve sha iyange i sha utaan man i sha ataratar i igbetar la shin sha gôgôshighe u igbetar u i fe un ga la. * (Genese 1:20-25, 31) Sha nahan yô, Bibilo lumun ér dinosaurs yange ve due shi ve lu sha shighe gôgônan.

Leviatan lu inyamkyume i i yer ér dinosaurs laa?

Ei. Er i ter kwagh u Leviatan ken takerada u Bibilo u Yobu la nahan kpa, i fa un jighilii ga. Kpa i nenge ér Leviatan ka ambe. Sha ci u kwagh u i ôr sha inyam ne ken Bibilo la zua sha mlu u ambe. (Yobu 40:15-23; 41:1, 14-17, 31) A lu nyi je kpa, Leviatan una fatyô lun inyamkyume i i yer ér dinosaurs la ga. Aôndo yange kaa a Yobu ér a za nenge inyam ne iyolna, man sha shighe u Yobu lu uma la dinosaurs gema kpe bee kera ica i gba.—Yobu 40:16; 41:8.

Ka nyi yange i er inyamkyume i i yer ér dinosaurs laa?

Bibilo ôr kwagh sha kwagh u mbee u dinosaurs ga. Nahan kpa, Bibilo kaa ér yange i gba akaa cii sha “ishima [i Aôndo],” nahan Aôndo yange lu a awashima jighilii u na ve gba dinosaurs yô. (Mpase 4:11) Awashima ne yange va kur sha mi yô, Aôndo de dinosaurs kpe bee kera.

^ par. 3 Akuhe a i zough a mi yô, tese wang ér dinosaurs yange ve lu. Jighilii yô, Akuhe ne tese ér sha shighe ugen la, inyam ne kposo kposo lu shi i lu aindi kpa kposo kposo shi i ta ijar.

^ par. 10 Ken Bibilo yô, ishember i “iyange” la, a fatyô u lun gôgôshighe u kuman anyom udubu imôngo.—Genese 1:31; 2:1-4; Mbaheberu 4:4, 11.