Iha Marsu 2023, ema naʼin-21.000 liu mak asiste ezibisaun livru iha sidade Riga, Letónia. Neʼe mak ba dala hitu neʼebé irmaun-irmán sira partisipa iha ezibisaun no neʼe mak dala primeiru husi tempu pandemia COVID-19. Sira kontente tebes tanba bele hatudu Bíblia Sagrada Tradusaun Mundu Foun kompletu iha lian Letaun, neʼebé fó sai ona iha tinan 2020.

Irmaun sira dada ema nia atensaun liuliu ba Jeová nia naran. Vizitante sira hakfodak atu hatene katak Bíblia tradusaun primeiru iha lian Letaun uza naran Jeová, tradusaun neʼe fó sai iha tinan 1689. Sira mós hakfodak liután bainhira haree katak Bíblia Tradusaun Mundu Foun tau fali Maromak nia naran dala 7.000 liu hodi tuir manuskritu Bíblia neʼebé tuan.

Iha buat seluk neʼebé mós dada ema balu nia atensaun ba Bíblia Tradusaun Mundu Foun. Mane ida neʼebé serbisu iha kompañia atu prodús livru sira hatete katak Bíblia neʼe halo ho didiʼak no uza materiál neʼebé kualidade, neʼe hatudu ho klaru katak Bíblia neʼe halo hodi ema bele lee loroloron.

Vizitante ida neʼebé simu tiha Bíblia iha ezibisaun, fó sai katak nia admira ho Bíblia Tradusaun Mundu Foun tanba uza liafuan neʼebé modernu no fasil atu komprende. Nia esplika katak uluk nia koko atu lee tradusaun Bíblia oioin, maibé nia para tanba susar atu komprende. Agora nia hakarak tebes atu lee Bíblia Tradusaun Mundu Foun hamutuk ho ninia oan-feto. Ezibisaun neʼe laʼo ba loron tolu no irmaun-irmán sira konsege fahe Bíblia Tradusaun Mundu Foun hamutuk 130 liu.

Sira neʼebé partisipa iha ezibisaun livru neʼe sente kontente tebes tanba bele ajuda ema barak aprende liután kona-ba Bíblia no ninia Autór. Irmán ida ho kontente esplika: “Haʼu nunka konsege ajuda ema barak atu hatene Jeová nia naran iha loron tolu nia laran!”

Ohin loron, iha haklaken-naʼin hamutuk 2.100 liu iha Letónia. Ita kontente katak sira no ema seluk neʼebé interese ba Maromak nia Liafuan bele hetan benefísiu husi tradusaun Bíblia neʼebé fasil atu komprende, no neʼe ajuda sira atu hakbesik liután ba Jeová.—Tiago 1:17.