Pergunta husi lee-naʼin

Kuandu ema sira neʼebé laran-metin ba Maromak mate, oinsá mak ida-neʼe “folin-boot iha Jeová nia matan”?

▪ Ema neʼebé hakerek salmu hatete: “Se ema sira neʼebé laran-metin ba Jeová mak mate, ida-neʼe folin-boot iha ninia matan.” (Sal 116:15) Maski Jeová haree ninia atan ida-idak nia moris nuʼudar folin-boot ba nia, maibé liafuan neʼebé foin temi iha Salmo 116 la koʼalia deʼit kona-ba ema ida-idak nia mate.

Kuandu hatoʼo diskursu kona-ba ema kristaun ida neʼebé mate, eskritura iha Salmo 116:15 labele uza ba ema neʼebé foin mate maski nia mate hodi laran-metin ba Jeová toʼo rohan. Tanbasá? Tanba liafuan neʼe nia arti mak Maromak hafolin tebes ninia atan sira-nia moris nuʼudar grupu ida, no tan neʼe nia sei nunka husik sira hotu mate.—Haree Salmo 72:14; 116:8.

Liafuan husi Salmo 116:15 hatudu katak Jeová sei la husik ninia atan sira neʼebé laran-metin atu lakon mohu iha mundu neʼe nuʼudar grupu ida. Tuir loloos, ita-nia istória modernu hatudu katak nuʼudar Maromak nia povu ita tahan hasoru ona terus oioin husi ema neʼebé kontra hasoru ita, no hatudu mós katak Maromak sei nunka husik ita atu lakon mohu.

Tanba Jeová mak forsa boot liu hotu no ninia hakarak sempre sai loos, nia la husik inimigu sira atu halakon ita nuʼudar grupu ida. Se Maromak husik ida-neʼe akontese karik, neʼe katak inimigu sira mak forsa liu fali Jeová. Neʼe la bele akontese! Jeová mós sei la husik ninia inimigu sira atu hapara ninia hakarak kona-ba halo mundu neʼe sai nakonu ho ema neʼebé laran-metin ba nia. (Isa 45:18; 55:10, 11) Se la iha ema ida neʼebé adora Jeová iha mundu, ka ninia templu espirituál nia pátiu liʼur, serbisu sagradu ba Jeová iha mundu sei lakon ona! Se ida-neʼe akontese karik, sei la iha ema neʼebé sai nuʼudar fundasaun ba “rai foun”, ka ema laran loos neʼebé moris iha mundu neʼe hodi simu ukun husi “lalehan foun”. (Apok 21:1) Liután neʼe, se la iha ema ida iha mundu neʼe, Jeová nia hakarak kona-ba Kristu nia Ukun ba Tinan Rihun Ida sei la sai loos.—Apok 20:4, 5.

Se Jeová husik ninia inimigu sira atu halakon ninia povu tomak iha mundu, ida-neʼe bele hamosu dúvida katak Maromak mak ukun-naʼin boot liu hotu no hafoʼer ninia naran. No mós, hanoin toʼok kona-ba neʼe: Tanba Jeová mak Maromak neʼebé “sempre iha justisa”, nia sei salva duni ninia atan sira neʼebé serbí nia ho laran-metin nuʼudar grupu. (Deut 32:4; Gên 18:25) Liután neʼe, se Jeová husik ninia atan lakon mohu nuʼudar grupu, ida-neʼe sei kontra ninia liafuan rasik neʼebé dehan: “Jeová sei la husik ninia povu tan ninia naran boot.” (1 Sam 12:22) Sin, “Jeová sei la husik ninia povu, nia mós sei la husik ninia liman-rohan”.—Sal 94:14.

Ita haksolok tebes hodi hatene katak Jeová nia povu sei nunka lakon mohu husi mundu neʼe! Tan neʼe, mai ita hatudu laran-metin ba Jeová hodi tau ita-nia fiar tomak ba ninia liafuan neʼebé dehan: “Kroʼat naran deʼit neʼebé ema halo atu hasoru ó sei la manán, no ó sei tesi lia hasoru nanál hotu neʼebé kontra hasoru ó. Ida-neʼe mak Jeová nia atan sira-nia liman-rohan, no sira-nia justisa mai husi haʼu.”—Isa 54:17.

[Dezeñu iha pájina 22]

Maromak sei nunka husik ninia povu atu lakon mohu