Oinsá mak teknolojia bele afeta Ita-nia moris kaben?
Teknolojia bele ajuda feen-laʼen atu hametin sira-nia relasaun se sira uza iha dalan neʼebé diʼak. Porezemplu, feen-laʼen barak uza teknolojia atu kontaktu malu beibeik.
Maibé feen-laʼen balu uza teknolojia iha dalan neʼebé sala. No neʼe bele lori problema hanesan . . .
-
la iha tempu hamutuk.
-
kontinua serbisu iha uma maski loloos la presiza.
-
la fiar malu tan no la laran-metin.
SAIDA MAK ITA PRESIZA HATENE
TEMPU HAMUTUK
Laʼen ida naran Michael hatete: “Dala ruma kuandu haʼu ho haʼu-nia feen tuur hamutuk, nia la liga haʼu. Nia haree deʼit ba ninia telefone no hatete: ‘Agora mak haʼu iha tempu atu cek haʼu-nia telefone.’” Laʼen ida seluk naran Jonathan hatete katak iha situasaun hanesan neʼe “feen-laʼen tuur besik malu maibé sira-nia laran dook tebes ba malu”.
HANOIN TOʼOK: Dala hira mak haʼu telefone, haruka mensajen, ka cek ema seluk nia posting, no la uza tempu neʼe hamutuk ho haʼu-nia kaben?—ÉFESO 5:33.
SERBISU
Ema balu halo serbisu neʼebé presiza duni atu atende ema seluk iha tempu naran deʼit. Maibé iha mós ema neʼebé bele halo serbisu tuir oras, maibé kontinua serbisu iha uma maski loloos la presiza. Laʼen ida naran Lee hatete: “Maski fahe ona haʼu-nia tempu atu hamutuk ho haʼu-nia feen, maibé susar ba haʼu atu la cek telefone ka mensajen neʼebé haʼu simu.” Feen ida naran Joy hatete: “Haʼu serbisu husi uma, tan neʼe susar ba haʼu atu husik serbisu. Haʼu presiza hakaʼas an atu tetu didiʼak.”
HANOIN TOʼOK: Kuandu Ita-nia kaben mak koʼalia ba Ita, Ita tau atensaun tomak ba nia ka lae?—LUCAS 8:18.
LARAN-METIN
Tuir peskiza ida, feen-laʼen barak haksesuk malu tanba sira ida uza média sosiál iha dalan neʼebé halo ida seluk deskonfia. Ema balu neʼebé tuir peskiza neʼe hatete katak sira halo ona posting hodi subar husi sira-nia kaben.
Ema barak fiar katak média sosiál lori perigu ba kaben-naʼin no neʼe mós halo fasil ba sira atu la laran-metin ba malu. Advogadu sira hatete katak média sosiál bele halo kaben-naʼin barak ohin loron soe malu.
HANOIN TOʼOK: Se Ita mak laʼen, Ita komunika malu ho feto seluk subasubar? Se Ita mak feen, Ita komunika malu ho mane seluk subasubar?—PROVÉRBIOS 4:23.
SAIDA MAK ITA BELE HALO
DESIDE PRIORIDADE
Ema neʼebé la hanoin atu han hahán neʼebé diʼak sei estraga ninia saúde. Nuneʼe mós, se Ita la hanoin atu fahe tempu hamutuk ho Ita-nia kaben, neʼe sei estraga moris kaben nian.—Éfeso 5:28, 29.
BÍBLIA NIA PRINSÍPIU: “Buka-hatene loloos buat sira neʼebé importante liu.”—FILIPE 1:10.
Haree sujestaun neʼebé imi bele implementa, ka hakerek imi-nia ideia kona-ba oinsá atu la husik teknolojia fó impaktu aat ba imi-nia moris kaben.
-
Han hamutuk dala ida ka liu loroloron
-
Deside tempu atu la uza sasán teknolojia
-
Planu atu halo buat espesiál ruma hamutuk
-
Hamate telefone ka tablet iha kalan, la rai besik toba-fatin
-
Loroloron fahe minutu 15 atu koʼalia ba malu no la uza telefone ka tablet
-
Hamate internét iha oras espesífiku ruma
Karik Ita sei gosta
MORIS KABEN NIAN NO FAMÍLIA
Oinsá atu uza teknolojia iha dalan neʼebé diʼak?
Dalan neʼebé Ita uza teknolojia bele lori benefísiu ba Ita-nia moris kaben nian ka bele estraga Ita-nia moris kaben nian. Oinsá neʼe afeta Ita-nia moris kaben nian ka lae?
MORIS KABEN NIAN NO FAMÍLIA
Dalan atu iha hanoin neʼebé loos kona-ba serbisu
Dalan lima neʼebé bele ajuda Ita atu la husik Ita-nia serbisu estraga Ita-nia moris kaben.
