“HAKLAKEN-NAʼIN sira iha Bretaña—Hadeer ona bá!!” Neʼe rona hanesan trombeta nia lian. (Informant, * Dezembru 1937, edisaun Londres) (Haree nota iha kraik.) Iha subtítulu mós hakerek: “Iha tinan sanulu nia laran la laʼo ba oin.” Relatóriu iha pájina primeiru kona-ba serbisu haklaken husi 1928 toʼo 1937 hatudu neʼe mak buat neʼebé akontese duni.

Saida mak halo serbisu haklaken iha Bretaña la laʼo ba oin? Tanba tinan barak tebes kongregasaun sira la laran-manas iha serbisu haklaken. No mós, sukursál iha neʼebá halo desizaun katak bele simu deʼit pioneiru naʼin-200 atu haklaken iha fatin neʼebé dook husi sidade no la presiza haklaken ho kongregasaun. Tan neʼe sukursál hatete ba ema sira neʼebé hakarak sai pioneiru katak sira bá haklaken deʼit iha rai seluk iha Europa tanba iha Bretaña fatin haklaken la toʼo ona. Sira neʼebé pioneiru muda husi Bretaña hodi bá rai seluk hanesan Fransa maski seidauk hatene koʼalia lia-fransés.

Informant ba tinan 1937 nian halo planu ida ba tinan 1938: Haklaken ba oras millaun ida! Se fulan-fulan mak haklaken-naʼin ida-idak haklaken oras 15, no pioneiru oras 110, sei halo fasil atu kumpre planu neʼe. Sujestaun sira-neʼe mós inklui atu hili loron balu hodi organiza grupu atu haklaken oras lima no fó atensaun atu halo vizita fali, liuliu durante loron baileet iha tempu kalan.

Mudansa neʼe halo ema barak kontente. Irmán Hilda Padgett dehan: “Desizaun neʼe mai husi sede-jerál no book ami atu laran-manas fali. Ami barak hein kleur ona no lakleur deʼit, mudansa neʼe lori rezultadu neʼebé furak tebes.” * (Haree nota iha kraik.) Irmán Wallis hatete: “Sujestaun kona-ba loron ida haklaken oras lima mak diʼak tebes! La iha serbisu seluk mak bele fó ksolok neʼebé boot tebes atu bele uza loron tomak hodi halo Naʼi nia serbisu. . . . Karik ami fila uma sente kole, maibé kona-ba ksolok, iha duni!” Irmaun joven ida naran Stephen Miller sente katak haklaken mak serbisu neʼebé urjente no nia mós aproveita oportunidade neʼe. Nia sei hanoin-hetan haklaken ba loron tomak ho bisikleta hamutuk ho ema barak no iha tempu bailoro sira uza gravasaun kona-ba diskursu sira. Sira badinas laʼo haklaken hodi uza spanduk no fahe revista sira ida dalan.

Informant mós fó sai avizu ida tan: “Ami presiza pioneiru naʼin–1.000.” Tanba mudansa sira-neʼe, pioneiru sira mós tenke halo tuir matadalan foun katak sira la bele haklaken mesamesak maibé tenkesér haklaken hamutuk ho kongregasaun, apoia sira, no atu haburas kongregasaun nia fiar. Irmán Joyce Ellis sei hanoin-hetan katak “irmaun-irmán barak hakarak foti pioneiru.  Tempu neʼebá haʼu foin tinan 13, maibé neʼe mak buat neʼebé haʼu hakarak halo, haʼu hakarak sai pioneiru”. Iha fulan-Jullu 1940, nia foti duni pioneiru ho idade 15. Irmaun Peter neʼebé ikusmai kaben ho Joyce, nia mós rona avizu atu “Hadeer ona bá”, no neʼe book nia atu “komesa hanoin kona-ba pioneiru”. Bainhira nia tinan 17, iha fulan-Juñu 1940, nia hean bisikleta ba kilómetru 105 toʼo iha Scarborough hodi halaʼo ninia knaar foun nuʼudar pioneiru.

Cyril no Kitty Johnson mak ezemplu ida tan kona-ba ema neʼebé halo sakrifísiu atu bele foti pioneiru. Sira faʼan sira-nia uma no sasán hodi bele haklaken tempu-tomak. Cyril para husi ninia serbisu no latoʼo fulan ida sira prepara didiʼak ona atu pioneiru. Nia dehan: “Ami la duvida kona-ba desizaun neʼe. Ami halo ho ami-nia hakarak rasik no ho haksolok.”

Nuʼudar pioneiru aumenta, irmaun sira neʼebé tau matan mós buka dalan oioin atu fó apoiu ba pioneiru sira-neʼe. Iha tinan 1938, Jim Carr serbí nuʼudar katuas área nian. Nia simu matadalan atu buka uma ba pioneiru iha sidade oioin. Sira husu ba pioneiru sira atu hela hamutuk no haklaken hamutuk hodi la presiza gasta osan barak. Iha sidade Sheffield, sira aluga uma boot ida no irmaun maduru ida mak tau matan ba uma neʼe. Kongregasaun mós kontribui osan no sasán hodi apoia sira. Pioneiru naʼin-10 mak hela iha uma neʼe no sira serbisu badinas tebes hodi halaʼo didiʼak atividade espirituál nian. Jim dehan: “Ema hotu serbisu hamutuk hodi buat hotu laʼo ho diʼak. Iha tempu matabixu, sira koʼalia kona-ba eskritura loroloron nian, no loroloron pioneiru sira bá haklaken iha fatin oioin iha sidade neʼe.”

Liafuan sira husi Informant book duni haklaken-naʼin no pioneiru sira, tanba iha tinan 1938, sira konsege haklaken ba oras millaun ida. Relatóriu hatudu katak atividade haklaken nian aumenta liután. Iha tinan lima nia laran, haklaken-naʼin iha Bretaña aumenta ba dala tolu. Ho mudansa kona-ba serbisu haklaken iha tempu neʼebá hametin Jeová nia povu atu tahan tempu funu neʼebé lakleur sira sei hasoru.

Ohin loron, ema neʼebé pioneiru iha rai-Bretaña mós aumenta liután nuʼudar funu Armajedón besik daudauk ona. Ema neʼebé pioneiru iha tinan sanulu foin liu daudauk neʼe barak tebes no barak liu mak iha Outubru 2015, iha pioneiru hamutuk naʼin–13.224. Pioneiru sira-neʼe rekoñese katak serbisu haklaken tempu-tomak mak dalan diʼak ida atu uza sira-nia moris.