Skip to content

Skip to table of contents

 HUSI ITA-NIA ARKIVU

“Bainhira tan mak atu iha fali reuniaun boot?”

“Bainhira tan mak atu iha fali reuniaun boot?”

IHA Novembru, tinan 1932, ema barak hein iha estasaun komboiu iha Sidade Méxiku. Sidade neʼe iha populasaun millaun ida liu. Ema barak kontente no hein namanas tebes. Jornalista sira mós hein ho sira-nia kámera prontu ona atu hasai foto. Semana ida antes neʼe, ema iha sidade neʼe laran-manas kona-ba lampu merah primeiru neʼebé foin harii, maibé agora saida mak halo sira laran-manas? Neʼe tanba prezidente ba Watch Tower Society, Joseph F. Rutherford mak foin mai. Irmaun-irmán sira mós hein atu simu irmaun Rutherford neʼebé mai atu tuir reuniaun boot ba loron tolu.

Iha revista The Golden Age hatete katak reuniaun boot neʼe sei sai nuʼudar reuniaun boot importante tebes iha ita-nia istória kona-ba serbisu atu habelar lia-loos iha Méxiku. Maibé tuir loloos, reuniaun boot neʼe, ema uitoan deʼit mak tuir, maizumenus naʼin-150 deʼit. Se nuneʼe, tanbasá mak reuniaun neʼe importante tebes?

Antes reuniaun boot neʼe, lia-loos iha rai-Méxiku ladún laʼo ba oin. Maski Testemuña sira halaʼo reuniaun boot balu husi tinan 1919, maibé tinan neʼe liutiha, kongregasaun sira iha Méxiku menus fali. Iha tinan 1929, sira harii sukursál iha Sidade Méxiku, no ema fiar katak neʼe sei ajuda tebes lia-loos atu habelar didiʼak iha Méxiku. Maibé sei iha problema balu. Ita-nia organizasaun dehan katak pioneiru sira la bele halaʼo negósiu iha tempu neʼebé sira haklaken hela. Pioneiru ida sai hirus tebes toʼo nia sai husi lia-loos no harii nia rasik nia grupu atu estuda Bíblia. No mós, durante tempu neʼe, koordenadór ba sukursál tenke troka tanba hahalok ladiʼak. Loos duni, iha tempu neʼe Testemuña sira neʼebé laran-metin presiza duni hetan laran-manas.

Durante irmaun Rutherford nia vizita, nia hatoʼo diskursu rua iha reuniaun boot no diskursu lima liuhusi rádiu neʼebé fó laran-manas tebes ba irmaun-irmán sira. Neʼe mak dala primeiru Testemuña sira uza rádiu atu fahe lia-loos iha rai-Méxiku. Reuniaun boot liutiha, irmaun ida hetan knaar atu sai koordenadór foun ba sukursál no atu organiza serbisu haklaken. Testemuña sira sai laran-manas fali no ho Jeová nia bensaun, sira kontinua haklaken.

Reuniaun boot iha tinan 1941, Sidade Méxiku

Iha 1933, sira halaʼo reuniaun boot rua iha Méxiku, ida iha Veracruz no ida iha Sidade Méxiku. Irmaun-irmán sira hakaʼas an tebes iha serbisu haklaken no sira hetan rezultadu neʼebé diʼak. Porezemplu, iha tinan 1931 iha haklaken-naʼin hamutuk 82. Maibé iha tinan 1941, númeru neʼe saʼe ba dala sanulu! No maizumenus ema naʼin–1.000 tuir reuniaun boot iha Sidade Méxiku iha tinan neʼe.

“EMA NADODON IHA ESTRADA”

Iha tinan 1943, Testemuña sira halaʼo kampaña atu konvida ema tuir reuniaun boot ho tema “Nasaun neʼebé livre” neʼebé sei halaʼo iha sidade 12 iha Méxiku. * Atu ema bele  hatene kona-ba reuniaun boot neʼe, Testemuña sira tara spanduk rua iha sira-nia kabaas, ida iha kotuk no ida iha oin. Husi tinan 1936, Testemuña sira uza dalan neʼe atu fó sai kona-ba reuniaun boot sira.

Jornál husi tinan 1944 hatudu irmaun sira iha Sidade Méxiku tara hela spanduk

Testemuña sira hetan rezultadu diʼak tebes ho dalan neʼebé uza spanduk sira-neʼe toʼo jornál ida naran La Nación hakerek kona-ba Testemuña sira neʼebé tuir reuniaun boot neʼe hodi hatete: “Iha loron primeiru, sira fó anúnsiu dehan atu konvida ema barak tan. Iha loron tuirmai, ema barak tebes tuir toʼo la iha ona fatin ba sira atu tuur.” Igreja Katólika la gosta haree ida-neʼe, tan neʼe sira kontra Testemuña sira. Maibé irmaun-irmán sira la taʼuk. Sira kontinua deʼit atu konvida ema ba reuniaun boot neʼe. Mane no feto sira hotu hola parte iha kampaña neʼe. Jornál La Nación mós hakerek dehan: “Ema hotu iha sidade haree sira.” Jornál neʼe mós hatudu foto kona-ba ita-nia irmaun sira laʼo iha dalan iha Sidade Méxiku, no hakerek liafuan iha foto nia kraik neʼebé dehan: “Ema nadodon iha estrada.”

AGRADESE ATU TUIR REUNIAUN BOOT

Iha tempu neʼebá, Testemuña sira presiza halo sakrifísiu barak atu tuir reuniaun boot sira iha Méxiku. Irmaun-irmán barak mai husi fatin izoladu neʼebé dook husi estasaun komboiu no dook husi estrada sira. Tan neʼe, irmaun-irmán sira presiza saʼe kuda-burru ka laʼo ain deʼit ba loron barak atu bele saʼe komboiu hodi bá toʼo sidade neʼebé halaʼo reuniaun boot sira.

Irmaun-irmán barak kiak no iha osan natoon deʼit atu tuir reuniaun boot. Bainhira toʼo iha neʼebá, sira hela ho Testemuña sira neʼebé hatudu laran-luak no domin ba sira. Irmaun-irmán balu toba iha Reuniaun-Fatin. Dala ida, irmaun naʼin-90 hela iha sukursál no toba deʼit iha kaixa leten neʼebé nakonu ho livru sira. Livru tinan nian hatete katak irmaun sira-neʼe agradese tebes tanba kaixa sira-neʼe mamar liu fali simente iha rai.

Testemuña sira-neʼe agradese tebes hodi bele halibur ho sira-nia irmaun-irmán sira no sente katak sakrifísiu neʼebé sira halo la saugati deʼit. Ohin loron iha Testemuña naʼin–850.000 liu iha Méxiku, no sira mós hafolin oportunidade hanesan neʼe hodi bele halibur hamutuk. * Iha livru tinan 1949 hatete katak sakrifísiu sira neʼebé irmaun-irmán sira halo la hamenus sira-nia laran-manas kona-ba adorasaun ba Jeová. Bainhira sira tuir tiha reuniaun boot ida, ba tempu kleur sira-nia tópiku atu koʼalia mak kona-ba reuniaun boot deʼit. Sira sempre husu, “Bainhira tan mak atu iha fali reuniaun boot?”—Husi ita-nia arkivu iha Amérika Sentrál.

^ par. 9 Tuir livru tinan 1944, ema komesa hatene Testemuña ba Jeová mak sé tanba reuniaun boot neʼe.

^ par. 14 Iha Méxiku, ema naʼin–2.262.646 mak tuir Memoriál iha tinan 2016.