Skip to content

Skip to table of contents

Organiza tuir Maromak nia Liafuan

Organiza tuir Maromak nia Liafuan

“Jeová kria rai ho ninia matenek. Nia harii metin lalehan ho ninia kbiit atu tetu didiʼak.”—PROVÉRBIOS (AMSAL) 3:19.

KNANANUK: 15, 16

1, 2. (a) Ema balu dehan saida se ita hatete katak Maromak iha organizasaun ida? (b) Ita sei koʼalia kona-ba saida iha lisaun neʼe?

MAROMAK iha organizasaun ida ka lae? Ema balu dehan: “Ita la presiza organizasaun ida atu dirije ita. Buat neʼebé ita presiza mak atu iha deʼit relasaun neʼebé diʼak ho Maromak.” Hanoin hanesan neʼe loos ka lae? Bíblia hatete saida?

2 Iha lisaun neʼe, ita sei haree katak Maromak Jeová halo buat hotu ho loloos no nia mós organiza didiʼak ninia povu. Ita mós sei haree kona-ba saida mak ita presiza halo bainhira Jeová nia organizasaun fó matadalan ruma ba ita. (1 Korinto 14:33, 40) Husi apóstolu sira-nia tempu toʼo ohin loron, Jeová nia povu sempre halo tuir Bíblia nia matadalan hodi bele haklaken iha fatin oioin. Ita mós halo tuir matadalan husi Jeová nia organizasaun parte rai nian hodi bele iha kongregasaun neʼebé moos, dame, no unidade.

JEOVÁ ORGANIZA BUAT HOTU HO LOLOOS

3. Tanbasá mak ita fiar katak Jeová organiza buat hotu ho didiʼak?

3 Se ita haree buat hotu neʼebé Jeová kria, ita bele haree duni katak nia organiza buat hotu ho didiʼak. Bíblia dehan: “Jeová kria rai ho ninia matenek. Nia harii metin lalehan ho ninia kbiit atu tetu didiʼak.” (Provérbios [Amsal] 3:19) Tuir loloos, Jeová nia kriasaun barak mak ita seidauk aprende, no buat neʼebé ita hatene “uitoan deʼit”. (Jó [Ayub] 26:14) Ezemplu ida mak kona-ba planeta sira neʼebé organiza ho didiʼak, ita seidauk hatene buat barak kona-ba  sira. (Salmo [Mazmur] 8:3, 4) Lalehan iha fitun rihun ba rihun, maibé sira hotu laʼo tuir dalan ida-idak no la xoke malu. Hanesan neʼe mós ho planeta sira neʼebé iha sistema solár, sira laʼo haleʼu loro-matan, maibé la iha ida mak laʼo runguranga. Loos duni, planeta no fitun sira la runguranga tanba Jeová mak organiza sira ho didiʼak. Kuandu ita haree oinsá Jeová kria rai no “lalehan ho matenek”, neʼe book ita atu hahiʼi, adora, no hatudu laran-metin ba nia, loos ka lae?—Salmo (Mazmur) 136:1, 5-9.

4. Tanbasá mak sientista la bele esplika kona-ba pergunta importante sira?

4 Sientista aprende ona buat barak kona-ba rai no planeta no sira uza informasaun sira-neʼe atu hadiʼa ema nia moris. Maibé sira la bele hatán ba pergunta importante kona-ba moris. Porezemplu, sientista sira la bele esplika kona-ba oinsá ita-nia universu hahú, ka tanbasá mak ema, animál, no ai sira moris iha mundu. No ema barak mós la bele esplika tanbasá mak ema iha hakarak atu moris ba nafatin. (Eclesiastes [Pengkhotbah] 3:11) Razaun ida tansá mak ema barak la hatene resposta ba pergunta sira-neʼe tanba sira la fiar katak Maromak iha no sira hanorin katak buat hotu mai husu evolusaun. Maibé Jeová hatán ba pergunta hotu neʼe liuhusi nia rasik nia Livru, Bíblia.

5. Saida deʼit mak hatudu katak ita presiza duni lei natureza sira?

5 Jeová kria ona lei natureza barak, no lei sira-neʼe nunka troka. Tanba lei sira-neʼe mak ema hanesan eletrisista, enjeñeiru, badain-bee, pilotu, no doutór sira bele halaʼo sira-nia serbisu ho didiʼak. Porezemplu, ema hotu nia fuan iha fatin ida deʼit, tan neʼe mak la susar ba doutór atu buka-hatene pasiente ida-idak nia fuan iha fatin saida. No ita hotu la bele kontra lei natureza nian. Porezemplu, ema hotu hatene katak se ema ida mak haksoit tun husi ai-hun neʼebé aas, nia bele mate.

MAROMAK MAK ORGANIZA

6. Oinsá mak ita hatene katak Jeová hakarak ema neʼebé adora nia atu organiza an didiʼak?

6 Jeová mak organiza buat hotu iha lalehan no rai iha dalan neʼebé kmanek tebes. Entaun, ita mós bele fiar katak nia hakarak ema neʼebé adora nia atu organiza an ho didiʼak. Tan neʼe mak nia fó Bíblia mai ita atu hanorin ita no fó matadalan kona-ba oinsá ita bele adora nia. Bainhira ita moris tuir matadalan sira neʼebé nia fó liuhusi Bíblia no ninia organizasaun, neʼe sei lori ksolok no kontente ba ita-nia moris.

7. Saida mak hatudu katak Jeová mak organiza didiʼak Bíblia?

7 Bíblia mak prezente furak ida husi Maromak. Ema balu hatete katak Bíblia mak ema judeu no ema kristaun nia livru balu neʼebé ema halibur hamutuk deʼit hodi sai Bíblia. Maibé tuir loloos, Maromak mak organiza ema atu hakerek Bíblia, hakerek iha tempu saida, no hakerek kona-ba saida. Tan neʼe mak livru ida-idak iha Bíblia bele ajuda ita atu hatene kona-ba Maromak nia hakarak. Porezemplu, husi Gênesis toʼo Apokalipse, ita bele haree katak Bíblia koʼalia kona-ba “bei-oan” ida neʼebé sei halo mundu tomak atu sai fali paraízu. Bíblia esplika katak “bei-oan” neʼe mak Jesus Kristu no ninia Ukun sei fó prova katak Jeová iha duni direitu atu ukun.—Lee Gênesis (Kejadian) 3:15; * Mateus 6:10; Apokalipse 11:15.

8. Ema Izraél organiza an didiʼak kona-ba saida deʼit?

8 Jeová fó ba ema Izraél Moisés nia Ukun-Fuan hodi ajuda sira organiza an iha dalan neʼebé diʼak. Porezemplu, Ukun-Fuan neʼe fó matadalan ba feto sira neʼebé simu “knaar atu serbí iha fatin atu tama ba tenda reuniaun nian”. (Êxodo [Keluaran] 38:8) Iha mós matadalan kona-ba oinsá ema Izraél sira bele  muda tenda no tabernákulu husi fatin ida ba fatin seluk iha dalan neʼebé la runguranga. Ikusmai, Liurai David mós organiza serbisu ida-idak fó ba amlulik no ema levita sira atu halo iha templu. (1 Crônicas [Tawarikh] 23:1-6; 24:1-3) Bainhira ema Izraél halo tuir matadalan neʼebé Jeová fó, nia fó bensaun ba sira hodi bele organiza didiʼak no atu bele iha dame no unidade.—Deuteronômio (Ulangan) 11:26, 27; 28:1-14.

9. Saida mak hatudu katak kongregasaun iha apóstolu sira-nia tempu organiza iha dalan neʼebé diʼak?

9 Kongregasaun iha apóstolu sira-nia tempu mós organiza ho didiʼak. Iha tempu neʼebá, apóstolu sira forma grupu kiʼik ida naran grupu administradór. Foufoun apóstolu sira deʼit mak serbí iha grupu neʼe, maibé ikusmai irmaun sira neʼebé laʼós apóstolu mós serbí hamutuk ho sira. Grupu neʼe mak fó matadalan ba kongregasaun hotu iha tempu neʼebá. (Apóstolu 6:1-6; 15:6) Jeová mós uza espíritu santu hodi leno irmaun sira husi grupu administradór ka irmaun seluk neʼebé serbisu hamutuk ho sira hodi hakerek karta balu atu fó konsellu ka matadalan ba kongregasaun sira. (1 Timóteo 3:1-13; Tito 1:5-9) Oinsá mak matadalan husi grupu administradór ajuda kongregasaun sira?

10. Bainhira kongregasaun iha apóstolu sira-nia tempu halo tuir matadalan husi grupu administradór, neʼe lori rezultadu saida? (Haree dezeñu iha pájina 9.)

10 Lee Apóstolu 16:4, 5Iha apóstolu sira-nia tempu, irmaun sira neʼebé vizita kongregasaun fó sai ba kongregasaun sira kona-ba “ukun-fuan neʼebé apóstolu no katuas sira deside ona iha Jeruzalein”. Bainhira kongregasaun sira halo tuir ukun-fuan sira-neʼe, “kongregasaun sira-nia fiar kontinua sai metin liután no loron ba loron fiar-naʼin sira aumenta ba beibeik”. Ezemplu saida mak ita bele aprende husi kongregasaun iha tempu uluk?

ITA HALO TUIR MATADALAN KA LAE?

11. Saida mak katuas no atan ba kongregasaun tenke halo bainhira sira simu matadalan husi Maromak nia organizasaun?

11 Irmaun sira neʼebé serbí iha Grupu Koordenadór ba Sukursál, katuas área nian, no katuas kongregasaun, sira hotu halo tuir matadalan neʼebé sira simu husi Jeová nia organizasaun. No Bíblia hatete katak ita hotu tenkesér halo tuir no hakruʼuk an ba irmaun sira neʼebé dirije ita. (Deuteronômio [Ulangan] 30:16; Ebreu 13:7, 17) Ema neʼebé laran-metin ba Jeová, sira nunka hatudu hahalok kontra, no sira mós nunka muramura kona-ba matadalan neʼebé sira simu. Ita lakohi sai hanesan Diótrefes iha apóstolu sira-nia tempu neʼebé la hatudu respeitu ba irmaun sira neʼebé dirije Jeová nia povu. (Lee 3 João 9, 10.) Se ita mak halo tuir matadalan neʼebé ita simu, neʼe bele ajuda kongregasaun atu iha dame no unidade nafatin. Tan neʼe husu ba ita-nia an: ‘Haʼu ajuda irmaun-irmán sira atu hatudu laran-metin ba Jeová ka lae? Haʼu simu no halo tuir kedas matadalan husi irmaun sira neʼebé dirije ita ka lae?’

12. Iha mudansa saida kona-ba foti katuas ka atan ba kongregasaun?

12 Foin lalais neʼe, Grupu Administradór halo mudansa kona-ba oinsá atu foti katuas no atan ba kongregasaun. “Pergunta husi lee-naʼin” iha Livru Haklaken 15 Novembru 2014 esplika katak iha apóstolu sira-nia tempu, grupu administradór fó knaar ba irmaun sira neʼebé vizita kongregasaun mak atu foti katuas no atan ba kongregasaun. Tan neʼe, komesa husi 1 Setembru 2014, katuas área mak halaʼo knaar neʼe. Bainhira katuas sira husi kongregasaun ida atu rekomenda irmaun ida atu sai katuas ka atan ba kongregasaun, katuas área nian sei koko atu koñese liután irmaun neʼe no mós ninia família, karik liuhusi haklaken hamutuk ho irmaun neʼe. (1 Timóteo 3:4, 5) Tuirmai katuas área nian sei koʼalia hamutuk ho katuas  kongregasaun atu haree didiʼak irmaun neʼe kumpre duni kritériu atu sai katuas ka atan ba kongregasaun ka lae.—1 Timóteo 3:1-10, 12, 13; 1 Pedro 5:1-3.

13. Oinsá mak ita bele hatudu katak ita halo tuir matadalan neʼebé katuas sira fó?

13 Katuas sira uza Bíblia hodi fó matadalan ba ita tanba hakarak proteje ita no kongregasaun. Tan neʼe mak ita presiza halo tuir matadalan sira tanba neʼe ba ita-nia diʼak. (1 Timóteo 6:3) Iha apóstolu sira-nia tempu, iha ema balu “la laʼo tuir dalan neʼebé loos, sira la halo serbisu ida maibé envolve an iha problema neʼebé laʼós sira-nian”. Katuas kongregasaun koko atu ajuda, maibé sira lakohi troka. Tan neʼe, apóstolu Paulo fó-hatene ba kongregasaun oinsá atu trata ema neʼe, nia dehan: “Tau marka ba ema neʼe, no keta ransu tan ho nia.” Paulo fó konsellu ba sira atu la ransu tan ho ema neʼe, maibé la bele trata nia hanesan inimigu. (2 Tesalónika 3:11-15) Ohin loron, katuas sira mós koko atu ajuda ema neʼebé la halo tuir Maromak nia matadalan, hanesan namora ho ema neʼebé la adora Jeová. (1 Korinto 7:39) Se ema neʼe lakohi troka ninia hahalok, karik katuas sei hatoʼo diskursu ida atu fó avizu ba kongregasaun katak hahalok hanesan neʼe bele halo foʼer kongregasaun nia naran. Se Ita mak rona diskursu hanesan neʼe, Ita sei halo saida? Se Ita hatene diskursu neʼe koʼalia kona-ba sé, Ita sei kuidadu kona-ba ransu ho ema neʼe, loos ka lae? Bainhira Ita halo tuir Bíblia nia konsellu, neʼe bele ajuda ema neʼe atu haree katak ninia hahalok sei estraga ninia an, estraga ninia relasaun diʼak ho Jeová, no karik bele book nia atu troka ninia hahalok. [1]—Haree nota husi lisaun.

AJUDA KONGREGASAUN ATU MOOS, IHA DAME, NO UNIDADE

14. Oinsá mak ita bele ajuda kongregasaun atu moos nafatin?

14 Ita ida-idak tenke halo tuir Bíblia nia matadalan hodi ajuda kongregasaun atu bele moos nafatin. Porezemplu, haree toʼok buat neʼebé akontese iha kongregasaun Korinto. Apóstolu Paulo ajuda ona ema barak atu simu lia-loos no nia hadomi tebes sira. (1 Korinto 1:1, 2) Maibé nia triste tanba ema ida husi kongregasaun neʼe halo hahalok sala-foʼer no irmaun sira husik deʼit. Paulo fó konsellu ba katuas sira atu “entrega mane hanesan neʼe ba Satanás”. Neʼe katak katuas sira tenke hasai ema neʼe husi kongregasaun. (1 Korinto 5:1, 5-7, 12) Ohin loron, se ema ida halo sala boot no lakohi hakribi sala, karik katuas sira sei foti desizaun atu hasai ema neʼe husi kongregasaun. Se nuneʼe, ita halo tuir Bíblia nia matadalan kona-ba oinsá atu trata ema neʼe ka lae? Se ita halo tuir matadalan husi Bíblia, neʼe sei ajuda kongregasaun atu moos nafatin. No karik bele ajuda ema neʼe atu hatene katak nia presiza hakribi ninia sala no husu Jeová atu fó perdua ba nia.

15. Oinsá mak ita bele ajuda kongregasaun atu iha dame nafatin?

15 Problema seluk tan neʼebé mosu iha kongregasaun Korinto mak irmaun sira lori malu ba tribunál. Tan neʼe Paulo husu pergunta ida hodi ajuda sira atu hanoin didiʼak: “Tansá mak imi la simu deʼit hodi tahan buat neʼebé la justisa?” (1 Korinto 6:1-8) Ohin loron, problema hanesan neʼe mós akontese ona iha kongregasaun. Irmaun balu halo kontratu hamutuk, maibé ikusmai lakon osan barak no karik duun malu katak sira ida mak hamatak osan. Tan neʼe sira lori malu ba tribunál. Maibé Maromak nia Liafuan ajuda ita atu haree katak, diʼak liu husik deʼit buat neʼebé ita lakon duké halo foʼer Jeová nia naran no estraga kongregasaun nia dame. [2] (Haree nota husi lisaun.) Diʼak atu halo tuir Jesus nia konsellu hodi rezolve problema boot sira-neʼe. (Lee Mateus 5:23, 24; 18:15-17.) Bainhira ita halo tuir matadalan neʼebé Jesus fó, neʼe sei ajuda kongregasaun atu iha dame no unidade nafatin.

16. Tanbasá ita la hakfodak atu haree katak Jeová nia povu iha unidade?

 16 Maromak nia Liafuan hatete: “Haree bá! Diʼak tebes no kmanek loos bainhira maun-alin sira hela hamutuk ho unidade!” (Salmo [Mazmur] 133:1) Kuandu ema Izraél halo tuir Jeová, sira la sai runguranga maibé iha unidade. Tuir loloos Maromak fó-hatene nanis ona, neʼe mak sei akontese ba ninia povu, nia dehan: “Haʼu sei tau sira hamutuk ho unidade, hanesan bibi-malae iha luhan laran.” (Miquéias [Mikha] 2:12) Jeová mós fó-hatene nanis katak ninia povu sei aprende lia-loos husi eskritura sira hodi serbí nia ho unidade. Nia dehan: “Haʼu sei troka povu sira-nia língua ho língua neʼebé moos, atu nuneʼe sira hotu bele bolu Jeová nia naran, atu adora nia ho unidade.” (Sofonias [Zefanya] 3:9) Ita agradese duni tanba bele adora Jeová ho unidade!

Se ema ida “laʼo iha dalan sala no nia la hatene ida-neʼe”, katuas sira sei ajuda nia (Haree parágrafu 17)

17. Katuas sira presiza halo saida atu kongregasaun iha unidade no moos nafatin?

17 Se ema ida halo sala boot, katuas sira sei ajuda lalais ema neʼe ho domin. Katuas sira hatene katak Jeová hakarak sira atu proteje kongregasaun husi hahalok neʼebé ladiʼak hodi kongregasaun bele iha unidade no moos nafatin. (Provérbios [Amsal] 15:3) Apóstolu Paulo hadomi tebes irmaun-irmán sira iha kongregasaun Korinto, maibé bainhira nia haree buat ruma la loos, nia fó kedas konsellu hanesan ita lee iha ninia karta primeiru neʼebé nia hakerek ba sira. Ita hatene katak katuas sira mós la demora atu halo tuir ninia matadalan, tanba liutiha fulan balu nia hakerek fali karta segundu hodi gaba sira. Hodi nuneʼe mak, se ema kristaun ida “laʼo iha dalan sala no nia la hatene ida-neʼe”, katuas sira tenke ajuda korrije kedas nia iha dalan neʼebé diʼak.—Galásia 6:1.

18. (a) Oinsá mak matadalan husi Maromak nia Liafuan ajuda tebes kongregasaun sira iha apóstolu sira-nia tempu? (b) Ita sei koʼalia kona-ba saida iha lisaun tuirmai?

18 Bainhira ema kristaun iha apóstolu sira-nia tempu halo tuir matadalan husi Maromak nia Liafuan, neʼe ajuda kongregasaun sira atu moos, iha dame no unidade. (1 Korinto 1:10; Éfeso 4:11-13; 1 Pedro 3:8) Hodi nuneʼe mak irmaun-irmán sira iha tempu neʼebá bele haklaken liafuan diʼak “ba ema hotu iha lalehan nia okos”. (Koloso 1:23) Hanesan neʼe mós ohin loron, tanba Jeová nia povu iha unidade no organiza an didiʼak mak ita bele haklaken liafuan diʼak iha mundu tomak. Iha lisaun tuirmai, ita sei haree evidénsia seluk tan neʼebé hatudu katak ita hafolin duni Maromak nia Liafuan, Bíblia, no ita hakarak tebes atu fó glória ba Naʼi Ukun-Naʼin Boot Liu Hotu, Jeová.—Salmo (Mazmur) 71:15, 16.

^ [1] (parágrafu 13) Haree livru Organizados para Fazer a Vontade de Jeová, pájina 134-136.

^ [2] (parágrafu 15) Kona-ba informasaun neʼebé hatete katak ema kristaun bele deside atu lori malu ba tribunál, haree iha livru Hela Nafatin iha Maromak nia Domin,” pájina 223, haree mós nota-rodapé.

^ par. 7 Gênesis 3:15 No haʼu sei hamosu odi-malu entre ó ho feto neʼe, no entre ó-nia bei-oan ho ninia bei-oan. Nia sei harahun ó-nia ulun, no ó sei hakanek ninia ain-tuban.