1, 2. O le ā o le a faataunuuina e le Malo o le Atua, ma aiseā e tatou te mautinoa ai o le a oo mai lenā Malo?

I LUGA o se mauga e lata i Kapanaumi i le 31 T.A., na aʻoaʻo ai e Iesu ona soo e tatalo: “Ia oo mai lou malo.” (Mata. 6:10) I aso nei, ua lē mautonu le toʻatele pe oo mai lenā Malo. Peitaʻi, e mautinoa o le a taliina la tatou tatalo ina ia oo mai le Malo.

² O le a faaaogā e Ieova lona Malo e autasia ai lona aiga i le lagi ma le lalolagi, ma e mautinoa o le a taunuu lona finagalo. (Isa. 55:10, 11) O mea mataʻina na tutupu i le 100 tausaga ua mavae, ua faamaonia ai o Ieova o le Tupu. Na faia e Ieova le tele o galuega lelei mo le faitau miliona o ona tagatānuu faamaoni. (Saka. 14:9; Faaa. 15:3) Peitaʻi, e lē tutusa le avea o Ieova ma Tupu, ma le oo mai o le Malo o le Atua, lea na aʻoaʻo i tatou e Iesu ina ia tatalo i ai. O le ā le itu e lē tutusa ai, ma e faapefea ona tatou aafia ai?

3. (a) O fea ma o anafea na avea ai Iesu ma Tupu? (e) E faapefea ona faamaonia na faavaeina le Malo o le Atua i le 1914? (Tagaʻi i le faaopoopoga i lalo.)

³ I le taufaaiʻuiʻuga o le senituri 19, na amata ai ona faalautele le malamalamaga i le valoaga na faamauina e Tanielu i le 2,500 tausaga ua mavae: “O aso o ia tupu, o le a faatūina ai e le  Atua o le lagi o le malo e lē faaumatia lava.” (Tani. 2:44) Na faalauiloa atu e Tagata Aʻoga o le Tusi Paia mo le faitau sefulu tausaga, o le 1914 o se tausaga iloga. O le toʻatele o tagata i lenā vaitaimi sa iai se vaaiga mautinoa e faatatau i le lumanaʻi. Na faapea mai se tasi tusitala: “E tele faamoemoega sa iai, ma na manatu o le a faasolo ina lelei le tulaga o mea i le 1914.” Na taunuu valoaga a le Tusi Paia ina ua gāpā le Taua Muamua a le Lalolagi i lenā lava tausaga. O le oo mai o oge, mafuiʻe, faamaʻi ma le faataunuuina o isi valoaga o le Tusi Paia, na faamaonia ai na amata ona pule Iesu i le lagi o se Tupu o le Malo o le Atua i le 1914. * O lea, na fai Ieova ma Tupu i se isi auala ina ua ia faanofotupuina lona Alo e avea ma Tupu faa-Mesia.

4. (a) O le ā le gaoioiga muamua na faia e le Tupu ua faatoʻā nofotupu a le Atua? (e) O le ā le isi gaoioiga na sosoo ai?

⁴ O le gaoioiga muamua lava na faia e le Tupu ua faatoʻā nofotupu a le Atua, o le siitaua lea iā Satani le Fili sili o le Atua. Na tutuliese e Iesu ma ana agelu Satani ma ana temoni mai le lagi. O lea, na olioli ai le lagi, ae na oo mai ai puapuaga e leʻi tutupu muamua i le lalolagi. (Faitau le Faaaliga 12:7-9, 12.) Ina ua mavae lenā, ona uaʻi mai lea o le Tupu e faamamā, aʻoaʻoina ma faamaopoopo ona tagatānuu e faia le finagalo o le Atua. O lea, seʻi o tatou iloiloina ni faaaʻoaʻoga lelei, i le auala na tali atu ai tagatānuu i na vala e tolu na faataunuuina e le Malo.

5. O le ā na faataunuuina i le 1914 seʻia oo i le tauamatamataga o le 1919?

⁵ Ina ua māeʻa ona aveesea e Iesu aafiaga leaga a Satani ma ana agelu mai le lagi, ona faatonuina lea e Ieova Iesu e asiasia ma faamamāina le tulaga faaleagaga o ona soo i le lalolagi. Na faamatalaina e le perofeta o Malaki lenā vala o le faamamāina faaleagaga. (Mala. 3:1-3) E faamaonia i mea na tutupu, na amata lenā faamamāina faaleagaga i le 1914, seʻia oo i le tauamatamataga o le 1919. * Ina ia avea i tatou ma vaega o le ʻauaiga o le Atua i le aoao o mea, e tatau ona tatou paia pe mamā. (1 Pete. 1:15, 16) E lē tatau ona tatou aafia i lotu sesē ma faiga faapolotiki a le lalolagi.

6. Ua faapefea ona sauniunia mai meaʻai faaleagaga, ma aiseā e tāua ai na sauniuniga?

⁶ Na sosoo ai ma le faaaogāina e Iesu o lona tulaga tautupu, e tofia ai le “pologa faamaoni ma le faautauta.” Ua saunia e lē aunoa e lenei pologa meaʻai faaleagaga mo i latou uma, o loo faia aʻe ai le “lafu e tasi” o loo i lalo o le tausiga a Iesu. (Mata. 24:45-47; Ioa. 10:16) Talu mai le 1919, na faia ai e le pologa faamaoni ma le faautauta lenei tiute tauave mamafa o le fafagaina o le “ʻaufaigaluega.” O nei meaʻai faaleagaga ua tatou tuputupu aʻe ai i le faatuatua. Ua faamalosia ai lo tatou faanaunauga ina ia mamā faaleagaga, tau amio, le mafaufau ma le faaletino. O nei foʻi meaʻai faaleagaga ua aʻoaʻoina ma faaaupega ai i tatou mo le galuega e sili ona tāua, o loo faia i le lalolagi i le taimi lenei. Po o tatou faaaogāina atoatoa na sauniuniga?

7. O le ā le galuega tāua na amataina e Iesu, ma o le ā le umi o le a faaauau ai lenei galuega?

⁷ Ina ua amata le faiva a Iesu i le lalolagi, na ia faalauiloa atu: “E tatau ona ou folafola atu le tala lelei o le malo o le Atua i isi foʻi  aai, auā o le mea lea na auina mai ai aʻu.” (Luka 4:43) Na avea lenei galuega ma vala autū o lona soifuaga i le tolu ma le ʻafa tausaga o lana faiva. Na ia faatonuina ona soo i le Mataio 10:7: “A outou ō, ia talaʻi atu e faapea: ʻUa latalata mai le malo o le lagi.’” Ina ua toe faatūina o ia, na ia faailoa mai o le a faalauiloa atu e ona soo lenei feʻau i “tuluʻiga uma o le lalolagi.” (Galu. 1:8) Na folafola atu e Iesu o le a ia fesoasoani iā i latou i lenei galuega tāua, seʻia oo mai lava i o tatou aso.​—Mata. 28:19, 20.

8. Na faapefea ona uunaʻia e le Tupu ona tagatānuu i le lalolagi e faia le galuega?

⁸ Talu mai le 1919, ua sili atu le tāua o le talaʻia o le “tala lelei o le malo.” (Mata. 24:14) O loo pule mai le Tupu i le lagi, ma ua ia aoaoina se vaega toʻaitiiti o ona tagatānuu i le lalolagi ua uma ona faamamāina. Ua latou naunau e tali atu i le faatonuga a Iesu: Ia talaʻi le tala lelei o le Malo o le Atua i le lalolagi aoao! (Galu. 10:42) O se faataʻitaʻiga, e toetoe 20,000 tagata talaʻi o le Malo na auai i se tauaofiaga faavaomalo na faia i Cedar Point i Ohio, i le Iunaite Setete iā Setema i le 1922. Sa faia ai e le uso o Rutherford le lauga na faamatuaina “Le Malo.” Seʻi mafaufau i le fiafia o le ʻauusufono ina ua faalauiloa atu e le uso: “Faauta, ua pule le Tupu! O outou o ona sui, ma e tatau ona faailoa atu o ia i le lautele. O lea, ia faalauiloa, faalauiloa, faalauiloa, le Tupu ma lona Malo.” Na tali atu le 2,000 o le ʻauusufono i lenā valaaulia, e ala i le faia o so latou sao i se aso faapitoa, e asiasi ai i aiga e oo atu i le 45 maila (72 km) le mamao, mai le nofoaga na faia ai le tauaofiaga. Na faapea mai se tasi na auai i lenā tauaofiaga: “E lē galo iā te aʻu le valaaulia ina ia faalauiloa atu le Malo, ma le maelega o i latou na auai ai.” E faapena foʻi faalogona o le toʻatele na auai i lenā tauaofiaga.

9, 10. (a) O ā faatulagaga ua faia ina ia toleni ai tagata talaʻi o le Malo? (e) O ā ni aogā ua e maua mai i na toleniga?

⁹ E oo mai i le 1922, ua silia i le 17,000 tagata talaʻi o le Malo na galulue i atunuu e 58. Peitaʻi e manaʻomia se toleniga. I le uluaʻi senituri, na avatu ai e lē na avea mulimuli ane ma Tupu faatonuga manino i ona soo i le auala e talaʻi ai, le oganuu ma le feʻau e ao ona talaʻia. (Mata. 10:5-7; Luka 9:1-6; 10:1-11) I aso foʻi nei, ua faamautinoa e Iesu ua maua e tagata talaʻi faatonuga ma meafaigaluega ina ia faaleleia ai le galuega. (2 Timo. 3:17) Ua faaaogā e Iesu faapotopotoga e auala mai ai toleniga mo ona tagatānuu, i le auala e fai ai le talaʻiga. O se tasi o auala ua faia ai na toleniga, o le Aʻoga o le Faiva Faatiokarate, lea e faia i le silia i le 111,000 faapotopotoga. O le usitaʻia o nei faatonuga, ua faaaupega ai le silia i le fitu miliona tagata talaʻi, i le auala e talaʻi ma aʻoaʻo atu ai ina ia pāʻia loto o ʻituaiga  uma o tagata.’​—Faitau le 1 Korinito 9:20-23.

¹⁰ E lē gata i lea, ua iai foʻi isi aʻoga ua toleni ai toeaina, paeonia, uso nofofua, ulugalii Kerisiano, Komiti o Lālā ma a latou avā, ovasia femalagaaʻi ma a latou avā ma misionare. * Na faaalia e se tasi o vasega o le Aʻoga Faale-Tusi Paia mo Ulugalii Kerisiano lo latou lotofaafetai e faapea: “O le toleniga faapitoa na matou maua, ua faaloloto ai lo matou alofa mo Ieova, ma faaaupega ai i matou e fesoasoani atu i isi.”

11. Ua faapefea ona onosaia e tagata talaʻi o le Malo teteega?

¹¹ E lē o tuuaunoaina e le fili o Satani le faatelega o le galuega talaʻi, faapea toleniga o loo faia. Ua ia faaaogā osofaʻiga tuusaʻo, ma auala iloagatā e taofia ai la tatou galuega. Peitaʻi, e lē taulau taumafaiga a le fili, auā ua tuu e Ieova lona Alo ina ia “sili ona maualuga nai lo o malo, o pule, o malosi, o taʻitaʻi.” (Efe. 1:20-22) I le avea ai o Iesu ma Tupu, ua ia faaaogā lana pule e puipuia ma taʻitaʻia ai ona soo ina ia faamautinoa, e faataunuu le finagalo o lona Tamā. * O loo talaʻia pea lenei tala lelei, ma e faitau miliona ē lotofaamaoni ua aʻoaʻoina ala o Ieova. Maʻeu se faaeaga mo i tatou i le faia o so tatou sao i lenei galuega tāua!

12. Faamatala nisi suiga na faia i le faalapotopotoga talu ona faavae le Malo o le Atua.

¹² Talu mai ona faavae le Malo i le 1914, o loo faaauau pea ona faaleleia e le Tupu le auala e faamaopoopo ai ana auauna ina ia faia le finagalo o le Atua. (Faitau le Isaia 60:17.) I le 1919, na tofia ai faatonu o auauna i faapotopotoga taʻitasi ina ia taʻimua i le galuega talaʻi. I le 1927 na amata ai le galuega talaʻi mai le fale i le fale i Aso Sa. I le 1931, na amata ona taʻua ai tagata talaʻi i lo latou igoa o Molimau a Ieova, ma faalaeiauina atili ai i latou e faia galuega tetele e lagolago ai le Malo. (Isa. 43:10-12) I le 1938, na lē toe palotaina ai uso mo faaeaga i le faapotopotoga, nai lo o lea e ao ona latou ausia agavaa faale-Tusi Paia. I le 1972, na amata ai ona vaavaaia e le ʻautoeaina le faapotopotoga atoa, nai lo o le vaaia e se toeaina se toʻatasi. Na faalaeiauina tane agavaa uma e aapa atu e faia so latou sao, i le ʻleoleoina o le lafu mamoe a le Atua o loo latou tausia.’ (1 Pete. 5:2) I le 1976, na faamaopoopo ai le Vaega Pule i komiti e ono mo le vaavaaia o le talaʻiga i le lalolagi aoao. O lea, na faasolosolo ai ona faamaopoopoina  e le Tupu tofia a Ieova, tagatānuu o le Malo i le auala a le Atua.

13. E faapefea i mea ua faataunuuina i le 100 tausaga talu ona faavaeina le Malo, ona aafia ai lou olaga?

¹³ Seʻi mafaufau i mea na faataunuuina e le Tupu faa-Mesia, a o faagasolo lana pulega i le 100 tausaga ua mavae. Na ia faamamāina tagata mo le suafa o Ieova. Ua ia faatonutonuina le talaʻia o le tala lelei o le Malo i le silia i le 239 atunuu, ma aʻoaʻoina le faitau miliona o tagata i ala o Ieova. Ua ia autasia foʻi le silia i le fitu miliona o tagatānuu faamaoni, ua ofo atu i latou lava e faia le finagalo o lona Tamā. (Sala. 110:3) E tele galuega lelei ua faia e Ieova e ala mai i le Malo faa-Mesia. Peitaʻi, e tele isi galuega mataʻina o le a faia i le lumanaʻi.

14. (a) O le ā o loo tatou talosaga ai i le Atua pe a tatou tatalo: “Ia oo mai lou Malo”? (e) O le ā le mau mo le 2014, ma aiseā e talafeagai ai?

¹⁴ E ui na faapaleina e Ieova lona Alo o Iesu Keriso e avea ma Tupu o le Malo faa-Mesia i le 1914, peitaʻi e leʻi taliina atoatoa ai la tatou tatalo ina ia ʻoo mai le malo.’ (Mata. 6:10) Ua loa ona valoia i le Tusi Paia, o le a “alu ia [Iesu] ma pule i totonu o [ona] fili.” (Sala. 110:2) O loo tetee pea faigāmalo o le lalolagi a Satani i le Malo o le Atua. O lea, pe a tatalo ia oo mai le Malo o le Atua, o loo tatou talosaga atu i le Atua ina ia aumaia e le Tupu o le Malo faa-Mesia ma ona pule lagolago, le iʻuga i malo faaletagata ma aveesea ē tetee i le Malo o le Atua. O lenā gaoioiga, o le a faataunuu ai le Tanielu 2:44, o le a “tuʻimomomoina ma faaumatia malo uma” e le Malo o le Atua. O le a tafiesea e le Malo o le Atua ona fili faapolotiki. (Faaa. 6:1, 2; 13:1-18; 19:11-21) Ua lata mai le taimi o le a faataunuuina ai lenā mea mataʻina. O lea, o le 2014 e atoa ai le 100 tausaga talu ona faavae le Malo o le Atua, ma ua talafeagai ai ona avea ma mau o le tausaga le Mataio 6:10: “Ia oo mai lou Malo.”

15, 16. (a) O ā mea mataʻina o le a tutupu a o faagasolo le Afe Tausaga? (e) O le ā le gaoioiga mulimuli o le a faia e Iesu le Tupu faa-Mesia, ma o le ā le fesootaʻiga o lenā gaoioiga i le fuafuaga a Ieova mo ana foafoaga uma?

¹⁵ Pe a māeʻa ona faaumatia e le Tupu faa-Mesia fili o le Atua, ona ia lafo lea o Satani ma ana temoni i le tō e lē gata mo le afe tausaga. (Faaa. 20:1-3) Pe a aveesea aafiaga leaga a le Tiapolo ma temoni, ona mafai lea e le Malo ona faaaogā aogā o le taulaga a Iesu, ma aveesea aafiaga o le agasala tuufaasolo. O le a faatutūina e le Tupu le faitau miliona o loo momoe i tuugamau, ma faamaopoopo se polokalame tauaʻoaʻoga e aʻoaʻoina ai i latou e faatatau iā Ieova. (Faaa. 20:12, 13) O le a pei le lalolagi atoa o le tulaga sa iai le parataiso i le faatoʻaga o Etena. O le a maua foʻi e tagata faamaoni uma le tulaga lelei atoatoa.

¹⁶ O le fuafuaga na faavae ai le Malo faa-Mesia, o le a faataunuu pe a māeʻa le pulega a Iesu i le Afe Tausaga, ona toe tuu atu lea e Iesu le Malo i lona Tamā. (Faitau le 1 Korinito 15:24-28.) O le a lē toe manaʻomia se tasi e fai ma sui i le va o Ieova ma lana fanau i le lalolagi. O le a autasi le fanau a le Atua i le lagi ma le lalolagi ma lo latou Tamā faalelagi, o se aiga i le aoao o mea.

17. O le ā ua e maumauaʻi e fai mo le Malo?

¹⁷ O mea mataʻina na tutupu a o faagasolo le 100 tausaga o le pulega a le Malo, ua tatou mautinoa ai o loo pulea e Ieova mea uma, ma o le a taunuu lona finagalo mo le lalolagi. O lea, seʻi faaauau pea ona avea i tatou ma tagatānuu faamaoni o le Malo, ma faalauiloa pea le Tupu ma lona Malo. Ua tatou mautinoa ua toe o se aga ona taliina lea o la tatou tatalo: “Ia oo mai lou Malo.”