Skip to content

Skip to table of contents

“O Ai la le Pologa Faamaoni ma le Faautauta?”

“O Ai la le Pologa Faamaoni ma le Faautauta?”

“O ai la le pologa faamaoni ma le faautauta, o lē ua tofia e lona matai e vaavaaia lana ʻaufaigaluega?”​—MATA. 24:45.

1, 2. (i) O le ā le auala ua faaaogā e Iesu e fafagaina faaleagaga ai i tatou i aso nei? (ii) Aiseā e tāua ai ona tatou iloa po o ai le pologa faamaoni i aso nei?

“O LE tele o taimi ou te maua ai lomiga e iai mataupu o loo oʻu matuā manaʻomia lava.” O le faamatalaga lenā a se tuafafine na faaalia ai lona talisapaia o galuega a uso i la tatou ofisa ulu. Pe e tutusa ou faalogona ma faalogona o lenā tuafafine?

2 O le mauaina o meaʻai faaleagaga i le taimi talafeagai, o se faamaoniga o le tausisi o le Ulu o le faapotopotoga i lana folafolaga e fafagaina i tatou. O le ā le auala ua fafagaina ai i tatou e Iesu i aso nei? Ina ua taʻua e Iesu le faailoga o lona faatasi mai, na ia faapea mai ai o le a ia faaaogāina le “pologa faamaoni ma le faautauta,” e aumaia “meaʻai i le taimi tatau” mo lana ʻaufaigaluega. * (Faitau le Mataio 24:45-47.) O lenā pologa faamaoni, o le auala lea ua faaaogā e Iesu e fafagaina faaleagaga ai ona soo i nei aso e gata ai. O lea, e tāua ai ona tatou iloa po o ai lenā pologa faamaoni, auā e faalagolago i ai lo tatou malosi faaleagaga, faapea la tatou faiā ma Ieova.​—Mata. 4:4; Ioa. 17:3.

3. O le ā sa taʻua i a tatou lomiga i le taimi ua teʻa e faatatau i le pologa faamaoni?

3 O le ā lo tatou malamalamaga e tatau ona iai i le talafaatusa a Iesu e faatatau i le pologa faamaoni? Na taʻua i a tatou lomiga i le taimi ua teʻa manatu nei. I le Penetekoso 33 T.A., na tofia ai e Iesu le pologa faamaoni e vaavaaia lana ʻaufaigaluega. Talu mai lenā taimi, na faaata mai e le pologa faamaoni Kerisiano faauuina uma o loo i le lalolagi. E faasino atu le ʻaufaigaluega i Kerisiano faauuina taʻitoʻatasi. I le 1919, na tofia ai e Iesu le pologa faamaoni, “e vaavaaia ana mea uma” e lagolagoina ai le Malo i luga o le lalolagi. Peitaʻi, ina ua māeʻa ona toe suʻesuʻeina ma le faaeteete lenei mataupu, ma manatunatu loloto i ai faatasi ma le tatalo, na iloa ai e tatau ona sui lo tatou malamalamaga e faatatau  i le pologa faamaoni ma le faautauta. (Faata. 4:18) O lea, seʻi o tatou iloiloina lenā talafaatusa, ma vaai pe faapefea ona tatou aafia ai e tusa po o le ā lo tatou faamoemoe.

O AFEA E FAATAUNUU AI LE TALAFAATUSA?

4-6. O le ā se faamaoniga e iloa ai na faatoʻā faataunuu fetalaiga a Iesu e faatatau i le pologa, ina ua mavae le 1914?

4 O isi fuaiupu o le Mataio e 24, e faaalia ai na amata ona faataunuu le talafaatusa e faatatau i le pologa faamaoni ma le faautauta i le taimi o le iʻuga, ae lē o le Penetekoso 33 T.A. O lea, seʻi o tatou iloiloina faamaoniga faale-Tusi Paia o lenā manatu.

5 O le talafaatusa i le pologa, o se vaega o le valoaga a Iesu e faatatau ʻi le faailoga o lona faatasi mai, ma le taufaaiʻuiʻuga o le faiga o mea a le lalolagi.’ (Mata. 24:3) O le vaega muamua o le valoaga o loo i le Mataio 24:4-22, e lua ona faataunuuga. O le faataunuuga muamua, na amata mai le 33 T.A. seʻia oo i le 70 T.A. A o le faataunuuga lona lua, e iai se aafiaga tele i o tatou aso. Po o lona uiga la e lua faataunuuga o le talafaatusa a Iesu e faatatau i le pologa faamaoni? E leai.

6 Na amata mai i le Mataio 24:29, ona uaʻi atu Iesu i mea mataʻina o le a tutupu i o tatou aso. (Faitau le Mataio 24:30, 42, 44.) Ina ua ia taʻua mea o le a tutupu i le puapuaga tele, na ia faapea mai ai “o le a latou vaaia foʻi le Atalii o le tagata ua sau i ao o le lagi.” O lea, na ia uunaʻia ai i latou o le a ola i aso e gata ai ina ia mataala. Na ia fetalai: “Auā tou te lē iloa po o lē fea aso e sau ai lo outou Alii,” ma “o le itula tou te lē manatunatu ai, e sau ai le Atalii o le tagata.” * O lea, a o talanoa Iesu e faatatau i mea o le a tutupu i aso e gata ai, na ia taʻua ai foʻi ma le talafaatusa e faatatau i le pologa. O lea la, e manino mai na faatoʻā amata ona faataunuu fetalaiga a Iesu e faatatau i le pologa, ina ua mavae le amataga o aso e gata ai i le 1914. Aiseā e talafeagai ai lenā manatu?

7. O le ā le fesili tāua na lāgā ina ua amata le vaitau o le seleselega, ma aiseā?

7 Seʻi mafaufau i le fesili lenei: ʻO ai le pologa faamaoni ma le faautauta?’ I le uluaʻi senituri, sa lē manaʻomia ona faia lenā fesili. E pei ona taʻua i le mataupu ua mavae, sa mafai e aposetolo ona faia vavega ma avatu foʻi i isi meaalofa o le agaga paia, o se faamaoniga o le lagolagosua mai le Atua. (Galu. 5:12) O lea, na iloa lelei i latou na tofia e Iesu e fai ma taʻimua. Peitaʻi, i le 1914 ua telē le suiga. Na amata i le tausaga lenā le vaitau o le seleselega. Ua oo i le taimi e tuuesea ai vao leaga mai le saito. (Mata. 13:36-43) Ina ua amata le vaitau o le seleselega, sa toʻatele i latou na faapea mai o soo moni o Keriso. O lea na tulaʻi ai se fesili tāua: Na faapefea ona iloa po o ai le saito po o Kerisiano faauuina? E maua le tali i le talafaatusa i le pologa faamaoni. O soo faauuina o Keriso e tatau ona fafagaina lelei i le itu faaleagaga.

O AI LE POLOGA FAAMAONI MA LE FAAUTAUTA?

8. Aiseā e talafeagai ai ona faapea atu e faia aʻe le pologa faamaoni i Kerisiano faauuina?

8 E tatau ona faia aʻe le pologa faamaoni i Kerisiano faauuina o loo i le lalolagi. E taʻua i latou o “ositaulaga ua avea ma tupu,” ma ua tofia e ʻfaalauiloa atu uiga silisili ona lelei o lē na valaauina latou mai i le pōuliuli i lona malamalama ofoofogia.’ (1 Pete. 2:9) O lea, e talafeagai ona faapea atu o nisi o “ositaulaga ua avea ma tupu,” o loo faia so latou sao tuusaʻo i le aʻoaʻoina o isi uso talitonu i le upu moni.​—Mala. 2:7; Faaa. 12:17.

9. Po o faia aʻe le pologa faamaoni i Kerisiano faauuina uma? Faamatala.

 9 Po o faia aʻe le pologa faamaoni i Kerisiano faauuina uma? E leai. O le mea moni, e lē o sui uma o le ʻaufaauuina, o loo faia sa latou vaega i le tufatufaina atu o meaʻai faaleagaga i le ʻauuso i le lalolagi aoao. O nisi o le ʻaufaauuina o ni auauna o le faiva po o toeaina i faapotopotoga. O loo latou aʻoaʻo mai lea fale i lea fale faapea i faapotopotoga, ma o loo latou lagolagosua foʻi i taʻitaʻiga mai le ofisa ulu. Peitaʻi, e leai sa latou vaega i le tufatufaina atu o meaʻai faaleagaga i le ʻauuso i le lalolagi aoao. E aofia foʻi i le ʻaufaauuina nisi o tuafāfine lotomaulalo, e lē o taumafai e avea i latou o ni aʻoaʻo i le faapotopotoga.​—1 Kori. 11:3; 14:34.

10. O ai le pologa faamaoni ma le faautauta?

10 O ai la le pologa faamaoni ma le faautauta? Na fafaga e Iesu le toʻatele e ala i se vaega toʻaitiiti. O lea, ua faia aʻe le pologa i se vaega toʻaitiiti o uso faauuina, o loo faia tuusaʻo so latou sao i le sauniunia ma le tufatufaina atu o meaʻai faaleagaga, a o faagasolo le faatasi mai o Keriso. A o faagasolo aso e gata ai, o loo auauna faatasi Kerisiano faauuina o loo faia aʻe ai le pologa faamaoni i le ofisa ulu. Na faasolo ina manino mai o le pologa faamaoni o loo faasino atu i le Vaega Pule o Molimau a Ieova. Ia mātau, na taʻua e Iesu i lana talafaatusa e tasi le “pologa.” O lea, e faia faatasi faaiʻuga a le Vaega Pule.

O AI LE ʻAUFAIGALUEGA?

11, 12. (i) O ā tofiga e lua e maua e le pologa faamaoni ma le faautauta? (ii) O anafea na tofia ai e Iesu le pologa faamaoni e vaavaaia lana ʻaufaigaluega, ma o ai na ia tofiaina?

11 Ia mātau, na taʻua i le talafaatusa a Iesu e lua tofiga eseese e tuuina atu i le pologa faamaoni ma le faautauta. O le tofiga muamua, o le vaavaaia o le ʻaufaigaluega. Ae o le tofiga lona lua o le vaavaaia o mea uma a le matai. E faataunuu lenei talafaatusa i le taimi o le iʻuga. O lea, e faatoʻā amata faataunuu uma nei tofiga, ina ua māeʻa ona avea Iesu ma Tupu i le 1914.

12 O anafea na tofia ai e Iesu le pologa e vaavaaia lana ʻaufaigaluega? Ina ia tali lenā fesili, seʻi o tatou toe foʻi i tuā i le 1914, i le taimi na amata ai le vaitau o le seleselega. I lenā vaitaimi, e tele vaega faalotu na faapea mai o i latou o Kerisiano. O lea, o ai le vaega na filifilia e Iesu ma tofia  mai ai le pologa faamaoni? Na tali lenā fesili ina ua asiasia e Iesu ma lona Tamā le malumalu faaleagaga i le 1914, seʻia oo i le amatamataga o le 1919. * (Mala. 3:1) Sa o la fiafia i le mātauina o se vaega toʻaitiiti o Tagata Aʻoga o le Tusi Paia, sa faamaoni o latou loto iā Ieova ma lana Afioga. Sa manaʻomia ona faamamāina i latou. Peitaʻi, na latou gauaʻi pea i lenā vaitaimi puupuu o tofotofoga ma le faamamāina. (Mala. 3:2-4) Na avea Tagata Aʻoga faamaoni o le Tusi Paia ma saito moni. I le 1919, na filifilia ai e Iesu uso faauuina agavaa mai Tagata Aʻoga o le Tusi Paia, e avea ma pologa faamaoni ma le faautauta, ma tofia loa i latou e vaavaaia le ʻaufaigaluega.

13. O ai le ʻaufaigaluega, ma aiseā?

13 O ai le ʻaufaigaluega? Ina ia faafaigofie, e faasino atu i ē uma e fafagaina faaleagaga. I le tauamatamataga o aso e gata ai, sa faasino atu le ʻaufaigaluega i le ʻaufaauuina uma. Peitaʻi, na aofia mulimuli ane ai foʻi ma le motu o tagata e toʻatele o isi mamoe i le ʻaufaigaluega. Ua faia aʻe i isi mamoe le toʻatele o le “lafu e tasi” i lalo o le taʻitaʻiga a Keriso. (Ioa. 10:16) E maua e le ʻaufaauuina ma isi mamoe aogā mai meaʻai faaleagaga, ua tufatufaina mai e le pologa faamaoni i le taimi tatau. Ae faapefea sui o le Vaega Pule lea o loo fai aʻe ai le pologa faamaoni ma le faautauta? E manaʻomia foʻi ona fafagaina faaleagaga na uso. O lo latou lotomaulalo, e latou te amanaʻia ai le mea moni e aafia foʻi i latou taʻitoʻatasi i le ʻaufaigaluega, e pei o isi Kerisiano moni uma.

Pe e tatou te faamoemoe e ola i le lagi po o le lalolagi, o i tatou uma o le ʻaufaigaluega e manaʻomia meaʻai faaleagaga i le taimi tatau

14. (i) O le ā ua vaavaaia e le pologa faamaoni, ma o le ā e aofia ai? (ii) O le ā le lapataʻiga na tuuina atu e Iesu i le pologa faamaoni ma le faautauta? (Tagaʻi i le pusa “Ae Afai e Faapea Ifo Lenā Pologa Leaga . . . ”)

14 E tāua tele le tiute tauave na tuuina atu e Iesu i le pologa faamaoni ma le faautauta. I taimi o le Tusi Paia, e vaavaaia e se auauna pule meatotino a lona matai. (Luka 12:42) I se tulaga talitutusa, ua tuuina atu i le pologa faamaoni ma le faautauta le tiute tauave e vaavaaia mea uma a Keriso i luga o le lalolagi. E aofia ai le vaavaaia o meatotino, le galuega talaʻi, fonotaga ma tauaofiaga, faapea le saunia o lomiga faale-Tusi Paia o loo faaaogā i le talaʻiga, suʻesuʻega a le tagata lava ia, ma suʻesuʻega a le faapotopotoga. E faalagolago le ʻaufaigaluega uma i meaʻai faaleagaga e saunia mai e le pologa faamaoni.

 O AFEA E TOFIA AI LE POLOGA E VAAVAAIA MEA UMA A LE MATAI?

15, 16. O afea e tofia ai e Iesu le pologa faamaoni e vaavaaia ana mea uma?

15 O afea e tuu atu ai e Iesu le tofiga lona lua i le pologa? Na ia fetalai e faapea: “E fiafia lenā pologa pe a taunuu mai lona matai, ma maua mai o loo faapea ona ia fai! E moni ou te fai atu iā te outou, E na te tofia o ia e vaavaaia ana mea uma.” (Mata. 24:46, 47) Mātau, na tuuina atu e Iesu le tofiga lona lua, ina ua ia taunuu ma maua mai le pologa “o loo faapea ona ia fai,” po o loo faamaoni i le tufatufaina atu o meaʻai faaleagaga. O lea, e iai le va mai le taimi na avatu ai le tofiga muamua ma le tofiga lona lua. Ina ia tatou malamalama i le auala ma le taimi e tofia ai e Iesu le pologa e vaavaaia ana mea uma, e tāua ona tatou iloa mea nei e lua. Muamua, o afea e taunuu mai ai Iesu, ma lona lua, o le ā e aofia i ana mea uma.

16 O afea e taunuu mai ai Iesu? Manatua i fuaiupu na muamua atu ina ua fetalai Iesu i le taimi e “sau” ai, e faasino atu i le taimi o le a ia afio mai ai e faalauiloa le faamasinoga ma faaumatia tagata amioleaga i le iʻuga o lenei faiga o mea. * (Mata. 24:30, 42, 44) O lea, o le “sau” po o le “taunuu mai” o Iesu o loo taʻua i le talafaatusa i le pologa faamaoni, o le a tupu a o faagasolo le puapuaga tele.

17. O le ā e aofia ai i mea uma a Iesu?

17 O le ā e aofia ai i “mea uma” a Iesu? Ina ua fetalai Iesu i na upu, e leʻi faasino atu i na o mea i le lalolagi. Auā ua iā te ia foʻi le pule uma i le lagi. Na ia fetalai: “Ua tuuina mai iā te aʻu le pule uma i le lagi ma le lalolagi.” (Mata. 28:18; Efe. 1:20-23) E aofia i ana mea uma le Malo o le Atua lea  na amata ona ia pule ai mai le 1914, lea o le a latou pule faatasi ai ma le ʻaufaauuina i le lumanaʻi.​—Faaa. 11:15.

18. Aiseā o le a fiafia ai Iesu i le taimi o le a ia faia ai le tofiga lona lua?

18 O le ā ua tatou malamalama ai mai i nei faamatalaga uma? Pe a afio mai Iesu e aumaia le faamasinoga a o faagasolo le puapuaga tele, o le a ia maua mai le pologa o loo faamaoni pea e tufatufa mai meaʻai faaleagaga i le ʻaufaigaluega i le taimi tatau. O le fiafia o le finagalo o Iesu, o le a ia tuuina atu ai iā i latou le tofiga lona lua, o le vaavaaia o ana mea uma. O le a maua e i latou e faia aʻe ai le pologa lenei tofiga, pe a maua lo latou tofi faalelagi, o le avea ma tupu faatasi ma Keriso.

19. Po o le a sili atu le taui e maua e le pologa faamaoni ma le faautauta i le lagi nai lo o isi sui o le ʻaufaauuina? Faamatala.

 19 Pe e sili atu le taui o le a maua e le pologa faamaoni nai lo o isi sui uma o le ʻaufaauuina? E leai. O le taui na folafola atu i se vaega toʻaitiiti, e mafai foʻi ona maua e isi. O se faataʻitaʻiga, seʻi mātau le folafolaga na fai atu e Iesu i ona aposetolo e toʻasefulu tasi i le pō a o leʻi maliu. (Faitau le Luka 22:28-30.) Na folafola atu e Iesu o le a latou pule faatasi ma ia i lona Malo, pe a latou tumau faamaoni. Ae i tausaga mulimuli ane, na faailoa mai ai e Iesu, o le a avea foʻi sui uma o le 144,000 ma tupu i lona Malo. (Faaa. 1:1; 3:21) I se tulaga talitutusa, na folafola mai e Iesu i le Mataio 24:47, o le a ia tofia se vaega toʻaitiiti o tane, po o uso faauuina o loo faia aʻe ai le pologa faamaoni e vaavaaia ana mea uma. E ui i lea, o le a vaavaaia foʻi e isi sui uma o le 144,000 mea uma a Keriso.—Faaa. 20:4, 6.

O le a vaavaaia e sui uma o le 144,000 mea uma a Keriso (Tagaʻi i le  palakalafa 19)

20. Aiseā na tofia ai e Iesu le pologa, ma o le ā ua e maumauaʻi e fai?

20 Na faaaogā e Iesu i le uluaʻi senituri T.A., se vaega toʻaitiiti e fafagaina ai le toʻatele. Ua faapena foʻi le auala ua ia faaaogā ai le pologa faamaoni ma le faautauta i aso nei. Ua tofia e Iesu le pologa faamaoni ina ia faamautinoa e maua e ona soo moni uma, meaʻai faaleagaga i nei aso e gata ai. O lea, seʻi o tatou maumauaʻi e faaalia lo tatou lototalisapaia, e ala i le lagolagoina ma le faamaoni o uso faauuina ua faia aʻe ai le pologa faamaoni ma le faautauta.​—Epe. 13:7, 17.

 

^ pala. 2 Palakalafa 2: I se taimi na muamua atu, na faaaogā ai e Iesu se talafaatusa e tai uiga tutusa, lea na ia faatusa ai le “pologa” i se “auauna pule,” ma le “ʻaufaigaluega’ e pei o “lana ʻautautua.”​—Luka 12:42-44.

^ pala. 6 Palakalafa 6: O le “sau” o Keriso (upu Eleni, erʹkho·mai) e ese mai i lona “faatasi mai” (pa·rou·siʹa). O lona faatasi mai lē vaaia, na amata a o leʻi oo i le taimi e afio mai ai e faia le faamasinoga.

^ pala. 12 Palakalafa 12: Tagaʻi i le mataupu “Faauta! Ou te Faatasi ma Outou i Aso Uma Lava” o loo i le itulau e 10-12 o lenei lomiga, palakalafa 5-8.

^ pala. 16 Palakalafa 16: Tagaʻi i le mataupu “Ia e Fetalai mai iā i Matou, Pe e oo Afea ia Mea” o loo i le itulau e 7-8, o lenei lomiga, palakalafa 14-18.