O le Faaaliga iā Ioane 6:1-17

  • Tatala e le Tamaʻi Mamoe faamaufaailoga muamua e ono (1-17)

    • O loo tiʻetiʻe lē manumalo i le solofanua paʻepaʻe (1, 2)

    • Aveesea le filemu e lē tiʻetiʻe i le solofanua mūmū (3, 4)

    • Aumaia le oge e lē tiʻetiʻe i le solofanua uliuli (5, 6)

    • Ua igoa lē tiʻetiʻe i le solofanua samasama vaivai i le Oti (7, 8)

    • Ē ua fasiotia o loo i lalo o le fata faitaulaga (9-11)

    • Se mafuiʻe tele (12-17)

6  Ua ou iloa atu foʻi ua tatala e le Tamaʻi Mamoe+ o le tasi o faamaufaailoga e fitu,+ ma ua ou faalogo ua faapea mai le tasi o foafoaga agaga+ i le leo e pei o se faititili: “Sau ia!”  Ona ou vaai ai lea, faauta foʻi! o le solofanua paʻepaʻe+ ma lē o loo tiʻetiʻe ai ua iai lana ʻaufana; ma ua tuuina atu iā te ia le pale,+ ua alu atu o ia ina ia manumalo, ma e oo ina manumalo aʻiaʻi.+  Ina ua ia tatalaina le faamaufaailoga lona lua, ona ou faalogo lea ua faapea mai le foafoaga agaga lona lua:+ “Sau ia!”  Ona alu atu loa lea o le solofanua mūmū, ma ua avatu i lē o loo tiʻetiʻe ai le faatagaga e aveesea ai le filemu mai i le lalolagi, ina ia latou fefasiotiaʻi ai; ma ua tuuina atu foʻi iā te ia le pelu telē.+  Ina ua ia tatalaina le faamaufaailoga lona tolu,+ ona ou faalogo lea ua faapea mai le foafoaga agaga lona tolu:+ “Sau ia!” Ona ou vaai ai lea, faauta foʻi! o le solofanua uliuli, ma o lē o loo tiʻetiʻe ai ua i lona lima se fua faatautau.  Ona ou faalogo lea i se leo e pei e sau mai i le ogatotonu o foafoaga agaga e toʻafā, ua faapea mai: “O le tau o le kilokalama o saito, o le tenari*+ lea, ma o le tau o kilokalama e tolu o karite,* o le tenari lea; ae aua e te faaleagaina le suāuu olive ma le uaina.”+  Ina ua ia tatalaina le faamaufaailoga lona fā, ona ou faalogo lea ua faapea mai le foafoaga agaga lona fā:+ “Sau ia!”  Ona ou vaai ai lea, faauta foʻi! o le solofanua samasama vaivai, ma lē o loo tiʻetiʻe ai ua igoa ia o le Oti. Ua mulimuli atu i ona tua le Tuugamau.* Ua tuuina atu i ai le pule i le tasi vaefā o le lalolagi, ina ia fasiotia i le pelu umī, ma le oge,+ ma le faamaʻi oti, ma e ala i manufeʻai o le lalolagi.+  Ina ua ia tatalaina le faamaufaailoga lona lima, ona ou iloa lea o loo i lalo o le fata faitaulaga+ le toto+ o ē ua fasiotia ona o le afioga a le Atua, ma le galuega talaʻi na latou faia.+ 10  Ua latou alalaga mai foʻi ma le leotetele e faapea: “Le Alii Pule Silisili Ese e, o lē e paia ma moni,+ o afea ea e te faamasinoina ai ma taui atu lo matou toto iā i latou o loo nonofo i le lalolagi?”+ 11  Ua tuuina atu iā i latou taʻitoʻatasi ni ofu talaloa papaʻe,+ ma ua faatonuina i latou e faatalitali teisi seʻia atoa le fuainumera o o latou uso a pologa ma o latou uso, o ē o le a fasiotia e pei foʻi o i latou.+ 12  Ua ou iloa atu foʻi ua ia tatalaina le faamaufaailoga lona ono, ona lūlū lea o se mafuiʻe tele; ua pogisa foʻi le lā e pei o se ʻie talatala uliuli,* ma ua mūmū foʻi le masina atoa e pei o le toto,+ 13  ma ua paʻuʻū ifo fetu mai le lagi i le lalolagi, e pei o le toʻulu ifo o mati moto pe a lūlūina le laau o le mati e se matagi malosi. 14  Ua mou atu le lagi e pei o le taataʻai o le tusi tāʻai,+ ma ua aveesea mauga uma ma motu uma mai i mea sa iai.+ 15  O tupu foʻi o le lalolagi, o tagata aloaʻia, o taʻitaʻiʻau, o ē e mauʻoa, o ē e malolosi, o pologa uma, ma tagata saʻoloto uma, ua latou lalafi i totonu o ana ma vā o papa o mauga.+ 16  Ua latou alalaga atu pea i mauga ma papa: “Mafuli mai ia iā i matou,+ ina ia lilo ai i matou mai i fofoga o Lē o loo afio i le nofoālii,+ ma le toʻasā o le Tamaʻi Mamoe,+ 17  auā ua oo mai le aso tele o lo la toʻasā,+ ma o ai ea sē e mafai ona tū atu i ai?”+

Faamatalaga Pito i Lalo

O se tupe siliva a Roma e tutusa ma le totogi o le tagata faigaluega i le aso. Tagaʻi i le Faa. E14.
O se isi ituaiga saito. O le upu Peretania, o le barley.
Po o “Heitisi.” Tagaʻi i le Uiga o Upu.
O nei ʻie atonu e fai mai i fulufulu ʻoti.