Galuega a le ʻAuaposetolo 1:1-26
1 Teofilo e, i laʻu tusi muamua na avatu iā te oe, na ou faamatalaina ai mea uma na faia ma aʻoaʻo atu e Iesu,+
2 seʻia oo i le aso na aveina aʻe ai o ia i le lagi,+ ina ua uma ona ia tuuina atu faatonuga e ala i le agaga paia i aposetolo ua ia filifilia.+
3 Ina ua mavae ona puapuaga, ona ia faailoa atu lea iā i latou ua toe soifua mai o ia, e ala i le tele o faamaoniga maumaututū.+ Na latou vaaia o ia a o faagasolo aso e 40, ma na ia talanoa atu e faatatau i le Malo o le Atua.+
4 A o potopoto faatasi o ia ma i latou, na ia faatonuina i latou e faapea: “Ia aua neʻi outou tuua Ierusalema,+ ae ia faatalitali pea i le mea na folafolaina mai e le Tamā,+ lea foʻi na outou faalogo ai mai iā te aʻu.
5 Auā o le mea moni, na faia e Ioane papatisoga i le vai, ae ua toe o ni nai aso, ona papatisoina lea o outou i le agaga paia.”+
6 O lea, ina ua latou potopoto faatasi, ona latou fesili mai lea iā te ia: “Le Alii e, pe e te toe faavaeina le malo iā Isaraelu i le taimi lenei?”+
7 Ua faapea atu o ia iā i latou: “E lē tatau ona outou iloa taimi po o tau* ua tuu e le Tamā i lana lava pule.+
8 Ae o le a maua e outou le mana pe a oo ifo iā te outou le agaga paia,+ ma o le a fai outou ma molimau+ iā te aʻu i Ierusalema,+ i Iutaia uma ma Samaria,+ ma tuluʻiga uma o le lalolagi.”+
9 Ua uma ona fetalai o ia i nei mea, ona aveina aʻe lea o ia a o latou vaavaai atu, ua ufitia foʻi o ia e se ao mai i la latou vaai.+
10 A o vaavaai atu i latou i le lagi i lona afio aʻe, ona faafuaseʻi lea ona tutū faatasi ma i latou o ni tamāloloa se toʻalua o loo oofu i ofu papaʻe,+
11 ma ua faapea mai: “Tagata o Kalilaia e, aiseā ua outou tutū ai ma vaavaai aʻe i le lagi? O Iesu lea ua aveina aʻe i le lagi mai iā te outou, o le a toe maliu mai i le auala lava lea e pei ona outou vaavaai atu i ai i lona afio aʻe i le lagi.”
12 Ona latou toe foʻi lea i Ierusalema+ mai i le mauga e taʻua o le mauga o Olive, lea e latalata ane i Ierusalema, e tusa le mamao ma le savaliga* e taga i le aso sapati.
13 Ina ua latou taunuu, ona ō atu lea i le potu i luga, i le mea ua latou nonofo ai. Na iai i inā Peteru ma Ioane, o Iakopo ma Aneterea, o Filipo ma Toma, o Patolomaio ma Mataio, o Iakopo le atalii o Alefaio, o Simona le tagata maelega, ma Iuta le atalii o Iakopo.+
14 Ua lotogatasi i latou uma ma finafinau i le tatalo, faatasi ma nisi fafine,+ atoa ma Maria le tinā o Iesu ma ona uso.+
15 I se tasi o na aso a o latou faapotopoto e tatalo, ua tulaʻi ai Peteru i luma o le ʻauuso, (o le aofaʻi atoa* o tagata e tusa ma le toʻa 120) ma faapea atu:
16 “Le ʻauuso e, na tatau ona taunuu tusitusiga paia, lea na valoia e le agaga paia e ala mai iā Tavita e uiga iā Iuta,+ o lē na taʻitaʻia i latou na puʻeina Iesu.+
17 Auā na faitaulia o ia faatasi ma i tatou,+ na fai foʻi lona sao i lenei faiva.
18 (Na faatauina e lenei tagata se fanua i le tau o le amiolētonu,+ na titō i lalo ma pā ai lona manava ma sau ai i fafo lona gaʻau.+
19 Na salalau atu lenei tala i tagata uma na nonofo i Ierusalema, o le mea lea na taʻua ai lenā fanua i la latou gagana, o Akeletama, o lona uiga o le “Fanua o le Toto.”)
20 Auā ua tusia i le tusi o Salamo, ‘Ia faatafunaina le mea e nofo ai o ia, ma aua foʻi neʻi toe nofo ai se tasi,’+ ma ‘Ia ave e se tasi lona tofi o se ovasia.’+
21 O le mea lea, e mai i tagata na faatasi ma i tatou i le taimi atoa na faia ai e le Alii o Iesu ana galuega a o iai o ia ma i tatou,
22 e amata mai i le papatisoina o ia e Ioane+ seʻia oo i le aso na aveina aʻe ai o ia,+ e tatau ona avea se tasi o nei tagata o sē na vaaitino faatasi ma i tatou i lona toetū.”+
23 Ona latou faatū atu lea o ni tagata se toʻalua, o Iosefa ua igoa iā Pasapa, o lē ua taʻua foʻi o Iuso, ma Matatia.
24 Ua latou tatalo e faapea: “Ieova* e, o oe o lē e silafia loto o tagata uma,+ ia e faailoa mai po o ai o i laʻua nei ua e filifilia,
25 ina ia faia lenei faiva ma le tofiga faaaposetolo, lea na lafoaʻi e Iuta ae alu i lona lava ala.”+
26 Ona latou faia lea o le vili,*+ ma ua faasaga le vili iā Matatia; o le mea lea ua faitaulia ai o ia* o se aposetolo faatasi ma le toʻa 11.
Faamatalaga Pito i Lalo
^ E faasino atu i taimi atofaina.
^ Po o “o le motu.”
^ Tagaʻi i le Uiga o Upu.
^ Po o le “ua manatu ai iā te ia,” e faasino atu i le vaai iā te ia e tutusa ma le isi toʻa 11.
