Skip to content

Skip to table of contents

O le ā le Agaga o Loo E Faaalia?

O le ā le Agaga o Loo E Faaalia?

 O le ā le Agaga o Loo E Faaalia?

“Ia iai le agalelei faifua o le Alii o Iesu Keriso i le agaga ua outou faaalia.”—FILE. 25.

O LE Ā LAU TALI?

Aiseā e tatau ai ona tatou iloiloina uiga o loo tatou faaalia?

O le ā le uiga e tatau ona ʻalofia, ma e faapefea ona tatou faia faapea?

E faapefea ona tatou faaalia se agaga lelei i le faapotopotoga?

1. O le ā na taʻua e Paulo i ana tusi i faapotopotoga?

I TUSI a Paulo i Kerisiano i le uluaʻi senituri, na ia faapea mai ai i le tele o taimi, e faamoemoe o loo finagalo malie Ieova ma Iesu i le agaga o loo faaalia e faapotopotoga. O se faataʻitaʻiga, i lana tusi i Kalatia na ia faapea atu ai: “Uso e, ia iai i le agaga ua outou faaalia, le agalelei faifua o lo tatou Alii o Iesu Keriso. Amene.” (Kala. 6:18) O le ā le uiga o upu a Paulo, e faatatau i le “agaga ua outou faaalia”?

2, 3. (i) O le ā le uiga o le upu “agaga”? (ii) O ā fesili e tatau ona tatou fesili ifo ai i tatou lava?

2 O le upu “agaga” e pei ona taʻua e Paulo, e uiga atu i mafaufauga ma uiga faaalia, lea e aafia ai le auala e tatou te gaoioi ma tautatala ai. O se faataʻitaʻiga, e mafai ona avea ai se tagata o sē e agamālie, e manatu mamafa i isi, agalelei, pe lotofaamagalo foʻi. Ua faapea mai le Tusi Paia, e lelei le iai o le “agaga agamalu ma le filemu,” faapea le ʻtoʻafilemu o le loto,’ e pulea ai o tatou faalogona. (1 Pete. 3:4; Faata. 17:27) Ae i le isi itu, atonu e faaalia e se tasi uiga e pei o le matapeʻapeʻa, faia o upu faatigā, maʻaleʻale ma e lē fautuaina. Ae o isi e mafaufau i mea e lē mamā, ma iai se uiga faatautee.

3 Ua faapea mai Paulo, “ia iai le Alii i le agaga ua e faaalia.” Na ia faasino atu i le tatau i Kerisiano ona faataʻitaʻi i uiga o Keriso, ma faaalia uiga e finagalo malie i ai le Atua. (2 Timo. 4:22; faitau le Kolose 3:9-12.) O lea, e tatau ona tatou fesili ifo: ʻO ā uiga o oʻu faaalia atu? Pe e mafai ona faaleleia oʻu uiga ma faafiafiaina ai Ieova? Po o oʻu fesoasoani i isi i le faapotopotoga ina ia faaleleia o latou  uiga?’ E pei ona matagofie se puataunofo ona o ona fugālaau taʻitasi, e tatau foʻi ona tatou saosaolaumea uma mo le lelei o le faapotopotoga. O lea, seʻi o tatou iloilo pe faapefea ona tatou atiaʻe uiga e faafiafiaina ai le Atua.

ʻALOFIA “LE AGAGA O LE LALOLAGI”

4. O le ā le agaga o le lalolagi?

4 Ua faapea mai le 1 Korinito 2:12, e “tatou te leʻi maua le agaga o le lalolagi, a o le agaga mai i le Atua.” O lea, o le ā “le agaga o le lalolagi”? E tutusa ma le agaga o loo taʻua i le Efeso 2:2, “na outou savavali ai e tusa ma le faiga o mea a lenei lalolagi, e tusa foʻi ma le pule a le taʻitaʻi o le ʻea, o le agaga lea o loo galue i fanau e lē usiusitaʻi.” O le “ʻea” po o le “agaga o le lalolagi,” o le auala lea e mafaufau ai tagata o le lalolagi. Ua siʻomia i tatou e le ʻea po o le agaga o le lalolagi, e pei ona siʻomia i tatou e le ʻea o loo tatou mānavaina. Ua taatele i le lalolagi le tausisi o le tagata i lana lava aiā tatau, ma faigatā ona talia faatonuga mai isi. O i latou na o “fanau e lē usiusitaʻi” a Satani.

5. O le ā le uiga leaga na faaalia e nisi tagata Isaraelu?

5 Ua loa ona iai i le fanau a tagata nei uiga ma manatu. I le taimi o Mose, na faitio Koru i ē na iai le pule, aemaise lava Arona ma ona atalii, lea na faia le faiva faaositaulaga. Atonu na vaai Koru i lo latou tulaga lē lelei atoatoa, pe manatu foʻi na faaituʻau Mose ma ave faaeaga i ona tauaiga. Po o le ā lava le māfuaaga, ae leʻi vaai Koru i mea e pei ona silasila i ai Ieova. E leʻi faaaloalo Koru i ē na filifilia e Ieova ina ua ia faapea atu: ʻUa matou fiu iā te oulua, aiseā ua lua faasili ai oulua i le faapotopotoga a Ieova?’ (Nu. 16:3) Na tetee foʻi Tatano ma Apiramo iā Mose ma tuuaʻia o ia i le fia pule. Ina ua talosagaina e Mose sa latou feiloaʻiga, sa la faapea mai, “E ma te lē ō atu!” (Nu. 16:12-14) Na toʻasā Ieova ona o le uiga fouvale na latou faaalia, ma na ia faaumatia ai i latou.—Nu. 16:28-35.

6. Na faaalia faapefea e nisi tane i le uluaʻi senituri se uiga lē lelei, ma aiseā?

6 Na faaalia e nisi tane i le uluaʻi senituri le “lē faaaloalo i alii,” e ala i le faitio i ē na iai le pule i le faapotopotoga. (Iuta 8) Atonu na manatu e tatau ona latou maua ni faaeaga se tele. Na latou taaʻina isi ina ia faitio i tane na tofia e Ieova, e ui na faia e nei tane le mea sili e auauna ai i le faapotopotoga.—Faitau le 3 Ioane 9, 10.

7. O le ā le uiga e tatau ona tatou faaeteete i ai?

7 E lē tatau ona iai lenā uiga leaga i le faapotopotoga, ma e tatau ona tatou faaeteete i le auala e mafaufau ai. E leʻi lelei atoatoa toeaina i tuā i le taimi o Mose ma le aposetolo o Ioane. E faapena foʻi toeaina i aso nei, e iai taimi e latou te faia ai se gaoioiga e tatou te aafia totino ai. A tupu lenā tulaga, e lē tatau ona tatou manatu e pei o tagata o le lalolagi, o le naunau lea ia faia se faaiʻuga i lenā uso. E tatau ona tatou manatua, e iai taimi e filifili ai Ieova e lē amanaʻia masei lāiti a toeaina. Po o le auala lenā o loo tatou manatu ai? E iai taimi e fesolasolataʻi ai se tagata na faia se agasala matuiā mai toeaina, pe afai e iai se mea e lē fiafia ai iā i latou. E tutusa lenā ma le tagata maʻi e lē fia talia le vaifofō o lona maʻi, ona e iai se mea e lē fiafia ai i le fomaʻi.

8. O ā mau e fesoasoani iā i tatou ina ia iai se vaaiga saʻo e faatatau i toeaina?

8 E mafai ona tatou ʻalofia lenā uiga, pe a manatu o loo i le aao taumatau o  Iesu “fetu e fitu.” E faasino atu “fetu” i toeaina faauuina, ae e mafai foʻi ona faasino atu i toeaina i le faapotopotoga. E faatino e Iesu so o se mea e finagalo i ai i “fetu” o loo i lona aao. (Faaa. 1:16, 20) I le avea ai o Iesu ma Ulu o le faapotopotoga, o loo ia silafia mea uma o loo tutupu i le ʻautoeaina. O ona ʻmata ua pei o se afi mumū,’ ma e na te silafia mea uma. Afai ua silafia e Iesu ua manaʻomia e toeaina se faasaʻoga, e na te aumaia i le taimi tatau ma i se auala talafeagai. (Faaa. 1:14) Ae i le taimi nei, e tatau ona tatou faaaloalo i toeaina ua tofiaina e le agaga paia. Na tusi Paulo: “Ia usiusitaʻi i ē o taʻimua iā te outou ma ia gauaʻi iā i latou, auā o loo leoleoina e i latou o outou ola talu ai e tatau ona latou fai atu se tala; ina ia latou faia ma le olioli ae e lē ma le ōi, auā e leaga lea mo outou.”—Epe. 13:17.

9. (i) O le ā le uiga e ono faaalia e se Kerisiano pe a maua faasaʻoga? (ii) O le ā e tatau ona tatou faia pe a maua faasaʻoga?

9 E mafai ona iloa uiga o se tagata i le auala e tali atu ai pe a aumaia e toeaina faasaʻoga, po o le aveesea foʻi o faaeaga i le faapotopotoga. Na avatu e toeaina i se tasi o uso talavou fautuaga e faatatau i le taalo i taaloga vitiō sauā. E leʻi talia e le uso fautuaga ma lē toe ausia ai agavaa faale-Tusi Paia o se auauna o le faiva. (Sala. 11:5; 1 Timo. 3:8-10) Na faailoa atu e le uso i isi o le faapotopotoga lona lē fiafia i le faaiʻuga a  toeaina. Na ia avatu i le ofisa o le lālā ni tusi taufaaleaga e faatatau i toeaina, ma taumafai e taaʻina isi e faia faapea. Afai e tatou te taumafai e taʻutonuina se mea sesē na tatou faia, o le a saveʻu ai le filemu o le faapotopotoga. O lea, pe a tatou maua se faasaʻoga, e tatau ona avea o se avanoa e iloa ai o tatou vaivaiga, ona talia filemu lea o le faasaʻoga.—Faitau le Auega 3:28, 29.

10. (i) O le ā ua tatou aʻoaʻoina mai i le Iakopo 3:16-18? (ii) O le ā e tupu pe a tatou gaoioi e ōgatusa ma le atamai o le Atua?

10 Ua aumaia e le Iakopo 3:16-18 se taʻiala lelei, e faatatau i uiga e tatau, ma uiga e lē tatau ona tatou faaalia i le faapotopotoga. Ua faapea mai: “O le mea o iai le lotoleaga ma le faamisa, e iai foʻi le vevesi ma mea leaga uma. A o le atamai mai i lugā, e muamua ona mamā, e filemu, e magafagafa, e gauaʻigofie, e tumu i le alofa mutimutivale ma fua lelei, e lē faailoga tagata, e lē faatagāfai. Ua lūlūina ma le filemu le fua o le amiotonu, e i latou ua faatupuina le filemu.” O le gaoioi e ōgatusa ma le atamai o le Atua, o le a faalaeiauina ai isi e faaalia uiga lelei i le faapotopotoga, ma maua ai le filemu.

IA FAAALIA LE FAAALOALO

11. (i) E faapefea ona fesoasoani iā i tatou le iai o se vaaiga saʻo? (ii) O le ā e tatou te aʻoaʻoina mai iā Tavita?

11 Ia tatou manatua, o le finagalo o Ieova ua ia faaaogā ai toeaina e ʻleoleoina le faapotopotoga a le Atua.’ (Galu. 20:28; 1 Pete. 5:2) E atamai ona tatou faaaloalo i faatulagaga a Ieova, e tusa po o i tatou o ni toeaina pe leai. O le iai o se vaaiga saʻo o le a tatou lē naunau ai e maua faaeaga ma le tulaga pule. Ina ua masalosalo Saulo o loo taumafai Tavita e faoa lona tulaga tautupu, ona ia ʻlamalama lea o Tavita.’ (1 Samu. 18:9) O lenā manatu sesē, na ia taumafai ai loa e fasiotia Tavita. E lē tatau ona tatou faatāua naʻuā le tulaga pule e pei o Saulo, nai lo o lea, e tatau ona tatou faataʻitaʻi iā Tavita. E ui i faiga lē tonu na fesagaʻia e Tavita, ae na ia faaalia pea le faaaloalo i ē na tofiaina e le Atua.—Faitau le 1 Samuelu 26:23.

12. O le ā e saosaolaumea i le autasi o le faapotopotoga?

12 O le eseese o taofi e ono māfua ai feeseeseaʻiga i le faapotopotoga, e faapea foʻi i le va o toeaina. Ua faalaeiauina i tatou e le Roma 12:10, 16 ina ʻia tausolomua ona faaaloalo le tasi i le isi, ma aua le faafiapopoto.’ Nai lo o le mafaufau e tatou te saʻo i taimi uma, ae lelei ona manatua, e iai taimi e lē tasi se auala saʻo e fai ai se mea. O le taumafai malosi e malamalama lelei i manatu o isi, o le a saosaolaumea ai i le faatumauina o le autasi o le faapotopotoga.—Fili. 4:5.

13. (i) O le ā e tatau ona fai pe a māeʻa ona faaali so tatou manatu i se mataupu? (ii) Ua faapefea ona faataʻitaʻia mai e le Tusi Paia lea manatu?

13 Po o lona uiga e lē mafai ona faaali so tatou taofi, i se vala e tatou te manatu e tatau ona faaleleia i le faapotopotoga? E leai. O se faaaʻoaʻoga, na iai se mataupu na lāgā ai se finauga, i se tasi o faapotopotoga i le uluaʻi senituri. Ona faatulaga lea e uso le malaga atu o “Paulo, Panapa, ma nisi o i latou i le ʻauaposetolo ma toeaina i Ierusalema,” ina ia maua se tali o le mataupu. (Galu. 15:2) Sa eseese uma manatu faaalia o uso e faatatau i lea mataupu. Ae ina ua faia se  faaiʻuga e ala i le fesoasoani a le agaga paia, ona lē toe tāea lea e uso o latou lava manatu. O lea, ina ua maua e faapotopotoga le tali o le mataupu, “ona latou olioli lea i faalaeiauga ua maua mai ai,” ma ʻfaamalosia ai lo latou faatuatua.’ (Galu. 15:31; 16:4, 5) O lea, pe a māeʻa ona faailoa atu i toeaina se mataupu o loo e atugalu ai, ona tatou maufaatuatuaina lea o le auala o le a latou taulimaina ai le mataupu.

IA IAI SE VAAIGA SAʻO I LE FAIĀ MA ISI

14. E faapefea ona tatou faaalia atu uiga lelei i isi?

14 E tele auala e mafai ona tatou faaali atu ai uiga lelei i isi. O se faataʻitaʻiga, pe a faatigā mai se isi iā i tatou, ia vave ona faamagalo atu. Ua faapea mai le Tusi Paia: “Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi. E pei ona finagalo malie Ieova e faamagalo iā te outou, ia faapea foʻi ona outou faia.” (Kolo. 3:13) E atagia mai i le faaupuga “afai e faia e se tasi se mea e tigā ai le isi,” e iai taimi e ono iai māfuaaga tatau e tatou te feeseeseaʻi ai ma isi. Peitaʻi, e lē tatau ona tatou soona faamamafa masei lāiti o o tatou uso, auā e saveʻu ai le filemu o le faapotopotoga. Nai lo o lea, ia faataʻitaʻi iā Ieova i le faamagalo atu i o tatou uso, ma faaauau pea ona auauna faatasi ma i latou.

15. (i) O le ā e tatou te aʻoaʻoina mai le lotofaamagalo o Iopu? (ii) E faapefea ona fesoasoani le tatalo iā i tatou e faaalia atu uiga lelei?

15 E tatou te aʻoaʻoina se lesona mai le auala na faaalia ai e Iopu le lotofaamagalo. Na tatau i uō e toʻatolu a Iopu ona faamāfanafanaina o ia, peitaʻi, na o latou faatigā iā te ia. E ui i lea, sa faamagaloina e Iopu i latou. O le ā na fesoasoani iā te ia e faia faapea? E ala i ʻle tatalo mo ana aumea.’ (Iopu 16:2; 42:10) O le tatalo mo isi, o le a suia ai le auala e tatou te vaai ai iā i latou. E faigofie ona iai ni o tatou lagona alofa e pei o Iesu i o tatou uso ma tuafāfine, pe a tatou tatalo mo i latou. (Ioa. 13:34, 35) E tatau foʻi ona tatou tatalo mo le agaga paia, auā e fesoasoani lenā iā i tatou e faaalia atu ai uiga faa-Kerisiano i isi.—Luka 11:13; faitau le Kalatia 5:22, 23.

AGAGA LELEI I LE FAAPOTOPOTOGA

16, 17. O le ā le agaga e tatau ona tatou faaalia?

16 E maua e le faapotopotoga aogā, pe a tatou galulue malolosi e atiaʻe uiga lelei. Ua fesoasoani lenei mataupu e faaleleia ai le auala e tatou te faaalia ai uiga lelei, ma faalaeiauina ai isi. E fesoasoani le Tusi Paia iā i tatou e faia faapea. (Epe. 4:12) Na naunau Paulo e avea o ia ma faaaʻoaʻoga lelei i le faapotopotoga, ina ua ia faapea mai: “Ou te lē iloa se mea ou te sesē ai. Ae e lē faamaonia ai i lenei mea laʻu amiotonu, a o Ieova e na te faamasinoina aʻu.”—1 Kori. 4:4.

17 Ia faalaeiau isi ina ia saosaolaumea i le agaga lelei o le faapotopotoga. E mafai ona faia faapea e ala i le faataʻitaʻi i uiga o le Atua, lotomalie i faaeaga ua tatou maua, ma lē soona faatāua i tatou lava. O le iai o se vaaiga saʻo i isi ma vave ona faamagalo atu, o le a maua ai le nofo lelei i le faapotopotoga. (Fili. 4:8) A tatou faia nei mea uma, o le a faafiafiaina ai Ieova ma Iesu, ʻi le agaga o loo tatou faaalia.’—File. 25.

[Fesili mo le Suʻesuʻega]

[Ata i le itulau 14]

E faapefea i le manatunatu i le tiutefai a Iesu, ona aafia ai le auala e tatou te tali atu ai i faasaʻoga?