O le Tusi Lona Lua iā Timoteo 4:1-22
4 Ou te matuā fai atu iā te oe i luma o le Atua ma Keriso Iesu, o lē e faamasino+ i ē e ola ma ē ua oti,+ pe a faaali mai o ia+ ma pe a pule i lona Malo:+
2 Ia talaʻi atu le upu;+ ia faia ma le faanatinati i taimi e sologa lelei ai ma taimi e lē sologa lelei ai; ia aʻoaʻi atu,+ ia matuā faatonu atu, ia apoapoaʻi atu ma le onosaʻi ma le tomai e aʻoaʻo atu.+
3 Auā e iai le taimi e latou te lē toe taliaina ai aʻoaʻoga aogā,*+ ae e tusa ai ma o latou lava tuʻinanauga, e latou te faapotopotoina aʻoaʻo mo i latou ina ia faalogo o latou taliga i mea e logolelei iā i latou lava.+
4 E liliuese foʻi i latou mai i le faalogo atu i le upu moni ma uaʻi atu i tala sesē.
5 A o oe, ia faaauau ona e mafaufau lelei i mea uma, ia onosaʻi i faigatā,+ ia fai le galuega a le faievagelia,* ia faia ma le māeʻaeʻa lau faiva.+
6 Auā ua liligiina atu aʻu e pei o se taulaga i meainu,+ ma ua lata le taimi e faasaʻolotoina ai aʻu.+
7 Ua ou tau le taua lelei,+ ua ou faaiʻuina le tamoʻega,+ ua ou tausia le faatuatua.
8 E amata atu nei, ua teuina mo aʻu le pale o le amiotonu,+ lea e tuuina mai iā te aʻu o se taui i lenā aso+ e le Alii o le faamasino amiotonu,+ e lē na o aʻu, ae faapea foʻi i latou uma o naunau i lona faaali mai.
9 Ia e taumafai malosi e te vave sau iā te aʻu.
10 Auā ua tuulafoaʻiina aʻu e Tema+ ona o le naunau tele i lenei faiga o mea a le lalolagi,* ma ua alu atu o ia i Tesalonia, ua alu atu Kerese i Kalatia, ae alu atu Tito i Talamatia.
11 Ua na o Luka o loo ma faatasi. Ia oulua ō mai ma Mareko, auā e aogā o ia iā te aʻu i le faiva.
12 Ae ua ou auina atu Tuiko+ i Efeso.
13 Pe a e sau, ia aumai le ofu tele na ou tuua i Teroa iā Kaapo, ma tusi tāʻai, aemaise lava paʻu e tusitusi ai.*
14 Na matuā agaleaga Alesana le tagata fai mea ʻapamemea iā te aʻu. E toe taui atu e Ieova* iā te ia e tusa ma ana gaoioiga.+
15 Ia e faaeteete foʻi iā te ia, auā na ia matuā tetee mai lava i la matou feʻau.
16 I laʻu uluaʻi tali atu i le faamasinoga, e leai se tasi na ʻau mai iā te aʻu, ae na latou tuulafoaʻiina aʻu; tau ina ia lē faasalaina i latou e tusa ma lenei mea.
17 Peitaʻi, na latalata mai le Alii ma foaʻi mai le mana iā te aʻu, ina ia faia ma le māeʻaeʻa le talaʻiga e ala iā te aʻu ma ia faalogo ai nuu uma;+ ma na laveaʻiina aʻu mai i le gutu o le leona.+
18 E laveaʻiina aʻu e le Alii mai i galuega leaga uma ma e na te faaolaina aʻu mo lona Malo i le lagi.+ Ia iā te ia le mamalu e faavavau, faavavau lava. Amene.
19 Ia momoli atu oʻu alofaaga iā Piseka* ma Akula,+ ma le aiga o Oneseforo.+
20 Na nofo Erato+ i Korinito, ae na ou tuua Tofimo+ a o maʻi o ia i Meleto.
21 Ia e taumafai malosi e taunuu mai a o leʻi oo i le tau mālūlū.
O loo momoli atu alofaaga o Eupolo, atoa foʻi ma Paute, ma Lino, ma Kalaotia, ma le ʻauuso uma.
22 Ia iai le Alii i le agaga ua e faaalia. Ia iā te outou foʻi lona agalelei faifua.
Faamatalaga Pito i Lalo
^ Po o “a‘oa‘oga e malosi ai; a‘oa‘oga e mālōlōina ai.”
^ Po o le “ia faaauau ona talaʻi le tala lelei.”
^ Tagaʻi i le Uiga o Upu.
^ E faasino atu i tusi tāʻai e faia mai i paʻu o manu.
^ E igoa foʻi iā Pisila.
