O le Tusi Muamua o Samuelu 18:1-30
18 Ina ua uma ona tautala atu Tavita iā Saulo, ona pipiimau lea o le loto o Ionatana+ i le loto o Tavita, ua alofa foʻi Ionatana iā te ia e pei o ia lava.+
2 Ua ave o ia e Saulo i lenā aso, ua lē mafai foʻi ona ia toe foʻi atu i le aiga o lona tamā.+
3 Ua osia e Ionatana ma Tavita se feagaiga,+ auā ua ia alofa iā te ia e pei o ia lava.+
4 Ua tatala ese foʻi e Ionatana lona ofu talaloa ma foaʻi atu iā Tavita, atoa foʻi ma lona ofutau, o lana pelu, o lana ʻaufana, ma lona fusipaʻu.
5 Ua alu atu Tavita e tau, ma ua taulau manuia*+ i mea uma na auina i ai o ia e Saulo. Ona tofia lea o ia e Saulo e pule i tagata o le taua;+ ua lelei foʻi lea i le nuu uma atoa ai ma auauna a Saulo.
6 Ina ua toe foʻi mai Tavita ma isi mai i le fasiga o Filisitia, ona ō mai lea o fafine mai i aai uma o Isaraelu, ua pepese+ ma sisiva e faafeiloaʻi ai le tupu o Saulo. Ua latou olioli ma tāina topa+ ma napeli,*
7 ma pepese e faapea:
“Ua fasia e Saulo le faitau afe,A o Tavita e faitau sefulu afe.”+
8 Ua matuā ita+ lava Saulo, ma ua leaga iā te ia lenā pese, auā ua ia faapea ifo: “Ua latou viiviia Tavita i le faitau sefulu afe, ae ua latou viiviia aʻu i le faitau afe, ua toe lava o le tofi o le tupu e leʻi tuuina atu iā te ia!”+
9 Na amata mai i lenā lava aso ona lamalama pea e Saulo Tavita.
10 I le aso na sosoo ai, na oo ai iā Saulo le agaga leaga* mai i le Atua,+ ma ua amioaʻi foʻi o ia i se auala e lē masani ai* i totonu o le maota, a o tā e Tavita le kitara+ e pei o isi taimi. Na iai foʻi le tao i le lima o Saulo,+
11 ma ua ia velo atu le tao+ ma faapea ifo: ‘Ou te tutu‘iina Tavita ia mau i le puipui!’ Ae na faalua ona sola ese Tavita mai i ona luma.
12 Ua fefe Saulo iā Tavita auā ua faatasi Ieova ma Tavita,+ ae ua alu ese mai iā Saulo.+
13 Ona aveesea lea e Saulo o ia mai i le auauna i ona luma, ma tofia o ia o se taʻitaʻiʻau o le to‘aafe; ua ia taʻitaʻia foʻi le nuu i le taua.*+
14 Ua faaauau ona taulau manuia* Tavita i mea uma,+ ma na faatasi foʻi Ieova ma ia.+
15 Ina ua iloa e Saulo ua matuā taulau manuia Tavita, ona fefe ai lea o ia iā te ia.
16 Ua alolofa uma Isaraelu ma Iuta iā Tavita, auā ua ia taʻitaʻia i latou i le taua.
17 Mulimuli ane, ua fai mai Saulo iā Tavita: “O loʻu afafine matua lenei o Merapa.+ Ou te avatua o ia e fai ma au avā.+ Tau ina ia e auauna mai pea ma le lototele iā te a‘u ma tauina taua a Ieova.”+ Ae ua faapea ifo Saulo iā te ia lava: ‘Aua neʻi oo loʻu lima iā te ia, ae ia oo i ai lima o Filisitia.’+
18 Ua fai atu Tavita iā Saulo: “O ai ea aʻu, o ai foʻi loʻu aiga ma le aiga o loʻu tamā i Isaraelu, e fai ai aʻu ma tane a le afafine o le tupu?”+
19 Peitaʻi, e oo ane i le taimi e avatu ai Merapa le afafine o Saulo iā Tavita, ae ua uma ona avatu o ia iā Atarielu+ le tagata Meola e fai ma ana avā.
20 A o Mekala le afafine o Saulo,+ ua ulu lona alofa iā Tavita, ona taʻu atu lea iā Saulo ma ua fiafia i ai o ia.
21 Ona faapea ifo lea o Saulo: ‘Ou te avatua o ia e fai ma mailei iā te ia, ina ia oo ai lima o Filisitia iā te ia.’+ Ua toe fai mai Saulo iā Tavita mo le taimi lona lua: “O le a e osia lava se aiga ma aʻu* i le asō.”
22 Ua poloaʻi atu foʻi Saulo i ana auauna: “Ia tautatala faalilolilo atu iā Tavita e faapea, ‘Faauta! Ua fiafia le tupu iā te oe, ua alolofa foʻi ana auauna uma iā te oe. O lenei, ia e faaipoipo i le afafine o le tupu.’”
23 Ina ua fai atu e auauna a Saulo nei upu iā Tavita, ona fai mai lea o Tavita: “Po o se mea faigofie ea iā te outou le faaipoipo atu i le afafine o le tupu, auā o aʻu nei o le tagata mativa ma faatauvaa?”+
24 Ua taʻu atu e auauna a Saulo iā te ia e faapea: “O upu nei na fai mai ai Tavita.”
25 Ua fai mai Saulo: “Ia faapea ona outou fai atu iā Tavita, ‘E manaʻo le tupu i paʻu*+ e 100 o tino o Filisitia ina ia taui atu ai i fili o le tupu, ae e lē manaʻo i tupe e totogi ai le faaipoipoga.’”+ Peitaʻi, na faufau Saulo ia oti ai Tavita i lima o Filisitia.
26 Ua taʻu mai e ana auauna o nei upu iā Tavita, ma ua fiafia ai Tavita e faaipoipo atu i le afafine o le tupu.+ A o leʻi oo i le taimi atofaina,
27 ona ō atu lea o Tavita ma ona tagata ma fasia tagata Filisitia e toʻa 200, ua aumaia foʻi e Tavita paʻu o o latou tino ma avatu le aofaʻi atoa i le tupu, ina ia faaipoipo ai o ia i le afafine o le tupu. Ona avatu lea e Saulo iā te ia o Mekala lona afafine e fai ma ana avā.+
28 Ua iloa e Saulo o loo faatasi Ieova iā Tavita,+ ma ua alofa foʻi lona afafine o Mekala iā Tavita.+
29 Ona atili fefe ai lea o Saulo ona o Tavita, ua avea foʻi Tavita ma fili o Saulo i lona olaga atoa.+
30 Ua ō atu ta‘ita‘i o Filisitia e tau, ae ua sili atu ona taulau manuia* Tavita i auauna uma a Saulo+ i taimi uma e ō ai e tau; ua matuā faatāuaina foʻi lona igoa.+
Faamatalaga Pito i Lalo
^ Po o le “ua gaoioi ma le atamai.”
^ O se meafaifaaili e tolu manoa i aso anamua e pei o se kitara. O le upu Peretania, o le lute.
^ Po o le “amioaʻi e pei o se perofeta.”
^ Epe., “ua alu atu o ia ma toe sau i luma o le nuu.”
^ Po o le “gaoioi ma le atamai.”
^ Po o “O le a avea oe ma tane a loʻu afafine.”
^ E faasino atu i le paʻu o totogasā o tamāloloa.
^ Po o le “gaoioi ma le atamai.”
