E Mafai Ona Faaleleia Lau Faaipoipoga

“Ou te fai atu i ē ua faaipoipo, e lē o aʻu a o le Alii.”—1 KORI. 7:10.

PE E MAFAI ONA E FAAMATALA?

Aiseā e mafai ai ona tatou faapea atu, ua faatasia e le Atua ulugalii faaipoipo?

E mafai faapefea ona fesoasoani toeaina i Kerisiano o loo iai faafitauli i a latou faaipoipoga?

O le ā lo tatou manatu e tatau ona iai e faatatau i faaipoipoga?

1. O le ā le manatu o Kerisiano i faaipoipoga, ma aiseā?

I LE taimi e faaipoipo ai Kerisiano, e latou te faia ai se tautoga i le Atua—o se tiute tauave e lē tatau ona manatu māmā i ai. (Fai. 5:4-6) Ona o Ieova o Lē na faavaeina faaipoipoga, e mafai la ona faapea atu, e na te “faatasia” i latou ua faaipoipo. (Mare. 10:9) E iai taimi e eseese ai aiāiga faaletulafono a nisi atunuu, ma tulafono a le Tusi Paia i mataupu tau faaipoipoga. Peitaʻi, e tatau ona manatu auauna a Ieova i lea mataupu e pei ona silasila i ai Ieova. E tatau i auauna a Ieova ona manatu i le faaipoipoga o se faatasiga tumau, e tusa lava pe sa maua le upu moni i le taimi na faaipoipo ai pe leai.

2. O ā fesili o le a iloiloina i lenei mataupu?

² E mafai ona maua le olioli tele mai i se faaipoipoga e taulau manuia. Ae o le ā e mafai ona fai pe a faapea ua iai faafitauli i le fusi o le faaipoipoga? Pe e mafai ona faamalosia se faaipoipoga ua amata ona lē māfana? O le ā le fesoasoani e mafai ona maua mo ē ua lamatia a latou faaipoipoga?

PO O LE A AVEA O SE FAAIPOIPOGA FIAFIA PE E LEAI?

3, 4. O le ā e ono tupu pe a lē filifilia ma le atamai se paaga faaipoipo?

³ O se fiafiaga pe a taulau manuia le faaipoipoga a se Kerisiano, ma e faamamaluina ai Ieova. Ae a lē taulau, e na o faalogona tigā e oo iai. E mafai e se Kerisiano o loo mafaufau e faaipoipo, ona maua se faaipoipoga fiafia pe afai e mulimuli i le taʻitaʻiga a le Atua. Ae i le isi itu, e mafai ona oo atu i se olaga e lē lotomalie ma faanoanoa ai, pe a lē atamai le filifiliaina o se paaga faaipoipo. O se faataʻitaʻiga, e amata ona faia ni faauōga a ni talavou, ae e leʻi nofosauni mo tiute tauave e aofia ai i le olaga faaipoipo. O nisi o tagata e latou te maua ni paaga i le Initaneti ma vave faaipoipo ai, ma iʻu atu i ni faaipoipoga lē fiafia. Ae o isi e filifili pea e faaipoipo  e ui lava sa faia se agasala matuiā tau feusuaʻiga a o feoaʻi, ma atonu o le a itiiti le faaaloalo e faaalia e le tasi i le isi, a o amata o la olaga o se ulugalii faaipoipo.

⁴ E iai nisi Kerisiano e lē faaipoipo “tau lava o lē ua i le Alii,” ma tofo ai i iʻuga faanoanoa o se aiga e eseese tapuaʻiga. (1 Kori. 7:39) Pe afai o lou tulaga lenā, ia tatalo atu i le Atua mo le faamagaloga ma le fesoasoani. Nai lo o le aveesea o aafiaga o mea sesē sa faia e se tasi i le taimi ua teʻa, ae e fesoasoani Ieova i ē ua salamō ina ia feagai ma tulaga faigatā. (Sala. 130:1-4) Ia faia au taumafaiga uma e faafiafia ai o Ia i le taimi nei seʻia oo i le faavavau, ona avea ai lea ʻo le olioli mai iā Ieova, ma ou malosi.’—Nee. 8:10.

PE A IAI I SE TULAGA LAMATIA LE FAAIPOIPOGA

5. O ā ituaiga o mafaufauga e tatau ona ʻalofia, pe afai e lē o toe māfana se faaipoipoga?

⁵ E ono taumānatu i latou ua oo iai le lototigā ona o a latou faaipoipoga e faapea: ʻPe e aogā ea loʻu taumafai e faatumauina laʻu faaipoipoga e lē o toe māfana? Manaia pe ana mafai ona toe foʻi i le tulaga o mea sa iai i le taimi muamua, ma toe suia se isi aʻu paaga faaipoipo!’ Atonu e latou te moemiti i le faamutaina o le fusi o le faaipoipoga—ʻMaʻimau e pe ana ou lē faaipoipo! Aiseā e lē tatala ai loa le faaipoipoga? E tusa lava pe e lē mafai ona faia se talagā faaipoipoga e aunoa ma se māfuaaga faale-Tusi Paia, ae aiseā e lē nonofo eseese ai ma fai le mea e fiafia i ai le tagata ia?’ Nai lo o le mafaufau i na mea, po o le moemiti foʻi i le olaga na semanū e ono oo iai, e tatau i Kerisiano ona faia taumafaiga uma ina ia fiafia ai i o latou tulaga ua iai, e ala i le saʻilia o le taʻitaʻiga a le Atua ma mulimuli i ai.

6. Ia faamatala le fetalaiga a Iesu e pei ona faamauina i le Mataio 19:9.

⁶ Pe a filifili se Kerisiano e tatala lana faaipoipoga, e ono mafai pe lē mafai foʻi ona iai se faatagaga faale-Tusi Paia e toe faaipoipo ai. Na fetalai Iesu: “Ai se tasi e faateʻa i lana avā ae e leʻi faitaaga lana avā, ma toe faaipoipo i se isi fafine, ua mulilua o ia.” (Mata. 19:9) O le “faitaaga” lea o loo taʻua i inei, e aofia ai le mulilua ma isi agasala matuiā tau feusuaʻiga. Pe afai e leʻi faia e se tasi o le paaga se amioga lē mamā tau feusuaʻiga, e tāua tele ona toe iloilo le faafitauli ma tatalo, pe e talafeagai pea ona tatalaina le faaipoipoga.

7. O le ā atonu e manatu i ai isi tagata pe a tatala le faaipoipoga a se Kerisiano?

⁷ O se faaipoipoga ua tatala, e ono fesiligia ai le tulaga faaleagaga o se tasi. Na lāgā e le aposetolo o Paulo lenei fesili tāua: “Afai e lē iloa e se tane ona pule i lona lava aiga, e faapefea la ona ia tausia le faapotopotoga a le Atua?” (1 Timo. 3:5) O le mea moni, pe afai e faapea mai se ulugalii faaipoipo o i laʻua o ni Kerisiano, ae ua tatala le la faaipoipoga, atonu o le a manatu isi  tagata e la te lē o faia mea o loo la talaʻia.—Roma 2:21-24.

8. Pe afai ua filifili se ulugalii Kerisiano e nonofo eseese pe tatala le la faaipoipoga, atonu o le ā le faafitauli ua faailoa mai ai?

⁸ Pe afai ua filifili se ulugalii faaipoipo ua uma ona papatiso e nonofo eseese pe tatala le la faaipoipoga ona o māfuaaga e lē faale-Tusi Paia, ua faailoa mai ai e lē o iai i se tulaga lelei o la itu faaleagaga. E foliga mai e lē o faatatauina e se tasi o le paaga mataupu silisili o le Tusi Paia, pe atonu foʻi e lē o faatatauina uma e le ulugalii faaipoipo. Pe ana faapea e la te ʻfaatuatua moni iā Ieova ma o la lotoatoa,’ e leai la se māfuaaga o le a tatala ai le la faaipoipoga.—Faitau le Faataoto 3:5, 6.

9. Ua faapefea ona tauia nisi o Kerisiano, ona o a latou taumafaiga maumauaʻi ina ia faatumauina le faaipoipoga?

⁹ O le tele o faaipoipoga na foliga mai e lē taulau manuia, ae na mulimuli ane toe sologa lelei. E masani lava ona lelei iʻuga e maua e ulugalii Kerisiano, o ē e lē mananaʻo e vave tuua a latou paaga ona ua iai faafitauli i le faaipoipoga. Seʻi mātau le mea e mafai ona tupu i se ulugalii faaipoipo e eseese tapuaʻiga. Na tusi le aposetolo o Peteru: “[O] outou avā, ia gauaʻi atu i a outou lava tane, ma afai e lē usiusitaʻi nisi i le upu, e mafai ona maua i latou i le amiolelei a a latou avā e aunoa ma se upu, auā ua latou vāaitino i a outou amioga mamā ma le matuā faaaloalo.” (1 Pete. 3:1, 2) Ioe, e ono taliaina e le paaga lē talitonu le upu moni, ona o amioga lelei a le paaga talitonu! E mafai e lenā faaipoipoga ona faamamaluina ai le Atua, ma aumaia ai le tele o faamanuiaga mo sui taʻitoʻatasi o le aiga.

10, 11. O ā faafitauli e leʻi faatalitalia e ono tutupu mai i totonu o se faaipoipoga, ae o le ā le tulaga e mafai ona mautinoa e se Kerisiano?

¹⁰ Ina ia faafiafia le finagalo o Ieova, ua filifili le toʻatele o Kerisiano nofofua e faaipoipo atu i isi foʻi auauna tuuina atu a Ieova. Peitaʻi, e tusa po o le tulaga lenā, ae e iai lava mea e leʻi faatalitalia e ono tutupu. O se faaaʻoaʻoga, i nisi taimi, atonu o le a feagai se tasi o le ulugalii faaipoipo ma sona lava faafitauli matuiā tau faalogona. Pe atonu foʻi a o faagasolo le olaga talu ona faaipoipo, ae amata ona lē toe talaʻi se tasi o le paaga. Ina ia faataʻitaʻi: Sa lē mafai e Linda * o se Kerisiano maelega, ma o se tinā faamaoni, ona fesoasoani atu i lana tane, o sē ua uma ona papatiso ae na ia faia ma le loto iai ni gaoioiga e lē ōgatusa ma le Tusi Paia. O le iʻuga, na faateʻaina o ia. O le ā le mea e tatau ona faia e se Kerisiano, pe afai ua foliga mai ua lē mafai lava ona toe faaleleia lana faaipoipoga ona o ni māfuaaga faapena?

¹¹ E te ono fesili e faapea, ʻPe e tatau ona ou taumafai pea e faatumauina laʻu faaipoipoga, e tusa lava po o le ā e tupu?’ E lē mafai ma e lē tatau i se tasi ona faia lenā filifiliga mo oe. Peitaʻi, e iai māfuaaga aogā e lē tatau ai ona tuua se faaipoipoga ua lē o toe māfana. E tautele i le silafaga a le Atua se Kerisiano faamaoni, o sē e onosaia faigatā o se faaipoipoga e iai faafitauli, ona o lona lotofuatiaifo. (Faitau le 1 Peteru 2:19, 20.) E ala mai i lana Afioga ma lona agaga, o le a fesoasoani Ieova i se Kerisiano o loo faia taumafaiga maumauaʻi, ina ia toe faaleleia lana faaipoipoga.

UA LATOU NOFOSAUNI E FESOASOANI ATU

12. O le ā le manatu o toeaina iā i tatou pe a tatou saʻilia la latou fesoasoani?

¹² Pe afai o loo iai ni faafitauli i lau faaipoipoga, aua e te faatalatū e saʻilia le fesoasoani  faaleagaga a toeaina Kerisiano taʻumatuaina. Ua avea toeaina ma leoleo i le lafu, ma e latou te fiafia e faauaʻi oe i le fautuaga mai i le Tusi Paia. (Galu. 20:28; Iako. 5:14, 15) Aua neʻi oulua manatu ma lau paaga e faapea, o le a manatu faatauvaa toeaina iā te oulua pe a saʻilia la latou fesoasoani faaleagaga, ma talanoaina ma i latou se faafitauli matuiā tau faaipoipoga. O le a atili ona latou manatu mamafa iā te oe, pe a latou mātauina lou naunau moni e faafiafia le finagalo o le Atua.

13. O le ā le fautuaga o loo taʻua i le 1 Korinito 7:10-16?

¹³ Pe a talosagaina toeaina ina ia fesoasoani i Kerisiano e lē talitonu a latou paaga faaipoipo, e mafai ona latou faaaogāina le fautuaga e pei ona faamatalaina e Paulo, o lē na tusi: “Ou te fai atu i ē ua faaipoipo, e lē o aʻu a o le Alii, e lē tatau i se avā ona tuua lana tane; ae afai e tuua e ia lana tane, ia nofofua pea o ia pe toe faalelei ma lana tane, ma e lē tatau i le tane ona tuua lana avā. . . . O oe le avā, e te lē iloa ea e mafai ona faaolaina lau tane ona o oe? O oe le tane, e te lē iloa ea e mafai ona faaolaina lau avā ona o oe?” (1 Kori. 7:10-16) O se matuā faamanuiaga lava, pe a liliu i le tapuaʻiga moni se paaga e lē talitonu!

14, 15. Atonu o le ā le taimi e mafaufau ai se Kerisiano e tuua lana paaga, ae aiseā e tāua ai le tatalo ma manatunatu loloto?

¹⁴ O ā tulaga e ono “tuua” ai e se avā Kerisiano lana tane? Ua filifili nisi avā e faia faapea, ona ua musu le tane e tausia le aiga. Ae ua faia faapea e isi avā Kerisiano, ona ua matuā sauāina lava i latou, pe ua matuā lamatia foʻi lo latou tulaga faaleagaga.

¹⁵ O le filifiliga a le tagata lava ia le tuua o lana paaga pe leai. Peitaʻi, e tatau i le paaga ua uma ona papatiso, ona mafaufau loloto ma tatalo e faatatau i lea mataupu. O se faataʻitaʻiga, pe e na o le paaga lē talitonu e tuuaʻia mo le lamatia o le tulaga faaleagaga o le paaga talitonu, pe e māfua ona ua faatalalē le paaga talitonu i le faia o ana lava suʻesuʻega o le Tusi Paia, seāseā ona auai i sauniga, faapea le talaʻiga?

16. O le ā e tatau ona taofia ai Kerisiano mai i le vave faia o se faaiʻuga, ina ia tatala se faaipoipoga?

¹⁶ O le mea moni, o lo tatou faatāuaina o la tatou faiā ma le Atua, ma lotofaafetai mo lana meaalofa o le faaipoipoga, e tatau ona taofia ai i tatou mai i le vave faia o se faaiʻuga ina ia tatala se faaipoipoga. I le avea ma auauna a Ieova, e tatou te naunau ai ina ia faapaiaina lona suafa paia. O lea la, e mautinoa lo tatou lē mananaʻo e faia se faufauga leaga, o le tuua lea o le paaga o loo iai, ona o le manaʻonaʻo i se isi paaga faaipoipo.—Iere. 17:9; Mala. 2:13-16.

17. Aiseā e mafai ai ona faapea atu, ua valaauina e le Atua Kerisiano ua faaipoipo ina ia filemu?

¹⁷ E tatau ona taumafai malosi se Kerisiano ua faaipoipo i se tagata lē talitonu, e faatumauina pea le fusi o le faaipoipoga. Peitaʻi, e lē tatau i se Kerisiano ona iai lagona nofosala, pe afai  ua loto lana paaga lē talitonu e tuua o ia, e ui lava i ana taumafaiga malosi e faatumauina le la faaipoipoga. Na tusi Paulo: “Afai e alu ese lē e lē talitonu, ia alu ese pea o ia, e lē faapologaina se uso po o se tuafafine i tulaga faapena, a ua valaauina outou e le Atua ina ia filemu.”—1 Kori. 7:15. *

IA FAAMOEMOE IĀ IEOVA

18. E tusa lava pe e lē mafai ona faatumauina se faaipoipoga, ae o ā iʻuga lelei e ono maua mai ai ona o taumafaiga sa fai?

¹⁸ Pe a feagai ma so o se faafitauli tau faaipoipoga, ia talosaga atu iā Ieova mo le lototele, ma ia faamoemoe atu pea iā te ia. (Faitau le Salamo 27:14.) Seʻi toe mafaufau iā Linda lea na taʻua muamua. Na iʻu lava ina tatala lana faaipoipoga, e ui i le tele o tausaga sa ia taumafai ai e faatumauina. Pe sa ia manatu ai ua leai se aogā o ana taumafaiga? Ua ia faapea mai: “E leai. O aʻu taumafaiga na avatu ai se molimau lelei i isi tagata. Ua ou maua se lotofuatiaifo mamā. Ae o le iʻuga e sili ona lelei, i na tausaga e tele na fesoasoani ai i la ma tama teine e tumau mausalī ai i le upu moni. Na ola aʻe o ia ma avea ma Molimau a Ieova maelega, ma faamaoni.”

19. O le ā e ono tupu pe a faia taumafaiga ina ia faatumauina se faaipoipoga?

¹⁹ Ua fiafia Marilyn o se tuafafine Kerisiano, talu ai sa ia faatuatua i le Atua, ma faia taumafaiga uma ina ia faatumauina lana faaipoipoga. Ua ia faapea mai: “Sa ou mafaufau lava e tuua laʻu tane, ona ua ia lē tausia lo ma aiga ma lamatia ai loʻu tulaga faaleagaga. Sa avea laʻu tane o se toeaina a o leʻi aafia i mataupu tau pisinisi e lē talafeagai. Na amata ona ia misia sauniga, ma iʻu ina lē toe lelei le auala e ma te talanoa ai. O loʻu fefe tele ona o se osofaʻiga a tagata faatupu faalavelave i lo matou aai, na ou lē toe faaalia ai lava ni uiga faaleuō. O le taimi lenā na faatoʻā ou iloa ai, o aʻu foʻi lea sa sesē. Na amata ona toe lelei a ma talanoaga, toe amata le ma suʻesuʻega o se aiga, ma toe auai e lē aunoa i sauniga. Sa agalelei toeaina, ma sa tele la latou fesoasoani iā i maʻua. Na toe faafouina ma fiafia le ma faaipoipoga. Mulimuli ane, na toe agavaa laʻu tane e maua faaeaga i totonu o le faapotopotoga. E ui lava sa matuā faigatā le tulaga o mea sa iai, ae na maua mai ai ni iʻuga lelei.”

20, 21. E tusa ai o le faaipoipoga, o le ā le mea ua tatou filifili e fai?

²⁰ E tusa lava pe e tatou te nofofua po ua faaipoipo foʻi, seʻi o tatou gaoioi pea ma le lototele, ma faamoemoe iā Ieova. Pe afai o loo tatou feagai ma faafitauli tau faaipoipoga, e tatau ona tatou faia taumafaiga uma ina ia foʻia ai, ma manatua o ē ua faatasia i le faaipoipoga, ʻua lē o toe toʻalua, ae ua avea ma tino e tasi.’ (Mata. 19:6) Seʻi o tatou manatua foʻi, pe afai e tatou te onosaia faigatā i totonu o se faaipoipoga e eseese tapuaʻiga, atonu o le a tatou tofo i le olioli pe a liliu i le tapuaʻiga moni se paaga lē talitonu.

²¹ Po o ā lava o tatou tulaga, tau ina ia tatou filifili e gaoioi ma le faautauta ina ia avatu ai se molimau lelei i ē e lē talitonu. Pe afai ua iai i se tulaga lamatia le faaipoipoga, e tatau ona tatou tatalo faatauanau, iloilo totoʻa o tatou faanaunauga, manatunatu loloto i manatu o le Tusi Paia, ma saʻili atu i le fesoasoani faaleagaga a toeaina. E sili atu i lenā, tau ina ia tatou maumauaʻi e faafiafia Ieova le Atua i vala uma o le olaga, ma faaalia le talisapaia moni mo lana meaalofa matagofie o le faaipoipoga.

[Faaopoopoga i lalo]

[Fesili mo le Suʻesuʻega]

[Faamatalaga faaopoopo i le itulau 10]

E masani lava ona lelei iʻuga e maua e Kerisiano, o ē e lē mananaʻo e vave tuua a latou paaga ona ua iai faafitauli i le faaipoipoga

[Faamatalaga faaopoopo i le itulau 12]

Ia faamoemoe atu pea iā Ieova, ma talosaga atu iā te ia mo le lototele

[Ata i le itulau 9]

E faamanuia e Ieova ulugalii faaipoipo Kerisiano o ē faia taumafaiga, ina ia toe faaleleia se faaipoipoga ua iai faafitauli

[Ata i le itulau 11]

E mafai ona maua mai faamāfanafanaga ma le fesoasoani faaleagaga, mai i le faapotopotoga Kerisiano