Skip to content

Skip to table of contents

Fesili Mai le ‘Aufaitau

Fesili Mai le ‘Aufaitau

 Fesili Mai le ʻAufaitau

E faapefea ona “tautele i le silafaga a Ieova” le maliliu o ona tagata faamaoni?

▪ Na pese se faisalamo: “E tautele i le silafaga a Ieova le oti o ona tagata faamaoni.” (Sala. 116:15) E tautele i le silafaga a Ieova soifua o ana auauna faamaoni uma. E ui i lea, e lē o faasino atu upu o le Salamo 116 i le maliu o se tagata se toʻatasi.

Pe a faia se lauga o le maliu o se Kerisiano, e lē mafai ona faatatau atu le Salamo 116:15 i lē ua maliu, e ui lava na maliu lenā auauna a Ieova a o faamaoni pea. Aiseā? Ona e iai se isi mea e sili atu o loo faatatau i ai upu a le faisalamo, nai lo le faasino atu i le maliu o se tagata se toʻatasi. E faauiga atu i le lē faatagaina e le Atua o le maliliu o ana auauna faamaoni uma, ona e tautele i latou i lana silafaga.—Tagaʻi i le Salamo 72:14; 116:8.

Ua faamautinoa mai e le Salamo 116:15 iā i tatou, o le a lē faatagaina e Ieova le faaumatiaina atoatoa o ana auauna faamaoni uma i le lalolagi. O le mea moni, i le talafaasolopito o Molimau a Ieova i aso nei, ua faailoa mai ai lo tatou tutumau i tofotofoga faigatā ma sauāga. O lenā mea ua aumaia ai iā i tatou se faamaoniga manino, e lē mafai ona faatagaina e le Atua le faaumatiaina atoatoa o i tatou, o ana auauna.

Ona e lē gata mai le mana o Ieova ma e mautinoa e taunuu lona finagalo, o lea, o le a ia lē faatagaina ai le faaumatiaina atoatoa o i tatou uma. Pe a faatagaina e le Atua lenā mea e tupu, e foliga mai ai o le a sili atu ona malolosi ona fili iā te Ia, ma e lē mafai ai ona faataunuu lona finagalo e faatumulia le lalolagi i tagata e faamaoni iā te Ia—o ni mea e lē mafai ona tutupu. (Isa. 45:18; 55:10, 11) O le a oo foʻi ina lē toe ofoina atu le auaunaga paia iā Ieova i le lalolagi, pe a lē toe iai nisi e tapuaʻi atu iā te Ia i lotoā faalelalolagi, o lona malumalu sili faaleagaga! O le a leai foʻi nisi e faia aʻe ai le “lalolagi fou”—o tagata amiotonu o ē o le a ola i le lalolagi i lalo o le pulega a le “lagi fou.” (Faaa. 21:1) O le a lē mafai foʻi ona taunuu le Pulega a Keriso i le Afe Tausaga, pe a leai ni tagatānuu.—Faaa. 20:4, 5.

O le a fesiligia le tulaga ma le taʻuleleia o le suafa o le Atua, pe a ia faatagaina ona fili e faaumatia ona tagata uma i le lalolagi. O le faatagaina o lenā mea e tupu o le a avea o se faalumaina i le tulaga o Ieova, i le avea ai o ia o le Pule Silisili Ese aoao. E lē gata i lea, o le a lē faatagaina foʻi e Ieova le faaumatiaina o ana auauna uma, ona o le faamamaluina o Ia lava ma lona suafa paia. Seʻi manatu foʻi: Ona ʻe lē o iā Ieova se faiga lē tonu,’ o le a lē mafai ai la ona ia faataga le faaumatiaina o tagata uma o loo auauna atu iā te ia ma le faamaoni. (Teu. 32:4; Kene. 18:25) E lē gata i lea, o le faataga o le faaumatiaina o ana auauna uma e feteenaʻi ma Ana Afioga e faapea: “E lē tuulafoaʻiina e Ieova lona nuu ona o lona suafa sili.” (1 Samu. 12:22) O le mea moni, “e lē tuulafoaʻiina e Ieova lona nuu, e lē tuua foʻi e ia lona tofi.”—Sala. 94:14.

Maʻeu le faamāfanafanaina o i tatou i le iloaina, e lē faatagaina e Ieova le faaumatiaina atoatoa o ana auauna i le lalolagi. O lea la, seʻi faaauau pea ona faamaonia atu lo tatou faamaoni i le Atua, ma faatuatua i lana folafolaga: “O so o se auupega ua faia e faasagatau iā te oe e lē manuia, ma o so o se laulaufaiva e tetee atu iā te oe i le faamasinoga e te taʻusalaina. O le tofi lenei o auauna a Ieova, ma o la latou amiotonu e mai iā te aʻu.”—Isa. 54:17.

[Faamatalaga faaopoopo i le itulau 22]

E lē faatagaina e le Atua le faaumatiaina atoatoa o ona tagata