Na Faaʻoaina o La Olaga—Pe Mafai Ona E Faia Faapea?

O MARC o se uso i Kanata na faigaluega i se kamupanī e fausia masini lavelave, na faaaogā e pisinisi e iai vaa e ō i le vateatea. Na ia galue faavaitaimi ma avea foʻi o se paeonia sauatoa. Na ofo atu e le pule iā Marc se siitaga o lona tulaga i le galuega e galue ai faasoloatoa, faatasi ai ma se totogi telē. O le ā le mea na faia e Marc?

O Amy o se tuafafine i Filipaina na galue o se paeonia sauatoa a o faauma lana aʻoga. Ina ua uma ona faauu, na ofo atu iā te ia se avanoa e galue ai faasoloatoa lea e manaʻomia ai le tele o lona taimi, ae e telē le totogi. O le ā le filifiliga na faia e Amy?

E eseese filifiliga na faia e Marc ma Amy, ma o iʻuga o a la filifiliga, ua faataʻitaʻia mai ai le poto o le fautuaga na avatu i Kerisiano i Korinito anamua. Na tusi le aposetolo o Paulo: “O i latou o faaaogā mea a le lalolagi, ia peiseaʻī e lē o faaaogāina atoatoa.”—1 Kori. 7:29-31.

Faaaogā Mea a le Lalolagi, ae Lē Faaaogā Atoatoa

A o tatou leʻi iloa le mea na tupu iā Marc ma Amy, seʻi o tatou tilofaʻia puupuu le uiga o le faaupuga “le lalolagi” (po o le koʹsmos i le gagana Eleni), lea na faaaogā e Paulo i lana tusi i tagata Korinito. I lenā faaupuga i le Tusi Paia, e faasino atu le koʹsmos i le faiga o mea a lenei lalolagi po o tagata uma, e aofia ai mea masani o le olaga i aso faisoo e pei o fale, o meaʻai, ma lavalava. * Ina ia maua nei mea manaʻomia i aso taʻitasi, o le toʻatele o i tatou e ao ona iai se galuega. Ioe, e leai se isi a tatou filifiliga e faia ae faaaogā loa mea a le lalolagi ina ia faataunuu ai lo tatou tofiga mai le Tusi Paia, o le saunia lea o mea mo i tatou ma o tatou aiga. (1 Timo. 5:8) Ae i le taimi e tasi, ua tatou iloa “e mavae atu foʻi le lalolagi.” (1 Ioa.  2:17) O lea, e tatou te faaaogā ai mea a le lalolagi e tusa o mea e manaʻomia, ae e lē faaaogā “atoatoa.”—1 Kori. 7:31.

I le uunaʻia i lenā fautuaga mai i le Tusi Paia ina ia faaitiitia i le tele e mafai ai lo latou faaaogāina o mea a le lalolagi, ua toe tilofaʻia ai e le tele o uso ma tuafāfine o latou tulaga, ua faaitiitia taimi e faigaluega ai, ma faafaigofie o latou olaga. O le faia faapea ua latou iloa ai ua faaʻoaina moni o latou olaga, auā ua tele atu le taimi e faaalu ai ma o latou aiga ma le auaunaga iā Ieova. I le ma lea, o le faafaigofie o o latou olaga ua mafai ai ona faaitiitia le faaalu i mea a le lalolagi ae faatele mo Ieova. Pe mafai ona e faia faapea, ia faafaigofie lou olaga ina ia faaauiluma ai manaʻoga o le Malo o le Atua?—Mata. 6:19-24, 33.

“Ua Sili Ona Ma Māfana iā Ieova”

Na utagia e Marc lea na taʻua i le amataga le fautuaga a le Tusi Paia ina ia lē faaaogā atoatoa le lalolagi. Na ia teena se tulaga e siitia ai le totogi lea na ofo atu iā te ia. I nai aso mulimuli ane, na ofo atu e le pule a Marc se isi totogi e sili atu, e tauanau ai o ia e talia le galuega fou. Ua taʻua e Marc: “O se tofotofoga, ae sa ou teena foʻi.” Na ia faamatala le māfuaaga: “Na ma mananaʻo ma laʻu avā o Paula e tuuina atu o ma olaga e auauna ai iā Ieova i le tele e mafai ai. O lea, na ma filifili ai e faafaigofie o ma olaga. Na ma tatalo iā Ieova mo le poto e ausia ai o ma sini, ma faatulaga se aso patino e amata ai ona ma auauna atu iā Ieova i se tulaga e sili atu.”

Ua taʻua e Paula: “Sa ou galue o se failautusi i se falemaʻi mo le tolu aso o le vaiaso, ma maua ai se totogi lelei. Sa ou galue foʻi o se paeonia sauatoa. Peitaʻi i le pei o Marc, sa ou manaʻo ou te auauna iā Ieova i se mea o iai se manaʻoga mo ni tagata e faalauiloa atu le Malo. Ina ua tuuina atu laʻu tusi talosaga e mālōlō mai i le galuega, na taʻu mai e loʻu pule ua ou agavaa mo le tulaga o le failautusi sili, lea faatoʻā tatala le avanoa. O le galuega faafailautusi e pito i sili lea ona maualuga le totogi i le falemaʻi, peitaʻi, na ou pipii pea i laʻu filifiliga e mālōlō mai i le galuega. Ina ua ou taʻu i loʻu pule le māfuaaga o loʻu lē talosaga i lea tulaga, sa ia faamālō mai i loʻu faatuatua.”

E leʻi leva mulimuli ane, na maua e Marc ma Paula ni tofiga e galulue o ni paeonia faapito i se faapotopotoga toʻaitiiti i se vaega maotua o Kanata. O ā iʻuga o lo la siitia ese atu? Ua faapea mai Marc: “Ina ua ou tuua se galuega e mautū lona tulaga tautupe lea na ou galue ai i le toetoe lava o le ʻafa o loʻu olaga, na ou lē mautonu i loʻu lumanaʻi, peitaʻi, na faamanuia e Ieova la ma faiva. Na ma maua le olioli e sili atu lea e maua mai le foaʻi faaleagaga i isi. Na matuā aogā foʻi le galuega faataimi atoa i la ma faaipoipoga. E taulaʻi a ma talanoaga i mea e tāua moni, o mataupu faaleagaga. Ua sili ona ma māfana iā Ieova nai lo le taimi muamua.” (Galu. 20:35) Ua faaopoopo mai Paula: “Pe a e tuua lau galuega ma mea e saogalemu ai a se aiga, ia e faatuatua iā Ieova. Na ma faia faapea, ma na faamanuia i  maʻua e Ieova. Na alofagia ma lagonaina le manaʻomia o i maʻua e uso ma tuafāfine pele o la ma faapotopotoga fou. Ua ou faaaogāina nei le malosi lea na ou faaalu i laʻu galuega e fesoasoani faaleagaga ai i tagata. Ua sili ona ou olioli e galue i lenei tofiga.”

‘Tamaoaiga ae Lē Fiafia’

E ese le ala na filifilia e Amy lea na taʻua i le amataga. Na ia talia se galuega totogi lelei faataimi atoa na ofo atu iā te ia. Ua taʻua e Amy: “Na ou toʻaga i le talaʻiga i le tausaga muamua, ae na faasolosolo mālie ona mou ese atu le taulaʻi o loʻu olaga i mea o le Malo, agaʻi i le galuega. Na ofo mai iā te aʻu ni tulaga e siitia ai laʻu galuega, ma na faaaogā loʻu malosi e agaʻigaʻi atu ai e faalautele laʻu galuega. A o faateleina tiutefai o laʻu galuega, na faasolo foʻi ina faaitiitia loʻu taimi i le talaʻiga. Na iʻu ina ou lē toe talaʻi ai.”

Pe a toe tepa i lenā taimi, ua taʻua e Amy: “Na ou tamaoaiga. Na tele ina ou malaga solo ma olioli i le mamalu na ou maua ona o loʻu tulaga i le galuega. Peitaʻi, ou te leʻi fiafia. E ui ina maua tupe, ae sa tele oʻu faafitauli. Na ou tomānatu po o le ā le mea o loo faalētonu. Mulimuli ane, na ou iloaina o le saʻilia o se galuega i lenei lalolagi, na toetoe lava a ou ‘alu ese ai mai le faatuatua.’ O le iʻuga, e pei lava ona taʻua i le Afioga a le Atua, na ou mafatia ai i le “tele o tigā.””—1 Timo. 6:10.

O le ā le mea na faia e Amy? Ua ia taʻua: “Na ou talosaga atu i toeaina e fesoasoani mai ina ia ou toe mālōlōina faaleagaga ma toe auai i sauniga. Na ou tagi a o usuina se pese i le sauniga. Na ou manatuaina loʻu fiafia na iai a o faia soʻu sao i le seleselega i le taimi o avea o se paeonia mo le lima tausaga, e ui sa ou mativa i le itu faaletino. Na ou iloa ai, ua tatau ona taofi le faamaʻimauina o loʻu taimi e saʻili ai tupe, ae faamuamua manaʻoga o le Malo. Na ou taliaina se tulaga e itiiti sona totogi i le galuega, lea e tusa o le 50 pasene o loʻu totogi ua aveesea ai, ma toe faia se sao i le talaʻiga.” Ua taʻua fiafia e Amy e faapea: “Na ou olioli e galue o se paeonia mo ni nai tausaga. O lenei ua ou lagona le faamalieina lea ou te leʻi mauaina muamua, ina ua faaalu le toetoe lava o loʻu taimi uma e galue ai mo le lalolagi.”

Pe e mafai ona fetuutuunaʻi lou tulaga ma faafaigofie lou olaga? Afai e te faaaogā le taimi e maua ina ia faaauiluma ai manaʻoga o le Malo, o le a faaʻoaina foʻi lou olaga.—Faata. 10:22.

[Faaopoopoga i lalo]

[Faamatalaga faaopoopo i le itulau 19]

Pe e mafai ona fetuutuunaʻi lou tulaga ma faafaigofie lou olaga?

[Pusa/Ata i le itulau 19]

“E Ese Loʻu Fiafia i Ai!”

Na naunau Tavita, o se toeaina Kerisiano i le Iunaite Setete e auai faatasi ma lana avā ma le fanau i le auaunaga faataimi atoa. Na maua sana galuega faavaitaimi i le kamupani na ia faigaluega ai, ma amata galue o se paeonia sauatoa. Pe na faaʻoaina lona olaga i lea suiga? I nai masina mulimuli ane, na tusi ai Tavita i sana uō e faapea: “E leai se isi mea e sili atu e faamalieina ai nai lo le auai atoatoa i le auaunaga iā Ieova faatasi ma le aiga. Na ou manatu atonu e alu sina taimi o oʻu tau faamasani i le avea ma paeonia, ae e ese loʻu fiafia i ai! E matuā faafouina ai lava.”

[Ata i le itulau 18]

Marc ma Paula i le talaʻiga