Skip to content

Skip to table of contents

Lomiga Fou mo Su‘esu‘ega o Le Olomatamata

Lomiga Fou mo Su‘esu‘ega o Le Olomatamata

 Lomiga Fou mo Suʻesuʻega o Le Olomatamata

O LE lomiga o loo e faitauina, o le uluaʻi lomiga lea o lomiga mo suʻesuʻega o Le Olomatamata. Matou te fia faamatala atu vala eseese o lenei lomiga fou.

O lomiga mo suʻesuʻega, ua lomia faapitoa mo Molimau a Ieova, ma tagata o agaʻigaʻi i luma i a latou suʻesuʻega o le Tusi Paia. E faatasi i le masina ona maua lenei lomiga, ma e iai ni mataupu e fā pe lima mo suʻesuʻega. E lomia i le faavaa o le mekasini le faasologa o aso e iloiloina ai nei mataupu mo suʻesuʻega. E lē pei o le lomiga o Le Olomatamata mo tagata lautele, auā e lē fesuisuiaʻi ata o faavaa o le lomiga mo suʻesuʻega, ona e lē ofoina i le galuega talaʻi.

E te maua i le itulau e 2 o le mekasini, se aotelega puupuu e faatatau i le agaga moni o suʻesuʻega, atoa foʻi ma le lisi o isi mataupu faaopoopo. E matuā aogā tele na faamatalaga i uso e faia Suʻesuʻega o Le Olomatamata, a o latou sauniuni e iloilo na mataupu i sauniga a le faapotopotoga.

E te mātauina ua pupuu teisi mataupu mo suʻesuʻega, pe a fua i mataupu i aso ua teʻa. Ona o lea, ua maua ai le taimi e iloilo mau autū, a o faia le Suʻesuʻega o Le Olomatamata. Matou te faalaeiau oe e suʻe uma mau o loo faasino mai o le Tusi Paia i vaiaso taʻitasi. O nisi o na mau ua faailogaina faapenei “faitau,” e tatau ona faitau ma iloiloina a o faia le Suʻesuʻega o Le Olomatamata. E mafai foʻi ona faitau isi mau pe a lava le taimi. O isi mataupu, e iai mau ua faailogaina faapenei “faatusatusa.” E lē o se mea e masani ai le faitauina o na mau a o faia sauniga a le faapotopotoga, auā e lē o lagolagoina tuusaʻo mai ai manatu autū o le palakalafa. Peitaʻi, o mau ua faailogaina “faatusatusa,” o loo iai ni faamatalaga faaopoopo e faaosonaunau, po o isi manatu e lagolago ai le palakalafa. Matou te faalaeiau oe e faitau i na mau a o e sauniuni mo le Suʻesuʻega o Le Olomatamata. Atonu e mafai ona e taʻua na mau i au tali.

E lē toe lomia i Le Olomatamata le lipoti faaletausaga. E amata atu i le 2008, o le a lomia le lipoti faaletausaga i le faaopoopoga o La Tatou Faiva o le Malo, ma a tatou tusi tausaga. Ae e pei ona taʻua i luga, e iai foʻi mataupu faaopoopo i le lomiga mo suʻesuʻega. E ui lava e lē iloiloina nei mataupu i sauniga a le faapotopotoga, ae e faalaeiauina pea oe e faitau lelei i ai. O loo maua ai foʻi taumafa faaleagaga mai le “pologa faamaoni ma le faautauta.”—Mata. 24:45-47.

E tasi lava le ʻauga o le lomiga mo suʻesuʻega o Le Olomatamata, ma le lomiga mo tagata lautele. O nei mekasini e lua, o loo Faasilasilaina le Malo o Ieova. E tutusa lelei palakalafa o loo iai i le itulau e 2 e faamatala ai le fuafuaga o Le Olomatamata. E maua uma nei lomiga e lua i le bound volume i tausaga taʻitasi. E taʻua foʻi manatu mai i lomiga e lua i le mataupu “Pe E te Manatua?” i le lomiga mo suʻesuʻega.

Na amata mai i le 1879 ona faalauiloa pea e Le Olomatamata upu moni o le Malo o le Atua, e ui i taua, o le faalētonu o le tamaoaiga, ma sauāga. Matou te tatalo ina ia faaauau ai faapea lenei lomiga fou, ona o le faamanuia mai a Ieova. Matou te tatalo foʻi, o le a faamanuia Ieova iā te oe le tagata faitau, a o e faaaogā lelei lenei lomiga fou mo suʻesuʻega o Le Olomatamata.