Skip to content

Skip to table of contents

Ta‘uaogāina e Maua le Malo

Ta‘uaogāina e Maua le Malo

 Taʻuaogāina e Maua le Malo

“O le faamaoniga lenei o le faamasinoga tonu a le Atua, ua iʻu ai ina taʻuaogāina outou i le malo o le Atua.”—2 TESA. 1:5.

1, 2. O le ā le finagalo o le Atua e tusa o le faamasinoina o tagata, ma o ai o le a tauaaoina le faamasinoga?

SA IAI le aposetolo o Paulo i Atenai pe tusa ma le 50 T.A. Ona o lona lē fiafia i le vaai atu i le taatele o le ifo i tupua i inā, na māfua ai ona ia molimau atu ma le poto. Na faaiʻu ana upu i se taʻutinoga, lea atonu na faaosofia ai le naunau o tagata faapaupau na faalogologo ane. Na faapea atu Paulo: “Ua . . . faatonuina [e le Atua] tagata uma lava ina ia salamō. Auā ua ia tofia le aso e faamasinoina ai le lalolagi uma i le amiotonu, e le tagata ua ia tofia, ua ia saunia foʻi se faamaoniga mo tagata uma, ona ua ia toe faatūina o ia mai le oti.”—Galu. 17:30, 31.

2 E tāua tele le manatunatu i le mea moni e faapea, ua tofia e le Atua se aso i le lumanaʻi e faamasino ai tagata! E leʻi taʻua e Paulo i lana lauga i Atenai po o ai lē o le a tauaaoina lenā faamasinoga, a ua tatou iloa o le a tauaaoina e Iesu Keriso, o lē ua toe faatūina. O le faamasinoga e faia e Iesu, e iʻu i le ola, po o le oti.

3. Aiseā na osia ai e Ieova se feagaiga ma Aperaamo, ma o ai e tāua tele la latou matafaioi i le faataunuuina o le feagaiga?

3 E 1,000 tausaga le umi o le Aso Faamasino. E taʻimua Iesu i le faamasinoga lea e faia i le suafa o Ieova, auā o ia o le Tupu o le Malo o le Atua. Peitaʻi, e lē na o Iesu e faia le faamasinoga. E filifilia e Ieova nisi mai i tagata, e pule faatasi ma Iesu ma fai ma faamasino i lenā aso, lea e afe tausaga lona umi. (Faatusatusa le Luka 22:29, 30.) Ua toeitiiti atoa le 4,000 tausaga talu ona faataatia e Ieova le faavae o lenā Aso Faamasino, ina ua ia osia se feagaiga ma lana auauna faamaoni o Aperaamo. (Faitau le Kenese 22:17, 18.) Na amata lenā feagaiga i le 1943 T.L.M. Ae e leʻi malamalama atoatoa Aperaamo i mea o le a faataunuu e lenā feagaiga mo tagata. A ua tatou iloa, ona o lenā feagaiga, e tāua tele le matafaioi e faatino e le fanau a Aperaamo i le faataunuuina o le finagalo o le Atua, ina ia faamasinoina tagata.

4, 5. (a) O ai e faaautū i ai le fanau a Aperaamo, ma o le ā lana fetalaiga e uiga i le Malo? (e) O anafea na tatala mai ai le faamoemoe ina ia auai i le Malo o le Atua?

4 O lē e faaautū i ai le fanau a Aperaamo, o Iesu lea, o lē na faauuina i le agaga paia i le 29 T.A., ma avea ai o le Mesia na folafolaina mai, po o le Keriso. (Kala. 3:16) E tolu ma le ʻafa tausaga na talaʻia ai e Iesu le tala lelei o le Malo i le nuu o Iutaia. Ina ua puʻeina Ioane le Papatiso, na faaalia e Iesu e mafai foʻi ona avea isi ma sui o lenā Malo, ina ua fetalai e  faapea: “Talu mai aso o Ioane le Papatiso seʻi oo mai i le taimi nei, ua avea le malo o le lagi ma mea e tausinio i ai tagata, ma ua maua e i latou o ē e tausinio i ai.”—Mata. 11:12.

5 A o leʻi fetalai Iesu e faatatau i le ‘⁠mauaina’ o le Malo o le lagi, na fetalai muamua o ia: “E moni ou te fai atu iā te outou, E leʻi tū mai i ē na fananau mai i fafine sē e sili iā Ioane le Papatiso; a o lē e faatauvaa i le malo o le lagi e sili o ia iā te ia.” (Mata. 11:11) Aiseā? Auā o le faamoemoe ina ia auai i le Malo o le Atua, na faatoʻā tatala mai i tagata faamaoni ina ua liligi mai le agaga paia i le Penetekoso e 33 T.A. E oo ane i lenā taimi, ua maliu Ioane le Papatiso.—Galu. 2:1-4.

Taʻuamiotonuina le Fanau a Aperaamo

6, 7. (a) O le ā le uiga, e avea le fanau a Aperaamo “e pei o fetu o le lagi”? (e) O le ā le faamanuiaga na maua e Aperaamo, ma o le ā se faamanuiaga faapena e maua e lana fanau?

6 Na taʻu atu iā Aperaamo o le a faatoʻateleina lana fanau “e pei o fetu o le lagi,” ma oneone o le matafaga. (Kene. 13:16; 22:17) O lona uiga, a o soifua Aperaamo, e leʻi mafai ona iloa pe e toʻafia i latou o le a iai i lenei fanau. Ae na faaalia mulimuli ane le fuainumera maʻoti o lana fanau faaleagaga. E lē gata e aofia ai Iesu, ae e iai foʻi ma isi e toʻa 144,000 lo latou aofaʻi.—Faaa. 7:4; 14:1.

7 Ua faapea mai le Afioga a le Atua e uiga i le faatuatua o Aperaamo: “Ua . . . faatuatua [Aperaamo] iā Ieova; ma ua ia silasila iā te ia o lē ua amiotonu.” (Kene. 15:5, 6) E moni e leai lava se tagata e atoatoa lona amiotonu. (Iako. 3:2) Ae ona o le malosi o le faatuatua o Aperaamo, na ala ai ona silasila Ieova iā te ia e peiseaʻī e amiotonu o ia, ma na ia taʻua foʻi Aperaamo o lana uō. (Isa. 41:8) O i latou la e aofia ai i le fanau faaleagaga a Aperaamo faatasi ai ma Iesu, ua taʻuamiotonuina foʻi i latou, ma ua sili atu faamanuiaga ua latou maua nai lo o Aperaamo.

8. O ā faamanuiaga ua maua e le fanau a Aperaamo?

8 Ua taʻuamiotonuina Kerisiano faauuina ona o lo latou faatuatua i le taulaga a Iesu. (Roma 3:24, 28) I le silafaga a Ieova, ua magalo a latou agasala ma e mafai ona faauuina i latou i le agaga paia e fai ma atalii faaleagaga o le Atua, o uso o Iesu Keriso. (Ioa. 1:12, 13) Ua latou auai i le feagaiga fou, ma ua fai i latou ma nuu fou, o “le Isaraelu a le Atua.” (Kala. 6:16; Luka 22:20) Maʻeu ni faaeaga ofoofogia! Ona o nei mea ua faia e le Atua mo i latou, e lē faamoemoe ai Kerisiano faauuina e ola e faavavau i le lalolagi. Ua latou tuua lenā faamoemoe ina ia latou matuā olioli ai i le auaufaatasi ma Iesu a o faasolo le Aso Faamasino, ma pule faatasi ai ma ia i le lagi.—Faitau le Roma 8:17.

9, 10. (a) O anafea na amata ai ona faauuina Kerisiano i le agaga paia, ma o ā ni mea o le a oo iā i latou? (e) O ā ni fesoasoani na maua e Kerisiano faauuina?

9 I le Penetekoso 33 T.A., na tuuina mai ai i tagata faamaoni le avanoa e avea ai ma pule faatasi ma Iesu, a o faagasolo le Aso Faamasino. E pe tusa e toʻa 120 soo o Iesu na papatisoina i le agaga paia, ma avea ai i latou ma Kerisiano muamua na faauuina. Ae o se laasaga muamua lenā mo i latou. E amata mai i  lenā taimi, sa tatau ona latou faaalia le faamaoni iā Ieova, e ui i tofotofoga uma o le a tofotofo ai i latou e Satani. Sa tatau ona latou faamaoni seʻia oo i le oti, ina ia mafai ai ona latou maua le pale o le ola i le lagi.—Faaa. 2:10.

10 O le māfuaaga lenā na saunia ai e Ieova apoapoaʻiga ma faalaeiauga mo Kerisiano faauuina, e ala i lana Afioga ma le faapotopotoga Kerisiano. O se faaaʻoaʻoga, na tusi le aposetolo o Paulo i Kerisiano faauuina i Tesalonia: “E pei o se tamā i lana fanau, e faapena foʻi ona matou apoapoaʻi atu pea iā te outou taʻitoʻatasi, ma faamāfanafana atu ma uunaʻia ai outou, ina ia outou savavali e tatau ma le silafaga a le Atua, o lē ua na valaauina outou i lona malo ma lona mamalu.”—1 Tesa. 2:11, 12.

11. O ā faamaumauga na faia e Ieova mo sui o “le Isaraelu a le Atua”?

11 Ina ua mavae tausaga talu ona uma le filifilia o uluaʻi sui o le faapotopotoga o Kerisiano faauuina, na finagalo Ieova e fai se faamaumauga o le faiva a Iesu i le lalolagi, faapea Ana feutagaʻiga ma fautuaga i Kerisiano faauuina o le uluaʻi senituri. O lea la, na faaopoopo ai e Ieova Tusitusiga Eleni i Tusitusiga Eperu na iai i lenā taimi. Na tusia muamua Tusitusiga Eperu mo le nuu o Isaraelu faaletino, a o iai la latou faiā faapitoa ma le Atua. Ae na tusia muamua Tusitusiga Eleni mo “le Isaraelu a le Atua,” o ē ua faauuina e fai ma uso o Keriso ma atalii faaleagaga o le Atua. Ae e lē faapea ai e lē mafai e tagata ese, e lē o ni Isaraelu, ona maua le tele o aogā mai le suʻesuʻeina o Tusitusiga Eperu. E faapena foʻi Kerisiano e lē faauuina i le agaga paia, e tele aogā latou te maua mai le suʻesuʻeina o Tusitusiga Eleni, ma faatatauina fautuaga o loo maua mai ai.—Faitau le 2 Timoteo 3:15-17.

12. O le ā le mea na faamanatu e Paulo i Kerisiano faauuina?

12 Na taʻuamiotonuina ma faauuina i le agaga paia Kerisiano o le uluaʻi senituri, ina ia mafai ai ona maua lo latou tofi faalelagi. E lē faapea ua faauuina i latou e fai ma tupu e pule i o latou uso Kerisiano ua faauuina, a o latou iai pea i le lalolagi. Na galo i nisi o uluaʻi Kerisiano lenā manatu, ma latou saʻili ai tulaga aloaʻia i o latou uso o le faapotopotoga. O le mea lea na fesili ai Paulo: “Po ua faamalieina ea outou? Po ua tamaoaiga ea outou? Po ua avea ea outou ma tupu e aunoa ma i matou? E lelei pe afai ua fai outou ma tupu, ina ia mafai ona tatou pule faatasi o ni tupu.” (1 Kori. 4:8) O lea la, na faamanatu atu e Paulo i Kerisiano faauuina i ona aso: “Matou te lē fia pule i lo outou faatuatua, ae o i matou o le ʻaufaigaluega faatasi ma outou mo lo outou olioli.”—2 Kori. 1:24.

Faaatoa le Numera na Valoia

13. Na faapefea ona faasolo mai le filifilia o ē faauuina ina ua mavae le 33 T.A.?

13 E leʻi filifilia uma i le uluaʻi senituri Kerisiano faauuina e 144,000. Na faaauau le filifilia o i latou a o soifua le ʻauaposetolo, ma e leʻi toʻatele nisi na filifilia i le faagasologa mai o tausaga. Peitaʻi, na faaauau mai lava le filifilia o i latou i senituri mulimuli ane ai, e oo mai lava i aso nei. (Mata. 28:20) Talu ona amata mai le pulega a Iesu i le 1914, e tele lava mea na tutupu.

14, 15. O le ā le mea o loo tupu i o tatou aso e tusa ai ma le filifilia o ē faauuina?

14 Muamua lava, na faamamā e Iesu le lagi ma aveesea ai i latou uma na tetee i le pule a le Atua. (Faitau le Faaaliga 12:10, 12.) Ona taulaʻi mai lea o Iesu i le aoaoina o sui totoe o le pulega a lona Malo ina ia faaatoa ai le numera e 144,000. E oo ane i se vaimea o le 1934-1936, ua toeitiiti lava ona atoa lenā numera, ma o le toʻatele o tagata na tali fiafia i le galuega talaʻi, e leʻi faanaunau e ō i le lagi. E leʻi molimau le agaga faatasi ma i latou e faapea o i latou o atalii o le Atua. (Faatusatusa i le Roma 8:16.) Ae na latou iloa o i latou  o “isi mamoe” o ē e faamoemoe e ola e faavavau i le parataiso i le lalolagi. (Ioa. 10:16) Ina ua mavae le 1935, na taulaʻi le galuega talaʻi i le aoaoina o “se motu o tagata e toʻatele,” o ē na vaaia e le aposetolo o Ioane i le faaaliga, o i latou nei o le a sao mai “le puapuaga tele.”—Faaa. 7:9, 10, 14.

15 E ui i lea, talu mai le 1930, na iai pea nisi na filifilia mo le faamoemoe i le lagi. Aiseā? O nisi o i latou nei, atonu ua latou suia nisi na filifilia muamua, a ua lē faamaoni. (Faatusatusa i le Faaaliga 3:16.) Na taʻua foʻi e Paulo nisi na masani lelei i ai, ae na latou tuua le upu moni. (Fili. 3:17-19) O ai o le a valaauina e Ieova e suia tagata faapena ua lē faamaoni? O le filifiliga lenā a Ieova lava ia. Ae e talafeagai le manatu e faapea, e na te filifilia tagata ua faamaonia lo latou tutumau, e pei o soo na fetalai i ai Iesu ina ua ia faavaeina le Faamanatuga, ae e na te lē filifilia tagata ua faatoʻā ō mai i le upu moni. *Luka 22:28.

16. O le ā e tatou te faafetai ai e faatatau i ē faauuina, ma o le ā e tatou te talitonuina?

16 Peitaʻi, e foliga mai e lē o tagata uma na valaauina mo le faamoemoe i le lagi talu mai le 1930, e suitulaga i ē ua ō ese mai le upu moni. Ua manino mai na faamautinoa e Ieova e iai pea se vaega o Kerisiano faauuina tatou te faatasi i aso e gata ai o le faiga o mea a lenei lalolagi, seʻia oo ina faaumatia “Papelonia Tele.” * (Faaa. 17:5) E mafai ona tatou mautinoa o le a atoa le aofaʻi o sui e 144,000 i le taimi atofaina a Ieova, ma e iai lava le taimi o le a latou pule uma ai i le Malo. E mafai foʻi ona tatou talitonu i le valoaga a le Tusi Paia, o le a faaauau ona faamaoni le motu o tagata e toʻatele, lea ua faatoʻateleina pea lo latou aofaʻi. Ua toeitiiti nei ona latou “sao [lea] mai le puapuaga tele” o le a oo mai i le lalolagi a Satani, ma ulu atu ma le olioli i le lalolagi fou a le Atua.

Toeitiiti Atoa le Pulega o le Malo i le Lagi!

17. O le ā le mea ua tupu i Kerisiano faauuina ua maliliu faamaoni, e tusa ai ma le 1 Tesalonia 4:15-17 ma le Faaaliga 6:9-11?

17 Talu mai le 33 T.A., e faitau sefulu afe Kerisiano faauuina ua faaalia le faatuatua malosi, ma ua tutumau faamaoni e oo i le oti. Ua taʻuaogāina i latou e maua le Malo, ma e aliali mai o le amataga o le faatasi mai o Keriso, na maua ai lo latou taui.—Faitau le 1 Tesalonia 4:15-17; Faaaliga 6:9-11.

18. (a) O le ā le mea ua mautinoa e i latou ua faauuina o loo iai pea i le lalolagi? (e) O le ā le manatu o isi mamoe e faatatau i o latou uso Kerisiano ua faauuina?

18 O i latou e faauuina o loo iai pea i le  lalolagi, ua latou mautinoa, afai e latou te tutumau ma le faamaoni, ua toeitiiti ona maua lea o lo latou taui. Afai e manatunatu le faitau miliona o isi mamoe i le faatuatua o o latou uso faauuina, latou te ioe faatasi ma le aposetolo o Paulo, ina ua ia faapea mai e faatatau i uso faauuina i Tesalonia: “O le mea lea ua matou mitamita ai iā te outou i faapotopotoga a le Atua, ona o lo outou tutumau ma le faatuatua i sauāga uma ma puapuaga o loo outou onosaʻia. O le faamaoniga lenei o le faamasinoga tonu a le Atua, ua iʻu ai ina taʻuaogāina outou i le malo o le Atua, lea o loo outou mafatia ai.” (2 Tesa. 1:3-5) O le taimi lava e maliu ai le sui mulimuli o ē faauuina i le lalolagi, o le taimi foʻi lenā e atoa ai le pulega o le Malo o le Atua i le lagi. O se mea e matuā olioli ai i latou uma o i lagi ma le lalolagi!

[Faaopoopoga i lalo]

^ pala. 15 Tagaʻi i Le Olomatamata o Iulai 1, 1992, itulau e 20, palakalafa e 17.

^ pala. 16 Tagaʻi i le “Fesili mai le ʻAufaitau” i Le Olomatamata o Me 1, 2007.

O le ā Sau Tali?

• O le ā se mea na faailoa mai e le Atua iā Aperaamo lea e fesootaʻi atu i le Aso Faamasino?

• Aiseā na taʻuamiotonuina ai Aperaamo?

• O ā iʻuga e maua e le fanau a Aperaamo ona ua taʻuamiotonuina i latou?

• O le ā le mea ua mautinoa ai Kerisiano uma?

[Fesili mo le Suʻesuʻega]

[Ata i le itulau 20]

Na faalaeiau e Iesu ona soo ina ia tausinio mo le Malo

[Ata i le itulau 21]

Na amata mai i le Penetekoso 33 T.A. ona filifilia e Ieova le vaega lona lua o le fanau a Aperaamo

[Ata i le itulau 23]

E lotofaafetai isi mamoe ona ua latou faatasi ma Kerisiano faauuina i aso e gata ai