Fesili Mai le ʻAufaitau

Na faataga e Ieova le tele o avā a ana auauna Isaraelu anamua, peitaʻi ua faasā i le taimi nei. Pe e fesuisuiaʻi tapulaa a le Atua?

E leʻi suia le finagalo o Ieova e faatatau i le tele o avā. (Salamo 19:7; Malaki 3:6) E leʻi fuafuaina e Ieova mai i le amataga le tele o avā a tagata, ma e leʻi suia lenā faatulagaga e oo mai i le taimi nei. Ina ua foafoaina e Ieova le fafine o Eva e fai ma avā a Atamu, na ia taʻua le tapulaa e faapea, e tasi le avā a le tane. “O le mea lea e tuua ai e le tane lona tamā ma lona tinā, a e faatasi ma lana avā; ona avea ai lea o i laʻua ma tino e tasi.”—Kenese 2:24.

A o soifua Iesu Keriso i le lalolagi, na ia toe taʻua ai le tapulaa lava lenā, e tali atu ai i ē na fesili e uiga i le teteʻa ma le toe faaipoipo atu. Na fetalai o ia: “Tou te leʻi faitaulia ea, o lē na faia tagata i le amataga, na ia faia i laʻua o le tane ma le fafine, na ia fetalai ane foʻi, O le mea lea e tuua ai e le tane o lona tamā ma lona tinā, a e faatasi ma lana avā; ona avea lea o i laʻua o le tino e tasi? O lea e lē toe toʻalua ai, a o le tino e tasi i laʻua.” Ona toe fetalai atu lea o Iesu: “Ai sē faateʻa i lana avā, a o leʻi mulilua ia, ma fai avā i se tasi, ua mulilua ia.” (Mataio 19:4-6, 9) Ua manino ai la, o le tele o avā o le mulilua foʻi lenā.

Aiseā la na faataga ai le tele o avā i aso anamua? Ia manatua, e leʻi faavaeina e Ieova lenei faiga o le tele o avā. O le tagata muamua lava o loo taʻua i le Tusi Paia e lua ana avā, o Lameko lea na tupuga mai iā Kaino. (Kenese 4:19-24) Ina ua aumaia e Ieova le Lolo i aso o Noa, na taʻitasi avā a Noa ma ona atalii e toʻatolu. Na faaumatia i le Lolo i latou uma na tele a latou avā.

Ina ua filifilia e Ieova le fanauga a Isaraelu e avea ma ona tagata i senituri mulimuli ane, e foliga mai na toʻatele tane na taʻitasi a latou avā e ui na iai lava nisi na tele a latou avā. E leʻi faatalitalia e Ieova e faateʻaeseina e na tane, isi a latou avā. Na i lo lea, na puleaina lelei e le Atua lenā faiga.—Esoto 21:10, 11; Teuteronome 21:15-17.

O lenei faiga o le tele o avā, na iai le taimi na muta ai. E mafai ona tatou iloa lenā mea e lē gata i fetalaiga a Iesu i le uluaʻi faatulagaga a Ieova mo le faaipoipoga, ae o faamatalaga na tusiaina foʻi e le aposetolo o Paulo ona o le taʻitaʻiga a le agaga paia. Na fai mai Paulo: “Ia taʻitasi le tane ma lana lava avā, ia taʻitasi foʻi le fafine ma lana lava tane.” (1 Korinito 7:2) Na faagaeeina foʻi Paulo e tusi e faapea o so o se tane lava e tofiaina e fai ma ovasia po o se auauna o le faiva i le faapotopotoga Kerisiano, e tatau ona “faiavā i le fafine e toʻatasi.”—1 Timoteo 3:2, 12; Tito 1:6.

O lea la, ua sili atu nei ma le 2,000 tausaga talu ona muta le onosai o Ieova i le faia o le tele o avā, ina ua faavaeina le faapotopotoga Kerisiano. O le taimi lenā na toe faafoʻisia ai le uluaʻi tapulaa mo le faaipoipoga lea na iai ina ua foafoaina e le Atua le uluaʻi ulugalii i le amataga: e tasi le avā a le tane. O le tapulaa foʻi lenā mo tagata o le Atua i aso nei i le lalolagi aoao.—Mareko 10:11, 12; 1 Korinito 6:9, 10.