Esoto 21:1-36
21 “O iʻuga nei o faamasinoga e te faailoa atu iā i latou:+
2 “Pe afai e te faatauina mai se pologa Eperu,+ e auauna o ia o se pologa mo le ono tausaga, ae i le tausaga lona fitu e tuusaʻoloto ai o ia e aunoa ma se tupe e totogiina.+
3 Pe afai na sau na o ia, e toe alu atu na o ia. Ae afai e iai sana avā, ona ō faatasi lea o ia ma lana avā.
4 Pe afai e avatu e lona matai iā te ia se avā ma ua fanau mai e ia o atalii ma afafine, e toe alu atu na o ia,+ ae tuu lana avā ma lana fanau mo le matai.
5 Ae afai e fai atu ma le maumauaʻi le pologa, ‘Ou te alofa i loʻu matai, o laʻu avā ma oʻu atalii; ou te lē manaʻo ou te saʻoloto,’+
6 ona aumai lea o ia e lona matai i luma o le Atua moni. E na te faatū o ia i tala ane o le faitotoʻa po o le pou o le faitotoʻa, ona tui ai lea o lona taliga i se mea maʻai e lona matai, ma nofo pologa ai o ia i lona matai i lona olaga atoa.
7 “Afai e faatau atu e se tamāloa lona afafine e fai ma pologa, e lē faasaʻolotoina o ia e pei ona faasaʻolotoina o le tane pologa.
8 Afai e lē fiafia lona matai iā te ia, ma e lē manaʻo e avea o ia ma ana palake, ae e tuu e toe faatau atu o ia i se isi tagata, e lē mafai ona ia faatauina atu o ia i tagata ese auā ua ia ‘olegia o ia.
9 Afai ua ia tuuina atu o ia i lona atalii e fai ma ana avā, ia faia o ia e pei o sona afafine.
10 Pe afai e fai se isi ana avā, e lē tatau ona faaitiitia lana tausiga i lana avā muamua i meaʻai, o ofu, ma le mea e tatau ai i le faaipoipoga.*+
11 Ae afai e na te lē faia ia mea e tolu iā te ia, ona saʻoloto ai lea o ia e aunoa ma le totogiina o se tupe.
12 “Pe afai e tā e se tasi se tagata ma oti ai o ia, ia fasiotia lava o ia.+
13 Ae afai e leʻi fuafua o ia e faia faapea, ma ua faataga e le Atua moni lenei mea e tupu, ona ou saunia lea mo oe se nofoaga e mafai ona ia sola i ai.+
14 Peita‘i, afai e matuā ita se tasi i lona tuaoi ma ua ia fasiotia ma le loto i ai o ia,+ ia e aveese o ia ma fasioti e tusa lava po o loo i luma o loʻu fata faitaulaga.+
15 O se tasi e tā i lona tamā ma lona tinā, ia fasiotia lava o ia.+
16 “O se tasi ua ave faamalosia se tagata+ ma faatauina atu o ia, pe maua fo‘i o iā te ia pea lea tagata,+ ia fasiotia lava o ia.+
17 “O lē e faamalaia* i lona tamā ma lona tinā, ia fasiotia lava o ia.+
18 “O le mea lenei e fai pe a femisaaʻi ni tamāloloa ma ua tuʻi* e le tasi le isi pe tu‘i fo‘i i se maa, ae e lē oti o ia ae ua taoto i lona moega:
19 Afai e mafai ona tulaʻi o ia ma fealualuaʻi i fafo i ona tootoo, ona lē faasalaina lea o lē na tu‘iina o ia. E na te avatu le taui mo le taimi ua lē faigaluega ai le tagata ua faamanu‘alia, seʻi toe malosi lelei o ia.
20 “Pe afai e tā e se tasi lana tane pologa po o lana teine pologa i se laau ma ua oti o ia i ona lima, ia faasalaina lava o ia.+
21 Ae afai e ola o ia mo se aso po o ni aso se lua, e lē faasalaina o ia auā na faatauina o ia i tupe a lona matai.
22 “Afai e fetauaʻi ni tamāloloa ma lavea ai se fafine ua tō ma ua faafuaseʻi ai ona fanau o ia*+ ae e lē oti* se tasi, e ao i lē na māfua ai ona totogi le sala e tusa ma le mea e fai mai ai le tane a le fafine iā te ia, ma e ao ona faia e tusa ma le faaiʻuga a faamasino.+
23 Ae afai e oti ai se tasi, e ao ona avatu le ola e sui ai le ola,+
24 o le mata e sui ai le mata, o le nifo e sui ai le nifo, o le lima e sui ai le lima, o le vae e sui ai le vae,+
25 o le mū e sui ai le mū, o le manuʻa e sui ai le manuʻa, o le tā e sui ai le tā.
26 “Afai e tā e se tamāloa le mata o lana tane pologa po o le mata o lana teine pologa ma leaga ai, e ao ona ia tuusaʻoloto o ia e fai ma taui o lona mata.+
27 Afai foʻi e na te tā i lana tane pologa po o lana teine pologa ma paʻū ese ai lona nifo, e ao ona ia tuusaʻoloto o ia e fai ma taui o lona nifo.
28 “Afai e sua e se povi poʻa se tamāloa po o se fafine ma oti ai, e ao ona fetogia lava le povi poʻa i maa ia mate ai,+ ma e lē ʻaina foʻi lona aano, ae e lē faasalaina lē e ana le povi poʻa.
29 Ae afai o le masani lea a le povi poʻa o le taufesua, ma ua lapataʻia lē e ana le povi ae e leʻi leoleoina lelei le manu, ae ua oti ai se tamāloa po o se fafine, ia fetogia lava le povi poʻa i maa ia mate ai ma ia fasiotia lē e ana le povi.
30 Afai e tatau ona ia totogi se togiola,* e ao ona ia avatua le tau o le togiola mo lona ola e tusa ma mea uma ua faatonu atu iā te ia e fai.
31 Ae pe a sua e le povi poʻa se atalii po o se afafine, e ao ona faia i lē e ana le povi e tusa ma lenei iʻuga o faamasinoga.
32 Afai e sua e le povi poʻa se tane pologa po o se teine pologa, ia avatu e ia le tau e 30 sekeli* i le matai o le pologa ma ia fetogia le povi poʻa i maa ia mate ai.
33 “Afai e tuu e se tamāloa se lua e lē ufiufia pe eli se lua ae e lē ufiufia, ma ua paʻū i ai se povi poʻa po o se asini,
34 ia taui atu+ e lē e ana le lua. Ia totogi atu i lē e ana le manu, ae e tuu ma ia le manu ua mate.
35 Afai e lavea le povi poʻa a se tamāloa i le povi poʻa a le isi tamāloa ma mate ai, ona faatau lea o le povi poʻa o loo ola, ma vaelua le tupe e maua mai ai, ma ia vaelua foʻi le povi ua mate.
36 Ae afai ua iloa o le masani lea a le povi poʻa o le taufesua, ae e lē leoleoina lelei e lē e ana le manu, ona taui atu lava lea o le povi poʻa e sui ai le povi poʻa, ae e tuu ma ia le povi mate.
Faamatalaga Pito i Lalo
^ E faasino atu i feusuaʻiga.
^ Po o le “fetuu.”
^ Pe atonu “tā i se meafaigaluega.”
^ Epe., “ma ō mai ai i fafo lana fanau.”
^ Po o le “e lē manuʻa tigāina.”
^ Po o “se tau e laveaʻi ai lona ola.”
